Read Quechua Bolivia DC Bible SAN MATEO 15 Bible Online

SAN MATEO 15 - Quechua Bolivia DC Bible bible

SAN MATEO 15

¹Wakin fariseos, leymanta yachachejkuna ima, Jerusalenmanta jamuspa Jesusman qayllaykorqanku, taporqankutaj: Imaraykutaj yachachisqasniyki p'akinku tataspa ñaupa usunkutari? Paykunaqa makinkuta mana mayllakunkuchu mikhunankupaj.

³Jesustaj kuticherqa: Imaraykutaj qankunapis Diospa kamachiyninta p'akinkichej, qankunaj usuykichejta ruwanaykichejrayku?

⁴Diosqa kamacherqa: Tataykita, mamaykitawan respetanki. Pichus tatanta, chayrí mamanta maldicejqa, wañuchun.

⁵Qankunaqa ninkichej: Pillapis tatanta, chayrí mamanta niyta atin: Mana yanapayta atiykichu, imaraykuchus tukuy kapuwasqanta Diosmanña qopuni.

⁶Jinapeqa, mana tatanta, nitaj mamantapis respetanqañachu. Ajinamanta qankunaqa Diospa kamachisqanta p'akinkichej, chay ñaupa usuykichejrayku.

⁷Puraj uyas! Allinta Isaías qankunamanta nerqa:

⁸Kay runasqa simillankuwan yupaychawanku, sonqonkurí noqamanta karupi kashan.

⁹Qhasillata yupaychawanku. Paykunaqa Diospa yachachiyninta jina, runaspa kamachisqallanta, yachachinku.

¹⁰Runasta wajyaspataj nerqa: Uyariychej, entiendeychejtaj.

¹¹Imachus simiman yaykojqa, mana ch'ichichanchu runataqa; simimanta llojsimojmá runataqa ch'ichichan.

¹²Yachachisqasnintaj qayllaykuspa nerqanku: Yachankichu, fariseos, nisqaykita uyarispa mana allimpaj jap'isqankuta?

¹³Jesustaj kuticherqa: Ima yurallapis, janaj pacha Tataypa mana plantasqanqa, saphinmantapacha sik'isqa kanqa.

¹⁴Saqeychej. Paykunaqa ciegos kanku, ciegosta pusaykachajkunataj. Sichus ciego, ciegota pusaykachanman chayqa, iskayninku t'oqoman urmaykunkuman.

¹⁵Chaymanta, Jesusman Pedro nerqa: Sut'inchawayku kay rijch'anachinamanta.

¹⁶Paytaj kuticherqa: Manarajchu qankunapis entiendenkichej?

¹⁷Manachu unanchankichej, tukuy ima siminejta yaykojqa wijsaman risqanta, chaymantataj wijch'usqa kasqanta?

¹⁸Siminejta llojsejqa sonqomanta llojsimun; chaymá runataqa ch'ichichan.

¹⁹Sonqomanta llojsimunku tukuy sajra yuyaykuna, runa wañuchiykuna, adulterio juchaman urmaykuna, solteropura juchallikuykuna, suwaykuna, llulla testigomanta sayaykuna, Diospa contranta rimaykuna ima.

²⁰Kay imasmá runastaqa ch'ichichanku; mana mayllasqa makiswan mikhoyqa mana runastaqa ch'ichichanchu.

²¹Jesusqa jaqaymanta llojsispa, Tironejman, Sidonnejmanwan rerqa.

²²Chaynejmantataj uj cananea warmi llojsimorqa, qhaparispataj Jesusmanta mañakorqa: Señor, Davidpa Churin, khuyarikuway ari! Warmi wawayta anchataña supay ñak'arichishan.

²³Jesustaj mana imata kuticherqachu warmiman. Chantá yachachisqasnin Jesusman qayllaykuspa nerqanku: Kachapuy, imaraykuchus qhepanchejta qhaparispa jamushan.

²⁴Paytaj kutichispa nerqa: Diosqa kachamuwan, Israel ayllumanta chinkasqa ovejasllaman.

²⁵Chaywampis warmeqa, qayllaykuspa Jesusman k'umuykukorqa, nerqataj: Señor, yanaparillaway ari!

²⁶Jesustaj kuticherqa: Mana allinchu, wawaspa t'antanta qhechuspa alqetusman qaranaqa.

²⁷Warmitaj nerqa: Arí, Señor alqetuspis mikhullankutaj, dueñosninkoj mesanmanta, t'anta t'unas t'akakojta.

²⁸Jesustaj payman nerqa: Warmi, feniykeqa ancha jatun. Munasqaykiman jina ruwasqa kachun. Chaymantapacha ususenqa thañikaporqa.

²⁹Jesús jaqaymanta llojsispa, Galilea qocha cantoman rerqa; orqoman wicharispataj, chaypi tiyaykukorqa.

³⁰Ashkha runastaj Jesusman qayllaykorqanku; pusamorqankutaj cojosta, ciegosta, opasta, ñuk'usta, waj ashkha onqosqastawan. Jesuspa ñaupaqenman churaykukojtinkutaj, paykunata thañicherqa.

³¹Runastaj mayta t'ukorqanku, rikuspa opasta parlajta, ñuk'usta thañejta, cojosta purirejta, ciegostataj rikojta. Paykunataj Israelpa Diosninta yupaycharqanku.

³²Jesustaj yachachisqasninta wajyaspa, nerqa: Sonqoy nanawan kay runasmanta, imaraykuchus kinsa p'unchaytaña noqawan kashanku, mana ima mikhunayoj. Manataj munanichu mana mikhusqasta kachapuyta, ama ñampi llauchhuyanankupaj.

³³Yachachisqasnintaj nerqanku: Maymantataj, noqanchej chay chhika t'antata kay ch'impi tarisunman, tukuynin runata sajsachinapajri?

³⁴Jesustaj taporqa: Mashkha t'antastaj tiyapusunkichejri? Paykunataj nerqanku: Qanchus t'antalla, pisi challwitaswan.

³⁵Chaymantataj, runasta kamacherqa pampapi tiyarakunankuta.

³⁶Qanchis t'antasta, challwastawan makimpi jap'ispa, graciasta qorqa. Partispataj yachachisqasninman jaywarqa; paykunataj runakunaman jaywarqanku.

³⁷Tukuyninku mikhorqanku, sajsakorqankutaj. Puchoj t'antatataj, qanchis kanasta junt'ata oqharerqanku.

³⁸Mikhojkunataj, tawa waranqa qharis karqanku; mana yupaspa warmista, nitaj wawasta.

³⁹Runasta kacharpayaspataj, payqa boteman wicharispa, Magdala llajta chaynejman rerqa.