Read Quechua Bolivia DC Bible 2 MACABEOS 12 Bible Online

2 MACABEOS 12 - Quechua Bolivia DC Bible bible

2 MACABEOS 12

¹Kay tratota ruwaytawantaj, Lisiasqa kutimporqa reypaman. Judiosrí chajrasninkuman kutimporqanku.

²Jinapis, wakin generalesqa manapuni saqesqankuchu judíos allin kaypi sonqo tiyasqataj kakunankuta. Chay generalespa sutisninkoqa kaymin: Timoteo, Geneoj wawan Apolonio, Jerónimo, Demofón, Chiprepi kamachej Nicanor ima.

³Chantaqa, Jope llajtayojkunaqa kay millayta ruwarqanku: Wajyarqanku chaypi tiyakojkuna judío runas warmisnintinta, rinankupaj paykunapaj wakichisqanku botespi. Chay Jope llajtayojkunaqa mana rikuchisqankuchu judiosta chejnikusqankuta.

⁴Judiosqa, Jope llajtayojkunaj munayninkuman jina, chay botesman yaykullasqanku. Ajinamanta rikuchiyta munasharqanku allin kaypi kausakuyta munasqankuta, mana manchachikuspalla. Chaupi marpiña kashajtinkutaj, chay jopesqa judiosta p'ultiykuchisqanku. Wañusqasqa iskay pachaj jina kasqanku.

⁵Judastaj, yachaspa imachus pasasqanta llajta masisninman, chay jina sonqo nanayta wañuchisqas kasqankuta, tukuy chaytaqa runasninman willasqa.

⁶Judasqa sonqonta oqharerqa sumajta cheqanyachej Diosman. Chaymantataj, kachaykukorqa mask'aj wauqesninta wañuchejkunata. Ch'isiyaytawantaj puertota enqhaykorqanku. Chaypi q'ala botesta ruphaykucherqanku. Chantaqa, Judasqa espadaswan wañuracherqa tukuy chaypi pakakojkunata.

⁷Mana llajtaman yaykuyta atispataj, ripullarqa watejmanta kutimuyta yuyaspa, munaspataj q'ala Jopepi tiyakojkunata wañuchiyta.

⁸Chaymantataj, Judasqa yachasqa Jabnia llajtayojkunapis munasqankuta kikillantataj ruwayta chaypi tiyakoj judioswan.

⁹Tutapi kachaykukusqa Jabnia llajtaman. Chayaspataj, enqhaykusqa puertota barcosnintinta. Chay ninaqa rikukusqa Jerusalén llajtamantapacha, pusaj khuskanniyoj leguamanta.

¹⁰Judaswan runasninwan kashajtinku Jabniamanta uj kilómetro khuskanniyoj chaynejpi, rishajtinku tinkunakoj Timoteowan, ujta paykunaj contrankupi rikhurimunku arabesqa, phishqa waranqa jina chakipi rejkuna, phishqa pachajtaj jina caballopi rejkuna ima.

¹¹May sinch'ita maqanakusqanku judioswan arabeswan. Judasqa runasninwan, Diospa yanapayninwan, arabesta atipasqanku. Chay ch'in pampaspi purejkuna runasqa, atipachikuytawankama, nisqanku Judasman allinyakapunankuta, nisqankutaj yanapanankuta uywaswan.

¹²Judastaj rikusqa cheqamanta chay runasqa payta yanapayta atisqankuta may kutispi. Chayrayku, paykunawan allinyakapusqa. Arabestaj allinyakapuytawan, jarasninkuman ripullasqanku.

¹³Chaymanta, Judasqa runasninwan khuska kachaykukusqa uj llajtaman, Caspín nisqa sutiyoj chayman, maqanakuyta munaspa chaypi tiyakoj runaswan. Chay llajtaqa sumaj perqachasqa kasqa. Muyuynimpi kasqa imaymana laya jark'anas. Chaypi tiyakojkunaqa imaymana llajtamanta kasqanku.

¹⁴Chay ukhupi kajkuna runasqa yuyasqanku mana ni jayk'aj perqasninku urmarachisqas kanankuta. Yuyasqankutaj mikhunasninkupis mana tukukapunanta. Chayta yuyaspa, Judasta runasnintapis qhesachaykusqanku. Millay palabrasta nispa. Diospajpis rimaspa.

¹⁵Judasta qhatejkunataj sonqonkuta oqharisqanku kay mundojpata jatun kamachejninman. Yuyarikusqanku Señorqa Josueta yanapasqanta atipanampaj mana ni ima maquinaswan kajtimpis maqanakunampaj. Ajinalla ari Josueqa Jericó llajtata t'unarparisqa. Chayta yuyaytawantaj, Judaspa runasnin, may phiñasqas sinch'i sonqo kachaykukusqanku perqasman.

¹⁶Diospa munayninrayku chay llajtamanta dueñochakusqanku. Llajtaman yaykuspa, mana willay atina wañuchikuta ruwasqanku. Chaynejpi kasqa uj qocha. Chay qochaqa uj cantonmantapacha uj cantonkama kinsa pachaj sojta chunka metroyoj kasqa. Chay qochaqa yawarmanta junt'ita jina karqa.

¹⁷Chaymanta ripuspataj, iskay chunka qanchisniyoj leguata purisqanku, chayasqankutaj Cárax llajtaman, maypichus tiyakunku uj judíos, tubianos nisqa, chayman.

¹⁸Manataj chay cheqapi Timoteota tarisqankuchu. Timoteoqa ripusqa ari chay cheqamanta. Timoteoqa mana ni ima munasqanta ruwayta atisqachu. Jinapis, chaynejpi uj sinch'i tropata qhepachisqa.

¹⁹Chaymantataj, iskay Macabeoj generalesnin, Dositeowan Sosipatrowan, kachaykukusqanku chay jark'ana wasiman maypichus kasqanku Timoteoj runasnin, chayman. Chayaspataj, chaypi wañurachisqanku chunka waranqa runasmanta astawan.

²⁰Macabeotaj soldadosninta t'aqapi t'aqapi churasqa. Sapa t'aqaqa uj kamachejniyoj kasqa. Chantaqa, kachaykukusqa Timoteota mask'aj. Timoteoj soldadosnintaj kasqanku pachaj iskay chunka waranqa chakipi rejkuna. Caballospi rejkunataj iskay waranqa phishqa pachajniyoj kasqanku.

²¹Yachaspa Timoteoqa Judas qayllamusqanta ñaupaqenta kachasqa Carnáin nisqa uj cheqaman, warmista, wawasta, tukuy q'episninkuta ima. Soldadosqa ñak'aymanta jap'inkuman Carnainta. Ñan mana as allinchu chayman chayanapajqa, may k'ullku kasqanrayku.

²²Rikhurimojtintaj Judaspa ñaupaj kaj tropan, Timoteoj runasnin sinch'i manchachikuywan jap'ichikuspa, kharkatitiyta qallarisqanku. Tukuy imata rikoj Dios paykunaman rikhurisqa. Chay soldadosqa kayman jaqayman phawaspa, tukuynejman ch'eqerasqanku. Correykachashajtinkutaj, paykunapura nanaykuchikusqanku. Kikin espadasninkuwampis t'ojsinakusqanku.

²³Judastaj, mana sayk'uspa qhatiykacharqa paykunata. Chay sajra runamantaqa espadanejta wañuchisqas kasqanku kinsa chunka waranqa.

²⁴Kikin Timoteopis urmasqa Dositeoj soldadosnimpa makisninkupi, Sosípatroj soldadosnimpa makisninkupi ima. Timoteoqa paykunaman nisqa, mayta parlaspa, salvasqata ripunanta saqenallankuta. Nishasqa paykunaj ayllusninkutaj hermanosninkutaj paypa makisnimpi kasqankuta. Nisqa ari sichus pay wañupunman chayqa, mana ni pi paykunata qhawanan kasqanta.

²⁵Mayta parlaspa comprometekusqa Timoteoqa kacharichinampaj paypa makisnimpi presochasqas kajkunata. Hermanosninkuta librayta munaspataj, Timoteota kacharichisqanku.

²⁶Chaymanta Judasqa risqa Carnáin llajtaman. Chaypitaj yaykusqa diosa Atargatispa templonman. Chaypi iskay chunka phishqayoj waranqa runasta qholuchisqa.

²⁷Chaykunata atipasqanmanta chinkachisqanmantataj, soldadosninwan kachaykukusqa Judasqa uj perqachasqa llajtaman, Efrón nisqa chayman. Chay llajtapi tiyakushasqa Lisias. Chaypi kallasqataj ashkha llajtayoj runas. Perqasnejpi sayashasqanku kallpayoj waynas, pikunachus may sinch'i sonqowan maqanakusqanku. Llajta ukhupitaj imaymana laya máquinas kasqa maqanakunapaj. Kallasqataj may chhika rumis ch'anqamunapaj.

²⁸Judiosqa majakusqanku Diosmanta. Señorqa kallpanwan pampayachin ari contraspa kallpasninkuta. Ajinamanta, judiosqa llajtata jap'ikapusqanku. Chay llajtapitaj wañuchisqanku iskay chunka phishqayoj waranqa runasta.

²⁹Chaymantaqa, watejmanta kachaykukusqanku, risqankutaj Escitópolis nisqa llajtaman. Chay llajtaqa iskay chunka iskayniyoj legua kashan Jerusalén llajtamanta.

³⁰Escitópolis llajtapi tiyakoj judiosqa Judasman willasqanku imaynatachus Escitópolis llajtayojkuna k'acha sonqowan judiosta qhawaykusqankuta, paykunata yanapaykusqankutataj llakiy diaspipis.

³¹Judiosqa runasninwan khuska agradecekusqanku chay runasta, nisqankutaj ajina sumajta qhawanankutapuni judiosta. Chay llajtamanta ripuspataj, Jerusalenman chayasqanku pisi diaslla faltashajtin semanas nisqa fiestapaj.

³²Chay fiestajta waj sutin kallantaj. Chaymin Pentecostés. Chay fiesta pasaytawantaj, llojsisqanku mask'aj Idumea kamachej Gorgiasta.

³³Gorgiasqa maqanakuman presentakusqa kinsa waranqa chakipi rej soldadoswan, tawa pachaj caballopi rej soldadoswan ima.

³⁴Iskaynin tropasqa tinkunakusqanku. Ujta wakin judiosqa urmasqanku.

³⁵Uj runa Dositeo sutiyoj, caballopi rej may wapu, tubiano judío, Gorgiasta jap'iykusqa. Chay runaqa Gorgiasta p'achanmanta aysasqa, munaspa kausayniyojta jap'ikapuyta chay bandidota. Chantaqa, uj Tracia llajtayoj runa, caballompi rikhurimuspa, ujta espadanwan qholuykuchisqa Dositeoj makinta. Ajinamanta Gorgiasqa ayqesqa, ripusqataj Maresa nisqa llajtaman.

³⁶Unaytaña maqanakushajtinkutaj Azariaspa runasnin, rikuspataj sayk'usqas kasqankuta, Judasqa Señormanta mañakusqa nispa paykunata yanapananta, nispataj paykunaj kamachejnin kananta.

³⁷Chaymanta Judasqa kikin parlaynimpi maqanakupaj qhaparisqa takisqataj. Chayta ruwaspa, Gorgiaspa contrampi soldadosninwan ujta kachaykukusqa, atipaspataj ayqerparichisqa.

³⁸Chantataj, Judasqa tukuy soldadosninta tantaykuspa, risqa Adulam llajtaman. Uj semanaña tukukushajtin, tukuyninku llimphuchakusqanku yachasqa kasqankuman jina. Chayllapitaj qhepakusqanku samarina diapi samarikunankupaj.

³⁹Q'ayantin, rerqanku mask'aj ayasta, p'ampanankupaj ayllusninkoj sepulturasninkupi.

⁴⁰Wañusqaspa p'achasninku ukhupi tarisqanku lantista, Jabniamanta dioskunaj lantisninkuta, imatachus judiospa leyninkuman jina ama yupaychanachu chaykunata. Tukuy chayta rikojkunapaj sut'i karqa imajtinchus chaykunaqa wañuchisqas kasqanku.

⁴¹Tukuyninkutaj alabarqanku Señorpa ruwasqasninta. Paymin cheqanta cheqanyachejqa, pakasqa kajta sut'iman orqhoj.

⁴²Chaymanta, Diosmanta mañakusqanku nispa chay juchaqa q'ala pampachasqa kananta. Chantaqa, sinch'i sonqo Judasqa nisqa runasman mana juchayoj kausanankuta. Rikusqanku ari kikin ñawisninkuwan imachus pasasqanta juchasninkurayku urmajkunaman.

⁴³Chantaqa, sapa ujninmanta mañakuspa tantaykusqa iskay waranqa qolqeta. Chaytataj Jerusalenman kachamusqa, chaypi rikuchikuta jaywanankupaj juchasrayku. Chayta ruwaspaqa, k'achatataj allintataj ruwarqa, wañusqasqa kausarinankuta yuyaspa.

⁴⁴Sichus mana creenmanchu chayqa, wañusqasqa kausarimunanku kasqanta, qhasilla kanman wañusqaspaj mañakuy.

⁴⁵Pay yacharqa jatun t'inka wakichisqa kasqanta Diosta qhatispa wañojkunapaj. Chayrayku Judaspa yuyasqan santotaj kosallataj karqa.

⁴⁶Chayrayku munarqa chay rikuchiku ruwakunanta wañusqaspa juchasninkurayku, Diosninchej juchasninkuta pampachanampaj.