Read Quechua Bolivia DC Bible 2 MACABEOS 10 Bible Online

2 MACABEOS 10 - Quechua Bolivia DC Bible bible

2 MACABEOS 10

¹Macabeoqa, paywan khuska kajkunawantaj, Señorpa yanapayninwan ujtawan jap'ikaporqanku templota, Jerusalén llajtatawan.

²Chantaqa, t'unarparicherqanku altarkunata, mana creejkuna plazapi sayarichisqanku chaykunata. T'unarparichillarqankutaj santo cheqaspi churasqanku chay altarkunatapis.

³Chaymantataj, templota llimphuyachiytawanqa, waj altarta sayaricherqanku. Chantá, iskay rumita khituspa, ninata rikhurichimorqanku. Chantá, iskay watamanta Señorman rikuchikusta jaywarqanku, ñaupaqempitaj churarqanku k'anchanasta rikuchiku t'antastawan.

⁴Chayta ruwaytawantaj, paykuna pampaman k'umuykukuspa Diosmanta mañakorqanku amaña ujtawan chay jina llakiypi paykunata urmajta saqenanta. Nerqankutaj sichus juchallikunkuman chayqa, paykunata k'acha sonqowan k'aminanta. Nerqankutaj ama paykunata jaywananta chay mana creejkuna runasman, mana khuyakoj k'ita runasman, pikunachus Diospaj sajrata parlaj kanku, chaykunaman.

⁵Chay karu llajtayojkuna templota ch'ichichasqanku ñaupaj watapi iskay chunka phishqayoj kaj diapi, Quisleu nisqa killamanta. Chay kikin diallapitaj judiosqa llimphuyacherqanku templota.

⁶Jatun kusikuywantaj judiosqa fiesta ruwarqanku pusaj diata, ramadas fiestapi jina. Yuyarikorqankutaj imaynatachus qanimpalla chay fiestapajqa orqospi kasharqanku, t'oqospi, k'ita animalkuna jina.

⁷Chantaqa uj procesionta ruwarqanku apaspa poqoykunata, t'ikasta palmastawan. Rispataj Diosman takikorqanku agradecekuspa templonta chay jina sumajta llimphuyachisqanmanta.

⁸Chaymantataj, tukuyninku tantaykukuspa nerqanku chay kutimantapacha mundontimpi kaj judiosqa fiestata ruwananku kasqanta chay diaspi.

⁹Ajina ari wañuporqa Antíoco, Epífanes nisqa.

¹⁰Kunanqa parlarikusun Antíoco Eupatormanta, chay rumi sonqo Antíoco Epifanespa wawanmanta. Willasuntaj ima sajrakunatachus jamusqanta chay ch'ajwaswan.

¹¹Antíoco Eupatorqa reyman tukuspaña, ajllasqa uj runata, Lisias sutiyojta, jatun kamachej kanampaj. Lisiasqa kamachej karqa Celesiriapi Feniciapitaj.

¹²Tolomeotaj, Macrón nisqa, cheqan sonqoyoj qhawasqa nin judiosta, phiñakuspa mana allintachu ñaupajta paykunata qhawasqankumanta. Tolomeoqa munashasqa tukuy imata paykunapaj k'achata ruwayta.

¹³Chayraykoqa, reypa amigosnin Tolomeota ch'ataykusqanku reypa ñaupaqempi. Tukuynejpi runasqa nisharqanku pay q'ewakusqanta, Chipremanta llojsimuspa. Filométor nisqa Tolomeoman Chipreta qhawananta. Uyanchasqankuta Antíoco Epifanesman ripusqanmanta. Mana atispataj respetachikuyta munasqanman jina, Tolomeoqa venenota tomaspa wañusqa.

¹⁴Jamusqataj kamachinampaj uj general Gorgias sutiyoj. Payqa jamusqa waj llajtayoj soldadoswan. Sapa munarispa Gorgiasqa llojsisqa judioswan maqanakoj.

¹⁵Chantaqa, chay kutillapitaj idumeosqa jark'ana wasisninkumanta toreyaj kasqanku judiosta. Chantapis, recibillasqanku runasta Jerusalén llajtamanta ayqesharqanku chaykunata. Munasharqankupunitaj ch'ajwan kananta.

¹⁶Macabeoswan khuska kashajkunataj, Diospa yanapayninta mañakuytawantaj, llojsisqanku idumeoswan maqanakoj.

¹⁷Sinch'is kallpawan yaykuspataj ayqechisqanku idumeosta jark'anasninkumanta, wañuchisqankutaj yaqha iskay chunka waranqa runasta.

¹⁸Isq'on waranqa runasmanta astawan pakaykukusqanku iskay altospi, tukuy imata apakuspa sayarinallankupajpuni.

¹⁹Macabeoqa ajllasqa Simonta, Joseta, Zaqueotawan, rinankupaj idumeoswan maqanakoj. Saqesqataj soldadosta necesitasqanman jina. Paytaj waj ladosman ripusqa, maypichus payta wajyasharqanku chayman.

²⁰Chantaqa, wakin Simompa soldadosnenqa, qolqeta munapayaspa, lluk'iykuchikusqanku. Ajinamantataj, isq'on chunka waranqa dracma qolqeta qochikuspa, saqellasqanku wakin runas ayqekapunankuta.

²¹Macabeotaj, yachaspa imachus pasasqanta, wajyachimusqa generalesta, ñaupaqenkupitaj willasqa imatachus chay runas ruwasqankuta, qolqerayku llojsichisqankuta contrasninkuta, chaykuna kachaykukunankupaj judiospa contrampi.

²²Chaymantataj, paykunataqa wañuchichisqa runa masisninkuta wasanchasqankumanta. Chantá, pay kikin kachaykukusqa chay iskay torresta jap'ikapoj.

²³Chay iskay torrespitaj iskay chunka waranqa runasmanta astawan, wañuchisqas kasqanku.

²⁴Timoteotaj, pichus ñaupajta atipachikusqa judioswan, kunanqa jamushasqa waj llajtayoj soldadoswan. Apamushasqataj Asiamanta caballostapis. Ajinamantaqa, munashasqa Judeata jap'ikapuyta.

²⁵Qayllasqantaña yachaspa, Macabeoj runasnin, Diosmanta mañakusqanku, umasninkumantaj jallp'ata churakusqanku, qhashqa p'achawantaj p'achallikusqanku.

²⁶Qonqorikuspataj altarpa chakinman, Diosmanta mañakusharqanku paykunata k'acha ñawiwan qhawananta. Mañakusharqankutaj nispa Diosqa judiospa contrasninkojpata contrankullamantaj tukunanta. Nisharqankutaj Diosqa oqharikunanta maqanakoj pikunawanchus judiospa contrampi oqharikunku chaykunawan, leypa nisqanman jina.

²⁷Mañakusqankumantataj maqanaku armasninkuta jap'ispa, llajtamanta llojserqanku, karumantaj chayarqanku. Chayaspataj maypichus contrasninku kasharqanku chayman, chay qayllapi sayarqanku.

²⁸Inti k'anchaykamushajtinña, iskay t'aqas tinkunakoj llojsisqanku. Ujnin t'aqaqa, atipasaj, nisqa, kallpankupitaj Señorpitaj suyaspa. Ujnintaj nishasqa atipananta, sonqonta churaspa kikin phiña kaynimpi.

²⁹May sinch'itapuni maqanakushajtinkutaj, ujta janaj pachamanta rikhurimunku, contraspa ñaupaqenkupi, phishqa wiraqochis caballospi. Chay caballospa aysanasninkoqa qorichasqas kasqanku. Chay phishqa wiraqochistaj judiospa ñaupaqenkuta rishasqanku.

³⁰Chay wiraqochisqa Macabeota churarqanku chaupinkupi, paytataj jark'arqanku kikin jark'anasninkuwan, mana ni ima nasqa kanampaj. Wijch'usharqankutaj t'ojsinastawan flechastawan enemigosninkuman. Chaykunataj, mana rikuytapis atispa, mushphasqas, kayman jaqayman ch'eqerakorqanku.

³¹Ajinamantataj, iskay chunka waranqa phishqa pachajniyoj chakipi rej soldadosqa qholusqas wañorqanku. Chaymantataj, sojta pachaj soldadospis caballopi rejkunamanta.

³²Timoteotaj ayqesqa Gezerman. Chaytaj sumaj jark'asqa kasqa. Chaypitaj kamachej kasqa uj general Quereas sutiyoj.

³³May kallpachasqas Macabeoj runasnin chay sumaj perqachasqa wasimanqa tawa día junt'ata yaykuyta munasharqanku.

³⁴Ukhupi kajkunataj, yuyaspa chay waseqa sinch'itapuni sayasqanta, mana sayk'uspa Diospaj rimashasqanku, millay palabrastataj nishasqanku.

³⁵Phishqa kaj p'unchay paqarimuytawantaj, iskay chunka waynas, Macabeowan rejkunamanta, may phiñasqas chay jinata enemigosninku rimasqankumanta, tukuy sonqo kachaykukusqanku perqasman. Mana manchachikuspataj sinch'i rabiawan wañuchisqanku ñaupaqenkupi rikhurimojkunata.

³⁶Wajkuna, kikillantataj waj ladontañataj lloq'aykusqanku, tinkunakusqankutaj ukhupi kajkunawan, larwachisqankutaj chay torresta, enqhaykuspataj ninawan jap'iykuchisqanku chay Diospaj rimajkunata, kausashajta.

³⁷Timoteoqa pakaykukusqa uj pujyupi. Chaypi tarispa. wañuchisqanku. Chantaqa, wañuchillasqankutaj paypa hermanon Quereastawan, Apolofanestawan.

³⁸Tukuy chay ruwasqankumantawanqa, takispataj qhaparispataj Diosta alabasqanku, Israelta chay jinatapuni yanapasqanmanta, paykunata atipachisqanmantataj.