Read Quechua Bolivia DC Bible 2 MACABEOS 1 Bible Online

2 MACABEOS 1 - Quechua Bolivia DC Bible bible

2 MACABEOS 1

¹Jerusalén llajtamanta judíos, Judea jallp'amanta judíos ima, napaykunku judío masisninkuta, Egiptopi tiyakojkunata, paykunapajtaj Diosmanta mañakunku sonqo tiyasqa kayta.

²Diosninchej qankunata yanapachumpuni yuyarikuspa trato ruwasqanmanta Abrahamwan, Isaacwan, Jacobwan ima. Paykunaqa Diosta tukuy sonqo sirvej kanku.

³Paymin yanapasuchun tukuy qankunata payman k'askakunaykichejpaj tukuy sonqo, paypa kamachikusqantataj junt'anaykichejpaj tukuy manakuywan.

⁴Payqa sonqosniykichejta kicharichun kamachikusqasninta junt'anaykichejpaj, tukuy ima nisqantataj, ajinamanta qosunaykichejpaj sonqo tiyasqa kayta.

⁵Payqa mañakusqaykichejta uyarichun, allinyakuchuntaj qankunawan, amataj qankunamanta qonqapuchunchu llakisqa kajtiykichej.

⁶Kunampis, noqaykoqa kaypi qankunapaj Diosmanta mañakushayku.

⁷Pachaj sojta chunka isq'onniyoj kaj watapi rey Demetrio kamachisqanmanta, noqayku judiosqa qankunaman kay cartata apachimuyku llakisqas kashajtiyku tukuy ima laya ch'ajwawan, imachus chayamuwayku kay wataspi maypachachus Jasonqa, payta qhatejkuna ima, oqharikorqanku kay santo jallp'aj contrampi, nacionninchejpa contrampitaj.

⁸Paykunaqa enqhaykorqanku templo punkuta, wañucherqankutaj mana juchayoj runasta. Noqaykutaj Señormanta mañakorqayku. Señortaj mañakusqaykuta uyarikorqa. Payman jaywarqayku rikuchikustawan jak'utawan. Lamparastapis k'anchaykucherqayku, altarmantaj churarqayku paypaj chijllasqa t'antasta.

⁹Kunanqa qankunaman escribimuyku fiestata ruwanaykichejpaj Ramadas nisqa chayta Quisleu killapi. Kayta escribimuyku pachaj pusaj chunka pusajniyoj watapi.

¹⁰Jerusalén llajtapi tiyakojkuna judíos, tukuy Judea jallp'api tiyakojkunataj, kurajkunataj, Judastaj, napaykuyku Aristobulota, rey Tolomeoj yanapajninta, ajllasqa sacerdotespa ayllunmanta kajta. Napaykullaykutaj tukuy Egiptopi tiyakojkuna judiosta. Tukuy qankunapaj allin kay kachun.

¹¹Señorqa noqaykuta kacharichiwarqayku may sinch'i llakiykunamanta. Chayrayku, noqaykoqa payta agradecekuyku noqaykuwan khuska maqanakusqanmanta reypa contrampi.

¹²Paypuni qharqorqa llajtamanta pikunatachus ajllasqa llajtata chinkachiyta munasharqanku chaykunata.

¹³Rishajtin ari reyqa Persiaman ashkha runasniyoj, mayqenkunamantachus ninchejman manapuni atipachikusqas kanankuta, q'ala wañurachisqas karqanku diosa Naneaj templompi, ch'aukiyachikuspa chay diosaj sacerdotesninwan.

¹⁴Antiocoqa nisqa casarakuyta munasqanta chay diosawan. Chantaqa, reyqa amigosninwan risqa temploman, jap'ikapuyta munaspa qolqeta, casamiento regalota jina.

¹⁵Naneaj sacerdotestaj rikuchisqanku qolqenkuta Antiocoman. Antiocotaj wakin amigosninwan yaykusqa templo ukhuman. Yaykuytawantaj sacerdotesqa templo punkuta wisq'aykusqanku.

¹⁶Chaymantataj kichariykusqanku uj ventanata, wasi patapi kajta. Chantaqa, chay ventanamantapacha rumiswan chanqaykuspa wañuchisqanku reyta amigosnintinta. Chantaqa, khuchurasqanku umasninkuta, makisninkuta, chakisninkuta ima. Chayta ruwaytawantaj, umasta, makista, chakistataj wijch'umusqanku jawapi kasharqanku chaykunaman.

¹⁷Yupaychasqapuni kachun wiñaypaj Diosninchej pichus pusarqa wañuyman chay mana creejkunata.

¹⁸Wakichikushaykuña noqaykoqa yuyarikunaykupaj templonchej watejmanta llimphuyachisqa kasqanmanta. Chay fiestata ruwasqayku Quisleu killapi, iskay chunka phishqayoj kaj diapi. Chayrayku, allin rijch'awarqayku qankunaman kay cartata apachimuyta, qankunapis Ramadas nisqa fiestata ruwanaykichejpaj yuyarikuspa chay ninamanta, Nehemiasman rikhurimorqa chaymanta, maypachachus templota watejmanta sayarichiytawankama, mosoj altartapis ruwachiytawankamataj, chaypi Señorman rikuchikusta jaywarqa.

¹⁹Maypachachus ñaupa tatasninchej Persiaman apasqas karqanku, Diosta munakojkuna sacerdotesqa ninata jap'ispa altarmanta pakaykorqanku ch'aki pujyupi. Sumajta pakasqankumantaqa, manaña ni pi yachasqachu maypichus pakasqankuta.

²⁰Ashkha watas pasasqanmantaña, Diospa nisqan chay tiempopi, Persiamanta rey kacharqa Nehemiasta Judeaman. Judeaman chayaytawanqa, Nehemías nerqa chay ninata mask'anankuta chay sacerdotes pikunachus kikin ayllumanta karqanku, ninata pakasqanku chaykunamanta. Paykunataj nisqanku mana tariyta atisqankuta chay ninataqa. Pujyu ukhupeqa qonchu yakullata tarisqanku. Nehemiastaj nisqa apamunankuta chay yakuta, rikunampaj.

²¹Tukuy ima wakichisqaña kashajtin Señorman rikuchikusta jaywanankupaj, Nehemiasqa nisqa sacerdotesman chay yakuwan qhallinankuta llant'ata, llant'a patapi kajtawan.

²²Ajinata ruwarqanku. Uj ratomantawan inti k'anchamorqa. Inteqa phuyuwan pakasqa kasqa chaykama. Chantaqa sinch'i larway llojsimorqa. Tukuytaj chayta rikuspa t'ukorqanku.

²³Rikuchikus ruphachikushajtin, sacerdotesqa Diosmanta mañakusharqanku. Paykunawan khuska tukuy runastaj mañarikullasharqankutaj. Jonatanqa mañakuyta qallarerqa. Tukuyninkutaj, Nehemiasta qhatispa, kutichikorqanku.

²⁴Runasqa kay jinamanta Diosmanta mañakusharqanku: Señor, Señor Diosniyku. Qanqa tukuy imata ruwarqanki. Qanqa kallpayoj kanki. Qanlla cheqan kanki. Qanlla tukuy atiyniyojtaj wiñay kausayniyojtaj kanki. Qanqa Israel aylluta tukuy ima laya llakiymanta jark'anki. Qanqa ñaupa tatasniykuta ajllakorqanki.

²⁶Jap'ikuy kay rikuchikuta, qanman jaywakusqaykuta, Israelta yanapanaykipaj. Israelqa qampata aylluykipuni. Llakiymanta jark'ay chay aylluykita, ajllakullaytaj qanllapajpuni kanampaj.

²⁷Tantamuy karu llajtapi tiyakojkuna masisniykuta. Pikunatachus presochasqas kashanku mana creejkuna naciones ukhupi, kacharichiy. Khuyakuywan kacharichiy qhesachasqas kajkunata chejnisqas kajkunatawan. Ajinamantaqa, mana creejkuna nacionesqa yachanqanku qanlla Diosniyku kasqaykita.

²⁸Castigay pikunatachus llakichiwayku chaykunata, pikunatachus sajrata rimawayku chaykunatawan.

²⁹Aylluykita sayarichiy ajllakusqayki jallp'api, imaynatachus Moisés nerqa ajinata.

³⁰Chaypachataj, sacerdotesqa salmosta takej kanku.

³¹Animalkunata ñak'asqankumantaña, Nehemías nerqa yaku puchusqanta jatuchaj rumi pataman jich'aranankuta.

³²Chayta ruwaytawanqa uj nina rikhurimun. Chaytaj oqochikun altar patapi kasharqa chay ninawan.

³³Chantaqa tukuynejpi yachakorqa. Persiamanta reypis yacharqa maypichus presochasqa sacerdotes ninata pakaykusqanku, chaypi rikhurimusqanta uj yaku, imawanchus Nehemiastaj sacerdote masisnintaj ruphaykuchisqanku animalkunata.

³⁴Chaymantataj reyqa, yachaspaña ajinapuni kasqanta, nerqa perqachanankuta chay cheqata. Nerqataj chay kutimantapacha santoña kananta.

³⁵Chay cheqata qhawajkunamantaj jap'ikusqan rikuchikusmanta allin regalosta qorqa.

³⁶Nehemiaspa sacerdote masisnin chay yakutaqa suticharqanku neftar. Chayqa niyta munan llimphuchakuy. Runastaj nafta nillankutaj.