Read Quechua Bolivia DC Bible 2 MACABEOS 6 Bible Online

2 MACABEOS 6 - Quechua Bolivia DC Bible bible

2 MACABEOS 6

¹Pisi tiempomantawan rey kachamorqa Atenas llajtayoj kamachejta kamachinampaj judiosta, ñaupa tatasninkoj leyesninkuta p'akinankuta kausanankutataj Diospa leyninta wasanchaspa.

²Chantaqa, chay runa churanan karqa Jerusalén templopi Zeus Olímpicoj lantinta, ajinamanta templota ch'ichiyachispa. Chantapis, Zeus Hospitalarioj lantinta churanan karqa Garizim orqopi. Chaytaqa mañakusqanku chay cheqapi tiyakoj runas.

³Tukuy chaykunaqa llakiy karqa runaspaj, manataj aguantayta atisharqankuchu.

⁴Kikin templopi mana creejkunaqa imaymana laya fiestasta ruwaj kanku. Templo patiospipis juchasapa warmiswan juchallikoj kanku. Chantaqa, temploman apaj kanku mana temploman apana imasta.

⁵Chaymantataj, altarman apaj kanku ñak'ana animalestapis.

⁶Nitaj samarina diatapis atikorqañachu respetayta. Nitaj fiestaspipis ruwayta atikorqachu costumbresman jina. Nillataj judíos kasqankutapis willakuyta aterqankuchu.

⁷Mana munashajtinkupis runasqa mikhunankupuni karqa aychata, imatachus sapa killa mana creejkuna runas jaywaj kanku reypa diachakunmanta yuyarikuspa. Baco sutiyoj diospa fiestanman rinanku karqa runasqa procesionman, umasninku qhorawan pilluchasqas.

⁸Tolemaida llajtayoj runasqa mañakusqanku reymanta tukuy qaylla griego llajtaspi judíos mikhunankutapuni animalesta, rikuchikupaj jaywasqa kanku chaykunata.

⁹Reytaj chayta kamachisqa. Nisqataj qholuchisqas kanankuta pikunachus mana munanqanku kasukuyta chaykuna. Chaywanqa runasqa manchachikusharqankuña yuyaspa aswan jatun llakiy jamunanta.

¹⁰Chantaqa, iskay warmis juezpaman pusachikusqanku, wawasninkuta circuncidachisqankurayku. Chay warmistaqa wawa warkhusqasta pusarqanku callesman, tukuynejpi purichispa. Chaymantataj, llajta perqamanta jawaman wijch'umorqanku.

¹¹Wakin runas qaqa jusk'usman ayqesqanku samarina diata pakayllamanta waqaychayta munasqankurayku. Pichá willasqa Filipoman chaypi kasqankuta. Chayta yachaytawantaj Filipoqa ordenta qosqa tukuy chaykuna presochasqas kanankupaj. Chantaqa, ujllapi tukuy paykunata enqhaykorqanku. Paykunataj, samarikuna diata respetayta munaspa, mana jark'akorqankuchu.

¹²Kay librota leejkuna, ama musphaychejchu kay llakiykunata yachaspa. Tukuy kay llakiy jamorqa ayllunchej wananampaj. Mana jamorqachu chinkachisqa kanampajqa.

¹³Diosninchej k'acha sonqo kasqanrayku, usqhayllata castigota apachimun juchasapasman.

¹⁴Waj llajtayoj runastaqa castigayta munaspa, Señor pacienciakullanraj suyaspa juchasninkuwan medidate junt'achinankuta. Noqanchejwanqa mana ajinachu.

¹⁵Noqanchejtaqa Señor castigawanchej menaraj juchasninchej ashkhayashajtin.

¹⁶Señorqa khuyakuyninta mana karunchanchu noqanchejmanta. Llakiywan nanaykuchiwanchejtimpis, pay mana saqerpariwanchejchu.

¹⁷Tukuy kaytaqa nini yuyarikunallanchejpaj. Chayta niytawanqa, nishasqanchejta siguillasun.

¹⁸Kasqa nin uj runa, Eleazar sutiyoj, Diospa leyninta yachachej, may rejsisqa. Chay runaqa hombreña karqa, respetasqa. Ujta, munasqanku Eleazarqa khuchita mikhunanta, siminta kicharichispa.

¹⁹Paytaj, cheqallanta payllamanta risqa maypichus runasta wañuchinku chayman. Unanchasqa ari aswan walej kasqanta wañuyman riyta uman oqharisqa, p'enqaywan kausakuymanta nisqaqa.

²⁰Chay khuchi aychata siminman sat'iykusqanku chayta, thoqaykusqa Eleazarqa. Kikillantataj ruwananku tiyan kamachisqa kasqanta junt'ayta munajkuna, wañuchisqas kajtinkupis.

²¹Chaymanta, pikunachus qhawasharqanku chaypi, unaymantapacha rejsisqanku Eleazartaqa. Payta wajyachispataj, k'amisqanku nispa wakichikunanta mikhuyta atina aychata. Nisqankutaj chayta mikhunanta creechispa mikhusqanta lantisman jaywasqa chay aychamanta, reypa kamachisqanman jina.

²²Nisqankutaj ajinamanta manaña wañuyman rinan kasqanta. Nisqankutaj paykunaqa unaymantapacha rejsisqankurayku, payta k'acha sonqowan qhawanankuta.

²³Eleazartaj umachakuspa yuyasqa maychus kajta machu mitanman jina, yuraj chujchasninman jina ima. Cheqantapuni kausakusqa ari wawa kasqanmantapacha. Chantapis, anchata munakusqanrayku Diospa leyninta, nisqa: Wañuchillawaychej, nispa.

²⁴Nillasqataj: Machu kayniypi manapuni allinchu ch'aukiyayqa. Manapuni munaymanchu waynas yuyanankuta noqa Eleazar isq'on chunka watayojña kaspa, cheqan Diosta wasanchasqayta.

²⁵Nisqataj: Ichapis paykuna rikuspa chayta ruwasqayta, munasqayrayku kausakuytaraj pisi watasllatapis, juchayrayku kikillantataj ruwankuman. Noqataj p'enqayta apachimuyman machu watasniyman, nispa.

²⁶Chaymantataj, kunan runaspa makisninkumanta kacharichikuymampis, manapuni ayqeyta atiymanchu Diospa makisninmantaqa.

²⁷Chayrayku, kunanqa umay oqharisqa llojsillasaj kay kausaymanta. Ajinamanta ruwasaj imatachus allinmin machu runapajqa.

²⁸Chayta ruwaspataj waynasqa rikuwanqanku wañuyman rejta mana munasqayrayku Diospa leyninta qhesachayta. Paykunataj imatachus ruwarqani rikuspa, kikillantataj ruwanqanku, nispa nisqa. Chayta niytawankamataj, cheqallanta risqa maypichus runasta wañuchinku chayman.

²⁹Payta pusasharqanku chay runastaj manaña misk'i simiwan parlasqankuchu paytaqa. Yuyasqanku ari yuyayninta chinkachisqanta.

³⁰Eleazerqa wañuy patapiña kashasqa anchatapuni maqaykusqankurayku. Ansaqeyaspataj kay jinata nisqa: Señorqa tukuy imata allintapuni yachan. Yachampuni wañuymanta ayqerparikojtiypis, imaymana laya nanaywan ñak'arisqayta jasut'iwasqankumanta. Señorqa yachallantaj sonqoypi kusisqa kasqayta, payta munakusqayrayku.

³¹Chayta niytawantaj Eleazarqa wañupusqa. Ajinamanta, Eleazarqa waynasmampis, tukuy llajta masisninmampis yachacherqa sinch'ita sayayta, kallpayoj kayta ima.