Read Quechua Bolivia DC Bible 2 MACABEOS 4 Bible Online

2 MACABEOS 4 - Quechua Bolivia DC Bible bible

2 MACABEOS 4

¹Chay kikin Simón, pimantachus ñaqhalla parlarqaykuña, tumpashasqa Oniasta nispa paypuni churasqanta Heliodorota wañuy patapi. Chay Simonqa ñaupajta willaramusqa templo qolqemanta, ajinamanta kikin llajtanta wasanchaspa.

²Kunantaj nishasqa Oniasqa oqharikuyta munasqanta reypa contrampi, sonqompi yachaspa tukuy imapipuni llajta masisninta yanapayta atisqanta, junt'asqantataj tukuy sonqo Diospa leyninta.

³Jina kajtintaj, uj runaqa, Simonwan khuska purisharqanku chaykunamanta ujnin, wakin runasta wañuchisqa.

⁴Oniastaj yuyasharqa manapuni allinchu kasqanta chay chejninakus. Chantaqa, rikusharqa Menesteoj wawan Apolonioqa tanqasqanta Simonta chaykunata ruwanampaj. Chay Apolonioqa general karqa, kamachisharqataj Celesiria provinciapitaj Fenicia provinciapitaj.

⁵Chayrayku Oniasqa reyta watukoj kachaykukorqa allin kajta munashaspa tukuy runa masisnimpaj. Mana munarqachu qhasimanta tumpayta ni pitapis.

⁶Pay sonqompi yuyasharqa reylla atisqanta allinyachiyta tukuyta, Simontataj yuyayninman kutirichiyta.

⁷Chaypachataj rey Seleuco wañuporqa, cuentanmantataj yaykorqa Antíoco, Epífanes nisqa. Chantaqa, Oniaspa wauqen, Jasón sutiyoj, qolqeta pagaspa, kuraj sacerdoteman tukusqa.

⁸Nisqa ari Jasonqa rey Antiocoman, promesata ruwaspa, reyman qonanta kinsa pachaj sojta chunka talento nisqa qolqeta impuesto jina, yapanantataj payllamanta pusaj chunka talento qolqetawan.

⁹Chantaqa, nillasqataj qonanta pachaj phishqa chunkatawan licenciayoj kanampaj ruwachinampaj Jerusalempi uj phujllana estadiota uj griego colegiotawan. Chantá, yupanampaj Antioquía llajtayojkunata, Jerusalén llajtayojkunata jina.

¹⁰Rey Antiocoqa qollasqa imatachus Jasón mañakorqa chaykunata. Jasontaj, chay kutimantapacha griego costumbresta apachimusqa Jerusalenman.

¹¹Chantaqa, nisqataj amaña kausanankuta chay licenciasman jina, imatachus reykuna judiosman qosqanku, chayta reykunamanta mañakusqanrayku Eupolemoj tatan Juan. Chay Eupolemoqa kachasqa karqa Roma llajtaman uj tratota judíos ruwanankupaj romanoswan. Chay tratopi judiostaj romanostaj nerqanku munanakuspa yanapanakuspataj kausanankuta. Chaymantataj Jasonqa nerqa amaña runas junt'anankuta Diospa leyninman jina churasqa costumbresta. Cuentankumantataj waj laya mosoj costumbresta churacherqa.

¹²Chaymantataj, uj phujllana estadiota sayaricherqa jark'ana wasi chajnejpi. Chantaqa pusacherqataj aswan sumachaj waynasta chay estadioman, chaypi phujllanasta yachanankupaj.

¹³Jasonqa anchatapuniña Diosmanta karunchakusharqa. Cheqamanta, manapuni sacerdotechu karqa. Payta qhatispataj, ashkha runas munasharqanku griegos jina kausakuyta.

¹⁴Sacerdotespis manaña munarqankuchu temploman riyta, rikuchikusta jaywaj Diosninchejman. Paykunapis ujta uyariytawantaj pututusta, kachaykukoj kanku estadioman. Chaypitaj phujllaj kanku wajkunawan khuska muyu fierrosta choqaspa. Ajinata, paykunapis Diospa leyninta wasanchasharqanku.

¹⁵Runasqa qhesachasharqanku ñaupa tatasninkoj costumbresninkuta, k'askakusharqankutaj griegospa costumbresninkuman, yuyaspa chay griego costumbresqa aswan allin kasqanta judío costumbresmanta.

¹⁶Jinapis, chay kikin griegos, pikunamantachus judiosqa yachaqakoj kanku, judiostaqa mayta llakicherqanku.

¹⁷Diospa leyninta p'akejkunaqa jasut'isqaspuni kananku tiyan ari. Kunanqa willamusqaykichej imaynatachus Diosninchej chay runasta jasut'iykorqa.

¹⁸Sapa phishqa wata Tiro llajtapi phujllanakus karqa reypa ñaupaqempi.

¹⁹Chay millay runa Jasón, kachamusqa Tiro llajtaman wakin Antioquía llajtayojkunata rinankupaj Jerusalén llajtaj sutimpi. Qosqataj paykunaman pachaj dracma nisqa qolqeta, chaywan rikuchikusta jaywanankupaj qhasi dios Herculesman. Paykunataj sonqonkupi nisqanku ama rikuchikuspi chay qolqeta gastananta, manachayqa wajkunapi.

²⁰Chayrayku, ima qolqewanchus rantinanku karqa rikuchikusta Herculespaj, Jasompa munayninman jina ruwacherqanku remosniyoj barcosta.

²¹Chaypacha uj runa Filometor sutiyoj, Egiptomanta reyman tukusqa. Ajllasqankutaj Menesteoj wawan Apoloniota Egiptoman rinampaj chay kutipaj. Antiocotaj, yachaspa Apolonio sonqompi karunchakusqanta paymanta, nerqa runasninman allinta ñawisninkuta kicharinankuta. Chayraykullataj Jope llajtaman kachaykukorqa. Chay llajtamantataj riporqa Jerusalén llajtaman.

²²Jasonqa tukuy Jerusalempi tiyakojkunapis jamusqanmanta anchatapuni kusikorqanku. Llajtaman yaykunampaj ñankunata k'ancharacherqanku. Chantataj, yaykumushajtin sinch'ita qhaparerqanku kusikuywan. Chaymanta, Antiocoqa runasninwan jarakorqa Fenicia cheqapi.

²³Kinsa watamantawan Jasón kacharqa Simompa wauqen Menelaota qolqeta apanampaj reyman parlanampajtaj paywan reypa sutimpi. Chay Menelaotaqa rejsinchejña.

²⁴Menelaotaj risqa reypaman. Reytaj payta rikuspa sumaj k'achanchasqata, aswan jatun kasqanta yuyasqa. Menelaoqa mañakusqa reymanta kuraj sacerdote kananta. Chaypaj isq'on waranqa isq'on pachaj kilo qolqeta yapasqa Jasompa qosqanman. Chaynejta kuraj sacerdoteman tukusqa Menelaoqa.

²⁵Kuraj sacerdoteman tukuytawantaj, Menelao kutimporqa Jerusalén llajtaman. Sonqontaj manapuni sacerdote sonqochu karqa, manachayqa uj phiña animalpa sonqon jina. Rumi sonqo karqa sajrataj.

²⁶Ajinamanta, Jasón, pichus kikin wauqenta wijch'orqa, paypis kunanqa wijch'uchikushan. Jerusalenmanta llojsispataj, Amón llajtaman ayqerqa.

²⁷Menelaotaj kuraj sacerdoteman tukuytawanqa, mana qolqeta chayachimusqachu reyman.

²⁸Sostratesqa, pichus reypa sutimpi impuestosta mañakoj, mañakushasqapuni Menelaomanta chay qolqeta. Chaymantataj, reyqa, mana qolqeta apachimusqankurayku, iskayninkuta wajyachimusqa.

²⁹Menelaotaj cuentanmanta Jerusalempi saqesqa wauqen Lisimacota kuraj sacerdote kanampaj. Sostratesri, cuentanmanta saqesqa uj capitanta, Crates sutiyojta. Chay capitantaj Chiprepi mandoyoj kasqa.

³⁰Chaykamataj, Tarso llajtayojkuna, Malos llajtayojkuna ima, reypa contrampi oqharikusqanku imaraykuchus reyqa qopusqa llajtasninkuta Antioquida sutiyoj warminman.

³¹Reytaj, chayta yachaspa, ujta risqa chay llajtasman oqharikojkunata ch'inyachej. Saqesqataj Andronicota cuentanmanta kamachinampaj chaykama. Chay Andronicoqa jatun runa karqa, may respetasqa.

³²Menelaoqa suwakusqa templomanta qori imasta. Chaykunamanta wakinta qopusqa Andronicoman, wakintataj vendeykusqa Tiro llajtapi waj llajtaspipis.

³³Tukuy chaytaqa Oniasman willaykusqanku. Chayta yachaspa, ripusqa Dafneman, Antioquía chaynejman. Chay cheqaqa pakakuna llajtapuni karqa. Chay cheqamanta Oniasqa willarqa imatachus Menelao ruwasqa chayta.

³⁴Menelaotaj nisqa Andronicoman Oniasta wañuchinanta. Andronicotaj risqa Oniasta watukoj. Chayaytawantaj, nisqa Oniasman juramentowan mana ni ima nananta. Nisqataj amapuni manchachikunanta. Oniasqa iskaychakusharqa. Jinapis, llojsillasqa pakakuna llajtamanta. Onias llojsejtin, Andronicoqa chaypachallapi wañurparichisqa, justiciamanta asirikuspa.

³⁵Chayrayku, mana judiosllachu, manachayqa waj llajtayoj runaspis, anchatapuni phiñakusqanku wañuchisqankumanta chay jinata Oniasta, cheqan sonqoyoj runata.

³⁶Chayamojtintaj rey Siliciamanta, judío runasqa reyta watukusqanku, willakusqankutaj Oniasta wañuchisqankumanta. Griego llajtayojkunapis phiñasqas kasharqanku chay runas wañuchisqa kasqanmanta.

³⁷Antiocotaj, chayta yachaytawantaj, anchatapuni llakikusqa. Phutiyninwantaj waqasqa. Yuyarikusqataj sumaj yuyayniyoj kasqanmanta.

³⁸Anchata phiñakuspa ujta qhechuykusqa Andronicomanta puka p'achasninta. Chay p'achasnintataj llik'iykusqa. Chaymantataj, Andronicota puriykuchisqa llajtantinta, maypichus pay Oniasta wañucherqa, chayman chayanankama. Chaypachapitaj Antiocoqa nisqa payta wañuchinankuta. Ajinamanta, Diosqa paywan ruwarqa juchasninman jina.

³⁹Menelao yachashajtin, Lisimacoqa ashkhata suwakapusqa Jerusalén templomanta. Chayta yachaspa, Jerusalén llajtayoj runasqa Lisimacoj contranta oqharikusqanku. Chaykama, ashkha qori imasqa chinkasqaña kasqa.

⁴⁰Lisimacotaj, rikuspa runas oqharikusqankuta may phiñasqas, maqanakupaj wakichisqa kinsa waranqa runasta. Chay runasqa sinch'i phiñakuywan llajta runaspa contramkupi llojsisqanku. Chay runaspa capitanku karqa uj runa Auranos sutiyoj. Chay Auranosqa ashkha watayojtaj pisi umayojtaj karqa.

⁴¹Runastaj yachasqanku Lisimacoqa paykunaj contrankupi jamusqanta. Wakinku risqanku rumista tantamoj. Wakinkutaj k'ullusta mask'asqanku. Wakinku, ushphata pampamanta oqharisqanku. Tukuy chaytataj Lisimacoj soldadosninman wijch'uykusqanku.

⁴²Chay ch'ajwapi wakin soldadosta nanaykuchisqanku, wakinta wañuchisqanku. Wakintataj ayqerparichisqanku. Chantaqa, templomanta suwakoj Lisimacota, kikin qori waqaychana chaynejpi wañuchisqanku.

⁴³Chaymantataj, Menelaota wajyasqanku tukuy chaykunamanta uyanchanankupaj.

⁴⁴Chayamojtintaj reyqa Tiro llajtaman, judío kurajkuna paypaman kachamusqanku kinsa runasta, reypa ñaupaqempi Menelaota tumpanankupaj.

⁴⁵Menelaotaj, juchachasqaña rikukuspa, parlaykusqa Dorimenoj wawan Tolomeowan. Nisqataj ashkha qolqeta qopunanta paypaj reyman parlaripunampaj.

⁴⁶Chaymanta Tolomeoqa reyta pusasqa uj corredorman, wayraman, samarikunampaj jina, ukhu ruphaymanta ayqespa. Chaypitaj yuyayninta tijraykuchisqa.

⁴⁷Reytaj nisqa Menelaoqa manapuni juchayoj kasqanta. Ajinamanta, pichus juchayoj karqa tukuy chay llakiymanta, llimphu sonqoyoj jina rikhurimun. Chantaqa, rey nillasqataj Menelaota tumpajkuna juchachasqas kanankuta, wañuyman pusasqas kanankutataj. Nitaj uywas jina kausakoj runaspis chayta ruwankumanchu karqa.

⁴⁸Chaypachapi, qhasi mana kajmanta wañuchisqas karqanku chay runasqa pikunachus waqaychayta munarqanku templo imasta, munarqankutaj llajtatawan runastawan llakiymanta jark'ayta.

⁴⁹Wakin Tiro llajtayoj runasqa sonqo nanaywan rikusqanku tukuy chay mana allinkunata. Chayraykutaj, ramakuspa, k'acha sepulturata wakichisqanku chay wañusqas p'ampasqas kanankupaj.

⁵⁰Menelaotaj kakullasqapuni atiyniyoj, qhapaj runas paypa yanapasqankurayku. Sonqontaj astawan rumiyasqa. Ajinamanta, pay chejnikorqa llajta masisninta tukuy runasmanta astawan.