Read Quechua Bolivia DC Bible 2 MACABEOS 15 Bible Online

2 MACABEOS 15 - Quechua Bolivia DC Bible bible

2 MACABEOS 15

¹Nicanorman willasqanku Judas runasninwan khuska Samaria cheqapi kasqanta. Unanchakuspa, yuyasqa Nicanorqa chayman kachaykukuyta, paykunata tinkoj samakuna diapi, ni imamanta manchachikuspa.

²Paywan khuska kasqanku wakin judíos. Chay judiosqa Nicanorman nisqanku: Amapuni yaykuychu chay jinamanta k'ita runa jina. Tukuy imata rikoj Diosqa chay diata tukuy diasmanta astawan santoyacherqa, nispa.

³Chay kinsa kuti sajra runaqa tapusqa sichus janaj pachapi tiyan uj Señor pichus nerqa chay diata qhawananta samakuna día jinata.

⁴Judiostaj nisqanku: Tiyampuni uj Señorqa. Paymin janaj pachapi kashan. Payqa atiyniyoj. Paypuni niwayku qanchis kaj diapi samakunaykuta, nispa.

⁵Nicanortaj nisqa: Noqataj atiyniyoj kani kay pachapi. Niykichej maqanakunasniykichejta jap'inaykichejta, reytataj kasukunaykichejta, nispa. Jinapis, mana atisqachu sajra yuyayninta junt'ayta.

⁶Nicanorqa, anchatapuni wapuyaspa, munashasqa oqharichiyta uj apachetata, chaypi churachinampaj Judaspa runasnimpata maqanaku armasininkuta.

⁷Macabeotaj, chaykama tukuy sonqo yuyashasqapuni Señorqa paykunata yanapananta.

⁸Runasninman nisqa Macabeoqa ama manchachikunankuta chay mana Diosniyojkunamanta. Nisqataj yuyarikunankutapuni Diosninchej ñaupajta paykunata yanapasqanta. Nisqa ari kunampis suyanankuta Tukuy Atiyniyoj Diosninchej paykunata yanapananta.

⁹Macabeoqa runasninta sonqochasqa parlaspa Diospa leyninmantawan profetasmantawan. Yuyarichillasqataj waj kutisña maqanakusqankumanta. Ajinamanta, may sonqochasqas kasqanku runasqa.

¹⁰Chay jinamanta runasninta sonqochasqanmantataj, allinta yachachisqa imatachus ruwanankuta. Rikuchisqataj chay mana Diosniyojkunaqa puraj uyas kasqankuta. Rikuchillasqataj imaynatachus chay runasqa p'akisqankuta chay trato ruwasqankuta.

¹¹Ajinamanta, Macabeoqa, paykunata kallpachaykorqa, mana jark'anasllatachu chayri t'ojsinasllatachu jaywaspa, manachayqa nisqasninwan sonqochaykuspa. Chaymantataj, paykunaman willaykusqa imatachus mosqoypi jina rikusqanta. Chaymin creenapaj jina karqa.

¹²Kayta rikusqa Macabeoqa mosqoynimpi: Onías, pichus ñaupajta sacerdote karqa chay, k'acha sonqoyoj runa karqa, munakunapajpuni, respetachikoj. Wawa kasqanmantapacha, Diosman k'askasqa kasqa. Chay runaqa makisnin oqharisqa, mañakushasqa Diosmanta tukuy judíos runaspaj.

¹³Ujta chaypachallapi rikhurimusqa waj runañataj, yuraj chujchasniyoj, respetoyojtaj. Payta rikuytawan ninchejman may jatun kasqanta, atiyniyojtaj.

¹⁴Oniastaj parlarisqa kay jinata: Kaymin Jeremiasqa, Diospa profetan. Payqa hermanosninta munakun. Tuta p'unchay Diosmanta mañakun judío runaspaj ajllasqa llajtapaj ima, nispa.

¹⁵Jeremiastaj paña makinta oqharisqa. Chaymanta, Judasman jaywasqa uj qori espadata nispa: Kay santo espadata jap'iy, Dios jaywashasunki chayta. Kay espadawanqa enemigosniykita t'unarparichinki.

¹⁷Kay k'acha palabraswan sonqochasqas, wapuyasqas kallpachasqastaj, nisqanku aswan allin kasqanta sinch'i sonqo llojsiyta tinkukoj enemigosninkuwan, chayllapi paykunata suyanamanta nisqaqa. Nisqankutaj llakiy jamushasqantaña llajtaman, religionman, temploman ima.

¹⁸Yuyarikusharqanku warmisninkumanta, hermanosninkumanta, tukuy ayllusninkumantataj. Jinapis, aswan llakisqas kasharqanku templopi piensaspa. Temploqa qanimpalla llimphuchasqa karqa.

¹⁹Llajtapi qhepakojkunapis may llakisqasllataj kasharqanku. Tukuyninku piensasharqanku imachus kananmanta chay maqanakupi.

²⁰Tukuyninku suyasharqanku manchachikuywan. Enemigosqa ujllapiña tantasqas kasqanku. Chakipi kajkuna wakichisqasña kasqanku maqanakupaj. Elefantespis churasqasña kasqanku cheqankupi. Cantospitaj kasqanku caballosniyojkuna.

²¹Macabeo rikushasqa soldados qayllashajta. Qhawaykushasqa chay jina tukuy ima laya maqanakunasniyoj kasqankuta. Qhawallashasqataj chay phiña elefantestapis. Chayta rikuytawanqa, Macabeo makisninta oqharisqa pataman. Makisninta oqharispataj, t'ukunasta ruwaj Señormanta mañakusqa. Payqa allinta yacharqa Señorqa atipachisqanta munayninman jina, mana maqanaspa atiyninkuman jinachu.

²²Kay jinamanta payqa Diosmanta mañakushasqa: Qan, Señor angelniykita kachamorqanki Judamanta rey Ezequiasman. Paytaj wañucherqa yaqha pachaj pusaj chunka phishqa waranqayoj Senaqueribpa soldadosninta.

²³Kunampis, qan, janaj pachapi kamachej, kachamuy uj sumaj angelta ñaupaqeykupi, enemigosniykuta manchachinampaj kharkatitichinampajtaj.

²⁴Sinch'i makiykiwan nanaykuchiy kay paganosta pikunachus qampaj rimanku, santo aylluykitapis wajtanku chaykunata. Chay jinata nispa nisqa Macabeoqa.

²⁵Nicanorpa runasnin jamushasqanku pututusninkuta waqachispa, maqanaku takiykunatapis takispa.

²⁶Judaspa runasnintaj maqanakuman risqanku Diosmanta mañakuspa.

²⁷Makisnillankuwan maqanakuspa, pampapi sirisqas saqesqanku kinsa chunka phishqa waranqayoj runasmanta astawan. Dios paykunata yanapasqanmantataj, may kusisqas qhepakusqanku.

²⁸Maqanakuyta tukusqankumantataj, kusisqas ripushajtinku, ujta rikusqanku Nicanorta, armasniyojta. Maqanakupi wañuchisqa kasqa.

²⁹Chantaqa, sinch'ita qhaparispa, Diosta alabasqanku paykunaj parlayninkupi.

³⁰Macabeotaj, pichus tukuy imapi ñaupakusqa tukuy sonqo mask'aspa ayllumpa allin kayninta, pichus wayna kasqanmantapacha munasqapuni ayllunta, nisqa Nicanorpa umanta qholurparimunankuta, makintapis khuchumunankuta. Chantaqa Jerusalenman chayta apanankuta.

³¹Paypis Jerusalenman risqa. Chaypi tantachimusqa llajta masisnintapis sacerdotestapis. Chaymanta, sayasqa altarpa ñaupaqempi. Chantaqa wajyachimusqa jark'anaspi kasharqanku chaykunata.

³²Tukuyninku chaypiña kashajtinku, rumi sonqo Nicanorpa umanta rikuchisqa. Rikuchillasqataj Nicanorpa makinta, mayqentachus oqharisqa templo cheqaman may rabiawan, Diospa contranta.

³³Chaymanta khuchusqa rumi sonqo Nicanorpa qallunta. Nisqataj t'unuyachinankuta, jaywanankutataj suwintusman. Nillasqataj Nicanorpa makinta churanankuta templo punkupi, chay jinamanta paganampaj sajra ruwasqasninmanta.

³⁴Chaymantataj tukuyninku ñawisninkuta oqharisqanku pataman, alabasqankutaj Señorta pichus paykunaman qayllaykusqa. Nisqankutaj: Alabasqa kachun Señor, pichus llimphuchasqata waqaycharqa templonta.

³⁵Judastaj warkhuchisqa Nicanorpa umanta jark'ana perqas patapi. Chayta rikuspa tukuy yuyarikonqanku Señorqa paykunata yanapasqanmanta.

³⁶Chaymanta, tukuyninta uj sonqolla nisqanku chay kutimantapacha chaymanta yuyarikunankutapuni fiestata ruwaspa sapa chunka iskayniyoj kaj killapi, chunka kinsayoj kaj diapi. Chay killaqa arameo simipi nikun Adar. Chay killa tukukojtin qallarin Purim nisqa fiesta.

³⁷Chaykuna pasarqa Nicanorpa tiempompi. Chay kutimantapacha llajtapi hebreoslla kamachinku. Kaypi noqaqa tukusaj willakusqasniyta.

³⁸K'achalla kajtenqa, sumaj ruwasqataj, niychej noqa chayta ruwayta munasqayta. Mana allinchu millaytaj kajtenqa, niychej chayllata ruwayta atisqayta.

³⁹Mana tomanachu vinollatachus yakullatachus. Aswan sumaj vinoqa yakuwan chajrusqa. Ajinallataj, uj libropi, ashkha layamanta escribisqa kajtin, uyarejkuna astawan kusikunku. Willakusqasniy kaypi tukukun.