Read Quechua Bolivia DC Bible 2 MACABEOS 3 Bible Online

2 MACABEOS 3 - Quechua Bolivia DC Bible bible

2 MACABEOS 3

¹Kuraj sacerdote Oniaspa tiempompi, ajllasqa llajta Jerusalempi tiyakojkunaqa sonqo tiyasqa kausakoj kanku. Runasqa sumajta junt'aj kanku Diospa leyninta. Oniasqa cheqan sonqoyoj runa karqa, chejnikojtaj mana allin kajta.

²Chay tiempospeqa reykunapis tukuy sonqo rej kanku Diospa wasinman Diosta yupaychaj, yapajtaj kanku templopi kajkunata regalosta apaspa.

³Rey Seleucopis qolqenwan yanapaj templopi animalkunata Diospaj ñak'anankupaj.

⁴Uj kuti, uj runa Simón sutiyoj, Bilgaj ayllunmanta, pichus templomanta administrador karqa, phiñakusqa kuraj sacerdote Oniaswan, imaraykuchus Oniasqa nishasqa waj jinamanta administracionta ruwananta llajta qhatuspi.

⁵Mana atispa Oniasta atipayta, Simonqa risqa parlaj Tarso llajtayoj Apoloniowan. Chay Apolonioqa chay tiempopi soldadospa kamachejnin karqa Celesiria provinciapi Fenicia provinciapipis.

⁶Simonqa willasqa Apolonioman templopi ashkha qolqetaj qoritaj kasqanta. Nisqa qolqeqa ashkha kasqanta, mana yupanapaj jina. Nisqa ari chay qolqeqa rikuchikuspaj necesitakusqanmanta astawan ashkharaj kasqanta. Nisqataj reyqa apakapunallanta paypaj chay qolqeta.

⁷Apoloniotaj risqa ari reyta watukoj, willaykusqataj tukuy uyarisqanta templomanta. Chayta yachaspataj reyqa kamachisqa Heliodoroman, chay jallp'aspi reypa sutimpi kamachejman, tukuy chay qolqeta jap'ikapunanta.

⁸Heliodorotaj qhajpacha Jerusalén llajtaman kachaykukusqa. Heliodoroqa creechisqa risqanta rikoj Celesiria llajtastawan Fenicia llajtastawan. Cheqamantaj munasharqa reypa kamachisqanta junt'ayta.

⁹Jerusalén llajtaman chayajtintaj, sumajta payta reciberqanku kuraj sacerdotetaj, Jerusalempi tiyakojkunataj. Chaykunaman Heliodoroqa willasqa imatachus templomanta nisqankuta, willasqataj imapajchus Jerusalenman jamusqanta. Tapusqataj reyman willasqankumanta, ajinachus manachus kasqanta.

¹⁰Chayta uyarispa kuraj sacerdoteqa nisqa tukuy chay qolqeqa kasqanta warmi sapaspaj, wajcha sapaspajwan.

¹¹Nisqataj wakin qolqeqa kasqanta Tobiaspa wawan Hircanojta. Chay Hircanoqa kamachej karqa, may patapi churasqa. Nisqataj chay Diosta wasanchaj Simonqa llullakusqanta. Willasqataj qolqeqa kasqanta chunka kinsayoj waranqa iskay pachaj kilo, qoritaj sojta waranqa sojta pachaj kilo.

¹²Kuraj sacerdote nisqa ari manapuni atikusqanta chay sajra ruwayta pikunamanchus chay qolqeta churarqanku templopi yuyaspa chay cheqaqa santo kasqanta, maymanchus mana ni pi yaykunchu, mundontimpi may respetasqa.

¹³Jinapis Eliodoroqa munasharqapuni tukuy chay qolqeta payman qonankuta, reypa kamachisqanman jina.

¹⁴Pay nisqaña ima diapichus temploman yaykunanta. Chay día chayaytawantaj yaykorqa temploman, chaypi waqaychasqa kajkunata yupaj. Llajtapitaj tukuy runasqa llakisqas kasharqanku.

¹⁵Sacerdotesqa, sacerdote p'achawan p'achallisqas, qonqorikusharqanku altarpa ñaupaqempi Diosmanta mañakuspa. Diosqa leyta churasqanrayku qolqemanta, paymanta mañakusharqanku waqaychananta tukuy chay imasta, dueñosninku aparqanku temploman chaykunata.

¹⁶Kuraj sacerdoteta rikuspataj, tukuyninku phutisqas kasharqanku. Q'ellu uyannejta yachakorqa sonqon sinch'i nanasqa kasqanta.

¹⁷Payqa manchachisqa kasqa, cuerpon kharkatitiska, sonqon sinch'i nanasqa rikukorqa.

¹⁸Runasqa callesman kachaykukoj kanku Diosmanta mañakoj templopaj, yachaspa Heliodoro templotaqa ch'ichiyachiyta munasqanta.

¹⁹Warmisqa wijsankukamalla qhashqa p'achawan p'achallisqas, callesta junt'aykorqanku. Manaraj llojsiyta yachajkuna sipaskunapis, wakinku llajta punkusman correykachaj kanku, wakinkutaj perqasman wicharej kanku, wakinkutaj ventanasninkumanta wateqaj kanku.

²⁰Tukuyninku makisninku oqharisqa, Diosmanta mañakoj kanku.

²¹Sonqo nanay karqa chay runasqa qonqor chakimanta pejtu pejtulla, risqanku. Ajinallataj, runasqa mayta llakikoj kanku sacerdoteta rikuspa llakisqata.

²²Runasqa mañakusharqanku Tukuy Atiyniyoj Diosmanta, kakunallanta sumaj jallch'asqa tukuy chay qolqe, dueñosninku temploman aparqanku chaykuna.

²³Chaykama Heliodoroqa wakichikushasqaña munayninta ruwanampaj.

²⁴Heliodoroqa soldadosninwan khuska kasharqaña qolqe waqaychanaj chimpampi. Chaypacha tukuy atiyniyojkunaj espirituspatawan Señornin, jatun kayninwan rikhurimorqa. Qolqe waqaychananman qayllajkunaqa manchachikorqanku Diospa atiyninta rikuspa. Pisi sonqoyojman tukuspa, ujta llauch'iyarqanku.

²⁵Ujta paykunaman uj caballo rikhurimun sumaj k'achanchasqa. Patampi lloq'asqa kasharqa uj phiña runa. Chay phiña runataj, caballompa chakisninta aysarichispa, Heliodoroj patanman kachaykukun sinch'i kallpawan. Chay runaqa qori corazawan karqa.

²⁶Chantaqa rikhurimorqanku iskay k'acha waynas sinch'i kallpayoj, sumaj p'achallisqas. Iskayninku chaupinkuman aparqanku Heliodorota. Chaupinkupi sayachispataj, mana sayk'uspa jasut'iykorqanku.

²⁷Heliodoroqa pampaman urmarqa mana ni imatapuni rikuspa. Urmaytawantaj oqharerqanku churarqankutaj uj puñunaman.

²⁸Pichus ñaqhallata temploman yaykorqa soldadosninwan, kunan wantupi llojsishan mana puriytapis atispa. Tukuy runastaj sut'ita rikorqanku Diospa atiyninta.

²⁹Chay runaqa winkusqa kashan Diospa atiyninnejta, q'ala opayasqa. Manapuni salvakuyta atinchu.

³⁰Judiostaj, chayta rikuspa Señorman graciasta qosharqanku. Señorqa k'anchayninta rikhurichisqa ari santo wasimpi. Ñaupajta templopi runasqa mancharikusharqanku llakikusharqankutaj. Kunanqa tukuyninku kusirikushanku Diospa atiyninta rikusqankumanta.

³¹Heliodoroqa wañuy patapiña kasharqa. Amigosnin Oniaspaman rerqanku mañakoj mañakunanta patapi kaj Diosmanta, Heliodorota kausachinanta.

³²Kuraj sacerdotetaj mana munasharqachu yuyanankuta judíos wañuchisqankuta Heliodorota. Chayrayku Diosman rikuchikusta jaywallarqa Heliodoro yuyayninman kutirimunampaj.

³³Kuraj sacerdote chay rikuchikusta Diosman jaywashajtin, watejmanta rikhurimorqanku Heliodoroman chay waynas, ñaupajta jina sumaj p'achallisqas. Qayllaspataj, nerqanku Heliodorota: Tukuy sonqo agradecekunayki tiyan Oniasta. Paypa mañakusqasninrayku Señorqa kausarichisunki, nispa.

³⁴Nerqankutaj: Rikunkiña Diospa phiñakuyninta. Kunantaj tukuy runasman willamuy Diosqa jatun atiyniyoj kasqanta, nispa. Chayta niytawantaj, chinkaporqanku.

³⁵Chaymantataj Heliodoroqa rikuchikusta jaywarqa Señorman, promesata ruwaspa kausarichisqanmanta. Chantaqa, Oniasta watukuytawanqa, runasninwan reypaman kutimporqa.

³⁶Heliodoroqa tukuyman willaj Diospa ruwasqanta, imatachus paypuni kikin ñawisninwan rikusqa chayta.

³⁷Chantaqa, rey tapusqa Heliodorota pitachus kachanman watejmanta Jerusalenman. Heliodorotaj reyman nisqa: Jerusalenman kachamunayki tiyan pitachus chejnikunki chay runata. Sichus pillapis oqharikuyta munashan contraykipi, chay runatapuni kachamuy. Mana wañunman chayqa chay runaqa, q'ala jasut'isqa jamponqa. Chay cheqapi Diospa atiynin sayashan.

³⁹Patapi kajqa tuta p'unchay chay cheqata qhawashampuni. Sichus pillapis chayman chayanman sajra sonqo, chaypi kashan chay Diosqa chay runataqa wajtaspa wañuchinman.

⁴⁰Tukuy chaykuna pasasqa Heliodoroman. Ajinamanta qolqeqa mana kuyuchisqachu karqa templomanta.