Read Quechua Bolivia DC Bible 2 MACABEOS 8 Bible Online

2 MACABEOS 8 - Quechua Bolivia DC Bible bible

2 MACABEOS 8

¹Chaypacha, Judas, Macabeo nisqa, payta qhatejkunawan khuska, pakayllamanta yaykoj kasqanku ranchosman. Tantaykamusqankutaj sojta waranqa runasta, ayllusninkumanta, judío religionman k'askasqas kajkunamantawan.

²Paykunaqa Señormanta mañakoj kanku qhawananta chay aylluta, tukuyninku sarusharqanku chayta. Mañakojtaj kanku khuyakunanta templomanta, mana creejkuna runas ch'ichisharqanku chaymanta.

³Mañakojtaj kanku raqayman tukuchisqa llajtapaj. Yuyashasqanku ari chejnikojkuna munashasqankuta q'alata pampachayta. Chantapis, mañakojtaj kanku uyarinanta wañusqas payta qhaparikusqankuta.

⁴Chaymanta, nisqankutaj yuyarikunanta mana juchayoj wañuchisqa wawasmanta. Yuyarikunantataj paypaj sajrata rimasqankumanta. Nillarqankutaj rikuchinanta sajra kajta chejnikusqanta.

⁵Macabeoqa runasninta sumajta wakichisqa maqanakupaj. Chaymantapacha manaña atipachikojchu kanku mana creejkuna runaswan. Señorpa phiñakuynenqa khuyakuyman tukusqa ari.

⁶Macabeoqa runasninwan ch'inllamanta ujta chayamoj kanku llajtasman ranchosmantaj, chaytataj ankhaykoj kanku. Chantaqa, jap'ikapoj kanku maqanakupaj ajllasqa cheqasta. Ayqechejtaj kanku ashkha runasta.

⁷Astawanraj chaytaqa ruwaj kanku ch'isispi. Ajinamanta, Macabeoj t'ukuna ruwasqasnin tukuynejpi rejsisqa karqa.

⁸Felipetaj rikusqa Judas Macabeo pisimanta pisi astawan jatunyasqanta. Maqanakuspi Judas Macabeoqa atipashasqapuni. Chayrayku Filipoqa nichimusqa Tolomeoman jamunanta yanapaj reypa kapuynin mana chinkachisqa kanampaj. Tolomeoqa jatun kamachej karqa Celesiriapitaj Feniciapitaj.

⁹Tolomeoqa chaypacha ajllakusqa ujnin amigonta, Patrocloj wawan Nicanorta kachaykukunampaj Judeaman iskay chunka waranqa runaswan, judiosta atipanankupaj tukuchisqas kanankukama. Chay runasqa ashkha nacionesmanta karqanku. Nicanorwan khuska rinampajtaj, Tolomeo ajllasqa Gorgiasta. Chay Gorgiasqa karqa uj general, sumaj wakichisqa maqanakuspaj.

¹⁰Rey qonan kasqa iskay waranqa talento nisqa qolqeta romanosman. Nicanortaj yuyashasqa vendeyta judiosta, chay qolqewan reypa manunta paganampaj.

¹¹Chantaqa, Nicanor willachimusqa jatun qochaj chimpapi kashaj llajtasman jamunankuta judiosta rantikoj wata runaspaj. Nichimusqa vendesqanta uj talentollapi isq'on chunka judiosta. Nicanorqa manapuni yuyashasqachu Diospa phiñakuynin patanman urmayashasqantaña.

¹²Judas Macabeotaj yachasqa Nicanor jamushasqanta. Chaypachallataj runasninman willasqa Nicanorpa soldadosnin qayllamushasqankuta.

¹³Chayta uyariytawantaj, pisi sonqoyojkuna, mana Diospi sonqonkuta churajkuna ima, ayqekapusqanku.

¹⁴Wajkunataj puchusqanmanta kapuyninkuta venderqanku. Mañakorqankutaj Diosmanta tukuy paykunata mana creej Nicanormanta jark'ananta. Nicanorqa paykunata vendesqa ari manaraj tinkuman rishajtinku.

¹⁵Nisharqankutaj mana paykunaraykuchu chayta ruwananta, manachayqa chay tratorayku ñaupa tatasninkuwan ruwarqa chayrayku, qhaparikusqankuraykutaj paypa may jatun sutinta.

¹⁶Chaymantataj Macabeoqa tantaykamorqa sojta waranqa runasninta, nerqataj ama llauch'iyanankuta contrankupi jamojkunaj ñaupaqenkupi. Nisqataj ama manchachikunankuta chay ashkha paganosmanta, qhasillamanta jamusharqanku maqanakoj chaykunamanta. Nisqataj sinch'i sonqoyoj rinankuta maqanakoj.

¹⁷Chaymanta, nillasqataj yuyarikunankuta imaynatachus chay runasqa ch'ichichasqankuta templota, yuyarikunankutataj llajtankuta chay jinatapuni llakichisqankumanta. Chantapis, nillasqataj yuyarikunankuta chay runasqa costumbresninkuta chinkachiyta munasqankumanta.

¹⁸Nerqa ari Macabeoqa: Paykunaqa wapuyashanku sonqonkuta churaspa maqanakunasninkupitaj, umachakuyta yachasqankupitaj. Noqanchejrí sonqonchejta churanchej Tukuy Atiyniyoj Diosninchejpi. Paymin uj simillawan atin atipayta contranchejpi jamushajkunatawan, mundontimpi kaj runastawan, nispa.

¹⁹Yuyaricherqataj imaynatachus Diosqa unay wataspi yanaparqa ñaupa tatasninkuta. Yuyarichillarqataj Senaquerib kamachishajtin, Diosqa chinkachisqanta Senaqueribpa pusaj chunka phishqayoj waranqa runasninta.

²⁰Ajinallatataj, yuyaricherqa imaynatachus Babiloniapi judiosqa maqanakorqanku galataswan. Chaypi pusaj waranqa judiosqa yanapasqanku maqanakupi tawa waranqa macedoniosta. Chaypacha, macedoniosqa atipachikushajtinkuña, chay pusaj waranqa judiosqa, Diospa yanapayninwan, pachaj iskay chunka waranqa runasta atipasqanku, kapuyninkumantataj ashkhata apakapusqanku.

²¹Ajinamanta Macabeoqa nisqasninwan kallpacharqa runasninta, nispa wakichikunankuta wañunankupaj leyesninkurayku llajtankuraykutaj. Chaymantataj, tukuy runasta tawa t'aqapi churarqa.

²²Ujnin kaj t'aqata kamachinan karqa Judaspa wauqen Simón. Ujninta kamachinan karqa wauqen José. Ujnintari wauqen Jonatán. Sapa uj karqa waranqa phishqa pachaj runasniyoj.

²³Kikin Judas Macabeo ñaupaj kaj t'aqata kamachinan karqa. Nerqataj Judas Macabeoqa Azariasman santo librota leemunanta. Chaymantataj, Diospa yanapayninwan!, nispa, kachaykukorqa Nicanorwan tinkukoj.

²⁴Tukuy atiyniyojqa paykunata yanaparqa maqanakupi. Paykunataj wañucherqanku isq'on waranqa soldadosmanta astawan. Nanaykucherqankutaj, qholurparerqankutaj yaqha tukuy Nicanorpa soldadosninta. Tukuyninkutataj ayqericherqanku.

²⁵Chantataj, judiosqa jap'ikaporqanku chay qolqeta imatachus chay runasqa apamusqanku judiosta rantinankupaj. Unaytaña qhatisqankumanta, judiosqa kutimpusqanku ch'isiyamushajtinrayku.

²⁶Q'ayantin samarina día karqa. Chayraykoqa, paykunata manaña qhatiykorqankuñachu.

²⁷Qotuytawanqa maqanasta, contrasninku saqerparisqanku chaykunata, tukuy imata pallakapusqanku. Chaymantataj, qallarisqankuña sabadota waqaychayta Señorta yupaychaspa. Agradecekorqankutaj Señorqa chay diakama paykunata qhawasqanmanta. Qallarisqaña ari paykunaman khuyakuyninta rikuchiyta.

²⁸Samarina pasaytawankamataj, jap'ikapusqankumanta qorqanku mask'asqas karqanku chaykunaman, warmi sapasman, wajcha wawasmampis. Puchusqantataj, paykuna wawasninkupis apakaporqanku.

²⁹Chaymanta, ujllapi tantaykukuspa, khuyakoj Señormanta mañakorqanku allinyakapunanta.

³⁰Maqanakuspataj Timoteowan Baquideswan ima, iskay chunka waranqa soldadosta wañucherqanku. Chaymanta, jap'ikaporqanku pataspi kashaj jark'anasta. Chantaqa, iskaymanta partisqanku jap'ikapusqanku chayta. Ujnin paykunapaj karqa, ujnintaj wajcha wawaspaj, warmi sapaspaj, machu runaspaj ima.

³¹Maqanasta sumajta jallch'asqanku ajllasqa cheqaspi. Wajkunatataj apakapusqanku Jerusalén llajtaman.

³²Chaymanta, wañuchisqanku Timoteoj soldado tropasninta kamachejta. Chay runa may sajra karqa, anchatapunitaj ñak'aricherqa judiostaqa.

³³Jerusalén llajtapitaj, fiestata ruwashajtinku atipasqankumanta, ruphaykuchisqanku pikunatachus templo punkusta enqhaykorqanku chaykunata, Calistenestawan, pichus uj ch'ullapi pakakushasqa, chayta. Ajinamanta, Calistenesqa pagota jap'ikorqa sajra ruwasqanmanta.

³⁴Kunanqa, yuyarikusunchej Nicanormanta, chay kinsa kuti sajra runamanta. Payqa ari apachimusqa waranqa qhatukoj runasta, judiosta rantikunankupaj.

³⁵Señorqa munasqanrayku, chay Nicanorta pampaman k'umuykucherqanku pikunachus paymanta qhesachasqas karqanku tukuy runasmanta astawan. Nicanorqa manaña k'acha p'achasniyoj karqachu. Sapallan ayqesharqa kayman jaqayman camposninta. Chaymanta, Antioquía llajtaman chayasqa, aswan suerteyoj kaspa atipachikusqanku soldadosninmantaqa.

³⁶Pichus nisqa romanosman manuta pagakapunanta Jerusalenmanta judiosta vendesqanwan, kunanqa willashan judiosata uj jark'akoj yanapasqanta, imaraykuchus judiosqa junt'anku chay yanapajpa kamachisqanta.