Read Quechua Bolivia DC Bible 2 MACABEOS 11 Bible Online

2 MACABEOS 11 - Quechua Bolivia DC Bible bible

2 MACABEOS 11

¹Chaymantataj, pisi tiempomantawan, uj runa Lisias sutiyoj, pichus reypa uywaqen aylluntaj kasqa, mayordomo kaspataj, anchatapuni phiñakusqa chay pasasqanta yachaspa.

²Lisiasqa tantachimusqa pusaj chunka waranqa soldadosta tukuy caballostapis. Chantaqa, llojsisqa tinkukoj judioswan. Munasqa ari Jerusalén llajtataqa griego llajtaman tukuchiyta.

³Chaymantataj, chay Lisiasqa munashasqa impuestosta churayta temploman, imaynatachus ruwasqa waj religiones temploswan ajinata. Chantapis, yuyashasqataj sapa wata jatun sacerdote cargota qoyta qolqeta qojkunallaman.

⁴Lisiasqa manapuni yuyarikusqachu Diospa atiyninmanta. Umanta oqharishasqa yuyaspa waranqa waranqa soldadosnimpi caballosnimpitaj, yuyaspataj pusaj chunka elefanteyoj kasqanta.

⁵Judea jallp'aman yaykuspataj, Lisiasqa Bet-Surman qayllaykusqa. Bet-Surqa uj sumaj perqachasqa llajta, mayqenchus iskay chunka phishqayoj kilometropi kasqa Jerusalenmanta. Bet-Surman chayaspataj, maqanakoj yaykusqa.

⁶Macabeoj soldadosnin yachaspa Lisias munasqanta yaykuyta jark'ana wasisman, tukuy runaswan khuska, qhaparispataj waqaspataj Diosmanta mañakusharqanku kachamunanta uj sumaj angelta Israelta salvanampaj.

⁷Kikin Macabeopuni ñaupakuspa, maqanaku armasnintataj jap'ispa parlarikusqa wajkunaman, nispa paywan khuska ch'ajwaman kachaykukunankuta hermanosninkuta salvamunankupaj. Chantaqa, tukuyninkutaj ujllapi tukuy sonqo llojsisqanku.

⁸Jerusalempa qayllampiña kashajtinkutaj, ujta ñaupaqenkupi rikhurimusqa uj runa caballopi yurajmanta p'achallisqa, qori maqanaku armas oqharisqa.

⁹Tukuyninkutaj uj sonqolla khuyakoj Diosta bendicerqanku, sonqosninkutataj kallpachakorqanku. Yuyasqanku atisqankutaña t'ojsinaswan pasachiyta mana runasllatachu, manachayqa phiña animalkunatapis, fierro perqastapis.

¹⁰Yachaspa Señorqa paykunamanta khuyakusqanta, ujllapi kachaykukusqanku, chay cielomanta jamoj yanapajninkuwan khuska.

¹¹Chantaqa, leones jina phawasqanku contrasninkuwan tinkunakoj. Urmachisqanku chunka ujniyoj waranqa chakipi rej soldadosta, waranqa sojta pachajniyoj caballopi rejkunatawan, wajkunatataj ayqechisqanku.

¹²Chaykunamantaqa yaqha tukuy nanaykuchisqas karqanku, mana armasniyojtaj qhepakusqanku. Kikin Lisiaspis salvakusqa p'enqayta ayqespa.

¹³Lisiasqa mana sonkochu karqa. Unanchaspa chay atipachikusqanmanta, yuyashasqa mana atisqanta hebreosta atipayta, Tukuy Atiyniyoj Dios paykunata yanapasqanrayku.

¹⁴Lisiasqa paypa sutimpi judiosman kachasta kachamusqa allinyakamunankuta nichimuspa, maychus kajta ruwaspa. Nisqataj reyman parlarinanta paykunajta amigonman tukunampaj.

¹⁵Macabeotaj, piensaspa imatachus aswan allin kanman tukuy runasnimpaj, arí, nispa nisqa. Reytaj qollasqa tukuy imatachus Macabeoqa Lisiasman uj cartanejta mañasqanta, judiospaj.

¹⁶Lisiastaj uj cartata escribisqa judiosman kay jinata: Lisias napaykun judío runasta.

¹⁷Sutiykichejpi jamuwajkuna Juantaj Absalontaj uj papelta jaywawarqanku. Chay papelpi nisqankuta kaypi watejmanta churamullasajtaj. Paykunaqa mañakunku imallatapis ninayta chay mañakusqankumanta.

¹⁸Noqaqa tukuy chaykunamanta reyman willani. Imatachus noqapuni noqamantaqa qoyta atini, chayta qollaniña.

¹⁹Chayrayku, sichus qankunaqa gobiernota allin ñawiwan qhawankichej chayqa, noqapis kunanmantapacha tukuy imapi atisqayman jina yanapallasqaykichej.

²⁰Tukuy imamanta niniña kachasniyman, kachasniykichejman ima, qankunawan parlarikunankuta.

²¹Walejllata kakuychej. Iskay chunka tawayoj kaj diapi, Dióscoro nisqa killamanta, pachaj tawa chunka pusajniyoj kaj watamanta.

²²Reypa cartantaj kay jina kasqa: Rey Antíoco napaykun wauqen Lisiasta.

²³Tatanchej dioskunajpaman ripusqanmantataj, munayku reinopi tiyakojkunaqa sonqo tiyasqa kanankuta, ruwanasninkuta allillanta ruwayta atinankupaj.

²⁴Niwanku judiosqa manapuni munasqankuta tatanchejpa nisqanman jina kausakuyta griego costumbresta jap'ispa. Niwankutaj munasqankuta kikin paykunaj costumbresnillankuta waqaychayta. Kunanqa judíos mañakushanku saqenanchejpaj kausakunankuta paykunaj leyninkuman jina.

²⁵Noqaykoqa munayku chay runasqa sonqo tiyasqa kanankuta. Chayraykullataj ordenta qoshayku templonkuta paykunaman kutichipunankuta. Nishaykutaj kausakunankuta ñaupa tatasninkoj costumbresninkuta qhatispa.

²⁶Allin kanqa kachanki chayqa runasta paykunawan allinyakunankupaj. Ajinata, yachaspa imatachus kamacherqayku chayta, sonqochasqas kanqanku, ruwanasninkutapis ruwallanqanku.

²⁷Chantaqa, reypa cartan judío runasman apachimusqanta kay jina kasqa: Rey Antíoco napaykun judiospa kurajkunasninkuta, tukuy judío runasta ima.

²⁸Munayman tukuy qankunaqa walejlla kanaykichejta. Noqaykupis walejlla kashayku.

²⁹Menelaoqa willawayku munasqaykichejta wasisniykichejman kutimpuyta ruwanasniykichejta ruwamoj.

³⁰Pikunachus kutimponqanku manaraj Xántico killa chayamojtin, libreta ripullanqanku.

³¹Ajinamanta, judiosqa atillanqanku mikhunasninkuta wakichiyta yachasqankuman jina. Atillanqankutaj waj costumbresninkutapis waqaychayta, imaynatachus ñaupajta ruwaj kanku, ajinata. Chantapis, mana ni pi ni imanasqachu kanqa imallatapis ruwasqanmanta, mana cuentata qokuspalla.

³²Menelaota kachamuykichej sonqochanasuykichejpaj.

³³Walejlla kakuychej. Chunka phishqayoj kaj diapi, Xántico nisqa killamanta, pachaj tawa chunka pusajniyoj kaj watamanta.

³⁴Romanospi apachimullarqankutaj paykunaman uj cartata kay jinata: Romanospata sutinkupi, noqayku Quinto Memiowan Tito Maniowan, judío runasta napaykuyku.

³⁵Imatachus reypa ayllun Lisiasqa qosunaykichejta nisorqachej chayta, noqaykupis nillaykutaj.

³⁶Kunanqa qankuna allinta qhawaychej imatachus Lisiasqa reyman willakunan kasqanta. Allinta qhawaytawantaj, noqaykuman uj kachata kachamuwayku. Payta uyarispataj, noqayku reywan parlasqayku qankunapaj. Noqaykoqa Antioquiaman rinayku tiyan.

³⁷Chayraykoqa, usqhayta kachamullawaykuña pikunatachus sutiykichejpi willawasqayku imatachus ninayashankichej chayta.

³⁸Allillanta kakuychej. Xántico nisqa killapi, chunka phishqayoj kaj diapi, pachaj tawa chunka pusajniyoj watapi.