Read Quechua Bolivia DC Bible SAN MATEO 19 Bible Online

SAN MATEO 19 - Quechua Bolivia DC Bible bible

SAN MATEO 19

¹Jesusqa, kay tukuy imasta niytawan Galileaman riporqa, Judea jallp'aman, Jordán mayoj chimpanman.

²Ashkha runataj Jesuspa qhepanta rerqa; chaypitaj pay onqosqasta thañicherqa.

³Wakin fariseostaj Jesusman qayllaykorqanku pantachiyta munaspa, taporqankutaj: Qhareqa atillanchu warminmanta t'aqakuyta mana imallamanta?

⁴Paytaj kuticherqa: Manachu Diospa palabrampi leerqankichej, pichus kay pachata ruwajqa qallariypi qharita warmitawan ruwasqanta?

⁵Chayrayku qhareqa, tatanta, mamanta saqespa warminwan kausakaponqa. Iskayninkutaj uj aychallaña kanqanku.

⁶Ajinapeqa manaña iskaychu, ujllaña kanku. Chayrayku, Diospa tantasqanta ama runaqa t'aqachunchu.

⁷Fariseostaj ujtawan tapullarqankutaj: Imaraykutaj chantá Moisés kamacherqa, uj t'aqanaku papelta jaywaspa warmita saqerparinata?

⁸Jesustaj paykunaman nerqa: Qankunaj rumi sonqoykichejraykulla Moisesqa saqesorqachej warmiykichejmanta t'aqakunaykichejta. Qallariypeqa mana jinachu karqa.

⁹Chayrayku niykichej: Pillapis warminta wijch'un mana pay qhenchachakojtillan, waj warmiwantaj casaran chayqa, qhenchachakun. [Jinallataj wijch'usqa warmiwan casarajpis qhenchachakullantaj.]

¹⁰Yachachisqasnintaj nerqanku: Sichus ajinata qhari kausanan tiyan chayqa, mana allinchu casarakunaqa.

¹¹Paytaj kuticherqa: Mana tukuychu umankupi jap'inku kay yachachiytaqa; pikunamanchá kay yachay qosqa kashan, chaykunalla yachanku.

¹²Wakin qharisqa nacisqankumantapacha eunucos kanku; wakintatajrí runas eunucosman tukuchinku; wakintaj paykunaj munayninkumanta, janaj pacha reinorayku eunucosman tukunku. Pichus kayta umampi jap'iyta atinman chayqá, jap'ichun.

¹³Chantá, wawasta pusamorqanku Jesusman, paykunaj patankuman makisninta churaykuspa Diosmanta mañanampaj. Yachachisqasnintaj chay pusamojkunata k'amerqanku.

¹⁴Jesustaj paykunaman nerqa: Saqeychej wawasta noqaman jamunankuta, ama jark'aychejchu. Janaj pacha reinoqa paykuna jina kajkunapaj.

¹⁵Wawaspa patanman makisninta churaykuspataj, chaynejmanta riporqa.

¹⁶Chaypacha, Jesusman uj runa qayllaykuspa nerqa: [K'acha] Maestro, ima sumaj kajtataj ruwasaj wiñay kausayniyoj kanaypajri?

¹⁷Paytaj kuticherqa: Imaraykutaj sumaj kajmanta tapuwankiri? Mana waj sumaj kanchu, Dioslla sumajqa. Wiñay kausayniyoj kaytachus munanki chayqa, kamachisqasniyta junt'ay.

¹⁸Paytaj nerqa: Mayqenkunataj chay kamachisqasri? Jesustaj kuticherqa: Ama wañuchinkichu, ama qhenchachakunkichu, ama suwankichu, amataj llulla testigomantapis sayankichu.

¹⁹Tataykita, mamaykitapis respetay, runa masiykitapis munakunki qan kikiykita jina.

²⁰Waynataj nerqa: Kay tukuyta junt'aniña. Imatawanraj ruwanay tiyanri?

²¹Jesustaj payman nerqa: Sichus cabal kayta munanki chayqa; riy, tukuy kapususqanta vendemuy, chay qolqetataj pisichikojkunaman qopuy. Ajinamanta kapuyniykeqa janaj pachapi waqaychasqa kanqa. Jamuspataj noqata qhatiway.

²²Waynataj chay nisqanta uyarispa, llakisqa riporqa, imaraykuchus, payqa ashkha jallp'asniyoj karqa.

²³Chantataj Jesusqa yachachisqasninman nerqa: Cheqamanta niykichej, qhapaj runaqa ñak'ayllata janaj pacha reinoman yaykonqa.

²⁴Ujtawan niykichej: Uj camelloraj yarwej ningrinta yaykuyta atinman, uj qhapaj runa Diospa reinonman yaykunanmantaqa.

²⁵Kayta uyarispa yachachisqasnenqa maytapuni t'ukorqanku, nispa: Pitaj chantá salvasqa kanmanri?

²⁶Jesustaj paykunata qhawarispa, nerqa: Runaspajqa mana kayqa atikunchu, Diospajrí tukuy ima atikun.

²⁷Pedrotaj Jesusman kuticherqa: Noqaykupis tukuy imaykuta saqerparispa qanwan purishayku. Imataj noqaykupaj kanqari?

²⁸Jesustaj paykunaman nerqa: Cheqamanta niykichej, tukuy ima mosojman tukojtin, Runaj Churin k'anchay tronompi tiyaykukojtintaj, qankunapis noqawan khuska purisqaykichejrayku, chunka iskayniyoj tronospi tiyaykukullankichejtaj, chunka iskayniyoj Israelpa ayllusninta juzganaykichejpaj.

²⁹Pillapis wasisninta, wauqesninta, panasninta; chayrí tatanta, mamanta, warminta; chayrí wawasninta, jallp'asninta ima, noqaj sutiyrayku saqejqa, tukuy imamanta pachaj kutitawan jap'ikaponqa, wiñay kausaymantaj yaykonqa.

³⁰Ñaupajpi kajkunataj qhepapi rikhurenqanku; qhepapi kajkunataj ñaupajpi kanqanku.