Read Quechua Bolivia DC Bible 1 MACABEOS 10 Bible Online

1 MACABEOS 10 - Quechua Bolivia DC Bible bible

1 MACABEOS 10

¹Pachaj sojta chunkayoj watapitaj, Antíocoj wawan Alejandro, Epífanes nisqa, wicharispa jap'ikapusqa Tolemaida llajtata. Llajtayojkunataj payta reyninkupaj jap'ikusqanku.

²Rey Demetriotaj chayta yachaspa, ashkha soldadosta tantamuytawan, llojsisqa Alejandrota taripaj.

³Chantá Demetrioqa Jonatanman apachimusqa uj cartata misk'i palabrasniyojta, payta manchayta jatunyachispa.

⁴Nisqa ari Demetrioqa sonqompi: Allinyakamunaña judioswan, ama Alejandrowan allinyakumunankupaj contranchejpi.

⁵Yuyarikushanchá tukuy sajra kajmanta imatachus ruwarqanchej paypaj, wauqesnimpaj, ayllumpaj ima.

⁶Atiytataj qosqa Jonatanman mask'akunampaj soldadostapis maqanaku armastapis. Chaymanta nisqa kacharinankuta presochasqas kasharqanku chaykunata. Ajinamanta Jonatanqa Demetrioj masinman tukun maqanakupaj.

⁷Jonatantaj chaypacha risqa Jerusalén llajtaman, chaypitaj Demetrioj cartanta leesqa tukuy runaspa ñaupaqenkupi, jark'anapi kasharqanku chaykunaj ñaupaqenkupipis.

⁸Jark'anapi kajkunataj sinch'ita mancharikusqanku, uyarispa reyqa Jonatanman atiyta qosqanta ashkha soldadosta tantamunampaj.

⁹Jark'anapi kajkunaqa presochasqasta qopusqanku Jonatanman. Jonatantaj tatasninkuman kachamusqa.

¹⁰Chaymanta, Jonatanqa tiyakusqa Jerusalempi. Chaymanta qallarisqa wasista oqhariyta sumajyachiytataj Jerusalempi.

¹¹Nisqataj Jonatán maestrosman perqasta ruwanankuta Jerusalempa muyuynintimpi, Sión orqoj muyuynintimpi ima, sumaj ch'eqosqa rumiswan.

¹²Karu llajtayojkunataj, jark'anaspi kasharqanku chaykuna, Báquides ruwachisqan chaypi, ayqerparikapusqanku.

¹³Sapa ujninku, ayqespa, llajtasninkuman ripusqanku.

¹⁴Bet-Surllapi qhepakusqanku wakin qonqapojkunamanta Diospa leynintapis, kamachisqasnintapis. Chay llajtaqa paykunapaj karqa pakakuna llajta.

¹⁵Rey Alejandrotaj uyarisqa parlajta promesasmanta Demetrio ruwarqa Jonatanman chaykunamanta. Payman willallasqankutaj Jonatampa maqanakusninmanta, wapu runa kasqanmanta ima. Ajinallatataj wauqesninmantapis parlasqanku. Chantapis, willasqanku Jonatanta llakichisqankumanta.

¹⁶Chayta yachaspa nisqa Alejandroqa: Tarisunmanchu waj runata payman rijch'akojta? Kunanqa payta amigonchejman tukuchina. Ladonchejman pasachimuna paytaqa, nispa.

¹⁷Chantaqa, Jonatanman uj cartata apachimusqa kay jinata:

¹⁸Rey Alejandro wauqen Jonatanta napaykun.

¹⁹Noqayku yachayku kallpayoj runa kasqaykita. Rijch'awaykutaj amigoyku kanaykipaj jina kasqaykita.

²⁰Kunantaj qantaqa ajllayku aylluykej kuraj sacerdoten kanaykipaj. Qantaqa sutichasonqanku: Reypa amigon, nispa. Qanqa imatachus noqaykojta qhawaykipuni tiyan. Noqaykoj amigoykupuni kay, nispa. Chantapis Alejandroqa kachamusqa Jonatanman uj k'acha puka kulli p'achata uj qori pillutawan.

²¹Qanchis kaj killapitaj pachaj sojta chunka kaj watamanta, ch'ujllas fiestapi, Jonatanqa churakusqa sacerdote p'achasta. Chantá, soldadosta tantakamusqa, imaymana laya maqanaku armastapis ruwachisqa.

²²Demetriotaj tukuy chaykunata yachaspa, mayta llakikuspa nisqa: Imanaspataj atipachikunchej Alejandrowan, kay jinamanta judíos payman k'askamunankupaj yanapanankupajtaj?

²³

²⁴Noqapis escribimullasajtaj paykunaman misk'i palabrasta. Prometeykusaj cargostapis regalostapis. Ichapis noqaman k'askamuwanqanku.

²⁵Chantaqa, kay cartata paykunaman apachimusqa:

²⁶Rey Demetrio judío aylluta napaykun. Jatun kusikuywan yachayku qankunaqa waqaychasqaykichejtapuni chay trato noqawan qankunawan ruwasqanchejta. Willawaykutaj qankunaqa mana pasakapusqaykichejta enemigosniyman, manachayqa noqawampuni kasqaykichejta.

²⁷Kunanqa, sonqoykichejta noqaykupi churallaychejpuni. Noqaykutaj sumaj kajta qopusqayku, noqaykupaj ruwasqaykichejmanta.

²⁸Amaña impuestosta qowankichejchu. Chantapis, imaymana laya regalostapis qosqaykichej.

²⁹Chayrayku, kunan noqaqa, qankunatapis tukuy judiostapis libraykichej kachi impuestomanta, qori impuestomantawan, imatachus reyman qonaykichej karqa chaymanta.

³⁰Kunanmantapacha wiñayman, noqaqa mana jap'ikusajñachu grano oqhariymanta kinsa kaj khuskanta, manataj jap'ikusajñachu sach'a poqoymanta khuskanta, imatachus kunankama jap'ikoj kani chayta. Kunanmantapacha wiñaypaj, mana chayta jap'ikusajñachu Judeamanta, nitaj chay kinsa suyumanta, mayqenkunachus karqanku Samariamanta Galileamantataj, kunan Judeamanta kanku, chaykunamanta.

³¹Jerusalén llajtaqa muyuynintimpi kaj jallp'aswantaj, santo jallp'aman tukuchun. Chay jawataj libre kachun chunka t'aqa qonamanta impuestosmantawan.

³²Chantapis, saqellanitaj atiyniyta imatachus kapuwarqa Jerusalén jark'anapi, qopunitaj kuraj sacerdoteman. Paypuni ajllakuchun runasta chay jark'anata qhawanankupaj.

³³Chantaqa, ordenta qoshani tukuy judíos pikunachus apasqas karqanku Judeamanta waj cheqasman reinoypi, kacharichisqas kanankupaj, mana ni imata pagaspa. Ajinallataj, libres kachunku impuestosta paganamanta, uywasninkumanta pagananku karqa chaymantapis.

³⁴Chaymanta, nillanitaj feriado kananta tukuy fiesta días, samarina días, mosoj killas, waj señalasqa fiestas ima. Chay feriadoqa kanan tiyan kinsa día ñaupajta, kinsa diataj qhepanta. Chay diaspeqa mana paganankuchu tiyan impuestosta nitaj imallatapis ruwanankuchu tiyan mandasqa kashan reinoypi tiyakoj judiosman chaykunamanta.

³⁵Mana ni pi atiyniyojchu qolqeta mañakunampaj judiosmanta, nitaj llakichinampaj judiosta imallamantapis.

³⁶Judío soldadosqa kinsa chunka waranqalla kananku tiyan. Paykunamantaj pagakonqa imaynatachus pagakun tukuy reypa soldadosninman, jinallatataj.

³⁷Reypa jark'anasnimpipis kanan tiyan judíos. Wakin judíos wajyasqas kanqanku kamachejkunaman tukunankupaj reinopi. Judiospa kamachejkunasninku judiosllataj kananku tiyan. Tukuy paykunaqa judíos leyman jina kausananku tiyan. Reyqa chayta kamachin tukuy Judea llajtapaj.

³⁸Chantaqa, chay kinsa suyus, Samariamanta t'aqasqas karqanku chaykuna, Judeaman k'askasqas kachunku. Tukuy chaypi uj runalla kamachichun. Chayrayku, tukuy runasqa kuraj sacerdotellata kasuchunku.

³⁹Chantá, Tolemaida llajtata muyuynintimpi kaj jallp'astawan, Jerusalén santo temploman qopuni, chay jallp'asmanta orqhosqa kanampaj imatachus necesitakun templopaj chayta.

⁴⁰Chantá, noqapaj jap'ikusqay impuesto qolqemanta, sapa watata temploman chayachimusaj pachaj sojta chunka phishqayoj kilo qolqeta. Chaytaj orqhomunanku tiyan ajllakusqanku lugarkunamanta.

⁴¹Chaymantataj, gobiernoj qolqenmanta imallapis puchojtin, autoridadesqa chayta qonanku tiyan templomanta trabajospaj.

⁴²Sapa wata, temploman yaykusqan qolqemantaqa, ñaupajta jap'ikapoj kayku phishqa chunka phishqayoj kilo qolqeta. Kunanqa, chay qolqeqa qopusqa kanqa sacerdotesman.

⁴³Pillapis manuyoj kajtin reymampis, mayqen runallamampis, ayqespa pakakun chayqa templopichus, temploman k'askasqas waj cheqaspichus, mana ni ima nasqachu kanan tiyan, nitaj reinopi kashan paypa kapuynimpis.

⁴⁴Imallapis wasichakunan kajtin templopi, imallapis sumajyachikunan kajtin, reypa qolqenwan pagakonqa.

⁴⁵Chaymantataj, Jerusalempi muyuynintimpipis oqharina kajtin perqas, sumajyachina kajtimpis, jinallataj tukuy Judea jallp'api, chay trabajosqa pagakonqa reypa qolqenwan.

⁴⁶Chay reypa nisqanta uyarispa, nitaj Jonatán nitaj tukuy runaspis creesqankuchu. Manataj sonqonkupi jap'ikusqankuchu palabrasnintaqa. Tukuyninku yuyarikusqanku ari imaynatachus rey Demetrioqa Israel aylluta llakichisqanta. Anchatapuni llakicherqa ari Demetrioqa israelitasta.

⁴⁷Chayraykoqa Alejandrollaman k'askaykukorqanku. Paymin tukuy reykunamanta aswan ñaupajta israelitasta parlarikorqa k'acha sonqowan. Judiosqa Alejandrollawampuni karqanku, tukuy paypa kausaynimpi.

⁴⁸Rey Alejandrotaj ashkha soldadosta tantaykusqa, risqataj paykunawan khuska Demetriowan tinkunakoj.

⁴⁹Iskaynin reykuna ch'ajwapi tinkunakusqanku. Chaymanta, Demetrioj runasnin ayqerparikapusqanku. Alejandrotaj kachaykukusqa Demetriota mask'aj. Alejandroj soldadosnin atipasqanku.

⁵⁰Alejandroj soldadosnin inti yaykupunankama maqanakupi kashasqanku. Demetriotaj chay diapi wañusqa.

⁵¹Chaymantataj, Alejandroqa kurajkunata kachamusqa Egiptoman, rey Tolomeojpaman, kay jinata nichimuspa: Noqaqa kutimpuni reinoyman. Tiyakushanitaj kunanqa ñaupa tatasniypa tiyanankupi. Demetriota atipasqaymantapacha atiyniyojña kani, tukuynin jallp'aykupitaj kamachishani.

⁵²

⁵³Demetriowan tinkunakorqayku. Paytaj runasninwan khuska atipachikorqanku. Noqataj, chaymanta, rey tiyanayta watejmanta jap'ikapuni.

⁵⁴Kunanqa, iskayninchej allinyakampuna. Ususiykita warmiypaj qopuway. Tolqayki kasaj. Qanmampis ususiykimampis maychus kaj regalosta qosqaykichej.

⁵⁵Rey Tolomeotaj kay jinata kutichimusqa: Kusiy chay p'unchay mayqempichus ñaupa tatasniykej jallp'ankuman kutimpunki rey tiyanaykipi tiyakoj.

⁵⁶Kunantaj, nichiwasqaykiman jina ruwasaj. Jinapis, jamuy Tolemaidaman noqata taripawaj rejsinakunanchejpaj. Chaymanta tolqayman tukullanki, mañakusqaykiman jina.

⁵⁷Pachaj sojta chunka iskayniyoj kaj watapitaj Tolomeoqa Cleopatra ususinwan khuska, Egiptomanta llojsispa, Tolemaidaman chayasqanku.

⁵⁸Rey Alejandrotaj chaypi watukusqa Tolomeota. Tolomeotaj qopusqa ususin Cleopatrata warmimpaj. Alejandrowan Cleopatrawan casarakusqanku Tolemaidapi, jatun fiestata ruwaspa, imaynatachus reykuna ruwanku ajinata.

⁵⁹Alejandroqa Jonatanta nichimusqa jamunanta paywan tinkukoj.

⁶⁰Jonatantaj, may k'achanchasqa, ashkha runaswantaj khuska, Tolemaida llajtaman chayamusqa. Chaypi watukusqa iskaynin reykunata. Qosqataj paykunaman, amigosninkumampis qolqetawan qoritawan, wajkunata ima. Ajinamanta, allin ñawiwan payta qhawasqanku tukuyninku.

⁶¹Jonatanta chajnikuspa, ujllapi tantakusqanku Diosta wasanchaj millay israelitas, Diospa leyninta p'akejkuna. Chaykunaqa Jonatanta ch'ataykusqanku. Reytaj mana uyarisqachu paykunata.

⁶²Reyqa nisqa Jonatanta p'achasninta lluch'ukunanta, churakunantataj k'acha kulli p'achasta. Jonatantaj ajinata ruwasqa.

⁶³Chantaqa, rey tiyaykuchisqa Jonatanta paypa ladompi, nisqataj kuraj kaj runasninman: Jonatanta pusamuychej plazaman. Chaypitaj qhaparinkichej mana ni pi payta tumpananta ni imallamantapis, nitaj ni imanaspapis llakichinankuta.

⁶⁴Jonatanta ch'atashajkunataj rikusqanku payta may k'achanchasqata k'acha kulli p'achaswan. Uyarispataj imatachus paymanta qhaparisqankuta, tukuyninku ayqerikapusqanku.

⁶⁵Chaymantataj reyqa aswan pataman payta oqharichispa, ñaupaj kaj kausaqesninwan khuska churaykuchisqa. Chantaqa payta tukuchisqa jatun kamachejman, soldadostapis tukuy runastapis kamachimunampaj.

⁶⁶Chantaqa, Jonatán kutimpusqa Jerusalenman, may kusisqa allinta qhawasqankumanta.

⁶⁷Pachaj sojta phishqayoj kaj watapi, Demetrioj wawan Demetrio, Cretamanta llojsispa, kutimpusqa ñaupa tatasninkoj jallp'ankuman.

⁶⁸Chayta uyarispataj Rey Alejandroqa mayta phutikusqa. Chayta uyariytawantaj, Antioquía llajtaman kutimpusqa.

⁶⁹Demetriotaj Apoloniota wajyasqa Celesiriapi kamachej kanampaj. Apoloniotaj ashkha soldadosta tantamuspa kachaykukullasqa. Soldadosninwantaj sayasqa Jamnia chaynejpi. Chantaqa, Jamniamanta jatun sacerdote Jonatanman nichimusqa kay jinata: Qan sapallayki noqaykoj contraykupi sayarishanki. Qanrayku noqaqa runasta asirichishani, p'enqaypitaj rikhurishani. Imaraykutaj atiyniykita orqospi rikuchishanki noqaj contraypi?

⁷⁰

⁷¹Kunanqa, sichus yuyashanki soldadosniyki may kallpayoj kasqankuta, uraykamullay pampasman noqaykuwan tinkunakoj. Chaypitaj yachasunchej mayqenchus aswan kallpayoj kasqanchejta. Kay llajtasmanta runasqa noqawan khuska kashanku.

⁷²Allinta tapukuy yacharqoytaj pichus noqa kasqayta. Chantapis, pikunachus kanku noqaykuta yanapajkunapis. Chaykunaqa nishanku qankunamanta: Paykunaqa manapuni atenqankuchu ñaupaqenchejpi sayayta. Iskay kutitaña ari paykunaj ñaupa tatasninku atipachikorqanku kikin jallp'ankupi.

⁷³Kunantaj, qanqa manapuni atiwajchu jark'ayta caballosta, chay chhika soldadostapis pampapi, maypichus mana kanchu rumispis, qaqaspis, nitaj uj cheqallapis, maymanchus riyta atiwaj pakakoj.

⁷⁴Jonatantaj, uyariytawan imatachus Apolonioqa payman willaykuchisqanta, ujta phiñaykukusqa. Chaypacha ajllakusqa chunka waranqa runasta. Paykunawantaj llojsisqa Jerusalenmanta. Chantaqa, paypata wauqen Simonqa chayamullasqataj Jonatanta yanapaj.

⁷⁵Jonatanqa jarakusqa Jope chaynejpi. Jope llajtayojkunataj wisq'aykusqanku llajta punkusta, imaraykuchus llajta ukhupi kasqanku Apolonioj soldadosnin. Chanta, judiosqa chay llajtayojkunaman maqanakuyta qallarisqanku.

⁷⁶Chaymantataj, chay Jope llajtayojkuna, manchachikuspa, llajta punkusta kicharparisqanku. Jonatantaj yaykuspa, dueñochakusqa llajtamanta.

⁷⁷Apoloniotaj chayta yachaspa, wakichisqa kinsa waranqa caballosniyoj soldadosta, may chhika chakipi purejkunatapis. Chantaqa, paykunawan khuska Azotoman risqa. Azotoman rej jinalla, pampasman chayaytawankama, soldadosninta kayman jaqayman ch'eqerachisqa. Yuyasharqa ari caballosnin may chhika kasqankuta, atipanankupaj jina.

⁷⁸Jonatampis Azotoman kachaykukullasqataj, Apoloniota qhatispa. Chaynejpi iskayninku tinkunakusqanku maqanakupi.

⁷⁹Apolonioqa wasampi saqesqa waranqa caballoyojkunata pakayllapi.

⁸⁰Yachasqa Jonatanqa paypa wasampi chay soldados pakasqas kasqankuta. Chantaqa, ujta Jonatampa runasnenqa rikusqanku muyuyninkupi tukuynejmanta Apolonioj soldadosnin rikhurimushasqankuta. Apolonioj runasnenqa wach'inasta wijch'uykusqanku Jonatampa runasninman paqarinmanta ch'isiyaykama.

⁸¹Jonatampa runasnenqa allinta sayasqanku, imaynatachus Jonatán nisqa, ajinata. Enemigospa caballosnintaj sayk'usqanku.

⁸²Simontaj runasninta llojsichimuspa, kachaykukusqa enemigosninkuta mask'aj. Paykunaj caballosninku sayk'usqasña kasqanku ari. Simompa runasnin atipaykusqanku enemigonninkuta. Chaykunataj ayqerikapusqanku.

⁸³Caballojkuna ch'eqerakusqanku pampapi. Ayqespataj, chayasqanku Azoto llajtaman. Azoto llajtaman chayaspataj, lantinkoj Dagompa templonman pakakoj yaykusqanku, salvakunankupaj.

⁸⁴Jonatantaj ruphaykuchisqa Azoto llajtata, muyuynintimpi kaj ranchostapis. Tukuy ima tarisqantapis apakapusqa. Ruphaykuchillasqataj Dagón templota, chay ukhupi kaj runastapis.

⁸⁵Espadawan wañuchisqaswan, ruphaykuchisqaswanqa karqanku pusaj waranqa runas.

⁸⁶Chaymanta, chay cheqamanta ripuytawantaj, Jonatanqa chayamusqa Ascalonman. Chaynejpitaj jarakusqa. Chay llajtayojkunataj llojsisqanku payta taripaj fiestata ruwaspa.

⁸⁷Chaymanta, Jonatanqa runasninwan khuska Jerusalenman kutimpusqanku, apakapuspa imatachus oqharikusqanku chayta. Chay apakapusqanqoqa ashkha kasqa.

⁸⁸Rey Alejandroqa, tukuy chaykunata yachaspa, nisqa astawan Jonatanta jatunyachinankuta.

⁸⁹Chantaqa, Jonatanman apachimusqa uj qori tuputa, reypa ayllusninman qoyta yachanku chaykunamanta. Chaymantataj, qosqa Jonatanman Ecrón llajtata jallp'asnintinta.