Read Quechua Bolivia DC Bible 1 MACABEOS 8 Bible Online

1 MACABEOS 8 - Quechua Bolivia DC Bible bible

1 MACABEOS 8

¹Judasqa allinta parlayta uyarisqa romanosmanta. Payman nisqanku romanosqa may wapus kasqankuta maqanakupi, qhawasqankutataj tratosta munakuywan pikunawanchus paykunawan k'askakunku chaykunawan.

²Nisqankutaj romanosqa atiyniyoj kasqankuta. Willasqankutaj maqanakusninkumanta, nispa imaynatachus romanosqa jatuchaj imasta ruwasqanku galospa contrankuta. Chay galosta atipasqankumantawan, paykunamanta mañakoj kasqanku impuestosta.

³Chantapis romanosqa jap'ikapusqanku qolqe qhoyasta, qori qhoyastawan Españapi.

⁴Unanchakuywan kallpawantaj dueñochakusqanku tukuy chay jallp'asmanta, ancha karu kashajtimpis llajtankumanta. Ukhu jallp'asmanta reykuna chayamusqanku romanoswan maqanakoj. Chay reykunataqa romanosqa atipaykusqanku sinch'ita saruspa. Waj reykunapis qoj kasqanku paykunaman impuestosta sapa wata.

⁵Jinallataj atipaykusqanku maqanakupi Macedonia reykunata Filipotawan Perseotawan. Paykunatapis runasninman tukuchisqanku. Kikillantataj ruwasqanku tukuy contrankuman llojsejkunatapis.

⁶Asia rey Antíoco, Jatun nisqa, maqanakusqa romanoswan tinkuman apaspa iskay chunka elefantesta, caballostawan, carretastawan, ashkha soldadosta ima. Jinapis, atipachikullasqataj.

⁷Antiocotaqa kausakushajta jap'isqanku. Nisqankutaj paypis, qhepampi reykuna kajkunapis romanosman paganankuta ashkha impuestota. Nillasqankutaj romanospaman kachamunankuta runasta kamachis kanankupaj.

⁸Chaymantataj, qochikusqanku wakin sumachaj provinciasta: Liciata, Miciata, Lidiatawan. Romanosqa chay jallp'asta jap'ikuytawanqa rey Eumenesman qosqanku.

⁹Uj kuti Grecia llajtayoj runasqa wakichikushasqanku rinankupaj romanoswan maqanakoj chinkachiyta munaspa.

¹⁰Romanostaj chayta yachaspa paykunaj contrankuman kachasqanku uj kamachejllata. Chaytaj kachaykukusqa griegoswan tinkunakoj. Ashkhataj k'irisqas kasqanku, ashkhataj wañusqanku chay tinkupi. Romanostaj apakapusqanku paykunaj warmisninkuta wawasninkuta ima. Tukuy imasninkutapis jap'ikapusqanku. Dueñochakusqankutaj jallp'asninkumanta. Chantapis, jatuchaj jark'anasninkuta t'unarparisqanku. Chay runasta romanosqa kamachisman tukuchinku kunankama.

¹¹Ajinallataj, mayllapipis runasqa oqharikoj kasqanku romanospa contrampi, romanosqa saroj kanku paykunata, kamachismampis tukuchej kanku. Ajinapuni karqa jatuchaj reinoswan, qocha chaupipi churuswampis.

¹²Jinapis, allin ñawiwan qhawaj kasqanku amigosninkuta, paykunaman k'askakojkunatawan. Chay romanosqa atipasqanku karupi kaj reykunata, qayllapi kaj reykunatawan. Chayrayku, pikunachus parlayta uyarinku paykunamanta manchachikuywan kharkatitinku.

¹³Cheqamanta, pikunatachus romanosqa yanapanku reykuna kanankupaj, reykunaman tukunku. Chantaqa, munajtinku pillatapis urmachiyta rey tiyananmanta, urmachillanku. Chay romanosqa jatun atiyniyojmin kanku.

¹⁴Jina kajtimpis, mana ni uj romanollapis pilluta churakunchu umanman, nitaj pukamanta p'achallikunchu, uman oqharispa purispa.

¹⁵Senado nisqa wasipi sapa día tantakoj kasqanku kinsa pachaj iskay chunka runas. Chaypi chay runasqa umachakuspa unanchaj kanku romano runaspa alliyninmanta, yuyajtaj kanku allin kausay kananta.

¹⁶Ajllaj kasqankutaj sapa wata uj runata kamachejninkupaj. Chay jatun kamachejqa tukuy Roma jallp'aspipuni kamachin. Chay kamachejtaqa tukuy kasukunku. Senado runas ukhupi mana kanchu nin ni ima churanakus, nitaj envidianakunkuchu paykunapura.

¹⁷Chaymantataj, Judasqa wajyachisqa Acosmanta Juampa wawan Eupolemota, Eleazarpa wawan Jasontawan, nisqa rinankuta Roma llajtaman uj allinyanaku tratota romanoswan ruwanankupaj.

¹⁸Yuyasharqanku chay jinamanta llojsiyta atinankuta griegospa atiyninkumanta, imaraykuchus griegosqa israelitasta kamachisman tukuchishasqankuña.

¹⁹Chay kachastaj kachaykukusqanku Romaman. Ancha karu kasqanrayku Roma llajta Jerusalén llajtamanta, ashkha diasmantawan chayasqanku Romamanqa. Chayaytawantaj, senadoman risqanku. Chaypitaj, kay jinata nisqanku: Judas, Macabeo nisqa, wauqesnintaj, tukuy judío ayllupis, kachamuwayku qankunaman ninaykupaj munasqaykuta uj tratota qankunawan ruwayta, allin kaypi kausayta munaspa. Noqaykoqa munashayku qankunawan khuskachakuyta amigosniykichejman tukuspa.

²¹Chay nisqankoqa allin rijch'asqa romanosman.

²²Chantaqa, Jerusalén llajtaman kachamusqanku broncepi qelqasqata chay ruwasqanku tratota, Jerusalempipis waqaychasqa kanampaj, tukuy yuyarikunankupaj. Chay qelqasqaqa kaymin:

²³Allin kausachunku romanospis judiospis wiñaypaj, jatun qochapipis, jallp'apipis. Espadayoj enemigosqa karunchasqas kachunku.

²⁴Sichus romanosqa, mayqen paykunawan khuskachasqa ayllupis, maqanakuman yaykunkuman chayqa mayllapipis Roma jallp'aspi, judiosqa tukuy sonqo paykunata yanapananku tiyan, atisqankuman jina.

²⁶Judiosqa manapuni qonankuchu tiyan nitaj mikhunata, nitaj maqanaku armasta, nitaj qolqeta, nitaj barcostapis romanosta chejnikojkunaman. Kaymin Roma llajtaj munaynin. Judiosqa kay tratota junt'anqanku mana qolqeta mañaspa.

²⁷Jinallataj, sichus judíos maqanakuman yaykunku chayqa, romanosqa yanapananku tiyan paykunata, atisqankuman jina, mana ni imata mañaspalla.

²⁸Chantapis, romanosqa mana qonqankuchu israelitasta chejnikojkunaman nitaj mikhunata, nitaj maqanaku armasta, nitaj qolqeta, nitaj barcostapis. Kaymin Roma llajtaj munaynin. Romanosqa kay tratota junt'anqanku mana ch'aukiyaspa.

²⁹Romanosqa kay tratota ruwanku judío aylluwan.

³⁰Sichus qhepanta ujnin iskayninkumanta munanman imallatapis yapaytachus qhechuytachu kay tratoman, chaytaqa ruwayta atillanku, munayninkuman jina. Chay yapasqankuchus, qhechusqankuchus junt'akunampuni tiyan.

³¹Chantaqa, yachaspa rey Demetrio judiosta llakichisqanta, payman uj cartata apachimuykuña kay jinata: Imaraykutaj sarushankiri amigosniyku israelitasta, pikunawanchus yanapanaku tratota, ruwarqayku, chaykunata?

³²Ujtawan jamonqanku chayqa willakoj paykunata llakichisqaykita, noqaykoqa rispa llojsisqayku qanwan maqanakoj, jatun qochapipis, jallp'apipis.