Read Quechua Bolivia DC Bible 1 MACABEOS 11 Bible Online

1 MACABEOS 11 - Quechua Bolivia DC Bible bible

1 MACABEOS 11

¹Egiptomanta reyqa tantamusqa ashkha soldadosta, imaynatachus t'iyu kashan qocha playapi, ajinata. Chantaqa wakichisqa ashkha barcostapis. Pay munashasqa ch'aukiyaspa rey Alejandroj jallp'asninta jap'ikapuyta, astawan yapaykunampaj reinonman.

²Egiptomanta reyqa chayamusqa Siriaman k'acha palabrasta nispa. Chayta uyarispa, tukuynejpi llajtayojkuna kicharej kasqanku llajta punkusta yaykumunampaj, llojsisqankutaj payta taripaj. Rey Alejandro nisqa chaytapuni ruwanankuta, Egiptomanta reypa tolqan kasqanrayku.

³Tolomeotaj sapa llajtapi saqesqa t'aqa soldadosta.

⁴Azoto llajtapi kashajtin, Tolomeoman rikuchisqanku Dagón templota ruphaykuchisqata. Rikusqa Azotota, muyuynintimpi kaj ranchostapis q'ala t'unasqasta. Kaypi jaqaypi rikusqa ayastapis, ruphaykuchisqa tullustapis, Jonatán wañuchisqa chaykunamanta. Tulluswan qollusta ruwasqanku ari tukuy ñampi Tolomeo rikunampaj.

⁵Willasqankutaj reyman Jonatán chayta ruwasqanta, reyqa paypaj phiñakunampaj. Reytaj mana ni imata nisqachu.

⁶Jopepi Jonatán llojsisqa reyta taripaj fiestata ruwaspa. Chaypitaj napaykunakusqanku. Iskayninkutaj chay ch'isipi chay llajtapi puñukusqanku.

⁷Jonatanqa rey Tolomeowan khuska risqa Eleutero mayukama. Chaymanta Jerusalenman kutimpullasqa.

⁸Rey Tolomeoqa jap'ikapusqa llajtasta jatun qocha chimpaspi kasharqanku chaykunata, Seleucia Qocha nisqa chay llajtakama. Rey Tolomeotaj sajra imasta sonqompi wakichishasqa rey Alejandropaj.

⁹Chantaqa, rey Tolomeo kachamusqa kurajkunata rey Demetriojpaman nichimuspa: Jamuy, qanwan noqawan uj tratota ruwasunchej. Warmiykipaj qosqayki noqaj ususiyta, pichus kunan rey Alejandrowan casarasqa kashan chayta. Qantaj tataykej reinompi rey jina sayanki.

¹⁰Sonqoy nanawan payman ususiyta qosqaymanta. Payqa wañuchiwayta munashan ari.

¹¹Chayta nisharqa Tolomeoqa munapayashasqanrayku Alejandroj reinonta.

¹²Chaymantataj, Tolomeoqa wajyachimuspa ususinta qopusqa Demetrioman. Tolomeowan Alejandrowan phiñanakusqanku. Chay phiñanakusqankutaj sut'ita rikhurisqa.

¹³Chantaqa, Tolomeo yaykusqa Antioquiaman. Churaykukusqa nin pilluta Asiamanta rey jina. Ajinamantaqa, iskay pilluta umanman churaykukusqa: Ujninta Egiptomanta, ujnintataj Asiamanta.

¹⁴Chaypacha Rey Alejandroqa kashasqa Ciliciapi. Chay llajtayojkuna oqharikushasqanku ari.

¹⁵Alejandroqa, yachaytawan imachus pasasqanta, chaypacha maqanakupaj wakichikusqa. Tolomeotaj kachaykukullasqataj Alejandrota taripaj. May kallpachasqa rikhurimuspataj, Alejandrota ayqerparichisqa.

¹⁶Alejandrotaj Arabiaman ripusqa chaypi pakakoj. Rey Tolomeotaj libreta atipasqa Alejandrota.

¹⁷Chaymantataj, Arabia llajtayoj Sabdielqa Alejandroj umanta qholurparichimusqa, apachisqataj Tolomeoman.

¹⁸Chantaqa, kinsa diamanta rey Tolomeopis wañupullasqataj. Jark'ana wasispi soldadosnintataj, chay cheqapi tiyakoj runas wañurachisqanku.

¹⁹Ajinamanta, Demetrioqa reyman tukun pachaj sojta chunka qanchisniyoj kaj watapi.

²⁰Chaypacha Jonatanqa tantachimusqa Judá llajtayojkunata yaykuyta munaspa Jerusalenman, chaypi jark'ana wasita jap'ikapuyta munaspa. Chayman ashkha maqanaku maquinastapis apasqanku.

²¹Chantaqa, uj runasqa, llajta masisninkuta chejnikojkuna, Diospa leyninta p'akejkuna, risqanku reyman willaj Jonatán jark'ana wasita jap'ikapuyta munashasqanta.

²²Chayta uyarispa Demetrioqa mayta phiñakusqa. Chaypachallataj kutimpusqa Tolemaidaman. Escribisqataj Jonatanman nispa amaña chay jark'ana wasita jap'inanta. Nisqataj qhajpacha Tolemaidaman rinanta paywan tinkukoj.

²³Chayta yachaytawantaj Jonatanqa nisqa runasninman chay jark'ana wasita jap'ikunankutapuni. Chantaqa, ajllasqa israelita kurajkunatawan sacerdotestawan. Paykunawan khuska rillasqataj mana manchachikuspa.

²⁴Apaspataj qolqetawan qoritawan, p'achastawan, wajkunatawan ashkhata, risqa reypaman Tolemaidaman. Reytaj k'acha sonqowan payta recibisqa.

²⁵Wakin mana creejkuna llajta masisnintaj payta tumpaykusqanku.

²⁶Reytaj qhawasqa Jonatanta imaynatachus ñaupa reykuna qhawarqanku, ajinallatataj. Churarqataj payta tukuy amigosninmanta aswan patapi.

²⁷Chaymantataj, nisqa kakunallantapuni jatun sacerdote jina, nitaj qhechupusqachu waj cargosninta, ñaupajta qosqanku chaykunata. Chantapis, paytaqa amigosnin ukhupi aswan patapipuni churasqa.

²⁸Chaymantataj, Jonatanqa reymanta mañakusqa amaña impuesto qolqeta mañakunanta Judeamantawan, kinsa Samaria provinciasmantawan. Nisqataj paymin reyman jaywananta isq'on waranqa isq'on pachajniyoj kilo qolqeta.

²⁹Reymanqa allin rijch'asqa Jonatampa nisqan. Reyqa uj cartata apachimusqa Jonatanman tukuy chaykunmanta. Ajina kasqa chay cartanqa:

³⁰Rey Demetrio napaykun wauqen Jonatantawan, tukuy judío runastawan.

³¹Uj cartata apachimorqani aylluy Lastenesman, imapichus qankunamanta parlarikorqani. Kunan chayta apachimullaykichejtaj, rikunaykichejpaj.

³²Rey Demetrio tata Lastenesta napaykun.

³³Noqaykoqa munayku allin kayta ruwayta judiospaj, k'acha sonqowan noqaykuta qhawasqankurayku. Paykunaqa amigosniyku kanku. Ruwankutaj imatachus noqaykupaj allin kashan chayta.

³⁴Chayrayku, paykunaman qopuyku Judea jallp'atawan kay kinsa provinciastawan: Efrainta, Lidata, Ramataimtawan. Chay jallp'asqa t'aqasqas karqanku Samariamanta, k'askasqastaj Judeaman tukuy suyusnintin. Kunanqa manaña mañakusajchu impuestosta tukuy israelitasmanta, pikunachus Jerusalenman rinku rikuchikusta jaywaj chaykunamanta. Sapa wata paykuna reyman qonanku karqa impuestota tukuy poqoyninkumanta.

³⁵Ajinallataj, kunanmantapacha nitaj waj impuestostapis mañakusajñachu. Qonawanku karqa poqoyninkumantaqa sapa chunkamanta ujta chay impuestota, kachi impuestotawan, qori impuestotawan, imatachus reyman qonanku karqa chayta, perdonakapuni.

³⁶Kay nisqayqa mana ni jayk'aj qonqasqachu kanan tiyan.

³⁷Kay escribisqaytaqa watejmanta ujta ruwamullankitaj, Jonatanman qonaykipaj. Chantaqa, chay cartata santo orqopi churankichej uj cheqapi, runas rikunankupaj.

³⁸Rikuspataj rey Demetrio jallp'an allillan kasqanta paypa kamachisqanwan, rikuspataj mana ni pi paypa contranta oqharikusqanta, tukuy soldadosninta kachapullasqa wasisninkuman. Qhepachisqa karu llajtayojkunallata, pikunatachus jatun qocha churusmanta apachimusqa soldadosnin kanankupaj, chaykunallata. Ajinamanta, tukuy chay runas, pikunachus soldados kasqanku Demetrioj tatasninmantapacha, Demetriota chejnikuyta qallarisqanku.

³⁹Chaypacha rikhurimusqa uj runa Trifón sutiyoj, pichus ñaupajta Alejandrowan khuska risqa. Rikuspataj chay Trifón tukuy soldados thutushasqankuta Demetriopaj, risqa watukoj Arabia llajtayoj Imalcueta, pichus uywasqa Alejandroj sullk'a wawan Antiocota.

⁴⁰Trifonqa majakusqa Imalcuemanta qopunanta wawata reyman tukuchinampaj, imaynatachus tatan rey karqa, ajinallatataj. Willaykusqataj imatachus Demetrio ruwashasqa chaykunata. Nisqataj Demetrioj soldadosnin payta chejnikusqankuta. Unayta kakusqa Trifonqa Imalcuejpapi.

⁴¹Jonatantaj nichimusqa rey Demetrioman orqhopunanta soldadosninta Jerusalén jark'ana wasimanta, waj jark'ana wasismanta ima. Chay soldadosqa maqanakusharqankupuni ari israelitaswan.

⁴²Demetriotaj uj cartata apachimusqa Jonatanman nispa: Mana chayllatachu ruwasaj qampajpis aylluykipajpis, manachayqa aswan pataman oqharisqaykichej qantapis aylluykipajpis, atisqayman jina.

⁴³Kunanqa, cheqanta ruwanki kachamuwanki chayqa runasta yanapanawankupaj maqanakunasniypi. Noqaj soldadosniy ripunku.

⁴⁴Jonatantaj kachamusqa paypaman, Antioquiaman, kinsa waranqa runasta, sumaj wakichisqasta maqanakuspaj. Chayamusqankutaj reypaman. Reytaj mayta kusikusqa chayasqankumanta.

⁴⁵Antioquía llajtayojkunataj tantakusqanku llajta chaupipi. Pachaj iskay chunka waranqa jina kasqanku chay runasqa. Munashasqankutaj reyta wañuchiyta.

⁴⁶Reytaj ayqesqa wasinman. Chay llajtayojkunataj jap'ikapusqankuña tukuy callesta. Ch'ajwapis qallarishasqaña.

⁴⁷Reyqa wajyachimusqa judiosta payta yanapanankupaj. Judiostaj chayamusqanku paypaman. Chantaqa kayman jaqayman ch'eqerasqanku llajtapi. Chay diataj judiosqa wañuchisqanku pachaj waranqa runasta.

⁴⁸Chantaqa, ruphaykuchisqanku llajtata. Wasispi tarisqankutaqa, ashkhata apakapusqanku. Librasqankutaj reyta.

⁴⁹Rikusqanku llajtayojkuna judiosqa dueñochakusqankuta llajtamanta munasqankuman jina. Chayta rikuspa sonqonku ñañuyarqa. Qhaparispataj majakusqanku reymanta nispa: Q'apinakunallaña: Niripuwayku chay judiosman amaña llakichinawaykuta, noqaykutapis, llajtaykutapis.

⁵⁰

⁵¹Judiostaj wijch'usqanku maqanaku armasninkuta. Tukuyninkutaj allinyakapusqankuña. Judiostaj may patapi rikhurimusqanku reypa ñaupaqempi, paypa runaspa ñaupaqenkupitaj reinompi. Kutimusqankutaj Jerusalenman ashkhata apakuspa tarisqankumanta.

⁵²Tiyakusqataj rey Demetrio rey tiyanampi. Tukuynejpitaj allimpi kausakorqanku pay kamachishajtin.

⁵³Chaymantataj, qonqapusqa rey Demetrio tratota ruwasqanmanta. Karunchakusqataj Jonatanmanta. Q'alata qonqarpakusqataj Jonatán payta yanapasqanmanta. Chantapis, imaymana laya llakiywan Jonatampa sonqonta nanachisqa.

⁵⁴Chaymantataj Trifón kutimpusqa Antiocowan khuska. Antiocoqa chaypacha juch'uy wawallaraj karqa. Antiocotaj reymanta yaykusqa, rey pillutataj umanman churaykukusqa.

⁵⁵Chantaqa, Antiocoman k'askaykukusqanku tukuy soldados mayqenkunatachus Demetrioqa wakhiyamusqa chaykuna. Paykunaqa kachaykukusqanku Demetriowan maqanakoj. Demetriotaj atipachikusqa. Chaymantataj, ayqesqa.

⁵⁶Trifonqa, dueñochakuytawan elefantesmanta, jap'ikapusqa Antioquía llajtata.

⁵⁷Chaymanta, wayna Antiocoqa uj cartata apachimusqa Jonatanman, nispa: Niyki kakunallaykitapuni jatun sacerdote jina. Chantapis, kallanki kamachej chay tawa provinciaspi. Chantapis, munani reypa amigosnin ukhupi kanaykita.

⁵⁸Chantaqa kachamusqa qori vasosta, nisqataj atisqanta qori vasospi ujyayta, puka p'achawan p'achallikuyta, qori tuputa churakuyta ima.

⁵⁹Chantaqa, Jonatampa wauqen Simonta kamachejta churasqa Tiro qaqasmantapacha Egiptokama.

⁶⁰Jonatanqa llojsispa risqa Eufrates mayoj chimpanta. Yaykusqataj chaynejpi kashan llajtasman. Siriamanta kaj soldadospis payman k'askallasqankutaj paywan khuska rinankupaj maqanakusman. Ascalón llajtaman chayamuspataj, chay llajtayojkuna llojsisqanku payta taripaj may k'achanchasqas.

⁶¹Chay llajtamantaqa kachaykukusqa Gaza llajtaman. Chay llajtayojkunataj llajta punkusta wisq'aykusqanku ama Jonatán yaykumunampaj. Jonatantaj sinch'i kallpawan yaykuyta munashasqapuni. Chantaqa, ruphaykuchisqa muyuynintimpi kaj wasista. Imatachus tarisqantapis apakapullasqa.

⁶²Gaza llajtayojkunataj mañarikusqanku Jonatanmanta paykunata khuyakunanta. Chantaqa, q'apinakusqanku, allinta kausakusunchej, nispa. Chantá, Jonatanqa presochasqa kurajkunaj wawasninkuta, apachisqataj Jerusalén llajtaman. Chaymanta ñanta jap'illarqa chay jallp'asninta Damascoman chayanankama.

⁶³Jonatanman willaykusqanku Demetrioj generalesnin chayasqankuta Galileaman, Cades nisqa llajtaman. Ashkha runaswan jamusqanku chay generalesqa munaspa Jonatanta wakhiyamuyta.

⁶⁴Jonatanqa kachaykukusqa paykunawan tinkoj. Wauqen Simontataj Judeapi saqesqa.

⁶⁵Chaykama, Simonqa risqa Bet-Surman. Ashkha diasta chaypi maqanakusqa. Llajtata runasninwan muyuykuchisqa, manataj saqesqachu runas llojsirikapunankuta.

⁶⁶Chay runastaj mañakusqanku allinyakapuyta. Paytaj allinyakapullasqa. Chaymantataj, runasta qharqosqa llajtankumanta. Chaypitaj saqesqa qhawaj soldadosta, dueñochakuspa chay llajtamanta.

⁶⁷Chaykamataj, Jonatán runasninwan khuska chayamusqa Genesaret nisqa qochaman. Chaypi sayasqanku. Q'ayantintaj, chhapu chhaputa chayasqanku Hazor pampaman.

⁶⁸Chay pampaspi, chay waj llajtayojkuna qayllashasqanku Jonatanwan tinkunakoj. Chay runasqa kachallasqankutaj uj t'aqa soldadosta orqosman. Pampanta jamusharqanku chay runastaj qayllaykushasqankupuni Jonatanman.

⁶⁹Ujta, chay runasqa, orqosman kachaykukusqanku chaykuna, orqosmanta uraykamuspa, ch'ajwaman sat'ikullasqankutaj.

⁷⁰Jonatampa runasnin ayqerparikapusqanku q'alitunku. Generaleslla runasninkuwan qhepakusqanku: Absalompa wawan Matatiaswan, Calfej wawan Judaswan.

⁷¹Jonatantaj p'achasninta llik'irasqa. Chaymantataj jallp'ata churakusqa umanman, Diosmantataj mañakusqa.

⁷²Jinapis, kutirisqa maqanakoj enemigosninwan. Paykunawan tinkunakuspataj, atipaykusqa ayqerparichisqataj.

⁷³Chayta rikuspa, ayqesharqanku chay judiosqa kutimpullasqankutaj Jonatampaman, paywan khuskataj qhatiykusqanku enemigosninkuta Cedeskama, maypichus chay runas jarakoj kanku chayman. Chaypi paykunapis sayallasqankutaj.

⁷⁴Chay kuti kinsa waranqa runas urmasqanku enemigos ukhupi. Chaymanta, Jonatanqa Jerusalenman kutimpusqa.