Read Quechua Bolivia DC Bible 1 MACABEOS 7 Bible Online

1 MACABEOS 7 - Quechua Bolivia DC Bible bible

1 MACABEOS 7

¹Seleucoj wawan Demetrio, pachaj phishqa chunka ujniyoj kaj watapi, Roma llajtamanta llojsispa pisi runasllawan khuska, chayarqa uj llajtaman, jatun qochaj qayllampi kasharqa chayman. Chaypitaj rey jina kamachiyta qallarerqa.

²Wakichikushajtintaj yaykunampaj ñaupa tatasnimpa wasinkuman, soldadosqa presochasqanku Antiocotawan Lisiastawan, Demetrioj makisninman churanankupaj.

³Chayta yachaspataj, Demetrioqa nerqa: Ama rikuchiwaychejchu uyasninkutaqa, nispa.

⁴Chantaqa, soldados wañuchisqanku paykunata. Ajinamanta, Demetrioqa rey tiyanapi tiyaykukorqa.

⁵Chaymanta, Alcimowan waj mana leyniyoj Diosta wasanchaj israelitaswan khuska, reyta watukorqanku. Chay Alcimoqa munashasqa jatun sacerdoteman tukuyta.

⁶Paykunaqa reypa ñaupaqempi Diospa ayllumpaj kay jinata rimarqanku: Judaswan wauqesninwan tukuy amigosniykita chinkachinku, noqaykutataj llajtaykumanta qharqowarqayku.

⁷Kunanqa, reyniyku, kachay uj ajllakusqayki runata rikunampaj imatachus paykunaqa ruwawarqayku, imatachus ruwarqanku qampa jallp'aykiwampis, chayta. Chay runaqa rispa castigachun paykunata, qhepanakuta rejkunatawan.

⁸Reytaj ajllasqa Baquidesta. Chay Baquidesqa reypa amigon kasqa. Chaykama payqa kamachej jallp'aspi Eufrates mayumanta pañanejpi kashan chaypi. Chay runaqa may rejsisqa karqa reinopi, reyman k'askasqataj karqa.

⁹Baquideswan khuska rinampaj reyqa kachamullarqataj chay rumi sonqo Alcimota. Paykunaman ordenta qosqa kutichikunankuta israelitasman. Alcimotataj nisqa jatun sacerdoteman tukuchinanta.

¹⁰Chay iskayninku kachaykukusqanku Judeaman. Chayaspataj ashkha soldadoswan kachasta kachamusqanku. Chay kachastaj misk'i simiwan parlarqanku Judaswan wauqesninwantaj, llullakuspataj nerqanku allimpi kausakunankuta.

¹¹Judastaj mana uyarikorqachu nisqankuta, rikusqanrayku ashkha soldadoswan chayamusqankuta.

¹²Jinapis, wakin Diospa leyninta yachachejkuna rerqanku taripaj Alcimotawan Baquidestawan uj tratota ruwayta munaspa.

¹³Hasideos nisqa chay runasqa tukuykunamanta ñaupajta chay tratota ruwayta munasharqanku.

¹⁴Paykunaqa nisharqanku: Aarompa mirayninmanta kaj uj sacerdote soldadoswan khuska chayamun. Chay runaqa mana ni ima sajrata ruwawasqaykuchu, nispa.

¹⁵Kikin Alcimo misk'i simiwan paykunaman parlarqa, juramentota ruwaspataj nerqa: Noqaykoqa mana ni ima sajrata ruwasqaykuchu qankunaman amigosniykichejmampis, nispa.

¹⁶Chayrayku paykunaqa payta creerqanku. Chaymantataj Alcimoqa presocharqa sojta chunkata paykunamanta, uj diallapitaj wañucherqa, Escritura nisqanman jina.

¹⁷Munakusojkunaj ayasninkuta t'aqararqanku, yawarninkutataj jich'arqanku tukuy Jerusalempi. Manataj kanchu p'ampajqa.

¹⁸Tukuy runastaj manchachikoj kanku. Nisharqankutaj: Chay runasqa mana cheqan sonqoyojchu. P'akinku ari chay juramentowan trato ruwasqankuta.

¹⁹Baquidestaj riporqa Jerusalenmanta, jarakorqataj Bet-Zetpi. Chaymanta presoyacherqa ashkha runasta payman pasakorqanku chaykunamanta, waj israelitastawan. Nerqataj wañuchinankuta wijch'unankutataj uj t'oqoman.

²⁰Chaymantataj Baquidesqa saqerqa chaypi Alcimota kamachejta jina. Saqerqataj ashkha soldadosta yanapanankupaj. Chantaqa kutimporqa maymanchus rey kasharqa chayman.

²¹Alcimotaj munasharqapuni jatun sacerdote kayta.

²²Tukuy ch'ajwata ruwajkunapis payman k'askakoj kanku. Paykunaqa dueñochakorqanku Israelmanta, miracherqankutaj llakiyta tukuy Israelpi.

²³Judastaj rikorqa imatachus ruwashasqankuta Alcimowan runasninwan. Aswan millayta ruwasqanku paganosmanta nisqaqa.

²⁴Judastaj rikuspa imatachus ruwashasqankuta, tukuy Judeanta purerqa, castigarqataj pikunatachus enemigoman pasakorqanku chaykunata. Nerqataj ama Judeanejpi purikunankuta.

²⁵Alcimo rikuspa Judaspis wauqesnimpis ancha kallpayoj kasqankuta, yachaspataj pay kikin mana atipayta atisqanta, reypaman kutimporqa, paykunatataj tumparqa jatuchej sajra imasmanta.

²⁶Reytaj Nicanorta kachamorqa nispa israelitasta tukuchinanta. Chay Nicanorqa may rejsisqa general karqa. Israelitastaqa anchatapuni chejnikoj.

²⁷Ashkha soldadoswan chayarqa Nicanorqa Jerusalenman. Puraj uyawantaj kachamorqa Judasman wauqesninmantaj allin palabrasta, kayta nichimuspa: Ama kachunchu maqanaku noqawan qanwan. Pisi runasllawan jamushani qanwan parlaj sonqo tiyasqa kaypi.

²⁸

²⁹Ajinamanta, pay chayarqa Judaspaman. Iskayninkutaj napaykunakorqanku respetowan. Judaspa enemigosnintaj wakichisqasña karqanku payta jap'inankupaj.

³⁰Yachaspaña Judasqa Nicanor jamusqanta llulla sonqowan, manchachikorqa, manañataj munarqachu payta rikuyta.

³¹Rikuspa Nicanor yachakusqantaña sajra yuyayninta, kachaykukorqa Judaswan maqanakoj. Tinkunakorqankutaj Cafarsalama chaynejpi.

³²Chay tinkupitaj Nicanorpa runasninmanta phishqa pachaj jina karqanku wañojkunaqa. Puchojkuna ayqerqanku David llajtaman.

³³Chaymantataj, Nicanorqa riporqa Sión orqoman. Payta napaykoj chayarqanku wakin templomanta sacerdotes wakin kurajkunawan khuska. Sonqo tiyasqa kaypi napaykuytawanqa, paykunaqa rikucherqanku rikuchikusta, reypaj jallch'asharqanku chaykunata.

³⁴Paytaj asipayaspa, paykunata thoqaykorqa ch'ichichasqas qhepakunankupaj. Anchatapunitaj trataykorqa.

³⁵May phiñasqa, kay juramentota ruwarqa: Manachus makisniyman churapuwankichej chayqa chay Judasta soldadosnintinta, kutimuspa atipasqaymanta kay maqanakupi, kay templota ruphaykuchisaj, nispa. Riporqataj may phiñasqa.

³⁶Sacerdotestaj temploman yaykuspa, sayarqanku rikuchiku altar qayllapi, santuarioj chimpampi, waqaspataj nerqanku kay jinata: Qan kay templota ajllarqanki sutiykiwan sutichasqa kanampaj, kaypi runasniyki qanmanta mañakunankupajtaj.

³⁷

³⁸Kutichiy kunanqa kay runaman soldadosninman ima. Paykunaqa espadawan wañuchisqas kachunku. Yuyarikuy millay palabrasninkumanta. Castigallayña paykunataqa.

³⁹Nicanorqa Jerusalenmanta llojsispa Bet-Horompi jarakorqa. Siria llajtayoj soldadostaj chaypi ujchakorqanku paywan.

⁴⁰Judasrí sayasharqa Hadasapi kinsa waranqa runaswan. Judastaj chaypacha, Diosmanta mañakorqa kay jinata: Maypachachus Asiria reypa kachasnin jamorqanku qampaj millayta rimaj, angelniyki jamuspa wañucherqa pachaj pusaj chunka waranqa soldadosta ejercitonmanta.

⁴¹

⁴²Ajinallataj, kunampis ñaupaqeykupi tukuchiy kay soldadosta. Tukuy wajkuna yachachunku Nicanorqa millayta parlasqanta temploykipaj. Sajra kayninman jina paytaqa castigay.

⁴³Chay iskay ejercitosmanta soldadosqa maqanakupi tinkorqanku Adar killamanta chunka kinsayoj kaj diapi. Nicanorpa soldadosnin tukuchisqas karqanku. Nicanorpuni ñaupajta urmarqa.

⁴⁴Nicanorpa soldadosnenqa rikuytawanqa kamachejninku wañuchisqa kasqanta, maqanaku armasninkuta saqerparispa ayqerqankupacha.

⁴⁵Judiostaj qhatiykorqanku paykunataqa uj día junt'ata Hadasamantapacha Gezerkama, pututusta waqachispa wasankumanta.

⁴⁶Tukuynejpi Judea llajtasmanta runa llojsimoj, muyuykamojtaj kanku ayqejkunata. Kutichimorqankutaj, paykunapurata tinkunachispa.

⁴⁷Tukuyninkutaj espadawan wañuchisqas karqanku. Mana ni ujllapis kausarqachu. Chantaqa judiosqa tarisqankuta apakaporqanku. Chaymanta, qholurparerqanku Nicanorpa umanta, paña makintapis khuchurarqanku. Chay makintaqa paymin wapu wapulla aysasqa. Umantawan makintawan Jerusalenman aparqanku runas rikunankupaj.

⁴⁸Runasqa anchata kusikorqanku. Chay diataj paykunapaj karqa jatun fiesta.

⁴⁹Chantaqa, nerqanku chay kutimantapacha chay diaqa waqaychasqa kananta sapa wata chunka kinsayoj kaj diapi Adar killamanta.

⁵⁰Qhepan wataspitaj allin kay karqa Judá jallp'api.