Read Quechua Bolivia DC Bible 1 MACABEOS 16 Bible Online

1 MACABEOS 16 - Quechua Bolivia DC Bible bible

1 MACABEOS 16

¹Simompa wawan Juan, Gezermanta llojsispa, risqa tatampaman willakoj Cendebeoj ruwasqanmanta.

²Simontaj, chayta yachaspa wajyasqa iskaynin kuraj wawasninta, Judastawan, Juantawan, nisqataj kay jinata: Noqa, wauqesniypis, tukuy tataypa ayllumpis, maqanakoj kayku Israel ayllunchejta chejnikojkunawan, waynas kasqaykumantapacha kunankama. Ashkha kutis aterqayku israelitasta makisninkumanta kacharichiyta.

³Noqaqa kunan machu runaña kani. Jinapis, Diosninchej khuyakusqanrayku qankunaqa kallpayoj kashankichej. Kunanqa noqajpata wauqeypatawan cuentaykumanta, qankunañataj llojsiychej maqanakoj ayllunchejrayku. Diosninchej yanapasuchun.

⁴Chay jallp'amanta Simonqa ajllakusqa iskay chunka waranqa chakipi rejkuna soldadosta, caballopi rejkuna soldadostawan. Paykunaqa kachaykukusqanku Cendebeowan tinkunakoj.

⁵Chhapu chhaputa llojsisqanku, risqankutaj pampaman. Chaypi kashajtinku rikhurimunku ashkha runas chakipitaj caballospitaj. Chaupinkupi uj wayq'o kasqa.

⁶Juan soldadosnintin kasqanku wayq'o chaynejpi, enemigosninkuta rikuspa. Soldadosqa manchachikushasqanku, manataj munashasqankuchu chimpaman pasayta. Chayta rikuspataj, Juanqa ñaupajta wayq'onta pasasqa. Runasnintaj qhepampi pasallasqanku.

⁷Rikuspataj contrasqa ashkha caballosniyoj kasqankuta, Juanqa chakipi rej soldadosta t'aqaspi churasqa, caballosniyojkunata chaupinkupi.

⁸Ujta pututus waqasqanku. Chaymantataj, Cendebeo runasninwan khuska atipachikusqanku. Ashkha runas wañusqanku. Kausajkunataj jark'ana wasiman ayqesqanku.

⁹Chay ch'ajwapi nanaykuchisqanku Juampa wauqen Judasta. Juantaj qhatiykachasqa ayqesharqanku chaykunata. Qhepankupi rispataj, Cedrón llajtaman chayasqanku Cendebeo watejmanta ruwachisqa chay llajtaman.

¹⁰Enemigosqa Azoto pampasman ayqesqanku. Chaypi jatuchaj torrespi pakaykukusqanku. Juantaj, chayamuspa, llajtata ruphaykuchisqa. Chaypi wañusqanku enemigos ukhupi iskay waranqa runas. Juantaj sanopacha Judeaman kutimpusqa.

¹¹Abubpa wawan Tolomeota churasqanku soldadosta kamachejmanta Jericó pampapi. Chay Tolomeoqa qhapaj runa kasqa. Qorintaj qolqentaj kapusqa.

¹²Kuraj sacerdotej tolqan kasqa Tolomeoqa.

¹³Munapayashasqa atiyniyoj kayta. Unanchashasqa chay jallp'asta jap'ikapuyta. Chaypacha yuyashasqa wasanchayta Simontawan wawasnintawan, wañurparichinampaj.

¹⁴Chaypacha Simonqa watukamushasqa tukuynin llajtasta yachamunampaj imamantachus pisichikusqankuta. Jericó llajtaman chayasqa wawasnin Matatiaswan Judaswan ima. Chayqa karqa pachaj qanchis chunka qanchisniyoj kaj watapi, chunka ujniyoj kaj killapi, Sebat killa nisqa chaypi.

¹⁵Paykunataqa chay puraj uya Abubpa wawan Tolomeo, pusasqa Doc nisqa jark'ana wasiman. Pay ruwachisqa chay juch'uy jark'anataqa. Chaypi iskayninkupaj uj fiestata ruwasqa. Chayllapitaj wakin runas pakakushasqanku.

¹⁶Simontaj wawasnimpis machaykusqankumantaña, Tolomeo amigosnintin yaykumusqanku maqanaku armasta jap'ispa. Chayllapi wañuchisqanku Simontawan iskaynin wawasnintawan, wakin kamachisninkutawan.

¹⁷Millayta ruwasqa Tolomeoqa. Allin kajmanta sajrawan kutichikusqa.

¹⁸Chaymantataj, Tolomeoqa tukuy imata willakusqa reyman uj cartapi. Nisqataj payman kachamunanta soldadosta yanapanankupaj. Mañakusqataj kamachej kayta kamachinampaj tukuy llajtaspi.

¹⁹Chaymanta, Gezermampis kachallasqataj wakin runasta, Juanta wañuchinankupaj. Generalesmampis cartasta apachimusqa, payman k'askanankuta mañakuspa. Prometesqataj qonanta qorita, qolqeta, wajkunata ima.

²⁰Chaymanta, Tolomeoqa waj runasta kachasqa jap'imunankupaj Jerusalén llajtatawan, templo orqotawan.

²¹Jina kajtimpis, uj runa ñaupakuspa, Gezerman chayasqa. Chayaspataj, Juanman willakusqa imaynamantachus tatantaj wauqesnintaj wañuchisqas kasqankuta. Nisqataj Tolomeo runasta kachamusqanta paytapis wañuchinankupaj.

²²Chayta uyariytawantaj, Juanqa yuyayninta chinkachisqa. Chantaqa, chayajtinku pikunachus jamusqanku payta wañuchinankupaj chaykuna, jap'ichispa chayllapi wañuchichisqa. Yachasqaña ari jamusqankuta payta wañuchej.

²³Juanqa kausaynimpi ashkha maqanakusman rerqa. Imaymana laya t'ukunasta ruwarqa. Tukuynejpi llajta perqasta ruwacherqa. Wajkunatapis ruwarqa yuyarikunapaj jina.

²⁴Tukuy chay ruwasqasnin qelqasqa kashan, jatun sacerdoteman tukusqanmantapacha tatampa qhepampi.