Read Quechua Bolivia DC Bible 1 MACABEOS 1 Bible Online

1 MACABEOS 1 - Quechua Bolivia DC Bible bible

1 MACABEOS 1

¹Filipoj wawan Macedonia llajtayoj Alejandro, Quitim llajtamanta llojsispa, uj maqanakupi atipasqa Dariota, persaspatawan mediospatawan reyninta, cuentanmantataj reyman tukusqa. Ñaupajta Greciamanta rey kasqa.

²Alejandroqa ashkha ch'ajwaspi atipasqa. Tukuynejpi jap'ikapusqa perqachasqa llajtasta. Ashkha reykunatapis wañuchisqa.

³Karu llajtasmampuni yaykusqa. Anchata qhapajchakusqa, ashkha llajtasmanta jap'ikapusqanwan. Chaymanta, pay kamachishajtin mana ni pi oqharikusqañachu. Alejandroj soldadosnin may yupa kasqanku, tukuyninku maqanakupaj wapu wapus. Alejandroj sonqontaj maytapuni jatunyasqa. Kayman jaqayman kachaykukuspa, jap'iykusqa provinciasta, nacionesta ima, reykunasnintinta. Chay reykunataj runasninman tukusqanku.

⁴

⁵Chaymantataj onqoykusqa. Onqoytawantaj, yachasqa wañuy patapiña kasqanta.

⁶Chantaqa, wajyachisqa paywan purej kamachejkunasninta, pikunachus wawas kasqankumantapacha, paywampuni kakoj kasqanku, chaykunata. Manaraj wañupushajtin, Alejandroqa paykunaman reinonta qopusqa.

⁷Alejandroqa chunka iskayniyoj watata kamachisqa. Chaymanta wañupusqa.

⁸Chantá, kamachejkunasnin kamachiyta qallarisqanku, reykunaman tukuspa, sapa uj jallp'ampi.

⁹Alejandro wañupusqanmanta, tukuyninku reykuna kasqanku. Qhepankupitaj, paykunaj wawasninku kamachillasqankutaj. Tukuy paykunaqa ashkha watasta kamachejkuna kasqanku. Tukuynejpitaj llakiy anchatapuni mirasqa.

¹⁰Paykuna ukhupi rikhurimusqa rey Antíocoj wawan, Antíoco Epífanes sutiyoj, chay sajra saphi, pichus unayta presochasqa kasqanmanta Roma llajtapi, kamachiyta qallarisqa pachaj kinsa chunka qanchisniyoj kaj watapi, griegos yupasqankuman jina.

¹¹Chay diaspi wakin sajra sonqoyoj israelitas, runa masisninkuman parlaj kasqanku kay jinata: Uj tratota ruwana muyuyninchejpi kaj nacioneswan. Paykunamanta karunchakusqanchejmantapachaqa, tukuy ima llakiy jamuwarqanchej, nispa.

¹²Paykunamanqa allin rijch'asqa chay nisqankoqa.

¹³Wakinkutaj qhajpacha risqanku reywan tinkukoj. Reyrí licenciata qosqa griegospa costumbresninkuman jina kausanankupaj.

¹⁴Chantaqa, Jerusalén llajtapi pujllana kanchasta ruwasqanku, imaynatachus griegospata tiyapunku ajinata.

¹⁵Paykunaqa qonqapusqanku circuncidasqas kasqankumanta. Ajinamanta, Dioswan tratota ruwasqankuta p'akisqanku. Muyuyninkupi kaj nacioneswantaj ujchakusqanku, sajra kajtataj ruwayta qallarisqanku.

¹⁶Reinompi allinta sayaspaña, Antiocoqa unanchakusqa imaynamantataj atinman Egiptopipis rey kayta, iskaynin nacionespi kamachinampaj.

¹⁷Ajinaqa, Egiptoman yaykusqa ashkha soldadoswan, maqanakupaj allinchasqa carroswan, elefanteswan, caballoswan, ashkha barcoswan ima.

¹⁸Egiptomanta rey Tolomeowan guerrata ruwayta munashajtin, rey Tolomeo paywan maqanakuymanta manchachikushajtintaj, ayqekapusqa. Ashkhastaj kasqanku wañusqaspis.

¹⁹Chantaqa, Antíoco jap'iykusqa Egiptopi perqachasqa llajtasta. Tukuynejpi imatachus tarisqanta apakapullasqataj.

²⁰Egiptota t'unarparichisqanmantapacha, Antiocoqa kutimpusqa pachaj tawa chunka kinsayoj watapi, Israelmantaj kachaykukusqa. Ashkha soldadoswan Jerusalén llajtaman yaykusqa.

²¹Wapuykachaspataj santuarioman yaykusqa. Apakapusqataj qori altarta, candelabrotawan lamparasnintinta. Chaymantataj, tukuy laya cucharasta, t'antasta jaywanapaj mesasta, bateasta, copasta, qori q'osñichinasta, cortinata, pillusta ima. Chantapis, templo punkupi kaj qori warawasta ima. Q'alitutataj phiriykuchisqa. Ajinallatataj, tarisqan qolqetawan qoritawan apakapusqa. Chantaqa, valorniyoj, tarisqan qolqetawan qoritwan apakapusqa. Chantaqa, valorniyoj vasostapis, pakasqa waqaychanastapis.

²²

²³

²⁴Tukuyta suwakapuspa, llajtanman kutiripusqa. Ashkha runasta wañuchisqa. Tukuy nisqampitaj wapuchasqa sonqonta rikhurichisqa.

²⁵Tukuy Israelpi llakiy junt'a kasqa.

²⁶Kamachejkunapis kurajkunapis paran paranta waqaj kasqanku. Sipaskunapis waynaspis mana kallpayoj qhepakusqanku. Warmistaj mana k'achasñachu kasqanku.

²⁷Noviostaj manchayta waqaj kasqanku, noviasninkutaj puñunasninkupi tiyarikusqas, jik'un jik'unta qhaparikoj kasqanku.

²⁸Jallp'aqa ikhakusqa, runasta khuyakuspa. Jacobpa miraynin p'enqaymanta p'achallikusqa.

²⁹Iskay watamantawan, rey kachamusqa Judá llajtasman ejercitompa kuraj kamachejninta, pichus Jerusalenman chayamusqa ashkha soldadoswan impuestosta cobraj.

³⁰Chay puraj uyaqa misk'ita parlaykusqa, runastaj nisqanta creesqanku.

³¹Chantaqa, chay runaqa ujta kachaykukusqa runaspa contrankupi, wañurachispa. Chay kutipi ashkha runas wañusqanku Israel ukhupi. Sinch'i kallpawantaj Jerusalén llajtamwan yaykumusqa. Llajtata ruphaykuchisqa. Wasista t'unarasqa, urmaykuchisqataj muyuynintimpi kaj perqasta. Warmista wawasnintinta presochasqasta apakapusqanku. Jinallatataj uywastapis suwakapusqanku.

³²

³³David llajtataqa watejmanta muyuykuchisqanku jatuchej perqaswan. Alto torrestapis ruwasqanku. Chay llajtata maqanakupaj wakichisqa llajtaman tukuchisqanku.

³⁴Chayman pusasqanku mana judíos kajkunata. Chaymantataj, mana judioschu kayku nejkuna judiostapis. Tukuy chaykunaqa chay ukhupi pakakusqanku.

³⁵Maqanakuna imasta mikhunasta ima chaypi waqaychasqanku. Chaypitaj jallch'asqanku imatachus Jerusalenmanta apakapusqanku chaykunata. Ajinamanta wateqaj kasqanku.

³⁶Santo wasita urmachiyta yuyasqanku. Israel ayllutataj chinkachiyta munallasqankutaj.

³⁷Santo wasinejta mana juchayojpa yawarninta jich'asqanku. Santo wasitataj ch'ichichasqanku.

³⁸Paykunamanta manchachikuspa. Jerusalén llajtapi tiyakojkuna ayqesqanku. Karu llajtayojkunalla Jerusalempi qhepakusqanku. Kikin Jerusalempi nacekojkuna, forasteros jina kasqanku. Chayrayku ripusqanku.

³⁹Santo waseqa raqayman tukusqa. Ch'impacha karqa. Kusirikuna p'unchaykuna llakiyman rukusqanku. Samakuna p'unchaykuna p'enqayman tukusqanku. Llajtaj jatun sutintaj p'enqay sutiman tukusqa.

⁴⁰Jerusalempa sutenqa patapi karqa. Kunanqa urapi kashan. Jatun kaynin llakiyman tukun.

⁴¹Chaypacha rey tukuy reinompi willacherqa paypa kamachisqanta: Tukuy runas uj ayllullaman tukuchunku, nispa.

⁴²Sapa uj costumbresninta saqechun, nispa. Tukuy nacionesqa reypa kamachisqanta kasorqanku.

⁴³Ashkha israelitaspis reypa religionninta jap'erqanku, lantismantaj rikuchikusta jaywarqanku. Chantaqa, samakuna diata mana respetarqankuchu.

⁴⁴Rey kachasninta kachasqa Jerusalenman, tukuy Judea llajtasmampis, tukuyman willanankupaj kamachisqa kasqanta tukuyninku costumbresninkuta saqespa, reypa costumbresninman jina kausanankuta.

⁴⁵Nerqankutaj manaña atikusqanta Santo wasipi Diosman jaywanasta rikuchikustataj jaywayqa, nitaj uywakunatapis ñak'ayqa. Chantaqa, samakuna días, fiestaspis mana karqañachu.

⁴⁶Santo wasipis, tukuy ima santo kajpis, mana respetasqañachu karqa.

⁴⁷Nerqanku ruwanankuta altarkunata, templosta, yupaychana wasistawan, chaypi lantis yupaychasqa kanankupaj. Chantapis, nerqankutaj khuchistawan waj ch'ichi animalkunatawan ñak'anankuta.

⁴⁸Nerqankutaj amaña wawasninkuta circuncidanakuta. Chaymanta ch'ichichakunankutapis mana llimphu imaswan, mana santo imaswan ima.

⁴⁹Ajinamanta, nerqanku Diospa leyninmanta qonqapunankuta. Diospa kamachisqampa cuentanmantataj waj kamachiykunata churarqanku.

⁵⁰Chaymantataj nerqanku pichus mana munanchu reypa nisqanta kasukuyta wañuchisqa kananta.

⁵¹Kay ordenqa tukuy reinoman apachimusqa karqa. Chantaqa, rey tukuynejpi qhawajkunata churarqa. Nerqataj ñak'asqa animalkunata jaywanankuta tukuy Judea llajtaspi.

⁵²Ashkha judíos, Diospa leyninta wasanchaspa, reypa nisqanta kasorqanku.

⁵³Sajra ruwasqasninkuwan cheqamanta kaj israelitasta pakanasman ayqecherqanku.

⁵⁴Quisleu killapi, chunka phishqayoj kaj diapi, pachaj tawa chunka tawayoj watapi, rey jatun juchata tarerqa ruwachisqanrayku lantista yupaychanapaj altarta, maypichus ñaupajta karqa rikuchikusta jaywana altar chaypi. Jinallataj, waj Judea llajtaspipis altaresta ruwacherqa.

⁵⁵Wasi punkuspi callespipis runasqa inciensota q'osñichej kanku.

⁵⁶Diospa leyninmanta qelqasqa librosta ruphaykucherqanku.

⁵⁷Pillatapis tarejtinku Diospa tratonmanta librosniyojta wañuchej kanku, reypa kamachisqanman jina. Ajinallataj, Diospa leyninta respetajkunatapis.

⁵⁸Ajinamanta, killamanta killa chay runasqa kallpankuta rikuchispa, israelitasta ñak'arichej kanku tukuy llajtasninkupi.

⁵⁹Iskay chunka phishqayoj diapi sapa killamanta lantisman rikuchikusta jaywaj kanku chay altarpi, Diosman rikuchikusta jaywana altar patapi.

⁶⁰Chay ordenman jina wañucherqanku warmista, wawasninkuta circuncidacherqanku chaykunata.

⁶¹Paykunata wañucherqanku wawasnin q'epirisqasta. Familiasninkutapis wañucherqanku, circuncisionta ruwajkunatawan.

⁶²Chaywampis, ashkha israelitasqa manapuni munarqankuchu ch'ichi mikhunasta mikhuyta.

⁶³Chayta ruwaymantaqa astawan wañuyta munarqanku. Manapuni munarqankuchu ch'ichichakuyta chay mikhunasta mikhuspa, Dioswan tratota ruwasqankuta p'akispataj. Chayrayku, wañuchisqas karqanku.

⁶⁴Chay p'unchaykunapeqa sinch'i llakiy karqa israelitaspaj.