Read Quechua Bolivia DC Bible 1 MACABEOS 9 Bible Online

1 MACABEOS 9 - Quechua Bolivia DC Bible bible

1 MACABEOS 9

¹Demetrio yachaytawan judiosqa wañuchisqankuta Nicanorta soldadosnintinta maqanakupi, watejmanta kachamorqa Judeaman Baquidestawan Alcimotawan. Paykunaqa apasqanku paña lado nisqa regimientosta.

²Paykunaqa jap'isqanku Galileaman pusaj ñanta, yaykusqankutaj Arbela provinciamanta Mesalot llajtaman. Chay llajtataqa jap'ikapusqanku. Chaypitaj ashkha runasta wañuchisqanku.

³Pachaj phishqa chunka iskayniyoj kaj watapi, ñaupaj kaj killapi, paykunaqa jarakorqanku Jerusalempa chimpampi.

⁴Chaymanta Beerotman kachaykukorqanku iskay chunka waranqa chakipi rej soldadoswan, iskay waranqa caballopi rej soldadoswantaj.

⁵Judastaj chaykama jarakushasqa Elasapi kinsa waranqa ajllasqa soldadoswan.

⁶Judaspa runasnintaj rikuspa enemigosninku jina ashkha kasqankuta, anchatapuni mancharikorqanku. Ashkhastaj paykunamanta jaramanta ayqekaporqanku. Jinamanta, chaypi pusaj pachaj runaslla qhepakorqanku.

⁷Rikorqataj Judasqa runasnin ayqesqankuta. Yachaspataj yaykunampuni kasqanta maqanakuman, sonqon llauch'iyarqa mana atisqanrayku watejmanta runasta tantaytaqa.

⁸Jinapis, qhepakojkunaman parlarqa kay jinata: Rina enemigosninchejwan tinkoj. Ichapis atillasunchej atipayta, nispa.

⁹Soldadosnintaj payman nerqanku: Mana atisunchejchu. Ayqenalla, manachayqa, wañusunchejpuni. Chaymanta kutimullasunchej masisninchejwan khuska enemigosninchejwan maqanakoj. Kunan ancha pisillaj kanchejqa, nispa.

¹⁰Judastaj nerqa: Maymanta noqaqa ayqeymanri enemigosniymanta! Qhepan hora chayamuwanchej chayqa, sinch'i sonqo wañuna hermanosninchejrayku. Mana saqenachu glorianchej ch'ichichakunanta.

¹¹Baquidespa soldadosnintaj jarankumanta llojsispa wakichikorqanku maqanakupaj. Caballopi rejkuna iskaymin t'aqakorqanku. Ñaupajta risharqanku warak'asniyojkuna, wach'inasniyojkunataj. Aswan wapu kajkunataj ñaupasharqanku.

¹²Baquidesqa pañanejpi risharqa. Iskayman t'aqasqa ejercitoqa chayamusharqaña pututusta waqachispa.

¹³Sonachisqanku pampata kuyurichej. Tinkuytawantaj maqanakorqanku paqarinmantapacha inti yaykunankama.

¹⁴Rikusqataj Judasqa Baquides ajllasqa runasninwan khuska paña ladopi kasqanta. Judasman qayllaykusqanku aswan wapu kaj runasnin.

¹⁵Judasqa runasninwan khuska kachaykukusqa paña kaj ladoman. Chantaqa Baquidespa runasninta qhatiykachasqa Azoto orqoskama.

¹⁶Lloq'e ladopi kajkunataj, rikuspa paña ladopi kajkuna atipachikusqankuta, kutirisqanku Judaspa qhepanman, runasnintataj wasankumanta qhatiykusqanku.

¹⁷Ch'ajwaqa may sinch'i kasqa. Sapa t'aqamanta kajkunapis urmachisqas kasqanku kaypi jaqaypi.

¹⁸Judaspis urmallasqataj. Wajkunataj ayqerparikapusqanku.

¹⁹Jonatán, Simontaj ima pusakapusqanku Judas wauqenkuta, p'ampaykusqankutaj Modimpi, maypichus tatasninkoj sepulturanku kasqa chaypi.

²⁰Tukuy israelitastaj waqaykusqanku paymanta. Ashkha diastaj lutota waqaychasqanku paymanta, nisqankutaj: Imaynatataj urmanri kallpayoj kaj, pichus Israelta salvarqa chaymin?

²¹

²²Wakin Judaspa ruwasqasnenqa, waj maqanakunasnimpis, t'ukuna imasta ruwasqasnimpis, mayqenkunapichus gloriayoj rikhurerqa chaykuna, mana churasqarajchu kanku libropi, may chhika kasqankurayku.

²³Chantaqa, Judas wañupusqanmantapacha, tukuy Israel cheqaspi rikhurimunku mana leyniyojkuna. Sajrata ruwajkunaqa tukuynejpi kasqanku.

²⁴Chay tiempopi may jatun yarqhay rikhurimusqa tukuynejpi, tukuy runastaj pasakapushasqanku chay sajra runasman.

²⁵Baquidestaj Diosta wasanchaj runasta ajllarqa, paykunatataj kamachejkunaman tukucherqa tukuynejpi.

²⁶Chay runasqa tukuynejman risqanku mask'aj Judaspa amigosninkuta, tarispataj apasqanku Baquidespaman. Paytaj paykunata ñak'arichisqa, sinch'itataj trataykusqa.

²⁷Tukuy Israelpaj may sinch'i llakiy karqa. Chay jina llakiy mana karqachu profetaspa tiemponkumantapacha.

²⁸Chantaqa, tukuy Judaspa amigosnin, ujllapi tantaykuspa, nisqanku Jonatanman: Judas hermanoyki wañupusqanmantapacha mana ni uj qharillapis rikhurimunchoqa mask'aj rinampaj enemigosninchejta, Baquidesta runasninta ima, pikunachus chejniwanchej chaykunata.

²⁹

³⁰Kunanqa, noqayku qantaqa ajllakuyku paypa cuentanmanta kamachejniyku kanaykipaj, pusanawaykupajtaj maqanakuspi, nispa.

³¹Kikimpacha Jonatanqa jatun kamachejman tukun, Judas wauqempa cuentanmanta.

³²Chayta yachaspa Baquidesqa munashasqa Jonatanta wañuchiyta.

³³Chayta willasqanku Jonatanman, paypa wauqen Simonman ima. Paykuna, runasninkuwan khuska ayqesqanku uj ch'in pampaman, Tecoa nisqa chayman, tiyakusqankutaj Asfar qocha chaynejpi.

³⁴Baquidestaj, chayta yachaspa, uj samarina diapi, tukuy soldadosninwan pasasqa Jordán mayu chimpaman.

³⁵Jonatanqa chantá kachamusqa ujnin wauqenta runasnintinta amigosninku nabateospaman, paykunamanta licenciata mañakunankupaj, paykunaj jallp'asninkupi q'episninkuta saqenankupaj.

³⁶Chaymantataj, Medaba llajtamanta llojsisqanku Jambrí aylluyojkuna. Chayaspataj maypichus kasharqa Juan chayman, payta jap'iykusqanku q'episnintinta. Chantaqa, ayqesqanku.

³⁷Uj kuti Jonatantaj wauqen Simontaj yachasqanku Jambrí aylluyojkuna jatun casamiento fiestata ruwasqankuta. Paykunaman willasqanku imaynatachus ashkha runaswan khuska noviata Nabadotmanta pusamusqankuta. Chay noviajta tatanqa qhapaj runa karqa Canaampi.

³⁸Jonatantaj Simontaj yuyarikusqanku chay runaspuni wañuchisqankuta wauqenku Juanta. Kachaykukusqanku, pakakusqankutaj orqospi.

³⁹Ujta rikusqanku ashkha runasta, ch'ajwaspa q'episniyojta. Waj ladomantañataj chayamushasqa novio amigosninwan, wauqesninwan khuska. Chay runasqa tocanasninkuta waqachisharqanku. Maqanaku armasniyojtaj kasqanku.

⁴⁰Judiostaj ujta rikhurimusqanku. Ashkha runasta wañuchisqanku, wakintataj nanaykuchisqanku. Tukuy imanakutataj jap'ikapusqanku. Puchojkunataj ayqesqanku orqosman.

⁴¹Ajinamanta, casamientoqa waqayman tukun, takiytaj llakiyman.

⁴²Ajina ari Jonatantaj Simontaj pagachikunku wauqenku Juan wañuchisqa kasqanmanta. Chantaqa ripusqanku Jordán mayu chimpaman, t'uru t'urulla kashan chayman.

⁴³Chayta yachasqa Baquidesqa. Yachaytawantaj, uj samakuna diapi risqa Jordán mayu chimpaman ashkha runaswan.

⁴⁴Jonatantaj nisqa paywan rejkunaman: Kunanqa sayarina. Rina maqanakoj kausayninchejrayku. Kunan diaqa mana qayna jinachu nitaj qanimpa jinachu.

⁴⁵Ñaupaqenchejpij maqanaku kashan, jinallataj wasanchejpipis. Jordán yakustaj kaypipis jaqaypipis t'uru t'urulla, ch'ampa ch'ampalla kashan. Mana ni maymampis ayqeyta atisunchejmanchu.

⁴⁶Kunanqa, janaj pachaman qhapariychej salvasqas kanaykichejpaj enemigosninchejpa makisninkumanta.

⁴⁷Ch'ajwataj qallarisqaña. Jonatanqa makinta oqharisqa Baquidesta wajtayta munaspa. Manataj qosqachu. Baquidestaj ayqekapusqa.

⁴⁸Chaymanta, Jonatanwan runasninwan Jordán mayuman kachaykukusqanku, wayt'aspataj chimpaman chayasqanku. Enemigosninkutaj mana qhatiykusqankuchu Jordán mayunta.

⁴⁹Chay diapeqa Baquidespa runasninmanta waranqa runas wañusqanku.

⁵⁰Chaymantataj, Baquidesqa Jerusalén llajtaman kutimpusqa. Judea jallp'api perqachasqa llajtasta oqharichisqa. Rumi jark'anasta ruwachimusqa Jericopi, Emauspi, Bet-Orompi, Betelpi, Timnapi, Piratompi, Tapuapi ima. Tukuynejpi oqharichisqa jatuchaj perqasta punkusniyojta aldabasniyojta ima.

⁵¹Tukuy chay cheqaspi soldadosta saqesqa, israelitasta toreyamunankupaj.

⁵²Chantapis, sinch'iyachisqa Bet-Surta, Gezerta, Jerusalentapis. Chaypi saqesqa soldadosta. Chaypitaj waqaychachisqa mikhunasta.

⁵³Baquidesqa presochachisqa kurajkunaj wawasninkuta, wisq'achimusqataj Jerusalén jark'ana wasipi.

⁵⁴Pachaj phishqa chunka kinsayoj kaj watapi, iskay kaj killapi, Alcimoqa ordenta qosqa urmachinankupaj perqasta templomanta, chaupi patiopi kasharqanku chaykunata. Ajinamanta tukuchiyta munasharqa profetaspa ruwasqasninkuta. Chay perqasta t'unarparichiyta qallarishasqankuña.

⁵⁵Perqasta t'unarparichiyta qallarishajtinkutaj, ujta Alcimoqa onqoykusqa, yuyayninta chinkachikuspa. Chay jawa, manaña perqasta urmachinkuñachu. Alcimoj simenqa opayaykusqa. Manataj testamentontapis ruwayta atisqañachu, manataj ni uj simillatapis parlarisqañachu.

⁵⁶Alcimoqa chaypacha wañupun sinch'i nanaywan.

⁵⁷Yachaspataj Baquides Alcimoqa wañusqaña kasqanta, reypaman kutimpusqa. Judá jallp'apitaj allin kay karqa iskay watata.

⁵⁸Chantaqa, tukuy Diosta wasanchaj judiostaj tantaykusqanku. Nisqankutaj: Kunanqa chay Jonatán, paywan khuska rejkunataj allin kaypi kausakushanku, mana ni imamanta manchachikuspalla. Kunampacha kutirichimuna Baquidesta. Chantá rina tukuy paykunata jap'iykoj uj ch'isillapi.

⁵⁹Risqankutaj Baquideswan tinkukoj.

⁶⁰Baquidestaj jamusqa ashkha soldadoswan. Chantapis pakayllamanta cartasta kachachimusqa Judapi tiyakoj masisninman, nichimuspa Jonatanta runasninta ima presochanankuta. Manataj atisqankuchu paykunata jap'iyta, yuyayninkuta yachasqankurayku.

⁶¹Jonatantaj, chay oqharikojkunamantaqa, phishqa chunka jinata jap'ichisqa, wañuykuchisqataj.

⁶²Chaymanta, Jonatantaj, Simontaj, paykunawan rejkuna ima, ripusqanku ch'in pampaman, Bet-Basiman. Chaypi oqharisqanku perqa jark'anasta, urmachisqas karqanku chaykunata.

⁶³Baquidestaj chayta yachaytawankama, tantamusqa tukuy soldadosninta, willachimusqataj Judeapi qhatejkunasninman.

⁶⁴Bet-Basi qayllapi jarananta sayachisqa, Chantá, maqanaku maquinasta ruwachisqa. Chantá, ashkha día junt'ata maqanakusqanku Bet-Basipi kajkunawan.

⁶⁵Jonatán saqesqa wauqen Simonta llajtapi. Pisi runasllata tantaykuspataj, jawaman llojsisqa.

⁶⁶Atipasqataj Jonatanqa odomerasta fasironkunatawan jarasninkupi. Kayman jaqayman wajtaspataj, wicharisqanku astawan ashkha soldadoswan.

⁶⁷Chaykama, Simonwan runasninwan llojsisqanku maquinasta enqhaykoj.

⁶⁸Risqankutaj Baquideswan tinkunakoj. Atipachikusqataj Baquidesqa paykunawan. Mayta llakikusqa, ruwayta munasqantaqa mana ruwayta atisqanmanta.

⁶⁹Baquidesqa mayta phiñakusqa chay Diosta wasanchaj runaspaj, pikunachus payta mask'arqanku chay jallp'aman rinampaj. Paykunamantaqa ashkhata wañucherqa. Chaymanta, piensasharqa llajtanman kutimpuyta.

⁷⁰Jonatanqa Baquidespaman kachamusqa kurajkunata, Baquideswan allinyakamunankupaj, mañakunankupajtaj presochasqasta kutichipunankuta.

⁷¹Baquidestaj, uyarispa nisqankuta, ruwarqa Jonatampa nisqanman jina. Chaymanta, juramentota ruwaspa, nisqa ni jayk'ajpis kausaynimpi ni ima sajratapis ruwananta payman.

⁷²Chantaqa, qopusqa presochasqa runasta mayqenkunatachus Judá jallp'amanta pusachimusqa chaykunata. Chaymantataj, Baquidesqa llajtanman kutimpusqa, manañataj judiospa jallp'ankuman kutisqañachu.

⁷³Israel llajtapitaj chay kutimantapacha espada karunchakorqa. Jonatantaj Micmaspi tiyakorqa. Jonatanqa kamachiyta qallarerqa Israelpi. Chinkachisqataj Israelpi Diosta wasanchajkunata.