Read Quechua Bolivia DC Bible 1 MACABEOS 5 Bible Online

1 MACABEOS 5 - Quechua Bolivia DC Bible bible

1 MACABEOS 5

¹Qayllapi kaj paganostaj yachasqanku israelitasqa watejmanta ruwasqankuta altarta, ruwasqankutataj templota, imaynatachus ñaupajta karqa ajinata. Chayta yachaspataj, anchatapuni phiñakusqanku.

²Phiñakuspataj, munarqanku wañurachiyta tukuy Jacobpa mirayninta, chaupinkupi kasharqanku chaykunata. Chantaqa, wakin judiosta wañucherqanku wakintataj qharqorqanku llajtankumanta.

³Yachaspa chaykunata ruwasqankuta, Judasqa kachaykukorqa Idumeaman Esaúj mirayninmanta runaswan maqanakoj. Judasqa chayarqa Acrabeteneman. Chaypi acrabetenosqa wakin israelitasta tukuy ladomanta wateqashasqanku. Chayaspataj, chay acrabetenostaqa sinch'ita nanaykuchisqa. Pampaman k'umuykucherqa paykunataqa. Chaymantataj, kapuyninkuta apakaporqa.

⁴Chaymantataj yuyarikorqa imaynatachus Beón llajtayojkunaqa unayta israelitasta imaymanapi llakichisqankuta, paykunata ñankunapi suwaspa.

⁵Judasqa mana saqerqachu chay runas wasisninkumanta llojsinankuta. Paykunaj muyuyninkupi Judasqa sayarqa soldadosninwan. Chaymantataj q'alata phiriykucherqa, ruphaykucherqataj llajtata runasnintinta.

⁶Chaymantataj riporqa amonitaspa llajtankuman. Chaypi Judaspa runasnin ashkha soldadoswan maqanakorqanku. Chay soldadosqa allintapuni wakichikusqanku maqanakupaj. Chay soldadosqa kamachejnenqa karqa uj runa Timoteo sutiyoj.

⁷Ashkha kutita tinkukuspa paykunawanqa, Judas atiparqa.

⁸Jap'iytawantaj Jazer llajtata ranchosnintinta, Judeaman kutimporqa.

⁹Galaad llajtayoj mana creejkuna runasqa paykunapura ujchakorqanku tinkuyman llojsinankupaj israelitaspa contranta. Llajtanku ukhupi karqa ari israelitas. Galaaditasqa munasharqanku chay israelitasta chinkachiyta. Israelitastaj chayta yachaspa Datemaman ayqerqanku pakakoj.

¹⁰Chantaqa, Datemamantapacha uj cartata kachamorqanku Judasman wauqesninmantaj. Chay cartaqa kay jina karqa: Muyuyniykupi kaj paganosqa paykunapura ujchakunku chinkachinawaykupaj.

¹¹Wakichikushankuña paykunaqa jamunankupaj noqaykuwan maqanakoj. Jap'ikapuyta munashanku kay lugarta, maypichus kashayku chayta. Uj runa, Timoteo sutiyoj, paykunaj kamachejnin.

¹²Jamuy ari chay runasmanta kacharichinawaykupaj. Noqayku ukhupi ashkhaña wañunku.

¹³Hermanosniyku Tubipi tiyakojkuna wañuchisqas karqanku. Enemigosniyku presochasqasta apakapunku warmista wawasta ima. Imasninkutapis apakapullanku. Waranqañachá kanku chay cheqapi wañojkunaqa.

¹⁴Chay cartata leeshajtinkuraj, chaypacha chayamorqanku Galileamanta waj kachas, p'achanku llik'isqas. Chay kachasqa nerqanku: Tukuy noqaykuta chinkachinawaykupaj ujchakorqanku Tolemaida llajtayojkuna, Tiro llajtayojkuna, Sidón llajtayojkuna ima. Chantapis, Galileapi tiyakojkuna chay paganospis, nispa.

¹⁵

¹⁶Chayta uyarispataj, Judaspis tukuy runaspis ujllapi tantakorqanku yuyanankupaj imatachus ruwayta atinkuman hermanosninkuta yanapanankupaj, jark'ayta munaspa enemigosninkumanta chay llakiypi.

¹⁷Judastaj nerqa Simón wauqenta kay jinata: Munayniykiman jina ajllakuy runasta. Rinayki tiyan Galileaman, hermanosninchejta kacharichej enemigosninkoj makisninkumanta. Wauqenchej Jonatanwan noqawan Galaadman risqayku.

¹⁸Judeapi kakorqanku soldadosninkuwan, Zacariaspa wawan Josewan Azariaswan ima. Iskayninku may rejsisqas respetasqastaj karqanku.

¹⁹Judasqa kay ordenta qorqa Joseman Azariamampis: Kunanqa kamachejkuna jina runasta qhawaychej. Amapuni tinkunakuychejchu paganoswan kutimunaykukama, nispa.

²⁰Simonqa kachaykukorqa Galileaman kinsa waranqa runaswan. Judastaj rerqa Galaadman pusaj waranqa runaswan.

²¹Galileapiña kaspa Simonqa ashkha maqanakuspi tinkukorqa chay paganoswan. Sapa kutitaj paykunata atipaykorqa.

²²Wakinta qhatiykorqa Tolemaidakama. Paganosqa chinkachisqas karqanku. Kinsa waranqa jina wañurachisqas karqanku. Simontaj kapuyninkuta apakaporqa.

²³Chantaqa, mayta kusikuspa Judeaman pusarqa judiosta Galileamantawan Arbatamantawan kajkunata, warmisnintinta, wawasnintinta, tukuy imasnintinta ima.

²⁴Chaykama Judas Macabeoqa Jonatán wauqenwan, Jordán mayunta pasaspa, kinsa día junt'ata purerqanku ch'in pampanta.

²⁵Ch'in pampapitaj tinkukorqanku nabateo runaswan. Chay nabateosqa allin sonqowan paykunata napaykorqanku, willarqankutaj paykunaman imachus pasasqanta Galaadpi judío masisninkuman.

²⁶Willarqanku imaynatachus judiosqa wisq'asqas kasqankuta Bosrapi, Bosorpi, Alemapi, Caspimpi, Maquedpi, Carnaimpitaj. Chay llajtasqa jatuchaj kanku, sumaj perqachasqas.

²⁷Nillarqankutaj waj Galaad llajtaspipis judiosqa wisq'asqas kasqankuta. Nerqankutaj chay judioswanqa enemigosninku munasqankuta qhepan diallata maqanakuyta. Nisqankutaj rinanku kasqanta perqachasqa llajtasman, jap'ikapunankupaj, wañuchinankupajtaj tukuy israelitasta uj diallapi.

²⁸Chayta uyarispataj Judasqa soldadosninwan khuska kutimporqa Bosora ch'in pampaman. Chayaspataj, llajtaman yaykorqa. Chaypi espadawan tukuy qharista wañucherqa. Tarisqan imasta jap'ikaporqa, llajtatataj ruphaykucherqa.

²⁹Ch'isita llojsispa, chayarqa Datema nisqa jark'akuna wasiman.

³⁰Paqarimojtintaj, judiosqa rikorqanku mana yupay atina runasta. Chay runasqa qayllasharqanku escalerasta marq'aspa, apaspataj tukuy ima laya wicharinasta, maqanakupaj imastawan, jark'anata jap'ikapuyta atinankupaj.

³¹Judasqa yacharqa qallarisqankutaña maqanakuyta. Uyarikusharqañapis llajtamanta jamoj qhapariytaj, pututoj waqaynintaj.

³²Judastaj soldadosninman kay jinata nerqa: Llajta masisninchejrayku kunanqa maqanakuna!, nispa.

³³Chaymantataj nerqa rinankuta, kinsa ladomanta wajtaj enemigosta. Judiosqa rikhurimunku enemigosninkoj wasankupi pututusta waqachispa, mañakuspataj Diosmanta qhaparikuspa.

³⁴Timoteoj runasnin, yachaspa Macabeo jamusqanta, ujta ayqekaporqanku. Judastaj ashkha runasta wañucherqa. Chay diallapi wañusqasqa pusaj waranqa jina karqanku.

³⁵Chantaqa, Judas rerqa Alemaman. Yaykuytawanqa, tukuy qharista wañucherqa, imatachus tarisqanta apakaporqa, ruphaykucherqataj llajtata.

³⁶Chaymantataj kikillantaj ruwarqa Casforpi, Maquelpi, Bosorpi, waj Galaad llajtaspipis.

³⁷Chantaqa, watejmanta Timoteoqa tantasqa soldadosta. Chay runasninwan rikhurimorqa Rafompa chimpampi, wayq'o wasapi.

³⁸Judastaj runasta kacharqa Timoteoj soldadosninta wateqaj. Kutimuspataj, kayta willarqanku: Tukuy kay cheqasmanta paganosqa Timoteoman k'askaykukusqanku. Kunanqa ejercitonqa ashkha soldadosniyoj.

³⁹Chantapis, arabeswampis yanapachikushanku. Chay arabesqa wayq'o wasapi kashanku, wakichisqasña jamusunankupaj, nispa. Chayta uyariytawanqa, Judas llojserqa arabesta taripaj.

⁴⁰Chayamushajtinña Judas wayq'oman, Timoteo soldadosninman nerqa: Wayq'onta pasanqa chayqa, kayman jamuspa, atipachikusunchejpunichá.

⁴¹Sichus manchachikuspa chimpallapi jarakonqa chayqa, noqanchej pasasunchej. Chayaspataj, payta atipaykusun, nispa.

⁴²Judas wayq'oman chayaytawanqa, kurajkunata churarqa mayu cantopi nispa: Ama ni pitapis jarachinkichejchu kaypi. Tukuypuni rinanku tiyan maqanakoj.

⁴³Judas pasarqa ñaupajta. Runasnin qhepampi pasallarqankutaj. Paganosqa, atipachikusqankuta rikuspa, maqanasninkuta wijch'uspa, ayqerqanku Carnáin temploman, chaypi pakakoj.

⁴⁴Judiostaj llajtaman yaykorqanku. Yaykuspataj llajtata q'alata ruphaykucherqanku templontinta. Templo ukhupi kajkuna tukuyninku wañuchisqas karqanku. Carnáin llajta raqayman tukuchisqa karqa. Chaymantapacha mana ni pi aterqañachu sayayta Judaspa ñaupaqempi.

⁴⁵Chaymanta Judasqa tantaykucherqa tukuy israelitasta Galaadpi tiyakojkunata. Tantakorqanku wawas, machu runas, warmis ima. Tukuyninku imasninkuta apaspa, ñanta jap'erqanku Judá jallp'aman rinankupaj.

⁴⁶Chayarqanku Efrón llajtaman. Chay llajtaqa ñan cantopi sayashan. Sumaj perqachasqa kasqa, sinch'i jark'asniyoj. Chaynintapuni pasananku karqa judiosqa. Mana atikorqachu riyta lloq'e ladomanchus, paña ladomanchus.

⁴⁷Llajtayojkunataj mana munarqankuchu pasanankuta. Tukuynejpi jark'anasta churaykusqanku ama llajtaman yaykunankupaj. Rumi perqastapis churallasqankutaj.

⁴⁸Judastaj chay llajtayojkunamanqa kachaswan allin kaywan nichimusqa: Pasarichiwayku, llajtaykuman chayanaykupaj. Mana ni imata ruwasqaykuchu. Pasallasqayku, nispa. Jinapis, chay runasqa mana munarqankuchu pasachiyta.

⁴⁹Chantaqa, Judas nerqa soldadosninman wakichikunankuta maqanakupaj.

⁵⁰Soldadosqa, wakichikuytawankamataj llajtaman rerqanku. Tuta p'unchay maqanakuspataj atiparqanku.

⁵¹Judasqa kamacherqa wañuchinankuta espadawan tukuy qharista. Llajtata raqayman tukucherqa. Tukuy ima tarisqantapis apakaporqa. Ayasta saruspataj llajtanta pasarqa.

⁵²Chaymantataj, Jordán mayunta pasarqanku, chayarqankutaj uj jatun pampaman, Bet-Seampa qayllanman.

⁵³Judasqa, purisqampi mana thaskiyta atejkunata sonqochaykorqa, tukuymantaj yanaparqa Judá llajtaman chayanankukama.

⁵⁴Anchata kusikuspa wicharerqanku Sión orqoman. Chaypi Diosman rikuchikusta jaywarqanku agradecekuspa allillanta chayasqankumanta, mana ni uj runallatapis chinkachispa.

⁵⁵Judaswan Jonatanwan kashajtinkuraj Galaad jallp'api, wauqenku Simontaj Galileapi kashajtin, Tolemaida chimpapi, Zacariaspa wawan Josewan Azariaswan Judeapi qhepakusqanku soldadosninkuwan. Chaypitaj uyarisqanku imatachus Judasqa wauqesninwan ima ruwasqankuta. Paykunaqa paykuna ukhu nisqanku kay jinata: Noqanchejpis sutisninchejta jatunyachina llojsispa maqanakoj, muyuyninchejpi kaj paganoswan, nispa.

⁵⁶

⁵⁷

⁵⁸Soldadosninkumantaj nisqanku rinankuta Yamniaman maqanakoj.

⁵⁹Gorgiastaj soldadosninwan llojserqa llajtamanta paykunata taripaj, tinkunakuyta munaspa.

⁶⁰Josepis Azariaspis atipachikorqanku. Iskayninkuta Gorgiasqa qhaticherqa Judea lindekama. Chay kuti wañorqanku iskay waranqa israelita runas.

⁶¹Israelitasqa atipachikorqanku mana Judasta kasukusqankurayku, nitaj wauqesnintapis, pataman oqharikuspa.

⁶²Nitaj Josepis, nitaj Azariaspis jatun sonqoyojchu karqanku. Mana ajllachikunkumanchu Israel aylluta llakiymanta llojsichinankupaj.

⁶³Tukuy Israelpi wapu Judaspis wauqesnimpis sumaj rejsisqas karqanku. Jinallataj waj jallp'aspipis, maymanchus sutisninku chayasqa chaypi.

⁶⁴Runasqa yupa kaj kanku muyuyninkupi sutisninkuta qhaparispa.

⁶⁵Judasqa wauqesninwan khuska kachaykukorqa uranejman maqanakoj Esaúj mirayninwan. Chayaspataj, jap'ikaporqa Hebrón llajtata ranchosnintinta. Llajta perqasta urmaracherqa. Chaymantataj, patapi kaj qhawanasta, llajtaj muyuynimpi kasharqanku chaykunata, q'alata ruphaykucherqa.

⁶⁶Chaymanta llojserqa filisteospa llajtankuman rinampaj, Manesanejta pasaspa.

⁶⁷Chay kuti wakin sacerdotes maqanakupi urmarqanku, mana unanchaspalla wapu wapus jina maqanakuyta munasqankurayku.

⁶⁸Chantá Judasqa muyuykamorqa Azotoman. Chayqa filisteospa llajtanku. Chaypi altaresta phiriykucherqa, ruphaykucherqataj lantista. Chaymantataj, tukuy ima tarisqanta chay llajtamanta apakaporqa. Chantaqa, kutimporqa Judea jallp'aman.