Read Quechua Bolivia DC Bible 2 MACABEOS 2 Bible Online

2 MACABEOS 2 - Quechua Bolivia DC Bible bible

2 MACABEOS 2

¹Ñaupa librospi leenchej profeta Jeremiasqa presochasqasman nisqanta ninata apakapunankuta. Chayta ñaupajta nerqanchejñaqa.

²Nillasqataj Jeremiasqa, Diospa leyninta qoytawanqa, ama Señorpa kamachikusqasninmanta qonqapunankuta. Nillasqataj ama munapayanankuta qoritawan qolqetawan qhasi dioskunaj patankupi rikonqanku chaykunata. Chantapis, nillasqataj ama munapayanankuta chaypi kashanku chay warawastapis.

³Nillasqataj amapuni Diospa leyninta saqerparinankuta.

⁴Chay libropi escribisqallataj kasqa profetaqa, Diospa nisqanrayku, apasqanta Dioswan tinkukuna toldota, trato arcatawan. Ajinallataj, chay libropi willasqallataj kashan profetaqa risqanta chay orqoman maymantachus Moisés rikusqa chay jallp'ata, Dios israelitasman qosqaykichej nisqa chayta.

⁵Chay orqoman chayaspataj, Jeremiasqa uj qaqa jusk'uta rikusqa. Chayman churasqa trato arcata, toldota, altartawan, maypichus q'osñichinku inciensota chayta. Tukuy chayta apaytawanqa yaykunata wisq'asqa.

⁶Chantaqa, paywan rejkunamanta wakinkunaqa, kutirimusqanku señalesta ñampi churanankupaj, manataj chay cuevataqa tarisqankuñachu.

⁷Chayta yachaspa Jeremiasqa k'amisqa nispa: Chay cheqaqa pakayllapipuni kanan tiyan, Diosqa ayllunmanta khuyakunankama, watejmanta tantaykuchispa.

⁸Chaypachallaña Señorqa rikhurichenqa chaykunata. Chaypacha Señorpa glorian rikhurimonqa phuyuwan, imaynatachus Moisespa tiempompi rikhurimorqa ajinata. Chantaqa, imaynatchus Salomonqa Señormanta mañarikorqa temploqa santoyachisqa kananta, ajinata.

⁹Chantaqa, chay libropi escribisqallataj karqa yachayniyoj Salomonqa jaywasqanta santoyachiy rikuchikuta templotataj kicharisqanta.

¹⁰Imaynachus Moisesqa Señormanta mañakorqa, cielomantataj uraykamun uj nina mayqenchus oqoykun tukuy chay animalkunata, rikuchikupaj churasqasta, ajinallataj Salomompis Diosmanta mañakullasqataj. Mañakojtintaj cielomanta uraykamun uj nina, oqoykuntaj q'ala rikuchikupaj churasqa animalesta.

¹¹Moisés nisqa: Juchasmanta jaywasqa rikuchikoqa ninawan ruphachisqa karqa, mana mikhusqachu kasqanrayku.

¹²Salomompis pusaj día junt'ata fiestata ruwacherqa.

¹³Chaypis escribisqa karqa chay libropi maypichus churasqanku Nehemíaspa tiempompi yachasqanku yuyarisqankuta ima. Chaypi willallankutaj Nehemías tantachimusqanta librosta reyesmanta, profetasmanta, Davidpa salmosninmanta, reyespa cartasninkumantataj, rikuchikusmanta yachachinku chaykunamanta.

¹⁴Ajinallataj Judaspis tantakamorqa tukuy apasqas kasharqanku chay librosta guerrasrayku. Kunanqa chay librostaqa noqayku jap'ishayku.

¹⁵Qankunachus munawajchej chayqa, runasta kachamuychej librosta apakapunankupaj.

¹⁶Noqaykoqa wakichikushaykuña fiestata ruwanaykupaj templonchej llimphuyachisqa kasqanmanta. Kunanqa qankunaman escribimuyku, qankunapis chay fiestata ruwanaykichejpaj.

¹⁷Diosninchej tukuy ayllunta salvarqa. Qorqataj tukuykunaman chayaqenta, reinonta sacerdociotawan. Chantaqa tukuy noqanchejta ajllawarqanchej paypata kananchejpaj.

¹⁸Chaytaqa Moisespa leyninnejta Diosninchej ruwananta nerqa. Chayraykoqa niyku tukuy noqanchejtapis khuyakunanta tantakunawanchejtataj ajllakusqan llajtampi, mundontimpi kashanku tukuy cheqasmanta chayman ayllusninchejta pusaspa. Payqa ari imaymana llakiymanta orqhowarqanchej templontataj llimphuyacherqa.

¹⁹Cirene llajtayoj Jasonqa escriberqa Judas Macabeomanta, hermanosninmantawan. Chantataj, escribillarqataj jatun templo llimphuyachisqa kasqanmanta, altar santoyachisqa kasqanmantataj.

²⁰Ajinallataj, escribillarqataj maqanakusmanta rey Antíoco Epífanas contrampi karqa chaykunamanta, wawan Eupátor contrampi karqa chaykunamantawan.

²¹Chantaqa willarqataj Diosninchej jatuchajkunata ruwasqanta yanapaspa wapu runasta pikunachus tukuy sonqo oqharikorqanku judiospa religionninrayku. Chayrayku ari chay runasqa pisilla kajtinkupis llajtata ch'inman tukucherqanku, ayqecherqankutaj karumanta jamorqanku chay soldadosta.

²²Paykuna watejmanta jap'ikaporqanku templonchejta may rejsisqa mundontimpi chayta. Jerusalén llajtapis kacharicherqanku ajeno makismanta. Watejmantataj churallarqanku Diospa leyninta qonqachisqa kanan karqa chayta. Señorqa k'acha sonqowan paykunata qhawarqa.

²³Noqaykuri uj librollaspi churarqayku imatachus Jasonqa phishqa libropi churarqa chayta.

²⁴Yachayta munajkunaqa imatachus ñaupa tiempospi karqa, umankuta muyuchinku rikuspa numerosta, rikuspataj ashkha imasmanta librospi parlasqankuta.

²⁵Chayrayku noqayku munayku gustowan leenaykichejta kay librota. Tukuy chayta umankuman churayta munajkunapis, atillanqanku. Tukuypajpuni sumaj kanqa kay libroqa.

²⁶Noqaykoqa anchata jump'ispa uj librollaman pasachiyku jatun libromanta.

²⁷Imaynachus uj mikhunata wakichejqa jump'iykun wajkunata kusichiyta munaspa, ajinallataj noqaykupis. Kunanqa noqayku runa masisniykuta yanapayta munasqaykurayku, sayk'uspa kusisqalla kasqayku.

²⁸Mana willasqaykuchu tukuy imatapuni mana ni imamanta qonqakuspa. Chaytaqa historiata qelqajlla ruwachun. Noqaykoqa tukuy imamanta tumpallata willamusqayku.

²⁹Imaynachus arquitectoqa mosoj wasita ruwanan kajtin tukuy wasitapuni qhawanan tiyan, maestro pintorestaj, k'achanchanasta churajkunapis qhawanku imatachus ruwananku tiyan chayllata, ajinallataj noqaykupis mana tukuytachu qhawasqayku.

³⁰Historiata escribejqa qallariyninmantapacha, tukuy imatapuni qhawanan tiyan, mana ni imamanta qonqakuspa.

³¹Pichus chaymanta imallatapis orqhon, tumpallata willanan tiyan, mana tukuy imatapuni willaspa.

³²Kunanqa imatachus niyta munarqayku qallarishaykuña, mana ni imata yapaspa nisqaykuman. Mana allinchu kanman ari qallariypi ashkha kanan wajkunata pisiyachispa.