Read Quechua Bolivia DC Bible 1 MACABEOS 6 Bible Online

1 MACABEOS 6 - Quechua Bolivia DC Bible bible

1 MACABEOS 6

¹Rey Antiocoqa, patapi kaj jallp'asnejpi purishajtin, yachasqa Persiapi kasqanta uj llajta Elimaida sutiyoj. Chay llajtaqa may rejsisqa kasqa qhapaj kasqanrayku, qolqeyojtaj qoriyojtaj.

²Chay llajtapi kasqa uj templo may qhapaj. Chay templo ukhupi Filipoj wawan Alejandroqa, Macedonia llajtayoj rey, pichus ñaupajta griegosta kamacherqa, saqesqa qorimanta ruwasqa maqanakuna p'achasta, corazasta, t'ojsinasta ima.

³Chay llajtaman ripusqa Antiocoqa jap'ikapuyta munaspa, munaspataj apakapuyta chay llajtaj imasninta. Manataj atisqachu, imaraykuchus llajtayojkunaqa yuyayninta yachasqanku.

⁴Runasqa maqanasniyoj llojsisqanku paywan tinkunakoj. Chayraykoqa, Antíoco ayqerqa, kutimporqataj Babiloniaman may llakisqa.

⁵Persiallapiraj kashajtin willarqanku soldadosnin atipachikusqankuta Judeapi.

⁶Nerqanku Lisiasqa ayqesqanta judiosmanta ashkha soldadosniyoj kajtimpis. Judiosqa mosoj maqanasniyojña kasqanku, kallpachakusqankutaj ejercitosmanta jap'ikusqankuwan.

⁷Yachallarqataj judiosqa phirisqankuta chay millay lantita mayqentachus pay kikin churachisqa Jerusalén altarpi. Willasqankutaj judiosqa watejmanta sayarichisqankuta templo perqasta, imaynachus ñaupajta karqa ajinata. Chaymantataj, payman willasqanku judiosqa sinch'iyachisqankuta Bet-Sur llajtata.

⁸Tukuy chaykunata yachaspataj, reyqa anchatapuni mancharikorqa, llakiywantaj waqarqa. Phutiywan onqorqa, mana suyasqanman jinachu tukuy ima risqanmanta.

⁹Unayta ajina karqa Antiocoqa, mana llojsiyta atispa chay phutiyninmanta.

¹⁰Chaymanta, wañuy patapiña rikukuspa, kausaqesninta wajyachisqa, nisqataj: Puñoyqa ñawisniymanta karunchakun. Llakiyniy ancha llasa.

¹¹Chayrayku tapukuni: Imaraykutaj kay jina sinch'i llakiy jamuwan? Imaraykutaj jina phutisqa kashaniri? Noqaqa k'acha sonqo karqani. Tukuy munakuwaj kanku atiyniyoj kashajtiy.

¹²Kunanqa yuyarikushani chay sajra ruwasqaymanta Jerusalempi. Chaymanta suwarqani qori imasta, qolqe imastataj. Qhasillamantataj Judea runasta wañucherqani.

¹³Kunanqa yachaniña imaraykuchus jamuwan kay llakiy. Kunanqa may llakisqa wañushani llajtaymanta kay jina karupi.

¹⁴Filipota wajyachispataj, ujnin amigosninmanta chayta, tukuy reinompa mayordomonman tukucherqa.

¹⁵Payman jaywarqataj pillunta, p'achasninta anillontawan. Nerqataj wawan Antiocota qhawananta wakichispa rey kanampaj.

¹⁶Chaypi wañuporqa rey Antiocoqa pachaj tawa chunka isq'onniyoj watapi.

¹⁷Lisiastaj, yachaytawan rey wañupusqanta, rey tiyanapi tiyaykucherqa reypa wawan Antiocota, pitachus qhawasqa wawa kasqanmantapacha, churarqataj Eupátor sutita.

¹⁸Jerusalén jark'anasta qhawaj soldadosqa templota qhawasharqanku, ama chaymanta israelitas llojsinankupaj. Tukuy imapi llakichej kanku paykunataqa, yanapajtaj kanku paganosta.

¹⁹Judastaj munaspaña paykunata ujta tukuchiyta, tukuy runasta wajyarqa paywan khuska rinankupaj llajtata muyuykunankupaj.

²⁰Pachaj phishqa chunka kaj watapitaj tukuyninku ujllapi tantaykukuspa qallarerqanku llajta perqata urmarachiyta. Chaypajqa wakicherqanku cheqasta chaymanta wach'inasninkuta wijch'umunankupaj, ruwakorqankutaj maqanakupaj tukuy laya imasta.

²¹Ukhupi kajkunamanta wakinkoqa ayqeyta aterqanku. Paykunamantaj wakin rumi sonqo israelitas k'askakusqanku.

²²Tukuy paykunaqa risqanku reypaman nispa: Jayk'ajkamataj mana ni imata naspalla kakunkiri? Jayk'ajtaj justiciata ruwapusqaykuri? Manachu yanapawasqayku kutichikunaykupaj llajta masisniykumanta?

²³Noqaykoqa tukuy sonqo tataykita sirvimorqayku, nisqanta uyarikorqayku, kamachisqantataj kasukorqayku.

²⁴Chayrayku kunanqa llajta masisniyku phiña ñawiwan qhawawayku. Pikunatachus jap'inku noqaykumanta wañuchinkupacha. Kapuwasqaykutapis suwakapunku.

²⁵Mana noqaykullatachu wajtashanku, manachayqa, qampa runasniykitapis.

²⁶Kunampis, Jerusalén llajtata jap'ikapuyta munashanku. Chantapis, templotawan, Bet-Sur llajtatawan perqaswan muyuykuchinku.

²⁷Mana jark'anki chayqa kunallan, reyniyku, aswan sajrakunata ruwanqankuchá. Qanrí mana atinkichu atipayta paykunataqa.

²⁸Chayta uyariytawanqa, rey maytapuni phiñakorqa. Chantaqa wajyacherqa tukuy kausaqesninta, soldado kamachejkunata, caballería kamachejkunata ima.

²⁹Chantaqa payman k'askakusqanku waj llajtayoj soldados. Paykuna ukhupi kasqa jatun qocha nacionesmantapis jamojkuna.

³⁰Reypa soldadosnin karqanku pachaj waranqa chakipi purejkuna. Chantá, iskay chunka waranqa caballopi rejkuna. Kallasqataj kinsa chunka iskayniyoj elefantes, maqanakupaj yachachisqas.

³¹Tukuy chaykunaqa Idumeanta pasasqanku, jarakusqankutaj Bet-Surpa chimpampi. Ashkha día junt'ata Bet-Sur llajtaman yaykuyta munashasqanku. Chaypajqa maqanaku imasta apakusqanku. Israelitastaj, jark'anasninkumanta llojsispa chay makinasta ruphaykuchisqanku, maqanakusqankutaj mana manchachikuspa.

³²Judastaj, ripuspa Jerusalén jark'anamanta, jaranta oqharichisqa Bet-Zacarías qayllapi, reypa jarampa chimpampi.

³³Q'ayantintaj tutamanta rey usqhayllata kachaykukorqa Bet-Zacariasman soldadosninwan. Runasqa wakichikorqanku tinkupaj pututusninkuta waqachispa.

³⁴Elefantesman qosqanku uva yakuta, mora yakutawan, chaywan kallpachasqas maqanakuman rinankupaj.

³⁵Batallones chaupipi churasqanku elefantestaqa. Sapa elefantej muyuynimpi karqa waranqa runas sumaj p'achallisqas corazaswan, umankupi fierro monterayoj. Kallarqataj qayllankupi phishqa pachaj caballopi rejkuna ajllasqa runas.

³⁶Chay runasqa elefantej ñaupaqempipuni kakoj kanku. Rillajtaj kanku mayllamampis elefantewan khuska.

³⁷Sapa elefantej wasampi watasqa karqa uj k'ullumanta ruwasqa caja, kinsa runayoj, pikunachus chay patamanta maqanakoj kanku. Cajaj ñaupaqempitaj tiyakoj elefanteta purichej, India llajtayoj runa.

³⁸Caballopi rejkunataj churakoj kanku wakinku lloq'enejpi, wakinkutaj pañanejpi. Paykunaqa qallarej kanku maqanakuyta. Chakipi rejkunataj paykunata jark'aj kanku.

³⁹Inteqa lliphirichej chay qorimanta broncemantawan jark'anasta. Orqospis lliphirej kanku larwashaj k'anchanas jina.

⁴⁰Wakin soldados orqosman wicharisqanku. Wakintaj pampallanta risharqanku. Tukuy reypa soldadosnenqa sonqochasqas risharqanku sinru sinrulla.

⁴¹Karumanta uyarikun purisqanku maqanasninkuta sonachispa. Chayta uyarejqa manchachikuywan kharkatiterqa. Ashkha karqanku ari chay runasqa, kallpayojtaj atiyniyojtaj.

⁴²Judastaj runasninwan khuska thaskisharqa paykunawan tinkoj. Tinkunakuytawanqa, sojta pachaj reypa soldadosnin urmarqanku.

⁴³Uj runataj, Eleazar sutiyoj, Avarán nisqa, rikusqa uj elefanteta reypa unanchanwan k'achanchasqata. Chay elefanteqa aswan jatun kasqa tukuy elefantesmanta. Rikuspataj, Eleazarqa, chaypichá kashan rey, nisqa.

⁴⁴Eleazarqa chaypacha, ayllunrayku kausayninta churarqa. Ajinamantataj, sutenqa wiñaypaj rejsisqaña.

⁴⁵Ujta sat'iykukusqa soldados chaupipi, kayman jaqayman wajtaspa, runasta wañuchispa. Soldadosqa ithirej kanku. Ajinamanta, pay pasallarqa.

⁴⁶Elefantej wijsan urapi chukuspataj, wijsanta t'ojsispa wañucherqapacha. Elefantetaj wañuynimpi Eleazarpa patanman urmaykorqa, chay pachallapitaj wañuchispa.

⁴⁷Jinapis, rikuspa israelitasqa reypa atiyninta soldadosnimpa kallpankutawan, ayqellarqanku.

⁴⁸Wakin soldados Jerusalenman rerqanku israelitasta wajtaj. Reytaj soldadosninwan muyuykucherqa Judeata, Sión orqota ima.

⁴⁹Chaymantataj, payqa allinyakorqa Bet-Sur llajtamanta runaswan. Chay runastaj llajtamanta llojserqanku. Chaypi mikhuna mana kasqachu. Runasqa manapuni atinkumanchu karqa sayayta enemigos munashajtinku llajtaman yaykuyta. Chay watapi jallp'aqa samarinan karqa, samarina wata kasqanrayku.

⁵⁰Reytaj yaykullarqa Bet-Surman. Chaypitaj saqerqa uj regimientota.

⁵¹Chantaqa unayta kachaykukorqa temploj contranman. Chaypajqa ruwacherqa alto patasta chaymanta rumista choqamunankupaj llajtaman. Ruwacherqataj maqanaku makinasta, nina wijch'umunasta, rumi choqanasta, wach'ina kachamunasta, warak'astawan.

⁵²Israelitaspis makinasta ruwasqanku kutichikunankupaj. Ajinamanta, unayta maqanakusharqanku.

⁵³Jinapis, samarina wata kasqanrayku chay wataqa, mana ni ima mikhunapaj karqachu pirwasninkupi. Chantapis, chay israelitasqa, Judeaman jamorqanku pagano llajtasmanta chaykuna, tukuy puchusqan mikhunatapis tukusqankuña.

⁵⁴Yarqhay anchaña karqa. Chayrayku templopi pisi runaslla qhepakusqanku. Wakinku wasisninkuman ripurasqanku.

⁵⁵Nerqanchejña rey Antiocoqa wañuy patapi kashajtin, nisqanta Filipoman wakichinanta wawan Antiocota rey kanampaj.

⁵⁶Chantá willasqanku Lisiasman chay Filipoqa kutimusqanta Persiamantawan Mediamantawan, reypa soldadosninwan khuska. Nisqankutaj Lisiasman Filipoqa munashasqanta gobiernoman wichariyta.

⁵⁷Chayta yachaytawanqa, Lisias usqhayllata ordenta qorqa soldadosninman rinankupaj. Nerqataj reyman, kamachejkunaman, soldadosmampis: Kallpanchejqa pisiyashan astawan sapa día. Mikhunanchejpis tukukapushanña. Yaykuyta munashanchej chay lugarpis may sinch'i. Chantapis, qhawananchej tiyan reino asuntosta.

⁵⁸Uj tratota ruwana chay runaswan. Allinyakamuna paykunawan tukuynin nacionninkuwampis.

⁵⁹Kausallachunku ñaupajta jina, leyesninkuman jina, costumbresninkuta siguispa. Mana saqesqanchejrayku leyesninkuman jina kausanankuta, paykunaqa phiñakunku kaytataj ruwawayku.

⁶⁰Nisqanqa allin rijch'arqa reymampis kurajkunamampis. Lisiastaj nichimorqa israelitasman allinyakunankuta, israelitastaj arí nerqanku.

⁶¹Reypis kamachejkunapis juramentota ruwaspa, chay tratota ruwarqanku. Chaymantataj israelitasqa jark'anankumanta llojserqanku.

⁶²Reytaj, Sión orqoman chayajtintaj, rikorqa sumaj sinch'iyachisqa kasqanta chay lugarqa. Chantapis, juramentota p'akispa ordenta qorqa t'unarparichinankupaj muyuynimpi kashaj perqasta.

⁶³Chaymantataj, usqhayllata riporqa Antioquiaman. Chaypi Filipo kamachej jina sayashasqaña. Contranman kachaykukuspataj, sinch'ita maqanakuytawantaj, llajtata jap'ikaporqa.