Read Quechua Bolivia DC Bible HAGEO 2 Bible Online

HAGEO 2 - Quechua Bolivia DC Bible bible

HAGEO 2

¹Qanchis kaj killamanta, iskay chunka ujniyoj p'unchaypi, Hageo profetaman Señor ujtawan parlarqa, kamacherqataj willananta, Judapi kamachej Zorobabelman, chanta Josueman, tukuynin runasmantaj: Pikunachus ñaupa templota lliphipiynimpi rikojkunaqa, niychej, imayna rijch'asunkichej kunan tiyapuwanchej chay templo. Ni chhikitampi jap'ikunchu chay ñaupa kajwanqa.

⁴Kallpachakuy, Zorobabel! Jinallataj, qampis kuraj sacerdote Josué, kallpachakuy! Tukuy runakuna, qankunapis kallpachakullaychejtaj. Llank'aychej, noqa qankunawan kashani. Noqa, Tukuy Atiyniyoj Señorqa cheqamanta niykichej.

⁵Imaynatachus Egiptomanta llojsimushajtiykichej, qankunawan tratota ruwarqani, chayman jina Espírituy qankunawan kanqa. Ama manchachikuychejchu.

⁶Pisimantawanqa, janaj pachata, kay pachatawan, mama qochata, sinch'i jallp'atapis kharkatichisaj.

⁷Tukuy nacionesta kharkatichisaj, tukuy nacionestaj tiyapusqanta apamonqanku, temploytaj gloriawan junt'a kanqa. Tukuy Atiyniyoj Señorqa ajinata nin: Qolqepis, qoripis noqajta.

⁹Kay qhepa kaj temploqa aswan sumaj kanqa, ñaupajta karqa chay templomanta nisqaqa. Chaypachataj kaypi runasman sonqo tiyakuyta noqa qosaj. Noqa, Tukuy Atiyniyoj Señor kaytaqa nini.

¹⁰Darío rey kasharqa chay kikin watapi, isq'on killamanta iskay chunka tawayoj p'unchayninman, Señor parlarqa Hageo profetaman, kamacherqataj Tukuy Atiyniyoj Señorpa sutimpi, sacerdotesta tapunanta, imaschus leypi kamachiykuna kashan chay imasmanta.

¹²Sichus uj runa p'achampi Diosman jaywasqa aychata mayt'uspa apaykachanman chayqa, chay p'achaj cantonwantaj llankhanman t'antata, wayk'usqa mikhuyta, vinota, aceiteta, chayri, mayqen ima mikhuyllatapis; chay mikhunasqa ajina llankharisqas kaspa llimphuchasqachu kankuman? Sacerdotestaj kuticherqanku: Mana, nispa.

¹³Chanta profeta Hageoqa ujtawan tapurillarqapuni: Nisunchejman, sichus mayqen runa ch'ichichakunman ayata llankhaykusqanrayku, chanta pay rispa, chay Diosman jaywasqa mikhunasta llankhaykunman chayqa, ch'ichichasqaschu kankuman? Sacerdotestaj, arí, ch'ichichasqas kankuman nerqanku.

¹⁴Chanta nerqa Hageo profetaqa: Ajinatapuni Señorqa nin: Chay jinallataj kay runasqa kanku, tukuy ima ruwasqasninku, tukuy ima jaywasqasninkupis, millay ch'ichis kanku.

¹⁵Kunanmanta ñaupajmanqa kay imaspi yuyaychej, manaraj templo ruwayta qallarishajtiykichej, imaynataj karqankichej? Pillapis iskay chunka carga granosta oqhariyta munajqa, chunkallata oqharerqa. Pitajchus maypichus vino ruwana chayman rispa, phishqa chunka yuruspi vinota junt'arachinampaj, iskay chunka yurusllapi junt'achiyta aterqa.

¹⁷Noqa tukucherqani tukuy llank'asqaykichejta, onqoywan, granizowantaj. Chaywampis qankunaqa mana noqaman kutirimorqankichejchu, noqa Señor nini.

¹⁸Kunan p'unchay, isq'on kaj killamanta, iskay chunka tawayoj p'unchaypi temployqa cimientakun.

¹⁹Qankuna allinta reparakuychej, kunan p'unchaymanta ñaupajman, trojeykichejpi trigoqa manaña pisiyanqachu. Mana poqoshanrajchu uvasqa, ni higospis, ni granado, ni olivopis. Chaywampis kunan p'unchaymantapachaqa bendisisqaykichej.

²⁰Chay kikin p'unchaypi, Señorqa ujtawan Hageota kamacherqa willananta, Judapi kamachej Zorobabelman, kay jinata: Noqa khatatichisaj janaj pachata kay pachatapis.

²²Mundopi atiykunata t'unaykusaj, tiyanasninkutataj urmarachisaj. Urmarachillasajtaj guerraman purina carrosta, chay carrospi purejkunatawan. Caballospis wañullanqankutaj lloq'ajkunasnintin, sapa uj wañonqa hermanompa espadanwan t'ojsisqa.

²³Chay p'unchaypitaj, sirviwajniy Zorobabel, noqaj atiyniyta qosqayki, noqa ajllakorqayki chayrayku. Noqa Tukuy Atiyniyoj Señor, cheqatapuni kaytaqa nini.