Read Quechua Bolivia DC Bible SAN MATEO 13 Bible Online

SAN MATEO 13 - Quechua Bolivia DC Bible bible

SAN MATEO 13

¹Jaqay p'unchaypi, Jesús wasimanta llojsispa qocha cantopi tiyaykukorqa.

²Ashkha runataj payman tantakamorqa. Chayraykutaj Jesusqa boteman wicharispa tiyaykukorqa. Tukuy runataj qocha cantollapi kasharqa.

³Jesusqa yachacherqa ashkha rijch'anachinaswan, nispa: Uj tarpoj runa llojserqa mujuta tarpoj.

⁴Tarpushajtintaj wakin mujoqa urmarqa ñan pataman, p'isqostaj jamuytawan mikhukaporqanku.

⁵Wakin mujutaj pisi jallp'ayoj rumiraraman urmarqa. Chaypitaj usqhayta p'utumorqa, jallp'a mana ukhu kasqanrayku.

⁶Inti llojsimojtinkamataj qawiraspa ch'akiporqanku, saphisnin mana ukhupi kasqankurayku.

⁷Wakin mujustajrí, khishkas chaupiman urmarqanku; khishkastaj wiñaykuspa k'irincharqanku.

⁸Wakin mujustaj urmarqanku sumaj jallp'aman, poqorqankutaj: Wakin muju pachajta, wakin sojta chunkata, wakintaj kinsa chunkata uj mujullamanta.

⁹Ningrisniyojqa uyarichun.

¹⁰Yachachisqasnintaj Jesusman qayllaykuspa nerqanku: Imajtintaj runasman parlanki rijch'anachinaswanri?

¹¹Paytaj kutichispa nerqa: Qankunaman janaj pacha reinoj pakasqa imasninmanta yachayta qosunkichej, manataj paykunamanqa.

¹²Kapuyniyojmanqa yapasqa kanqa, astawan kapuyniyoj kanampaj. Pisi kapuyniyojmantataj chay pisi kapuynimpis qhechusqa kanqa.

¹³Chayrayku noqaqa, rijch'anachinaswan paykunaman parlani; imaraykuchus paykunaqa, qhawashaspa mana rikunkuchu, uyarishaspataj mana uyarinkuchu, manataj entiendenkuchu.

¹⁴Ajinata Isaiaspa profetizasqan paykunapi junt'akun: Uyarinkichej, manataj entiendenkichejchu; rikuyta rikunkichej, manataj allinta qhawankichejchu.

¹⁵Kay runaspa sonqonqa rumiyasqa. Nak'ayllata uyarinku. Ñawisninkuta, ningrisninkutapis wisq'anku. Paykunachus ñawisninkuwan qhawankuman, ningrisninkuwan uyarinkuman, sonqonkuwantaj kutirimuwankuman chayqa, chaypacha noqaqa paykunata thañichiyman.

¹⁶Qankunaqa kusiyniyoj kankichej, imaraykuchus ñawisniykichej rikun, ningrisniykichejpis uyarinku.

¹⁷Cheqamanta niykichej: Ashkha profetas, allin runaspis, rikuyta munarqanku imatachus rikusqaykichejta, manataj rikorqankuchu. Munallarqankutaj uyariyta imatachus uyarishankichej chayta, nillataj uyarerqankuchu.

¹⁸Uyariychej ari imatachus niyta munan, tarpojmanta rijch'anachina yachachiy.

¹⁹Pichus janaj pacha reinomanta palabrata uyarishaspa mana yuyaynimpi jap'inchu chayqa, supay jamuytawan sonqompi imachus tarpusqa kajta qhechun. Paykunaqa kanku ñan patapi muju t'akasqa jina.

²⁰Pichus Diospa palabranta uyarin, chaypachataj kusiywan jap'in chayqa, rumiraraman urmaj mujuman rijch'akun.

²¹Mana allin saphichasqa kaspa mana unayta kayta atinchu; Diospa palabranraykutaj llakiy, chejniy jamojtin payqa urman.

²²Khishka ukhuman t'akakoj mujutaj palabrata uyarejman rijch'akun. Mundo imaspi yuyaykuna, qhapajyayta munapayay ima, Diospa palabranta qonqachispa mana poqojta saqenkuchu.

²³Sumaj jallp'api tarpusqa mujutaj rijch'akun, pichus Diospa palabranta uyarispa sumajta umampi jap'in, poqoytataj apan, chayman. Sapa uj mujutaj poqon pachajta, sojta chunkata, wakintaj kinsa chunkata uj mujullamanta.

²⁴Waj rijch'anachinawan Jesús yachachin, nispa: Janaj pacha Diospa reinonqa rijch'akun sumaj mujuta jallp'ampi tarpoj runaman.

²⁵Tarpojkuna puñuranankukamataj, tarpojpa enemigonqa jamuspa qhora cizaña mujuta trigo tarpusqaman t'akaykuspa ayqerqa.

²⁶Trigo wiñamuspa espigashajtinña, cizaña qhorapis rikhurillarqataj trigowan khuska.

²⁷Kamachisnintaj rispa, chajrayojman nerqanku: Patrón, manachu sumaj mujuta tarporqanki jallp'aykipeqa? Imaynamantataj rikhurimun cizaña qhorari?, nispa.

²⁸Paytaj nerqa: Pi enemigochá kaytaqa ruwan. Kamachistaj nerqanku: Munankichu chay qhorasta sik'iramunaykuta?, nispa.

²⁹Paytaj kuticherqa: Ama jinaychejchu. Qhorata t'irashaspa trigo wiñaytawan t'irawajchej.

³⁰Saqellaychej khuska wiñajta cosechakama. Trigo ruthunaña kajtintaj, ruthojkunaman nisaj: Cizaña qhorataraj ñaupajta pallaychej, marq'a marq'ata wataraspa ruphachinapaj. Trigotataj pirwayman waqaychaychej.

³¹Jesusqa, waj rijch'anachina yachachiyta paykunaman willarqa: Janaj pacha Diospa reinonqa rijch'akun uj mostaza mujuman, mayqentachus uj runa jallp'ampi tarporqa, chayman.

³²Cheqamanta chay mujoqa, tukuy mujusmanta aswan juch'uy. Wiñaspataj, tukuy qhorasmanta aswan jatunta wiñan, sach'ayanankama. Ajina kajtintaj p'isqospis jamuspa thansasnimpi thapachakunku.

³³Waj rijch'anachina yachachiytañataj paykunaman nerqa: Janaj pacha reinoqa, levaduraman rijch'akun; imaynatachus uj warmi, levadurata kinsa tupu jak'uman chajrun, tukuynin masata poqochinampaj, chayman.

³⁴Kay tukuy imasta Jesusqa rijch'anachinaswan parlaj runasman; mana rijch'anachinaswanqa mana imatapis yachachejchu.

³⁵Profetaj nisqan junt'akunampaj ajinata nerqa: Rijch'anachinaswan simiyta kicharisaj, sut'inchasajtaj pakasqa imasta, kay mundo ruwasqa kasqanmantapacha.

³⁶Runasta kacharpayaspataj Jesusqa wasiman yaykorqa. Yachachisqasnintaj payman qayllaykuspa taporqanku: Cizañamanta sut'inchawayku, nispa.

³⁷Paytaj kuticherqa: Sumaj mujuta tarpojqa Runaj Churin.

³⁸Jallp'aqa mundo. Sumaj mujutaj janaj pacha reinoj wawasnin. Cizañataj supaypa wawasnin.

³⁹Cizañata t'akaj enemigoqa supay. Cosechaqa mundoj, tukukuynin. Ruthojkunataj ángeles kanku.

⁴⁰Imaynatachus cizañata tantaykuspa ruphaykuchinku ninawan, ajinallataj kay mundoj tukukuynimpi kanqa.

⁴¹Runaj Churin kachamonqa angelesninta, orqhonampaj reinonmanta, juchaman misk'achej tukuy runasta juchasapastawan. Nina hornomantaj enqhaykonqanku; chaypitaj manchay waqay, kiru k'arukuytaj kanqa.

⁴²

⁴³Cheqan kaj runastaj, inti jina lliphipenqanku Tatankoj reinompi. Chayrayku, ningriyojqa uyarichun.

⁴⁴Janaj pacha reinoqa, jallp'api pakasqa qolqeman rijch'akun. Uj runa chayta tarispa, pachallanmantaj watejmanta p'ampaykun. Kusisqa ripuspataj tukuy imasninta vendemun; chay jallp'atataj rantikapun.

⁴⁵Jinallataj janaj pacha reinoqa, comerciante runa sumachaj perlasta mask'ajman rijch'akun.

⁴⁶Uj sumaj perlata tarispataj, tukuy kapusqanta vendespa, chay sumaj perlata rantikaporqa.

⁴⁷Janaj pacha reinoqa rijch'akullantaj, uj challwa jap'ina ch'ipaman, qochaman wijch'uykusqa, tukuy laya challwasta jap'ejman.

⁴⁸Challwas ch'ipaman junt'aykojtinkukamataj, challwiris qocha cantoman aysanku. Chaypi tiyaykuspa allin kajkunata canastasman ajllanku, mana allin kajkunatataj wijch'upunku.

⁴⁹Ajina kanqa, kay mundoj tukukuynimpi, ángeles llojsimonqanku juchasapasta t'aqaj mana juchayojkunamanta.

⁵⁰K'ajaj hornomantaj wijch'uykonqanku. Chaypitaj manchay waqay, kiru k'arukuytaj kanqa.

⁵¹Chaymanta Jesús paykunata taporqa: Kay tukuy imata entiendenkichejchu? Paykunataj, arí Señor, nerqanku.

⁵²Jesustaj paykunaman nillarqataj: Chayrayku, pi leymanta yachachejpis, janaj pacha reinomanta yachajqa, rijch'akun uj familiayoj runaman, pichus waqaychananmanta orqhomun mosojkunata, mauk'asta ima.

⁵³Jesús rijch'anachinaswan parlayta tukuspa, chaymanta riporqa.

⁵⁴Nazaret llajtaman chayaspataj, sinagogasninkupi yachachisharqa. Paykunataj t'ukuspa nerqanku: Maymantataj kay yachaynin tiyapunri? Imaynamantataj kay milagrostapis ruwanri?

⁵⁵Manachu payqa carpinteroj wawan? Manachu mamampis María, wauqesnimpis Santiago, José, Simón, Judas ima kanku?

⁵⁶Manachu panasnimpis noqanchej ukhupi kashanku? Chantá maymantataj kay tukuy imasta pay yachanri?

⁵⁷Chayrayku paykunaqa t'ukorqanku. Jesustaj paykunaman nerqa: Mayllapipis profetaqa allimpaj qhawasqa; llajtallampi, wasillampi payqa qhesachasqa.

⁵⁸Mana creesqankuraykutaj, jaqaypeqa mana ashkha milagrosta ruwarqachu.