Read Quechua Bolivia DC Bible 1 MACABEOS 14 Bible Online

1 MACABEOS 14 - Quechua Bolivia DC Bible bible

1 MACABEOS 14

¹Pachaj qanchis chunka iskayniyoj kaj watapi, rey Demetrioqa runasninta tantamuspa Media jallp'aman kachaykukusqa astawan runasta mask'amoj yanapanankupaj Trifompa contranta rinampaj.

²Persiamantawan Mediamantawan rey, Arsaces sutiyoj, yachasqa Demetrioqa jallp'asninman yaykusqanta. Chayta yachaytawantaj kachasqa ujnin generalninta Demetriota jap'iranampaj kausashajta.

³Chay generaltaj rispa atipasqa Demetrioj ejercitonta. Demetriotataj presochasqa. Chaymanta payta pusasqa Arsacespaman. Arsacestaj carcelpi wisq'aykuchisqa.

⁴Judea jallp'api allin kay karqa Simón kamachikushajtin. Simonqa allin kajllata mask'arqa ayllumpaj. Tukuyninku kusisqas kasharqanku paywan. Kausakushajtin sutenqa patapipuni oqharisqa karqa.

⁵Ñaupajta ruwasqanmanqa kaytapis yaparqa: Jope llajtata jap'ikaporqa puertontinta. Chay llajtamanta kachaykukorqa jatun qochapi kaj churusman.

⁶Ayllunman aswan jallp'asta yapaykorqa. Tukuy chay cheqastaj makisnimpi karqanku.

⁷Chaymantataj, presochasqas llajta masisninta ashkhasta llajtankuman kutichimusqa. Chantaqa, Gezertawan, Bet-Surtawan, Jerusalén jark'anatawan jap'ikapusqa. Jerusalén jark'anamantaqa wijch'umusqa tukuy ima ch'ichipaj qhawasqa kajta. Mana ni pi karqachu paypa contranta sayarejqa.

⁸Runasqa jallp'asninkupi llank'aj kanku allin kaypi. Chajraspi tukuy ima poqorqa. Huertaspitaj sach'aspis poqoyniyoj karqanku.

⁹Machu runasqa plazaspi tiyakoj kanku. Tukuyninku parlarikoj kanku sumaj tiemposmanta. Waynastaj k'acha p'achasniyoj purikoj kanku, maqanakupaj jina wakichisqas.

¹⁰Simonqa llajtasman mikhunata chayachimusqa. Tukuynejpi jark'anasta oqharichimusqa. Tukuy chaynejta sutenqa sumaj rejsisqa kasqa mayllapipis.

¹¹Allin kay chayamusqaña. Israel aylloqa kusikuywan junt'asqa kasqa.

¹²Sapa uj tiyakoj uva sach'ampa, higo sach'ampa llanthumpi, mana ni pejpa imanasqallan.

¹³Chay tiempopi judiosta chejnikojkunaqa ch'inlla kasharqanku. Reykunapis atipasqasña kasqanku.

¹⁴Simonqa allin ñawiwan qhawasqa wajcha runasta. Diospa leyninta allintapuni junt'asqa. Diosmanta karunchakojkunatawan sajra runastawan chinkaykuchisqa.

¹⁵Chantapis, sumajta templota k'achanchaykuchisqa, yapaykusqataj imaymana vasosta templopaj.

¹⁶Roma llajtapitaj Esparta llajtapitaj runasqa yachasqanku Jonatán wañuchisqa kasqanta. Chayta yachaspataj, mayta phutikusqanku.

¹⁷Romanostaj espartanostaj uyarisqanku Jonatampa wauqen Simonqa, Jonatampa cuentanmanta kuraj sacerdote kasqanta. Yachallasqankutaj Simonqa kamachej kasqanta Judea llajtapi.

¹⁸Tukuy chayta yachaspataj, cartasta apachimusqanku Simonman, broncepi qelqasqata. Chaypi nisqanku munasqankuta watejmanta ruwayta chay tratota imatachus ñaupajta ruwasqanku Judaswan Jonatanwan ima, paykuna ukhu yanapanakunankupaj.

¹⁹Simón leechisqa chay cartasta tukuy runaspa ñaupaqenkupi, Jerusalempi.

²⁰Kaymin espartanospa cartanqa: Espartanospata kurajkunasnin, tukuy Esparta llajtayoj runaspis napaykuyku kuraj sacerdote Simonta, kurajkunatapis, sacerdotestapis, tukuy Judea llajtayoj wauqesniykutapis.

²¹Kayman kachamuwarqayku chay kachasniykichejnejta yachayku kunanqa qankuna kusikuyniyoj kasqaykichejta. Yachallaykutaj sutiykichej patapiña kasqanta. Noqaykoqa mayta kusikuyku kachasniykichej jamusqankumanta.

²²Noqayku, imatachus paykuna willawarqayku chaykunata, kay jinata churachiyku llajtayku librospi: Antíocoj wawan Numeniowan, Jasompa wawan Antipatrowan, judiospa sutinkupi jamuwayku yanapanaku tratota noqaykuwan watejmanta ruwayta munaspa.

²³Espartamanta runastaj munasqanku recibikuyta judío runasta jatun fiestata ruwaspa. Nisqankutaj tukuy chay cartasqa waqaychasqa kananta libro waqaychanasninkupi, espartanos chaymanta yuyarikunankupajpuni. Ujtataj apachimusqanku kuraj sacerdote Simonman.

²⁴Chaymantataj Simonqa kachasqa Numeniota Romaman. Numeniotaj apakusqa uj jatun qori jark'anata, tawa pachaj kinsa chunka sojtayoj kiloyoj, romanosman qonampaj, chay trato watejmanta ruwasqa kananrayku.

²⁵Israelita runastaj chaykunata uyarispa nerqanku. Imaynatataj agradecekusunman Simontawan wawasnintawan?, nispa.

²⁶Nerqankutaj: Paypis, wauqesnimpis, tatampata ayllumpis, sinch'itapuni sayarqankoqa. Payqa Israel aylluta chejnikojkunawan maqanakuspa, chaykunata karuncharqa, Israel ayllutataj makisninkumanta kacharicherqa. Chayta unanchakuytawanqa, qelqaykusqanku broncepi, churasqankutaj pilarkunapi, Sión orqopi.

²⁷Kaymin chay qelqasqankoqa: Kinsa wata Simón jatun sacerdote kasqanmanta. Elul nisqa killamanta, chunka pusajniyoj kaj diapi, pachaj qanchis chunka iskayniyoj kaj watapi Asaramelpi uj jatun tantakuy karqa.

²⁸Chaypi tantakorqanku sacerdotes, ashkha runas, kamachejkuna ima. Chay tantakuypi kashajtiyku kayta niwayku: Tukuy laya maqanakus kashajtin, ashkha kuti kay llajtanchejpi, rikhurimorqa Simón, sacerdote Matatiaspa wawan, Joiaribpa ayllunmanta. Paywan khuska wauqesnin rikhurimullarqankutaj. Paykunaqa, mana wañuyta manchachikuspa, Israelta chejnikojkunaj ñaupaqenkupi sayarillarqanku. Paykuna munasharqanku temploqa cheqampi kakunallanta. Munasharqankutaj Diospa leynin manapuni qonqasqa kananta. Chaynejta, ayllunkuta pataman churarqanku.

²⁹

³⁰Jonatanqa, ayllu masisninta ujllapi tantaykorqa, kuraj sacerdotemantaj tukorqa. Chantaqa, ayllumpaman riporqa.

³¹Chaypacha, Israel aylluta chejnikojkunaqa munashasqanku jallp'ankuta jap'ikapuyta. Munallashasqankutaj temploman yaykuyta, tukuy imata jap'ikapoj.

³²Simontaj ujta oqharikorqa ayllunrayku maqanakoj. Kikin paypa qolqenwan ranterqa maqanaku armasta, qolqenmantataj soldadosman sueldota pagarqa.

³³Chaymantataj Simonqa oqharichisqa jark'ana perqasta tukuynin Judea llajtaspi. Ajinallataj, jark'anasta churachisqa Bet-Sur llajtapi, mayqenchus kashan Judea jallp'aj lindempi. Chaypi ñaupajta enemigosqa waqaychaj kasqanku maqanaku armasninkuta. Chayllapitaj Simonqa judío soldadosta saqesqa chayta qhawanankupaj.

³⁴Chaymantataj, Simonqa perqachimullasqataj Jope llajtatapis, jatun qochaj cantompi kashan chayta. Chantapis, perqachimusqataj Gezer llajtata, Azotoj chimpampi kashan chayta. Chay llajtaspeqa ñaupajta enemigos tiyakoj kasqanku. Apachimusqataj judío runasta chaypi tiyakunankupaj, qosqataj paykunaman tukuy imata kausanankupaj.

³⁵Judío runastaj rikusqanku Simonqa cheqan sonqoyojpuni kasqanta. Rikusqankutaj munasqanta Israel ayllunta aswan pataman oqhariyta. Tukuy chayta rikuytawantaj munasqankapuni Simonqa kamachejninku kananta, chantapis kuraj sacerdoteman tukunanta. Yuyarikusharqanku ari tukuy ruwasqasninmanta, cheqan sonqoyoj kasqanmanta, ayllunta tukuy imapi aswan ñaupajman purichiyta munasqanmanta ima.

³⁶Simón kamachikushajtintaj, judiosqa aterqanku qharqoyta jallp'asninkumanta waj llajtayoj runasta. Judiosqa wijch'umorqanku paganosta Davidpa llajtan Jerusalenmanta. Chaypi chay runasqa uj jark'ana wasita ruwasqanku. Chay jark'ana wasimantaqa, chay runas kachaykukoj kasqanku kayman jaqayman. Ajinamanta, santuarionejpi kashan chay cheqasta ch'ichichaykusqanku. Chayta ruwaspataj, jatun juchata tarispa, mana allintachu qhawarqanku templota.

³⁷Chaymanta, Simonqa chayman apachimusqa judío soldado runasta. Chantaqa, llajtaj muyuynimpi perqasta oqharichisqa, llajtatapis tukuynin jallp'atapis jark'anankupaj. Chantaqa, aswan pataman oqharichisqa Jerusalén perqastapis.

³⁸Chaymantataj, rey Demetrio nisqa Simón kuraj sacerdotepuni kananta.

³⁹Nisqa Simón paypa amigon kananta. Chaymantataj, patamampuni Simonta churasqa.

⁴⁰Chantapis, reyqa uyarisqa romanos qhawasqankuta judiosta amigosninkuta jina. Uyarisqataj uj tratota paykunapura ruwasqankuta, wauqesña jina kasqankutataj. Yachallasqataj imaynatachus romanosqa recibisqankuta Simompa kachasninta.

⁴¹Willasqankutaj rey Demetrioman judiosqa sacerdotesninkuwan khuska unanchasqankuta kanallantapuni Simonqa kamachej jina, kuraj sacerdote jinataj, uj cheqan sonqoyoj profeta rikhurimunankama.

⁴²Jinallataj, willaykusqanku Simonqa generalninkupis kasqanta. Chantataj, Simonqa templotapis qhawanan kasqa. Paypuni ajllanan kasqa templota qhawajkunata. Chantapis, Simonqa tukuy imatapuni qhawanan kasqa Israel ayllupi. Maqanaku armaspis, jark'anaspis, makisnimpi kasqa.

⁴³Chantapis, religiompis makisnillampitaj kasqa. Tukuy runaspis payllatapuni kasukoj kasqanku. Chaymantataj, tukuy gobierno papelkunapis sutinwan llojsinan kasqa. Chantaqa, Simón purikunan kasqa puka p'achasniyoj, may qorinchasqa.

⁴⁴Mana ni mayqen runallapis, ni sacerdotespis karunchakunankuchu karqa chay kamachisqasmanta. Nillataj nisqanmantaqa waj jinata ninankuchu karqa. Chantapis, manapuni atikusqachu imallapajpis tantakuyta pay mana munajtenqa. Chantaqa, pillapis munajtin puka p'achasta churakuyta, qori walqastachus churakuyta, ñaupajta paymantapuni licenciata mañakunan karqa.

⁴⁵Chaykunata mana kasukojkunaqa, castigasqa kananku karqa.

⁴⁶Tukuy runas munanku kay jinamantapuni Simón tukuy imapi ruwananta.

⁴⁷Simonqa munasqa sumajta junt'ayta imatachus ruwanan karqa kuraj sacerdote jina. Pay mana q'ellikusqachu general kananmanta, kamachinanmantataj judiosta sacerdotestapis, tukuykunajta umanku kaspa.

⁴⁸Chay qelqasqankoqa ch'eqosqa kanan karqa broncepi. Chaytaj sayarichisqa kanan karqa templopi, chayta rikunankupaj Simompis wawasnimpis sapa munajtinku.