Read Quechua Bolivia DC Bible 1 MACABEOS 15 Bible Online

1 MACABEOS 15 - Quechua Bolivia DC Bible bible

1 MACABEOS 15

¹Rey Demetrioj wawan Antíoco, jatun qocha churusmantapacha uj cartata apachimusqa Simonman, tukuy Israel aylluman ima. Simonqa chaypacha karqa kuraj sacerdotetaj, judiospa kamachejnintaj.

²Chay cartaqa kay jina karqa: Rey Antíoco napaykun jatun sacerdote kamachej Simonta, tukuy judío runastapis.

³Wakin sajra runas jap'ikapunku ñaupa tatasniypa reinonta. Noqataj munashani chay reinotaqa watejmanta jap'ikapuyta, imaynatachus ñaupajta karqa, chay jinaman kutichinaypaj. Chaypajqa, ashkha runasta wajyamuni, wakichishanitaj barcosta maqanakuspaj.

⁴Munayman ari chimpaman chayayta. Jallp'asniyman chayaspataj, chay soldadosta pikunatachus jallp'asniyta chinkacherqanku castigasaj, paykunaqa ashkha llajtasta reinoymanta t'unarparichisqankurayku.

⁵Kunanqa, imatachus noqamanta ñaupajta reykuna qosorqanku, noqapis qollaykitaj.

⁶Atillanki qolqeta ruwachiyta sutiykiwan, chaywan tukuynejpi runasqa rantikunankupaj.

⁷Chantapis, rantikusqanki chay maqanaku armas, chay oqharichisqanki jark'ana wasispis, qanllapatapuni kanqanku.

⁸Manukusqasniykimantapis, reyman qonayki karqa chaykunamantapis, qonqapullasaj wiñaypaj. Ajinallataj, imatachus kunanmanta qhepaman manukuwaj chaytapis, qonqapullasajtaj.

⁹Reinoy watejmanta makisniypiña kajtin, imaymana allinkunata qosqaykichej qanmampis, aylluykimampis, templomampis. Ajinamantaqa, sutiykichej may rejsisqa kanqa mundontimpi.

¹⁰Pachaj qanchis chunka tawayoj kaj watapi, Antiocoqa kachaykukusqa ñaupa tatasnimpa llajtankuman. Ashkha runas payta qhatiykusqanku. Pisi runaslla Trifonwan qhepakusqanku.

¹¹Antiocoqa qhatiykachasqa Trifonta. Trifontaj ayqesqa Dor llajtaman, jatun qochaj chimpampi kashan chayman.

¹²Trifonqa rikusqa llakiy payman urmasqanta, yachasqataj runasnin sapitallanta saqerparisqankuta.

¹³Chaymantataj, Antiocoqa jarakusqa Dor chaynejpi pachaj iskay chunka waranqa chakipi rejkuna soldadoswan, pusaj waranqa caballopi rejkuna soldadoswan ima.

¹⁴Antiocoqa runasninta churasqa llajtaj muyuynintimpi. Chaykamataj, barcosqa chayasqankuña chimpaman. Ajinamanta, tukuynejmanta llajtaqa muyuykuchisqa karqa. Mana ni pi aterqañachu llojsiytapis yaykuytapis.

¹⁵Numeniotaj, paywan khuska rerqanku chaykunawantaj kutimusqanku Roma llajtamanta. Apamusqanku cartasta reykunapaj, llajtaspaj ima. Chay cartaqa kay jina kasqa:

¹⁶Romanosta kamachej Lucio napaykun rey Tolomeota.

¹⁷Kuraj sacerdote Simón, tukuy judío ayllutaj kachasta kachamuwayku paykunaj sutinkupi noqaykuwan watejmanta ruwanankupaj uj yanapanaku tratota, imaynatachus ñaupajta ruwasqa karqa, ajinata.

¹⁸Paykunaqa qowayku uj qori jark'anata, tawa pachaj kinsa chunka sojtayoj kiloyojta.

¹⁹Chayrayku, nichimushani reykunamampis, llajtasmampis, nispa ama paykunata ni imapi llakichinankuta sajrata ruwaspa, amataj maqanakunankuta, llajtasninkumampis, jallp'asninkumampis yaykuspa. Ninitaj amapuni yanapanankuta judioswan maqanakojkunata.

²⁰Noqaykoqa jap'ikullasqayku chay apachimusqanku qori jark'anata.

²¹Sichus mayqen sajra sonqoyoj runas, Simonmanta ayqespa qampaman jamunkuman chayqa, jaywaykuy sacerdote Simonman, paykunata leyninkuman jina ruwasqasninkumanta castiganampaj.

²²Lucioqa kikillantataj escribimusqa rey Demetrioman, rey Ataloman, rey Ariarateman, rey Arsacesman ima. Chantaqa, escribimullasqataj kay llajtasmampis: Sampsameman, Espartaman, Delosman, Mindosman, Sicionman, Cariaman, Samosman, Panfiliaman, Liciaman, Halicarnasoman, Rodasman, Faselisman, Cosman, Sideman, Arvadman, Gortinaman, Cnidoman, Chipreman, Cirenemanwan.

²⁴Chantaqa, apachimullasqataj sacerdote Simonmampis, yachanampaj.

²⁵Rey Antíoco jarakushasqa Dor chaynejpi. Siga kachamusharqapuni soldadosta llajtaman. Ruwachisharqataj maqanaku maquinasta. Tukuynejmanta muyuykusharqa Trifonta. Trifontaj mana aterqañachu ni llojsiytapis ni yaykuytapis.

²⁶Simontaj Antiocoman kachamusqa iskay waranqa sumaj ajllasqa runasta maqaysinankupaj. Chay runasqa apallasqankutaj Antiocopaj qolqetawan qoritawan, ashkha imastawan.

²⁷Paytaj mana munasqachu chaykunata jap'ikuyta. Manachayqa, ima tratotachus ñaupajta Simonwan ruwasqa chayta, p'akiykusqa. Chay kutimantapachataj Simonta chejnikuyta qallarisqa.

²⁸Antiocoqa Simompaman kachaykusqa kausaqen Atenobiota, kayta nimunampaj: Qanqa jap'ikushanki Jope llajtatawan Gezer llajtatawan, Jerusalén jark'anatawan. Chay llajtasqa reinoypata kanku.

²⁹Qanqa tukuy chay jallp'asta ch'in pampaman tukucherqanki. Tukuynejpitaj imaymana sajra kajtapis ruwarqanki. Chaymantataj, qampaj ashkha cheqasniyta jap'ikaporqanki.

³⁰Kunanqa kutichipuway jap'ikapusqayki llajtasniyta. Chantapis, qopuway impuestosta jap'erqanki chay cheqasmanta, mana Judeapi kashanku chaykunamanta.

³¹Chaytachus mana ruwanki chayqa, qonawayki tiyan phishqa pachaj talento nisqa qolqeta, chay llajtasta t'unarparisqaykimanta. Chantaqa, waj phishqa pachaj talentota qonawayki tiyan chay jallp'asmanta impuestosmanta. Chay nisusqayta mana ruwanki chayqa, rispa qanwan maqanakusajpuni.

³²Risqa ari reypa amigon Atenobio Jerusalén llajtaman. Rikusqataj Simón atiyniyoj kasqanta. Rikusqa qori vasosninta, qolqe vasosnintapis. Rikusqa may qhapaj kasqanta Simonqa. Tukuy chayta rikuspataj anchatapuni t'ukusqa. Chantaqa, Simonman willasqa Antíocoj nisqanta.

³³Simontaj kay jinata kutichikusqa: Mana wajkunaj jallp'asninkutachu jap'ikapuyku, nitaj wajkunaj imasninkuta qhechuykuchu, manachayqa imatachus ñaupa tatasniykojpata karqa chayllata watejmanta kutichikapuyku. Chejnikuwayku chay runasqa sajrata ruwaspa chay jallp'asniykuta qhechuwarqayku, unaytataj jap'ikapunku.

³⁴Noqayku aterqayku jap'ikapuyta imachus ñaupa tatasniykojpata karqa chayta.

³⁵Jope llajtayojkunataj Gezer llajtayojkunataj anchataña llakichiwarqayku. Chay llajtasmantaqa pachaj talento qolqeta qosqayku.

³⁶Chayta uyarispa Atenobioqa mana ni imata nisqachu. May phiñasqa kutimpusqa reypaman. Willasqa reyman Simompa nisqasninta. Willasqataj may qhapaj runa kasqanta. Tukuy rikusqantapuni willakusqa. Reytaj, uyariytawanqa anchatapuni phiñakusqa.

³⁷Chaykamataj, Trifonqa barcopi ayqesqa Ortosiaman.

³⁸Chantaqa, reyqa Cendebeota churarqa kamachejmanta jatun qocha cheqas chaynejpi. Paymantaj qosqa chakipi rejkuna soldadosta, caballopi rejkuna soldadostawan.

³⁹Reyqa Cendebeoman ordenta qomusqa soldadosninwan kachaykukunampaj Judeaman. Chantataj nisqa Cedrón llajtata watejmanta ruwachinanta. Nillasqataj jark'anasta ruwachinanta llajta yaykunaspi. Nisqataj judío runaswan maqanakunantapuni. Reytaj ripusqa Trifonta mask'aj.

⁴⁰Cendebeotaj Jabnia llajtaman chayamusqa. Chaypi qallarisqa judiosta toreyayta. Chantaqa Judea jallp'asman yaykusqa. Chaypitaj runasta presochasqa, wañuchisqataj.

⁴¹Chaymantataj, Cedrón llajtata watejmanta oqharichisqa. Chaypi qhepachisqa caballojkunata, chakipi rejkuna soldadostawan. Paykunaman nisqa kayman jaqayman kachaykukunankuta, Judea ñankunata qhawanankutataj, reypa kamachisqanman jina.