Read Quechua Bolivia DC Bible 1 MACABEOS 13 Bible Online

1 MACABEOS 13 - Quechua Bolivia DC Bible bible

1 MACABEOS 13

¹Simonqa yachasqa Trifón tantaykamusqanta ashkha runasta, kachaykukuyta munaspa Judá jallp'aman t'unarparichinampaj.

²Yachaspataj runasqa manchachikuywan kharkatitisqankuta, Jerusalenman kachaykukusqa. Chaypitaj runasta tantamusqa.

³Tantakuypitaj runasman nisqa: Qankunaqa yachankichej imatachus noqa wauqesniypis, tataypa ayllumpis ruwasqaykuta Diospa leyninrayku templonraykutaj. Yachallankichejtaj ima maqanakuspi kasqaykuta, ima llakiywan kasqaykutapis.

⁴Chayrayku, Israel aylluraykutaj tukuy wauqesniy urmarqanku. Paykunamantaqa noqa sapallay qhepakushani kunankama.

⁵Kunanqa, manapuni munaymanchu kausayniyta waqaychayta ima llakiypachapipis. Mana aswan sumajchu kani wauqesniymantaqa.

⁶Manachayqa, llojsisaj maqanakoj llajta masisniyrayku, santo templonchejrayku, warmisniykichejrayku, wawasniykichejraykutaj. Tukuy paganosqa ujllapi chejnikuywan oqharikushanku contranchejpi chinkachinawanchejpaj.

⁷Chay nisqanta uyarispataj, runaspa sonqosninku t'impusharqaña.

⁸Paykunataj, sinch'ita qhaparispa nisqanku: Wauqesniyki Judaspata Jonatampatawan cuentankumanta, qanqa kamachejniyku kanki.

⁹Maqanakunasniykupi maqanakuy. Noqaykurí, imatachus niwasqaykuta ruwasqaykupuni.

¹⁰Chaymantataj, Simonqa wajyachimusqa tukuy soldadosta. Usqhayllata tukuchisqa Jerusalén perqasta, muyuynimpitaj jark'ana wasista ruwachisqa.

¹¹Chantaqa, Simón kachamusqa Absalompa wawan Jonatanta Jope llajtaman. Ashkha runaswan chayamusqa Jonatanqa Jopeman. Chay llajtamantataj qharqosqa chaypi tiyakojkunata. Chaypitaj tiyakapusqa.

¹²Trifontaj llojsisqa Tolemaidamanta ashkha runaswan. Kachaykukusqataj Judá jallp'aman. Pusasqataj Jonatanta presochasqata.

¹³Simontaj jarakusqa Hadidpi, pampa chimpapi.

¹⁴Trifontaj, yachaytawan Simonqa kamachejman tukusqanta, wauqen Jonatampa cuentanmanta, yachaspataj munasqanta maqanakuman kachaykukuyta, kurajkunata kachamusqa kayta ninankupaj: Noqaykoqa jap'ishayku Jonatán wauqeykita, cargosninmanta manukusqanrayku reyman. Cargosniyoj kasqanmanta qolqeta paganan tiyan.

¹⁵

¹⁶Kunanqa qowayku pachaj talento nisqa qolqeta. Chantataj jaywawayku paypa iskay qhari wawasninta, cuentanmanta presochasqas kanankupaj. Jinapi yachasqayku Jonatanqa ama ni jayk'aj contraykupi oqharikunanta. Chaymantaraj noqaykoqa payta kacharisqayku.

¹⁷Yachaspapis Simonqa Trifón puraj uyawan parlasqanta, ordenta qomusqa tantanankupaj qolqeta, rinankupajtaj wawasta mask'aj. Runasmanta manchachikushasqa ari. Ichapis runasqa ninkuman: Trifonqa Jonatanta wañucherqa, Simón mana payman qoyta munasqanrayku qolqetapis wawastapis.

¹⁸

¹⁹Chayrayku Simonqa apachimullasqa wawasta chay pachaj qolqetawan. Trifontaj nisqantaqa mana junt'asqachu. Manapuni Jonatanta kacharichisqachu.

²⁰Chaymantataj, Trifonqa ñanta jap'isqa judiospa llajtasninkuta t'unarparichiyta munaspa. Judiospa jallp'asninkuman chayanampajqa Adoraim ñannejta risqa. Simontaj runasninwan khuska tukuy risqampi Trifonta jark'asqanku.

²¹Chaykama, Trifompa runasnin pikunachus kasharqanku Jerusalempi, jark'ana wasipi, payman nichimusqanku ch'in pampanta Jerusalenman jamunanta. Mañakusqankutaj paykunaman mikhunata chayachimunanta.

²²Chantaqa, Trifón wakichisqa caballosninta llojsinankupaj. Chay ch'isillapitaj anchatapuni rit'imusqa. Chay jawa, q'ayantin manapuni llojsiyta atisqankuchu. Chayrayku Trifonqa Galaadman kachaykukusqa.

²³Bascama nisqa llajtaman chayaytawankama, Jonatanta wañuykuchisqa. Chantataj, chayllapi p'ampaykuchisqa.

²⁴Chaymantataj, Trifonqa llajtanman kutimpusqa.

²⁵Simontaj apachimusqa Bascamamanta wauqen Jonatampa ayanta, p'ampaykusqataj Modín llajtapi. Chaymin tatasninkoj llajtanqa.

²⁶Tukuy israelitasqa may phutisqas unayta waqasqanku paymanta.

²⁷Simón uj apachetata ruwachisqa tatampata wauqesnimpatawan sepulturankupi, as jatun, karumanta rikukunampaj jina. Chay apachetaqa llusk'achasqa kasqa puraj ladomanta.

²⁸Chantá oqharichisqa qanchis piramidesta, iskay sinrupi, rikunakuspa. Chaykunata ruwachisqa runas yuyarikunankupaj paypa tatanmanta, mamanmanta, tawantin wauqesninmanta ima.

²⁹Muyuyninkupitaj sumaj k'achanchasqa jatuchaj pilaresta oqharichisqa. Sapa pilarpi churachisqa escudostawan maqanastawan, wiñay yuyariy kanampaj. Ladonkupitaj, perqaspi ruwasqa barcosta, jatun qochapi rejkuna rikunankupaj jina.

³⁰Simón oqharichisqan chay sepulturaqa Modimpi, kunankama kakushan.

³¹Trifonqa wasanchaspa wayna rey Antiocota, payta wañuchisqa.

³²Chayta ruwaytawantaj Trifonqa, Antíocoj cuentanmanta reyman tukusqa. Umanmantaj Asiamanta rey pilluta churakusqa. Tukuynejpitaj imaymana mana allin kajta ruwasqa.

³³Simontaj, chayta yachaspa, Judea jallp'api oqharichisqa jark'ana wasista. Muyuyninkupitaj churachisqa jatuchaj torrestawan perqastawan. Churachisqataj aldabasniyoj punkusta. Apachimusqataj mikhunasta sapa jark'ana wasiman.

³⁴Chantataj, Simonqa kachasta kachamusqa rey Demetriojpaman, ninankupaj amaña impuestosta mañakunanta Judea jallp'amanta. Trifonqa ari manchay ashkhata suwakusqa.

³⁵Kutichikuspataj rey Demetrio kay cartata Simonman apachimusqa:

³⁶Rey Demetrio napaykun reykunaj amigon kuraj sacerdote Simonta, kurajkunata, tukuynin judío aylluta ima.

³⁷Chayamuwan chay qori pillutaj chay palmataj, imatachus apachimuwarqankichej chaykuna. Munanipuni qankunawan allinyanakuyta. Nichimusaj runasniyman amaña qankunamanta impuestosta mañakunankuta.

³⁸Imatachus niykuña qankunapaj ruwakunanta, ruwakullachun. Chay ruwakorqankichej jark'anasqa, qankunajta kachumpuni.

³⁹Chantapis, kunankama pantasqaykichejmantawan, juchasniykichejmantawan q'alata qonqapusaj. Nitaj mañakusajñachu kikin reyman impuestota qonaykichej karqa chayta. Chaymanta, sichus ima laya impuestollapis oqharisqa karqa Jerusalenmanta, mana oqharikonqañachu.

⁴⁰Pikunachus qankunamanta kayman jamuyta munanku noqaj soldadosniy kanankupaj, jamullachunku. Noqanchej ukhupi allin kausakuy kachun.

⁴¹Ajina, pachaj qanchis chunka kaj watapi, Israel ayllu kacharichisqa karqa paganospa sinch'i makisninkumanta.

⁴²Chayrayku, runasqa churayta qallarerqanku papelesninkupitaj contratosninkupitaj: Ñaupaj kaj watapi Simón kasqanmanta Israel ayllupi kuraj sacerdotetaj, kamachejtaj, kuraj kajtaj.

⁴³Chaypachapitaj Simonqa Gezer llajtaman chayamusqa jap'ikapuyta munaspa. Soldadosninta churasqa chay llajtaj muyuynimpi. Chaypajqa ruwachisqa uj maqanaku carrota. Chay carrotaqa llajtaman chimpaykuchisqa. Chaywan uj torrepi jatun jusk'uta ruwaspa, atisqa jap'ikapuyta llajtataqa.

⁴⁴Chay carropi kasharqanku chay runasqa, uraykuytawan anchatapuni manchachisqanku Gezer llajtayojkunata.

⁴⁵Llajtayojkunataj, warmisnintin, wawasnintin ima, perqaman wasarisqanku. P'achasninkuta llik'ikuspataj, sinch'ita qhaparispa. Simonmanta mañakusqanku paykunawan allinyakapunanta.

⁴⁶Nisqankutaj: Ama qhawawaykuchu juchasniykuman jina. Manachayqa, khuyakuyniykiman jina qhawawayku.

⁴⁷Simonqa nisqankuta uyarispa, soldadosninman ordenta qosqa amaña maqanakunankupaj. Paykunata llajtamanta llojsichisqa. Chantataj, llimphuyachisqa wasista, maypichus lantis kasqa chaykunata. Chantataj Simonqa runasninwan khuska llajtaman yaykusqanku takirikuspa, Diosta alabaspa ima.

⁴⁸Llajtapi tukuy ch'ichi kajta chinkarparichisqa Simonqa. Chaymantataj waj ladosmanta pusachimusqa Diospa leyninta qhatejkuna runasta, chaypi tiyakunankupaj. Chantataj, jark'anasta oqharichisqa. Paypajtaj uj jatun wasita ruwachikusqa.

⁴⁹Jerusalén jark'anapi kasharqanku chay soldadostaj manapuni atisqankuchu llajtaman qayllayta imallatapis rantikunankupaj. Chay jawa yarqhaywan atipachikushasqankuña. Ashkhaña yarqhaymanta wañusqankuña.

⁵⁰Chaykunataj Simonmanta majakusqanku allinyakapunankuta. Paytaj, arí, nispa nisqa. Chantá, paykunataqa jark'ana wasimanta qharqosqa, jark'anatataj ima laya ch'ichimanta sumajta llimphuyachisqa.

⁵¹Judiosqa chay jark'ana wasiman yaykusqanku pachaj qanchis chunka ujniyoj kaj wata kashajtin iskay kaj killamanta, iskay chunka kinsayoj kaj diapi. Yaykusqanku mayta qhaparispa palmasniyoj. Tocachispa imaymana laya tocanasninkuta, yaykusqanku takirikuspa. Chayta ruwasqanku Israel aylluta chejnikojkuna chinkachisqas kasqankurayku.

⁵²Simontaj ordenta qomusqa chay kutimantapacha fiestata ruwaspa sapa wata yuyarikunankuta chay diamanta. Chaymantataj jark'ana perqasta oqharichisqa orqopi, jark'ana wasej chimpampi. Paytaj runasnintaj chaypi tiyakusqanku.

⁵³Chantataj, rikuspa Simonqa paypa wawan Juan jatunña kasqanta, soldadospa kamachejninkuman tukuchisqa. Juantaj tiyakusqa Gezer llajtapi.