Read Quechua Bolivia DC Bible SAN MATEO 2 Bible Online

SAN MATEO 2 - Quechua Bolivia DC Bible bible

SAN MATEO 2

¹Jesús nacikorqa Belempi; chaytaj karqa Judea jallp'api rey Herodes kamachishajtin. Chaypacha, inti llojsimuynejmanta yachaysapa runas Jerusalenman chayamorqanku.

²Taporqankutaj: Maypitaj kashan judiospa reynin nacikojri? Kayta niyku, imaraykuchus ch'askanta rikuyku inti llojsimuynejpi. Chayrayku kayman jamuyku payta yupaychaj.

³Rey Herodestaj kayta uyariytawankama kharkarqa; jinallatataj Jerusalempi tukuy kajkunapis.

⁴Chaymantataj wajyacherqa kuraj sacerdotesta, Diospa leyninta yachachejkunatawan. Paykunatataj taporqa: Maypitaj Cristo nacikunan karqari?

⁵Paykunataj nerqanku: Belempi, Judea jallp'api, imaraykuchus ajinata profeta escriberqa:

⁶Qanrí Belén, Judaj jallp'ampi kaj, manamin aswan juch'uychu kanki Judaj llajtasnin ukhupi. Qanmanta llojsenqa uj kamachej, paytaj Israel aylluyta michenqa.

⁷Chantá Herodesqa, pakayllamanta yachaysapa runasta wajyaspa, aswan allinta taporqa, mayk'ajpunichus chay ch'aska paykunaman rikhurimusqanta.

⁸Chaymanta paykunata kacharqa Belenman, nispa: Riychej jaqayman, allinta yachamuychej chay wawamanta. Wawata tarispataj willawankichej, noqapis yupaychamunaypaj.

⁹Yachaysapa runastaj, reypa nisqanta uyariytawan riporqanku. Chantá inti llojsimuynejpi rikusqanku chay ch'askataj, ñaupaqenkuta risharqa wawa maypichus kasharqa chaykama, chaynejpitaj sayaykorqa.

¹⁰Paykunataj ch'askata rikuspa, maytapuni kusikorqanku.

¹¹Wasiman yaykuspataj, wawata, María mamantawan rikorqanku. Chaypitaj qonqoriykukuspa wawata yupaycharqanku. Chantá, q'episninkumanta orqhospa saqeporqanku qorita, inciensota, mirratawan.

¹²Mosqoypitaj Dios paykunaman willarqa ama Herodesman kutinankuta. Chayrayku waj ñannejta llajtankuman kutiporqanku.

¹³Yachaysapa runas ripusqankumanta, Señorpa angelnin Joseman rikhurerqa mosqoypi, nerqataj: Jatarikuy, wawata mamantawan pusarikuspa, ayqey Egipto jallp'aman. Chaypitaj qhepakunki noqa ujtawan willasunaykama. Herodesqa wawata mask'anqa wañuchinampaj.

¹⁴Josetaj jatariytawankama, wawata mamantawan tutapacha pusarikuspa riporqa Egiptoman.

¹⁵Chaypitaj kamorqa Herodes wañunankama. Ajinata junt'akunampaj Señorpa nisqan profetanejta: Egiptomanta Churiyta wajyarqani.

¹⁶Herodestaj yachaysapa runas payta ch'aukiyasqankuta yachaspa, maytapuni phiñakorqa. Kamacherqataj Belén llajtapi, muyuynimpi ima, tukuy qhari wawasta wañurachinankuta, iskay watayojmanta uraman, yachaysapa runasta allinta tapusqanman jina.

¹⁷Chaypacha junt'akorqa profeta Jeremiaspa parlasqan:

¹⁸Ramá llajtapi uj qhapariy uyarikun, jatun waqay, jik'uytaj. Raquel waqasharqa wawasninmanta, manataj sonqochasqa kayta munarqachu, imaraykuchus wawasnin wañusqasña karqanku.

¹⁹Herodes wañusqanmantaña, Señorpa angelnin mosqoypi rikhurillarqataj Joseman, Egipto llajtapi, nispa: Sayariy, wawata mamantawan pusariykukuspa kutipuy Israel jallp'aman, imaraykuchus wawata wañuchiyta munajkunaqa ñapis wañurankuña.

²¹Chaymanta José jatariytawan, wawata mamantawan pusarikuspa kutiporqa Israel jallp'aman.

²²José uyarerqa, Judeapi Arquelao kamachishasqanta, Herodes tatampa cuentanmanta. Chayrayku manchachikorqa chayman riyta. Dios mosqoypi willasqanraykutaj Galileaman riporqa.

²³Nazaret llajtaman chayaspataj chaypi tiyakorqa, profetaspa nisqanku junt'akunampaj: Jesusqa, nazareno sutichasqa kanqa.