Read Quechua Bolivia DC Bible ZACARÍAS 1 Bible Online

ZACARÍAS 1 - Quechua Bolivia DC Bible bible

ZACARÍAS 1

¹Rey Daríoj iskay wata kaj kamachiynimpi, pusaj killampi Señor parlaykorqa Berequías, Idoj allchhin profeta Zacariasman, nispa:

²Noqa Atiyniyoj Señorniykichej sinch'ita phiñakorqani ñaupa tatasniykichejpaj. Chayrayku, kunan Israel aylluman kay jinata willay: Kutirimpuychej noqaman. Noqataj qankunaman kutirimpusaj. Noqa Señorniykichej kayta nini:

⁴Ama ñaupa tatasniykichej jinachu ruwaychej. Paykunaman Diospa ñaupa profetasnin parlarqanku noqaj sutiypi: Saqeychej sajra puriyta t'aqakuychejtaj chay millay ruwaykunamanta, noqa Señor kayta niykichej. Paykunataj mana uyariwarqankutaj nitaj nisqayta kasuwarqankuchu.

⁵Kunanrí, maypitaj chay ñaupa tatasniykichej kashankuri? Diospa profetasnenqa wiñaypajchu kausanqanku?

⁶Chaywampis, tukuy parlasqasniy, kamachisqasniypis ñaupa tatasniykichejkama chayarqanku profetasniynejta. Chayrayku, paykuna kutirikamuwarqanku yachasqankurayku noqa Tukuy Atiyniyoj Señor paykunawan ruwasqayta chay purisqankuman jina, chay ruwasqankuman jinataj.

⁷Noqa Zacarías, Berequiaspa wawan, Idoj allchhintaj, rey Daríoj iskay wata kaj kamachiynimpi, iskay chunka tawayoj diapi chunka ujniyoj kaj Sebat killapi Señormanta uyarerqani kay jinata: Uj ch'isipi mosqoyniypi jina rikorqani uj puka caballopi lloq'asqa runata, uj pampapi arrayanes chaupinejpi sayashajta, qhepannejpitaj puka caballosta, oqe caballosta, chantá yuraj caballosta ima sayashajta.

⁹Chantá tapurerqani: Señor, piskunataj kay caballospi lloq'asqas kajkunari?, nispa. Parlashawarqa chay angeltaj kutichispa niwarqa: Noqa rikuchisqayki pikunachus kasqankuta.

¹⁰Arrayanes chaupinejpi kaj runataj nerqa kay jinata: Kaykunaqa Señorpa kachasnin kanku tukuy jallp'ata muyurinankupaj, nispa.

¹¹Caballospi kajkunataj kuticherqanku chay arrayanes ukhupi kasharqa chay Señorpa angelninman, nispa: Tukuy jallp'antintaña muyurimuyku, tariykutaj ch'inllata, ni ima ch'ajwapis kanchu.

¹²Señorpa angelnin nerqa: Tukuy Atiyniyoj Señor, qanchis chunka watastaña phiñasqa kanki Jerusalempaj, Judá llajtaspajpis. Mayk'ajkamataj paykunamanta mana khuyakunkichuri?, nispa.

¹³Noqaman parlaj chay angelmantaj Señor kuticherqa, sonqochakoj palabraswan, kaytataj Señorpa angelnenqa kamachiwarqa sut'inchanayta, nispa: Kay jinata nin Tukuy Atiyniyoj Señorqa: Noqa sinch'ita munakuni Jerusalenta, Sión orqotapis.

¹⁵Chayrayku sinch'ita k'ajarin phiñakuyneyqa, mana ni imamanta yuyarikojkunaj contrampi, maypachachus pisillataraj phiñakorqani. Chaypachaqa paykunaqa astawan juchawan yapaykukorqanku.

¹⁶Chaywampis, noqa Señorniykichej nini: Khuyayniywan kutiykuni Jerusalenman. Yupaychana wasiy chaypi sayarichisqa kanqa. Jinataj tukuy llajtantin watejmanta jatarichisqas kanqanku.

¹⁷Chantá Señorpa angelnin nillawarqataj kay jinata sut'inchanayta: Tukuy Atiyniyoj Señor nin: Watejmanta llajtasniyta qhapajyachisaj allin kajwantaj junt'achisaj Sionta. Jinamanta watejmanta Jerusalenta uj ajllasqa llajtayta jina rikuchisaj.

¹⁸Ujtawan mosqoypi jina rikullarqanitaj. Chaypachari rikorqani tawa wajrasta.

¹⁹Noqawan parlasharqa chay angelta tapurerqani chay wajras ima niytachus munasqanta. Paytaj kutichiwarqa jinata: Kay wajrasqa niyta munan Judapi tiyakojkunata, Israelpi, Jerusalempi tiyakojkunatataj, tukuynejman ch'eqerachejkunaj atiynin kasqanta.

²⁰Qhepantataj Señor rikuchillawarqataj tawa herrerosta.

²¹Noqataj taporqani: Imamantaj jamunku kay herrerosri?, nispa. Paytaj kutichiwarqa. Kay wajrasqa Judata ch'eqerachejkunaman ninakun, kay ch'eqerachejkunaqa runasta ch'eqeracherqanku umasninkuta ni pi oqhariyta atinankama. Kay herrerosqa jamunku mancharichej kharkatitichej, Judapi tiyakojkunata wajraspa, tukuy llajtasman ch'eqerachejkunaj wajrasninkutapis khuchuraj nispa.