Read Quechua Bolivia DC Bible 1 MACABEOS 4 Bible Online

1 MACABEOS 4 - Quechua Bolivia DC Bible bible

1 MACABEOS 4

¹Uj runa Gorgias sutiyoj kachaykukorqa chakipi purej phishqa waranqa soldadoswan, caballopi rej waranqa soldadoswantaj. Tukuyninku allin ajllasqas karqanku. Tukuy paykunaqa chaupi tutata llojserqanku.

²Chay runasqa munasharqanku ch'inllamanta yaykuyta judío jarakuman ujllapi runasta maqaj. Paykunata pusarqanku Jerusalempi tiyakoj runas.

³Jina kajtimpis, Judasqa yacharqa chayta yuyasqankuta. Pay, soldadosninwan khuska llojserqa reypa soldadosninta wajtaj, Emauspi kasharqanku chaykunata.

⁴Judasqa chayta munasharqa soldados kashajtinkuraj jarakuna jawapi.

⁵Gorgiastaj tuta chayamorqa Judaspa jarakunman. Chaypitaj mana ni pita tarerqachu. Chaymantataj, Gorgiasqa paykunata mask'aj rerqa orqosman, yuyaspa ayqesqankuta, paykunamanta manchachikuspa.

⁶Q'ayantintaj tutamanta Judasqa rikhurimorqa pampapi kinsa waranqa runaswan. Mana apakusqankuchu maqanasta nitaj espadastapis, munasqankuman jina.

⁷Judaspa runasnin rikorqanku contrasninkuta, kallpayojta, sumaj wakichisqasta, caballosniyojta. Tukuy chay soldadosqa yachasqas karqanku maqanakuyman.

⁸Judastaj runasninman kay jinata nerqa: Amapuni manchachikuychejchu chay chhika runasmanta. Ama kharkatitiychejchu chayamojtinku.

⁹Yuyarikuychej imaynatachus ñaupa tatasninchej salvakorqanku Puka Qochanta pasashajtinku, maypachachus faraón runasninwan khuska qhepankuta risharqa.

¹⁰Kunanqa, Diospa khuyakuyninta mañakunachej. Mañakuna yuyarikunanta chay tratomanta, ñaupa tatasninchejwan ruwasqan chaymanta. Mañarikuna t'unarparichinanta chay soldadosta, ñaupaqenchejpi kashanku chaykunata.

¹¹Ajinamanta, tukuy naciones yachanqanku kasqanta pichus Israel aylluta salvan, kacharichintaj enemigosnimpa makisninmanta.

¹²Karu llajtayojkunaqa rikorqanku israelitasta, paykunaman kachaykukojkunata.

¹³Rikuspataj, jaramanta llojserqanku maqanakoj. Judaspa soldadosnin pututusninkuta waqacherqanku.

¹⁴Chaymantataj yaykorqanku tinkunakoj. Chaypacha, mana creejkunaqa atipachikorqanku. Atipachikuytawantaj, pampaman ayqekaporqanku.

¹⁵Qhepapi kajkuna espadawan wañuchisqas karqanku. Wajkunata israelitasqa qhaterqanku Gezerkama, Idumea pampaskama, Azoto pampaskama, Jabnia pampaskamataj. Tukuypi wañusqasqas enemigos ukhupi kinsa waranqa karqanku.

¹⁶Judasqa, kutimuspa soldadosninwan enemigosta qhatichisqanmantapacha, kay jinata nerqa runasman: Ama munaychejchu kunanqa imallatapis jap'ikapuyta. Kanqaraj maqanakus noqanchejpajqa.

¹⁷

¹⁸Gorgias soldadosninwan sayashan orqopi, qayllallanchejpi. Sinch'ita sayariychej ñaupaqenkupi. Maqanakuychej paykunawanqa. Qhepantaraj imatapis apakapullankichej.

¹⁹Judas chayta nishajtin, orqomanta rikhurimunku enemigo soldados wateqaj.

²⁰Chay soldadosqa rikunku chay rato masisninku ayqesqankuta, llojsishaj q'osñita rikuspataj yacharqankuña jaranku ruphachisqa kasqanta.

²¹Chayta rikuspa manchachikuywan kharkatiterqanku. Rikorqankutaj pampapi Judaspa soldadosnin wakichisqasña kasqankuta.

²²Rikuytawantaj qhaj pacha tukuyninku ayqerqanku filisteospaman.

²³Judas kutimporqa pallakoj jarapi tarisqanta. Paypa runasnin apakaporqanku ashkhata: Qorita, qolqeta, kulli colorniyoj puka colorniyojtaj awayusta, wajkunata ima.

²⁴Kutimushaspa israelitasqa salmosta takisharqanku, Diosman graciasta qospa: Payqa k'achamin. Khuyakuynenqa wiñaypaj, nispa.

²⁵Chay diaqa may jatun karqa Israelpaj.

²⁶Karu llajtayojkuna, salvakusqanku chaykuna, llajtankuman chayarqanku, willarqankutaj Lisiasman imachus pasasqanta.

²⁷Lisiastaj, chayta uyarispa mayta llakikorqa phutikorqataj, imaraykuchus Israelpi payman mana risqachu suyasqanman jina. Israelitas mana junt'asqankuchu ari reypa kamachisqantaqa.

²⁸Qhepaj watata Lisiasqa wakicherqa sojta chunka waranqa runasta, phishqa waranqa caballostawan, israelitaswan tinkukoj.

²⁹Lisiasqa Idumeanta rerqa, jarakorqataj Bet-Surpi. Chayman rerqa Judasqa chunka waranqa runaswan.

³⁰Judasqa, rikuspataj Lisiaspa soldadosnin chhika yupa kasqankuta, Diosmanta kay jinata mañakorqa: Bendito kanki Israelpa salvadornin. Qanqa David kamachiykinejta llauch'iyacherqanki jatunkaray runata, qorqankitaj filisteo soldadosta Saulpa wawan Jonatanman, paypa maqanakunasninta apajmampis.

³¹Ajinallatataj kunanqa churay kay soldadosta Israel aylluykej makisninman. P'enqakuchunku chay runasqa runasmantawan caballosmantawan.

³²Mancharichiy paykunata. Amaña kallpankumanta umasninkuta oqharichunkuchu. Pampaman k'umuykuchisqas kachunku, amataj ni jayk'aj sayarichunkuñachu.

³³Munakusunku runasniykej espadasninkuwan wañuchisqas kachunku. Ajinamanta, qanta rejsisojkuna sutiykita yupaychanqanku.

³⁴Iskaynin soldado tropas tinkunakorqanku. Wañorqankutaj phishqa waranqa Lisiaspa soldadosnin.

³⁵Lisiastaj rikorqa soldadosnin pisi sonqo kasqankuta. Judaspa runasninrí wapu wapusman tukusharqanku. Paykunaqa manapuni wañuymanta mancharikusharqankuchu. Chayrayku Lisiasqa riporqa Antioquiaman. Chaypitaj mask'asharqa ejercitonta jatunyachiyta mosoj soldadoswan. Munasharqapuni kutiriyta Judeaman.

³⁶Chaypacha, Judaspis hermanosnimpis nisharqanku paykunapura: Enemigosninchej atipachikunku. Wicharina ari Jerusalenman, Santo templota llimphuchaj, watejmanta Diospaj santoyachisqa kanampaj.

³⁷Tukuy soldadosta tantaspataj Sión orqoman wicharerqanku.

³⁸Chaypi Diospa wasenqa ch'usajpacha kasqa, altartaj ch'ichichasqa, punkus ruphachisqas. Wasistaj t'unarasqas kasqanku. Patiospitaj qhora wiñasqa montepi jina.

³⁹Chayta rikuspa, israelitasqa p'achasninkuta llik'irasqanku, paran parantataj waqasqanku, umasninku patapitaj ushphata churakusqanku.

⁴⁰Chaymantataj pampaman k'umuykukorqanku, pututustapis waqacherqanku, qhaparerqankutaj janaj pachaman ñawisninkuta oqharispa.

⁴¹Judas ajllarqa wakin runasta perqasman rinankupaj maqanakoj. Payrí templopi kakullarqa chayta llimphuyachiyta munaspa.

⁴²Chantaqa Judas ajllarqa mana k'amina sacerdotesta. Diospa leyninman k'askasqas kajkunata.

⁴³Paykunaman nerqa templota llimphuchanankuta, apanankutataj mana creejkunaj ch'ichi altarnimpa rumisninkuta q'opa wijch'unaman.

⁴⁴Chaymantataj, tantakuspa nisharqanku imatachus ruwanankuta chay altarwan, Diosman rikuchikusta jaywanku chaywan, ch'ichichasqa kasqanrayku.

⁴⁵Allinta unanchaspataj nerqanku kosa kasqanta phiriykuchiy. Ajinamanta, mana p'enqachikonqankuchu, paganos ch'ichichasqankumanta.

⁴⁶Chay altar rumista churarqanku templo orqopi, sumaj cheqapi, rikhurimunankama uj profeta imachus chaywan ruwanankuta sut'inchaj.

⁴⁷Chantaqa mask'arqanku mana allinyachisqa rumista, leypa nisqanman jina, sayaricherqankutaj mosoj altarta, ñaupaj kajman rijch'akojta.

⁴⁸Mosoj templota ruwarqanku. Santoyacherqankutaj chaupipi kajta patiostapis.

⁴⁹Mosoj santoyachisqa imasta ruwarqanku. Chaymantataj, candelabrota watejmanta churarqanku santuariopi. Churarqankutaj q'osñichina churana altarta, t'antata jaywana altartapis.

⁵⁰Altar patapi inciensota q'osñicherqanku, jap'icherqankutaj candelabro lamparasta, santo lugarpi k'anchanankupaj.

⁵¹Mesa pataman churaykorqanku t'antasta. Chantataj cortinastapis warqhorqanku. Ajinamanta, tukuy ruwanankuta tukorqanku.

⁵²Iskay chunka phishqayoj kaj diapi, Quisleu nisqa killapitaj, chayqa jisq'on kaj killa, pachaj tawa chunka pusajniyoj watapi, chhapu chhaputa sayarikorqanku.

⁵³Sayarikuytawantaj, Diospa leyninman jina uj rikuchikuta Diosman jaywarqanku rikuchikuspaj ruwasqanku chay mosoj altar patapi.

⁵⁴Uj wataña kashajtin paganos ch'ichichasqankumanta altarta, chay kikin diapi israelitasqa watejmanta santoyacherqanku takispa, guitarrasta, arpasta, tocanastapis waqachispa.

⁵⁵Tukuy runasqa qonqorikorqanku, pampamantaj k'umuykukorqanku Diosta yupaychaspa, agradecekuspataj tukuy imas allin paykunapaj risqanmanta.

⁵⁶Pusaj día junt'ata kusikorqanku altarta santoyachisqankumanta. Kusikuspa rikuchikusta jaywarqanku, Diosta alabaspa, perdón mañakuspa, agradecekuspataj.

⁵⁷Temploj punkunta k'achancharqanku qori pilluswan warawaswan ima. Chantapis, yaykunasman punkusta churarqanku, mosojyacherqankutaj wasista.

⁵⁸Jatun kusikuywan runasqa kusikorqanku, manaña k'umuykuchisqas kasqankumanta paganoswanqa.

⁵⁹Judasqa, hermanosninwan khuska, tukuy israelita runaswantaj nerqanku chay kutimantapacha fiestata ruwanankuta sapa wata jatun kusikuywan, pusaj día junt'ata, qallarispa Quisleu killaj iskay chunka phishqayoj dianmanta, yuyarikuspa mosoj altar santoyachisqa kasqanmanta.

⁶⁰Chaypacha, oqharerqanku Sión orqoj muyuynimpi jatuchaj perqasta sinch'i jark'anastawan, ama watejmanta mana creejkuna yaykunankupaj, chay lugarta ch'ichichaj.

⁶¹Judasqa chayman kacharqa qhawaj soldadosta jark'anankupaj. Chaymantataj, Bet-Surtapis perqachaykorqa, jark'ana llajta kanampaj Idumeaj chimpampi.