Read Quechua Bolivia DC Bible 2 MACABEOS 14 Bible Online

2 MACABEOS 14 - Quechua Bolivia DC Bible bible

2 MACABEOS 14

¹Kinsa watasmantawan, Judasman runasninmantaj willaykusqanku Seleucoj wawan Demetrio, Trípoli puertoman chayamusqanta ashkha soldadoswan barcoswan ima.

²Willallasqankutaj wañuchisqanta Antiocota, paypa qhawajnin Lisiastapis. Paykunata wañuchiytawan, Demetrioqa llajtata jap'ikapusqa.

³Kasqa nin chaypi uj runa Alcimo sutiyoj. Chay runaqa ñaupajta kuraj sacerdote kasqa. Oqharikuypi paypuni munayninwan ch'ichichakusqa. Kunanqa, pay yuyashasqa manaña paypaj salvación kasqanta nitaj atisqanta watejmanta santo altarman qayllayta.

⁴Chay Alcimoqa risqa watukoj rey Demetriota. Chaymin pasasqa pachaj phishqa chunka ujniyoj watapi. Qayllaspataj, jaywasqa Alcimoqa Demetrioman uj qori pilluta uj palmatawan. Chantá qosqa Demetrioman olivo ramosta, imaynatachus templopi jaywaj kanku, ajinata. Chay kutipeqa mana astawan ruwasqachu.

⁵Chantaqa, uj kuti Demetrio wajyasqa Alcimota uj tantakuyman, yachayta munaspa imatachus judiosqa yuyasqankuta, ima sonqowanchus kasqankuta ima. Alcimoqa chaypacha sajra sonqonta kicharisqa. Nisqataj kay jinata: Judíos ukhupi tiyan uj laya runas pikunatachus beatos ninku. Paykunaj umanqa chay Judas Macabeo. Chay runasqa waj runasta pusanku oqharikuyman, ch'ajwastataj rikhurichimunku kaypi jaqaypi, manataj saqenkuchu allin kay kananta reinopi.

⁶

⁷Qhechuwanku kuraj sacerdote kayniyta, mayqenchus ñaupa tatasniymantapacha jamuwan. Kunan noqaqa jamushani qanwan parlaj.

⁸Ñaupajtaraj niyman k'askakusqayta tukuy sonqo reypa munayninman. Qhepanta, nishaykichej noqaqa munasqayta llajta masisniyta yanapayta. Judaspa runasnin yuyayninkuta chinkachisqankurayku, tukuy judío runas llakiyniyoj kashanku.

⁹Tukuy chaykunataqa allinta tapuy, reyníy. Tukuy imata sumajta yachaspataj, ruway imatachus allin kanqa aylluykupaj. Aylluykoqa tukuynejmanta llakiyllata jap'ikushan. Qanqa k'acha ñawiwan tukuyta qhawankipuni ari.

¹⁰Judasqa, qayllallapipuni kanqa chayqa, manapuni allin kay kanqachu kay lugarpi.

¹¹Chayta Alcimo niytawantaj, waj reypa amigosninkupis qhajpacha astawan t'impurichisqanku Demetrioj sonqonta, mana paykunapis Judasta munakusqankurayku.

¹²Reytaj chay kikimpachalla ajllasqa Nicanorta, pichus kamachishasqa elefantesniyoj soldadosta. Chantaqa nisqa Judeapi kamachej kananta.

¹³Reyqa ordenta qosqa Nicanorman Judasta wañuchinampaj, chantaqa payta qhatejkunata ch'eqerachinampaj. Chaymanta, nisqataj watejmanta Alcimota churachinanta kuraj sacerdotepaj may jatun temploman.

¹⁴Waj religionniyojkunataj, pikunachus ayqesqanku Judasmanta manchachikuspa. Nicanorman k'askaykukusqanku. Yuyashasqanku kusikuyta judiospa llakiyninkunejta.

¹⁵Judiosqa yachaspa Nicanor jamushasqanta, yachaspataj mana judío runas reyta munakusqankuta, jallp'ata churakusqanku umasninkuman, mañakusqankutaj Diosmanta. Yuyarikushasqanku Diosqa ayllunta sayarichisqanta wiñaypaj. Yuyarikullasqankutaj Diosqa tuta p'unchay paypa kapuyninta qhawaykusqanta yanapasqantataj t'ukuna imasta ruwaspa.

¹⁶Kamachejninku ordenta qosqanrayku, llojsisqanku. Hadasa llajta chaynejpitaj Nicanorpa runasninwan tinkunakusqanku.

¹⁷Judaspa wauqen Simón churanakusqa Nicanorwan. Chaypacha, ujta enemigosqa chayamusqanku. Chayrayku Simonqa maqanakupi atipachikusqa.

¹⁸Nicanortaj yachaspa Judasqa runasnintin sinch'i sonqos kasqankuta, yachaspataj paykunaj llajtankuta munakusqankurayku maqanakusqankuta, mana munashasqachu paykunata tukurparichiyta.

¹⁹Chayta unanchaspa kachamusqa Posidoniotawan, Teodototawan, Matatiastawan, paypa sutimpi Judaswan allinyakamunankupaj.

²⁰Allinta parlasqankumantawan tukuy imamanta, Nicanortaj Judastaj chay trato ruwanamanta parlasqanku runasninman. Nicanorpa runasninman Judaspa runasninman ima, allin rijch'asqa chay tratoqa.

²¹Chaymanta nisqanku jayk'ajchus iskaynin kamachejkuna tantakunankuta. Chay día chayamojtintaj sapa ladomanta uj carro llojsisqa. Iskayninkupajtaj uj cheqapi wakichisqanku tiyanasta.

²²Judastaj chaynejllapi churachisqa maqanasniyoj runasta. Nicanor ch'aukiyayta munajtin chayqa, Judasqa chay casopaj wakichikusharqaña. Nicanortaj mana ni ima allin kajta ruwasqachu. Iskayninkutaj uj yuyaylla uj tratota ruwasqanku.

²³Chaymanta Nicanorqa risqa Jerusalenman. Chaypi allillan kakusqa maychus kajta ruwaspa. Payta qhatisharqanku soldadostapis kacharparisqa.

²⁴Munasqataj Nicanorqa Judas paywan khuskapuni kananta. Nicanorqa chay runata mayta munakusqa.

²⁵Nicanorqa nisqa Judasman casarakunanta wawasniyojtaj kananta. Judastaj casarakusqa. Judasqa allinta kausakusqa.

²⁶Alcimotaj kachaykukusqa rey Demetriota watukoj. Apasqa chay tratota papelpi rey Demetrio rikunampaj. Alcimoqa rey Demetrioman nisqa Nicanorqa munashasqanta oqharikuyta. Nisqataj Nicanorqa wakichishasqanta Judasta paypa cuentanmanta kakunampaj Jerusalempi kamachej jina. Nisqa ari reyman Judasqa paypa enemigon kasqanta.

²⁷Reytaj, chayta uyarispa, mayta phiñakusqa. Chantaqa, phiñakuywan t'impuspa chay sajra sonqoj tumpasqanwan, Nicanorman uj cartata apachimusqa nispa mana allin ñawiwanchu qhawasqanta chay trato ruwasqanta Judaswan. Nisqataj usqhayllata Macabeota presochasqata pusachimunanta Antioquiaman.

²⁸Reypa cartanta leeytawantaj Nicanorqa mayta phiñakusqa. Mana munashasqachu ari chay trato ruwasqanta p'akiyta Judasqa mana ni ima juchayoj kasqanrayku.

²⁹Reypa nisqanta ruwanampuni kasqanrayku, unanchashasqa ima ratotachus chayta ruwayta atinman pakayllamanta.

³⁰Judastaj rikusqa mana allintañachu payta qhawasqanta Nicanorqa. Rikusqataj manaña k'acha sonqochu payman parlarikusqanta sapa tinkojtinku. Chayqa mana sumajchu kasqanta yuyarispa, ashkha runasninta tantaykuspa ayqesqa Nicanormanta, pakakoj.

³¹Nicanorqa rikuspa libreta atipachikusqanta Judaswan, risqa temploman. Chayasqa sacerdotes rikuchikusninkuta jaywashajtinku. Ordenta qomusqa Nicanorqa nispa payman entreganankuta Judasta.

³²Paykunataj juraspa nisqanku manapuni yachasqankuta maypichus chay runa kasqanta.

³³Chantaqa, Nicanorqa paña makinta temploman oqharispa, juramentota ruwaspa nisqa: Manachus pusampuwankichej Judasta watasqata, noqaqa kay Diospa wasinta q'alata urmarparichisaj, altartapis t'unarparichisaj. Cheqampitaj oqharichisaj uj k'acha templota Bacopaj, nispa.

³⁴Chayta niytawantaj ripusqa. Sacerdotestaj makisninkuta pataman oqharispa, ayllunchejta qhawaj Diosmanta kay jinata mañakusqanku. Qan, Señor, mana ni imata qampaj munankichu. Noqaykupaj ajllarqanki kay cheqata, noqaykuwan khuska kayta munasqaykirayku.

³⁵

³⁶Kunanqa, Santo Señor, qhaway kay santo wasita, amataj saqeychu ch'ichichasqa kananta. Qanimpalla llimphuchasqa karqa ari, nispa.

³⁷Kasqa nin uj runa, judío kurajkunamanta ujnin kaj, Razis sutiyoj. Chay runamantaqa mana allintachu parlasqanku Nicanorman, payta tumpaspa. Chay runaqa llajta masisninta munakoj kasqa. Paypis may rejsisqa munasqataj kasqa. Tukuy judiostaj paytaqa tatankuta jina rejsisqanku, judiosta anchatapuni munakusqanrayku.

³⁸Ñaupajta, judiospa oqharikuynin qallarikushajtin, sut'ita yachakusqaña judaismoman sumaj k'askasqa kasqanta. Yaqha wañuchisqankupis judío religionta qhatisqanmanta.

³⁹Nicanortaj, rikuchiyta munaspa judiosta chejnikusqanta, kachasqa phishqa pachaj soldadosmanta astawan, Razista jap'imunankupaj.

⁴⁰Nicanorqa yuyashasqa chay runata jap'ispa may jatun llakiyta apachimusqanta judiospa patankuman.

⁴¹Soldadosqa chay yachashasqankuña chay torreman maypichus Razis kasharqa chayman. Jawamanta munasharqanku punkuta urmachiyta. Nisqankutaj chay soldadosman punkuta larwachimunankuta. Razistaj, mana ni mayman ayqeyta atispa, espadanta jap'ispa, pay kikinta t'ojsikusqa.

⁴²Razisqa munasqa mana p'enqaywanchu wañupuyta. Mana munasqachu urmayta sajra runaspa makisninkuman nitaj p'enqayta ñak'arichinankuta.

⁴³Soldados yaykushajtinkutaj, chay ch'ajwapi, t'ojsikusqanwanqa mana wañusqachu. Soldadosqa yaykushasqankuña. Razistaj mana manchachikuspa wicharisqa torre pataman. Chay patamantataj ujta uraman kachaykukusqa runas pataman.

⁴⁴Soldadostaj ithirikusqanku, Razistaj q'ara pampaman urmasqa.

⁴⁵Manataj wañusqachu. Wapu wapulla sayarisqa sinch'ita nanachikushajtimpis. Corresqa q'ala yawarchasqa runas chaupipi. Chayasqa uj pata qaqaman.

⁴⁶Manaña kallpan kasqañachu. Ch'unchulasninta orqhokusqa. Iskay makisninwantaj, soldadosman ch'unchulasninta wijch'uykusqa. Chantaqa, kausayta qoj Señormanta mañakusqa jayk'ajllapis watejmanta kausayninta kutipunanta. Ajina wañorqa Razisqa.