Read Quechua Bolivia DC Bible SAN MATEO 16 Bible Online

SAN MATEO 16 - Quechua Bolivia DC Bible bible

SAN MATEO 16

¹Chaymantataj, fariseos saduceoswan Jesusman qayllaykorqanku, imaynallapipis urmachiyta munaspa; mañarqankutaj, janaj pachamanta ima señaltapis rikuchinanta.

²Paytaj kutichispa nerqa: Qankunaqa, ch'isiyaykushajtin ninkichej: Sumaj p'unchayta ruwanqa; imaraykuchus phuyu pukata antawaramushan.

³Tutamantataj ninkichej: Kunanqa llojlla para kanqa. Puka yanata phuyuykamushan. Puraj uyas! Qankunaqa phuyusta qhawarispa yachankichej imayna diachus kananta, manataj rejsiyta atinkichejchu tiempospa señalesninta.

⁴Kay sajra, qhenchachakoj runaj miraynenqa, mañan uj señalta. Manataj ima señalpis qosqachu kanqa, Jonaspa señalninmanta astawanqa. Paykunata pachanman saqerpayaspataj riporqa.

⁵Yachachisqasnintaj, qocha chimpaman chayaspa, yuyarikorqanku t'antata mana apakusqankumanta.

⁶Jesustaj nerqa: Qhawakuychej, karunchakuychejtaj fariseospa levaduranmanta saduceospamantawan.

⁷Yachachisqasnintaj, paykunapura ninakorqanku: Kaytaqa niwanchej t'antata mana apakamusqanchejrayku.

⁸Jesustaj, chay nisqankuta yachaspa nerqa: Pisi feniyoj runas! Imaraykutaj qankunapura ninakunkichej mana t'antaykichej kasqanta?

⁹Manarajchu entiendenkichej, nitajchu yuyarikunkichej, phishqa t'antasmanta, phishqa waranqa runas mikhusqankuta: puchoj t'antastataj mashkha canastastarajchus oqharisqaykichejta?

¹⁰Nitajchu yuyarinkichej qanchis t'antasmanta, tawa waranqa qharis mikhusqankuta, mashkha canastastarajchus oqharisqaykichejta?

¹¹Imajtintaj mana entiendenkichejchu, mana t'antamantachu qankunaman parlasqayta? Astawanqa, allinta qhawakuychej fariseospa levaduranmanta, saduceospamantawan.

¹²Chaymantaña yuyayninkuman churakorqanku, Jesusqa mana t'anta levaduramantachu parlasqanta; manachayqa, fariseospa yachachiyninmanta, saduceospamantawan, allinta qhawakunankuta.

¹³Filipoj Cesareannejman chayaspa, Jesús yachachisqasninta taporqa: Runasrí, Runaj Churinta pi kasqantataj ninku?, nispa.

¹⁴Paykunataj nerqanku: Wakin ninku Juan Bautista kasqanta; ujkunataj Elías kasqanta; wajkunatajrí Jeremías kasqanta; chayrí profetasmanta ujnin kaj, nispa.

¹⁵Jesustaj paykunaman nerqa: Qankunarí, pi kasqaytataj niwankichej?

¹⁶Simón Pedrotaj kutichispa nerqa: Qanqa Cristo kanki, kausaj Diospa Churin.

¹⁷Jesustaj kuticherqa: Kusikuyniyoj kanki Simón, Jonaspa wawan; kaytaqa mana runachu yachachisunki; manachayrí, janaj pachapi kashaj Tatay kaytaqa yuyaychasunki.

¹⁸Noqarí niyki, qan Pedro kasqaykita. Kay chhanka patapitaj iglesiayta sayarichisaj. Infiernoj atiynimpis mana iglesiataqa atipanqachu.

¹⁹Qanman qosqayki janaj pacha reinoj llavesninta; imallatapis kay pachapi watanki chayqa, janaj pachapi watasqallataj kanqa. Imatachus phaskaranki chaypis, janaj pachapi phaskarasqallataj kanqa.

²⁰Chaymantataj yachachisqasninta allinta kamacherqa, ama pimampis willanankuta pay Cristo kasqanta.

²¹Chaypachamanta, Jesús yachachisqasninman willayta qallarerqa Jerusalenman rinampuni kasqanta, chaypitaj kurajkuna, leymanta yachachejkuna, kuraj sacerdotes ima, anchatapuni ñak'arichinankuta, wañuchinankuta ima; kinsa p'unchaymantataj kausarimunanta.

²²Pedrotaj, Jesusta sapallanta wajnejman pusaspa k'amiyta qallarerqa: Señor, chay nisqaykeqa karunchakuchun qanmanta. Ama jinaqa kachunchu, nispa.

²³Jesustaj kutirikuspa Pedroman nerqa: Riy kaymanta Satanás. Qanqa misk'achiyta munawanki. Imaraykutaj mana Diospa imasnimpi yuyankichu? Qanqa runakunaj imasnillampi yuyashanki.

²⁴Chaypacha, Jesusqa yachachisqasninman nerqa: Pillapis noqawan riyta munajqa, pay kikinta qhesachakuchun, cruznin oqharisqataj qhatiwachun.

²⁵Pillapis kausayninta salvayta munajqa, kausayninta chinkachenqa; kausayninta noqarayku chinkachejrí, tarikaponqa.

²⁶Ima allintaj runapaj kanman, sichus mundontinta gananman, kausaynintataj chinkachinman chayqa? Chayrí, imatataj runa qonman almanrayku?

²⁷Runaj Churenqa, Tatampa janaj pacha k'anchaynimpi jamonqa angelesninwan. Chaypachataj sapa ujman qoponqa ruwasqanman jina.

²⁸Cheqamanta niykichej, wakin kaypi kajkunamanta mana wañonqankuchu, Runaj Churinta reinompi jamojta rikunankukama.