Read Quechua Bolivia DC Bible 1 MACABEOS 3 Bible Online

1 MACABEOS 3 - Quechua Bolivia DC Bible bible

1 MACABEOS 3

¹Chaypacha, Matatiaspa cuentanmanta sayarqa paypa wawan Judas, Macabeo nisqa.

²Paypa wauqesnintaj, tatanta qhatejkunataj payta yanaparqanku. Tukuy sonqotaj llojserqanku Israelrayku maqanakoj.

³Judasqa ayllumpa sutinta tukuynejpi rejsicherqa. Corazata churakorqa gigante jina, maqanasnintataj jap'erqa. Maqanakuyman llojserqa. Soldadosninta jark'arqa espadanwan.

⁴Maqanakushaspa leonman rijch'akoj. Uña león jina payqa qhaparikoj enemigompa qhepampi.

⁵Sajra runasta qhatiykorqa jap'inankama. Ayllunta llakichejkunata larwayman wijch'uykucherqa.

⁶Ñaupaqempi sajra runasqa manchachikoj kanku. Sajra kajta ruwajkuna qharkatitej kanku. Paynejta runasqa llojsillasharqanku sarusqa kaymanta.

⁷Ashkha reyespis, payrayku llakiypi rikukoj kanku. Jacobpa ayllunrí, ruwasqanmanta kusirikorqa. Chayrayku, paypa sutenqa wiñaypaj rejsisqataj bendicisqataj kanqa.

⁸Pay tukuy Judá llajtasman rej. Chay llajtaspi mana creejkunata chinkacherqa. Ajinamanta, Israelmanta karunchacherqa Diospa phiñakuyninta.

⁹Paypa sutin karu k'uchusman chayarqa tantasqanrayku chinkapushaj aylluta.

¹⁰Uj runa, Apolonio sutiyoj, tantarqa soldadosta mana creej nacionesmanta, Samariamantataj, paykunawan Israelman kachaykukunampaj maqanakoj.

¹¹Judastaj, chayta yachaspa, paywan tinkukoj llojserqa. Paywan tinkukuytawantaj atiparqa wañucherqataj. Ashkha soldadospis wañurachisqas karqanku. Wajkunarí, ayqerqanku.

¹²Judaspa runasnin tarisqankuta apakaporqanku. Judastaj Apolonioj espadanta jap'ikaporqa. Chay kutimantapacha Judasqa chay espadawampuni maqanakuyman rej.

¹³Siriapi soldadosta kamachej Serón, yachaspa Judasqa ashkha runasta tantasqanta maqanakupaj, sonqompi kay jinata nerqa: Maqanakupi tinkukusaj chay Judaswan. Ajinata, sutiy rejsisqa jatunchasqataj kanqa reinopi, maqanakusqayrayku Judaswan runasninwantaj, reypa nisqanta chay qhesachajkunawan.

¹⁴

¹⁵K'askasqankutaj payman ashkha judíos, ñaupa tatasninkoj leyninkuta saqerparisqanku chaykuna. Paykunawan yanapachikuspa llojserqa israelitaswan tinkukoj.

¹⁶Seronqa chayarqa Bet-Horón lomaman. Chayman Judaspis rillarqataj pisi runaswan.

¹⁷Judaspa runasnin, rikuspa Serompa soldadosninta, Judasman nerqanku: Imaynamantataj atisun tinkuyta jina pisi kaspa, chay soldadoswanri? Paykunaqa ashkha kanku, aswan kallpayojtaj noqanchejmantaqa. Chaymantataj, qaynamantapacha mana ni imata mikhorqanchejchu. Mana kallpayojñachu kanchej, nispa.

¹⁸Judastaj nerqa: Ashkha runas urmallanku pisi runaspa makisninkuman. Diosninchej ari ashkha runastapis pisi runastapis atipachillan.

¹⁹Maqanakupi mana atipanchu soldadospa yupakuynin, manachayqa Diosninchejpa yanapakuynin.

²⁰Chay runasqa jamushanku wapu wapus, Diosninchejta wasanchaspa. Munashanku wañuchinawanchejta, jinallataj warmisninchejta, wawasninchejta ima. Munallashankutaj kapuyninchejta jap'ikapuyta.

²¹Noqanchejrí maqanakuyman rinchej kausayninchejrayku costumbresninchejraykutaj.

²²Chayrayku ari, amapuni manchachikuychejchu paykunamantaqa. Diosninchej paykunata t'unarparichenqa ñaupaqenchejpi.

²³Chayta niytawanqa, Judasqa kachaykukorqa enemigosninta taripaj. Pachampi, Seronqa runasninwan khuska atipachikorqanku.

²⁴Chantá, israelitasqa Bet-Horón lomanta paykunata qhatiykorqanku pampaskama. Chaypi urmarqanku pusaj pachaj runas enemigosmanta. Wajkunataj filisteospaman ayqerqanku.

²⁵Tukuynejpi manchachikoj kanku Judasmantawan hermanosninmantawan. Qaylla nacionespipis runasqa manchachikoj kanku.

²⁶Judaspa sutin reyman chayarqa. Mayllapipis runasqa parlaj kanku Judaspa atiyninmanta.

²⁷Tukuy chaykunata yachaytawanqa Antíoco mayta phiñakorqa. Nerqataj tantakunankuta ujllapi tukuy soldados reinompi kajkuna. Chay runasqa atiyniyoj karqanku.

²⁸Antíoco qolqeta qorqa sapa ujman uj watamanta, nerqataj wakichisqas kanankuta ima horallapajpis.

²⁹Chantaqa rikorqa qolqen pisiña kasqanta. Impuestosqa pisilla chayasqa sapa llajtamanta ch'ajwasrayku. Paypuni juchayoj kasqa, imaraykuchus ñaupa tiempospi kaj leykunata manaña junt'achisqachu.

³⁰Manchachikuywan yuyasharqa ichachus qolqen pisiyanman. Ajina kajtenqa, mana atenqañachu regalosta qoyta yachasqanman jina, aswan sumajta waj reyesmanta nisqaqa.

³¹Qolqeta necesitasqanrayku, Persiaman rerqa impuestosta mañakunampaj provinciasmanta. Chaypi ashkha qolqeta junt'ayta atisqanta yuyasharqa.

³²Chaykama, Lisiasta saqerqa cuentanmanta kamachinampaj jallp'asta Eufrates mayumantapacha Egipto lindekama. Chay Lisiasqa qhapaj runa karqa, karqataj reypa ayllunmanta.

³³Chantaqa, nillarqataj Lisiasta qhawapunanta Antíoco wawanta jampunankama.

³⁴Qollarqataj payman khuskan soldadosta. Ajinallataj, elefantestapis saqerqa. Nerqataj junt'anantapuni astawanqa, imatachus kamacherqa apamunankuta Judeamanta Jerusalenmantawan chayta.

³⁵Lisiasman ordenta qosqa nispa kachaykukunanta Israelman q'alituta tukuchispa, mana ni ima sayasqata saqespa. Nisqataj raqayman tukuchinanta imatachus puchusqanta Jerusalempi, mana ni yuyarikuypis qhepakunampaj chay llajtamantaqa.

³⁶Lisiasqa pusanan karqa tukuy Israelman karu llajtayoj runasta, paykunamantaj jallp'asta qonan karqa.

³⁷Rey Antíoco riporqa khuskan soldadosninwan. Pachaj tawa chunka qanchisniyoj kaj watapi Antioquía llajtanmanta llojserqa. Eufrates mayunta pasarqa. Chantá, ñanta jap'erqa pata pampasninta.

³⁸Lisiasqa wajyarqa Tolomeota, Dorimenoj wawan chayta. Chantapis, Nicanortawan Gorgiastawan. Chay runasqa atiyniyoj karqanku reypa amigosnin ukhupi.

³⁹Paykunata kacharqa tawa chunka waranqa chakipi rej soldadoswan. Chantaqa, qanchis waranqa caballopi rej soldadoswampis. Tukuy chaykunaqa Judeaman rerqanku q'alata tukuchinankupaj reypa nisqanman jina.

⁴⁰Purispa, purispa, chayamorqanku uj pampaman Emauspa qayllanman. Chaypi jarakorqanku.

⁴¹Qhatukojkunataj, yachaspa chay soldados llajtankuman chayamusqankuta qolqetawan qoritawan tantaspa, cadenasta jap'ispa rerqanku maypichus soldados jarakusharqanku chayman, munaspa israelitasta rantikuyta wata runasman tukuchinankupaj. Siriospis filisteospis paykunata yanapaj chayamullarqankutaj.

⁴²Judastaj hermanosnintaj rikorqanku jatun llakiy jamushasqantaña. Chay soldadosqa jallp'ankuman yaykushasqankuña. Chantapis, yachasqanku rey ordenta qomusqanta t'unarparichinankupaj llajtata, runasta chinkachispa.

⁴³Chayrayku, paykunapura ninakorqanku: Llojsichina ayllunchejta llakiyninmanta. Maqanakuna llajtanchejrayku templonchejrayku ima.

⁴⁴Chaypacha, tukuyninku tantakorqanku maqanakupaj wakichikunankupaj. Diosmantataj mañakorqanku khuyakuyninta yanapaynintataj.

⁴⁵Jerusalenqa ch'impacha karqa, mana runasniyoj, uj ch'in pampa jina. Mana ni pi kuyurejchu llajtapi. Templo ch'ichiyachisqa karqa. Karu llajtayojkuna llajta ukhupi tiyakusharqanku. Llajtaqa mana creejkunaj wasinkuman tukorqa. Jacobpa ayllun manaña kusikuyniyojchu karqa. Mana uyarikorqañachu qenajta waqaynin, nitaj arpajta waqaynimpis.

⁴⁶Israelitas tantakorqanku Mispapi, Jerusalempa chimpampi. Chaypimin ñaupa wataspi israelitaspata kapusqa uj lugar Diosta yupaychanankupaj.

⁴⁷Chay kuti israelitasqa mana mikhorqankuchu, umasninkumantaj ushphata churakorqanku, p'achasninkutataj llik'iykorqanku.

⁴⁸Diospa leyninta yachachej librota kicharerqanku, Diospa munayninta yachanankupaj, imaynachus mana creejkunapis dioskunasninkumanta tapunku, ajinata.

⁴⁹Sacerdote p'achastapis apamorqanku, jinallataj mishkha poqoykunatapis. Chantá, tukuy kapuyninkumanta, sapa chunkamanta ujta. Chantaqa wajyacherqanku nazarenosta pikunachus promesasninkuta junt'asqankuña chaykunata.

⁵⁰Chaymanta, Diosmanta mañakorqanku kay jinata nispa: Imatataj ruwasqayku kay runaswanri? Maymantaj pusasqaykuri?

⁵¹Temployki sarusqataj ch'ichichasqataj kashan. Sacerdotesniyki sonqo nanasqas purishanku pampaman k'umuykuchisqas.

⁵²Qhaway ari imaynatachus chay mana creejkuna runasqa tantakunku noqaykuta tukuchinawaykupaj. Qan yachanki imatachus ruwayta yuyashanku noqaykoj contraykupi.

⁵³Imaynamantataj atisqaykuri jark'akuyta, qan mana yanapawajtiykuri?

⁵⁴Chaymantataj pututusta waqacherqanku, runastaj sinch'ita qhaparerqanku.

⁵⁵Chantaqa, Judas ajllarqa runas ukhupi kamachejkunata. Paykunamanta, wakinku kamachinanku karqa waranqa runasta, wakinkutaj pachaj runasta, wakinkutaj phishqa chunka runasta, wakinkutaj chunka runasta.

⁵⁶Leypa yachachisqanman jina, Judasqa paykunata nerqa wasisninkuman kutiripunankuta wasisninkuta ruwashajkuna. Jinallataj, chay diasllapi casarakojkuna ima. Chantapis, uva chajrata tarpojkunapis, manchachikojkuna ima.

⁵⁷Chaymantataj, maqanakupaj wakichisqa runasqa ñanta jap'erqanku. Emauspa urannejpi jarakorqanku.

⁵⁸Judastaj nerqa: Wakichikuychej! Ama manchachikuychejchu. Wakichikuychej, q'aya tutamanta maqanakunaykichejpaj chay mana creejkunawan, pikunachus tantaykukunku contranchejpi, llojsinankupaj munasqankurayku tukuchinawaykuta temploykutataj t'unarparichiyta.

⁵⁹Aswan walej wañuyman riy maqanakuspa, rikunanchejmanta llakiy urmajta nacionninchejman templonchejmantaj.

⁶⁰Jinapis, imachus Diosninchej munashan, chaymin ruwasqa kanqa.