Read Quechua Bolivia DC Bible SAN MATEO 20 Bible Online

SAN MATEO 20 - Quechua Bolivia DC Bible bible

SAN MATEO 20

¹Janaj pacha reinoqa rijch'akun uj jallp'asniyoj runaman, pichus tutamanta llank'ajkunata mink'aj llojserqa uvas chajrampaj.

²Llank'ajkunatataj mink'arqa, sapa p'unchay uj denario qolqeta paganampaj. Uvas chajranmantaj paykunata kacharqa.

³Tutamantataj, isq'on hora chayta, plazapi rikorqa mana ima ruwanayoj runasta.

⁴Qayllaykuspataj nerqa: Qankunapis riychej uvas chajrayman, qopusqaykichejtaj maychus kajta. Paykunataj sayariytawan rerqanku.

⁵Jallp'ayojqa chaupi p'unchayta ujtawan llojsispa, chantá, chaupi p'unchay pasaytapis, llank'ajkunata mink'allarqataj.

⁶Inti yaykuyta ujtawan plazaman llojserqa, chaypitaj tarerqa mana ima ruwanayojkunata, nerqataj: Imaraykutaj kaypi tukuy p'unchaynintin, mana imata ruwaspa kashankichej?

⁷Paykunataj kuticherqanku: Mana pipis mink'akuwaykuchu. Paytaj nerqa: Qankunapis uvas chajrayman riychej llank'aj.

⁸Ch'isiyaykushajtintaj, uvas chajrayojqa mayordomoman nerqa: Wajyay llank'ajkunata, pagapuytaj qhepata yaykojkunamanta qallarispa, ñaupajta yaykojkunakama.

⁹Jinataj, inti yaykuyllataña jamojkunaman, uj denario qolqeta sapa ujman qoporqa.

¹⁰Paqarinmantapacha llank'ajkunataj, qayllaykuspa yuyasharqanku aswan ashkha qolqeta jap'iyta. Manataj jinachu karqa, sapa ujninku uj denariokamalla jap'erqanku.

¹¹Denariota jap'iytawantaj, uvas chajrayojpaj anchata rimarqanku, nispa: Kay qhepa jamojkunaqa uj horallata llank'arqanku, qantaj noqaykuman uj rejllata pagashawayku; noqaykoqa diantinta llank'ayku ruphayta ima aguantaspa.

¹³Paytaj ujninman kuticherqa: Kausaqéy, mana noqaqa ch'aukiyashaykichu. Manachu uj denario qolqemanta mink'arqayki?

¹⁴Qampata kajta jap'ikapuy, ripuytaj; kay qhepa jamojman, qanman jinallataj qoyta munani.

¹⁵Manachu qolqeywanqa, munasqayta ruwayta atiyman; chayrí, k'acha kajtiychu, sajra ñawiwan qhawawanki?

¹⁶Ajinata qhepapi kajkuna ñaupajpi rikhurenqanku. Ñaupajpi kajkunataj qhepapi kanqanku, imaraykuchus wajyasqas ashkha; pisistaj ajllasqasqa kanku.

¹⁷Jerusalenman wicharishaspataj, Jesusqa chunka iskayniyoj yachachisqasninta, ñanmanta wajnejman wajyaspa nerqa: Kunanqa Jerusalenman wicharishanchej, chaypitaj Runaj Churenqa kuraj sacerdotesman, leymanta yachachejkunaman ima entregasqa kanqa; paykunataj juchachaspa wañuchichenqanku.

¹⁹Gentilesman pusanqanku, paykunataj asipayaspa jasut'enqanku, cruzpitaj chakatanqanku. Kinsa p'unchayninmantaj kausarimonqa.

²⁰Chantá, Jesusman Zebedeoj warmin wawasninwan, qayllaykorqa, ñaupaqenman qonqoriykukuspataj, mañakorqa wawasninta yanapananta.

²¹Paytaj nerqa: Imatataj munankiri? Warmitaj kuticherqa: Niy ari, kay iskay wawasniy janaj pacha reinoykipi, ujnin pañaykipi, ujnintaj lloq'eykipi tiyaykukunankuta.

²²Jesustaj kutichispa, nerqa: Mana yachankichejchu imatachus mañakusqaykichejta. Atiwajchejchu, ujyanay vasomanta ujyayta? Atiwajchejchu ima bautismowanchus bautizakusaj, chaywan bautizakuyta? Paykunataj arí, nerqanku.

²³Jesustaj kuticherqa: Arí, atinkichej vasoymanta ujyayta; bautismoywampis bautizakuyta; pañaypi, lloq'eypiwan tiyaykuytaqa mana qoyta atinichu. Chaytaqa Tatallay qoyta atin, pikunapajchus wakicherqa, chaykunaman.

²⁴Chunka yachachisqastaj, chayta uyarispa, mayta phiñakorqanku chay iskaynin wauqespaj.

²⁵Jesustaj paykunata wajyaspa nerqa: Qankuna yachankichej, sapa llajtapi atiyniyojkunaqa, runata kamachiyninkupi jap'inku, aswan atiyniyojkunatajrí, munasqankuta ruwanku runaswan.

²⁶Qankuna ukhupeqa mana jinachu kanqa. Pichus qankunamanta kuraj kayta munajqa, tukuypa kamachin kanan tiyan.

²⁷Jinallataj, mayqellampis qankunamanta kuraj kayta munajqa, tukuypa kamachin kachun.

²⁸Runaj Churenqa mana sirvichikojchu jamorqa. Astawampis, payqa jamorqa runata sirvej, kausaynintataj qoj; ashkha runa salvasqa kanampaj.

²⁹Jesús yachachisqasninwan Jericó llajtamanta llojsishajtin, ashkha runakuna paywan rerqanku.

³⁰Iskay ciegostaj chay ñan patapi tiyasharqanku. Jesús chaynejta rishasqanta uyarispataj, qhaparerqanku: Señor, Davidpa Churin, khuyarikuwayku ari!, nispa.

³¹Runakunataj chayta uyarispa k'amerqanku, ch'inyachiyta munaspa. Paykunataj astawanraj qhaparerqanku: Señor, Davidpa Churin, khuyarikuwayku ari!, nispa.

³²Jesustaj sayaykuspa ciegosta wajyarqa, taporqataj: Imatataj qankunapaj ruwanayta munankichejri?

³³Paykunataj kuticherqanku: Señor, munayku ñawisniyku rikunanta.

³⁴Jesustaj paykunata khuyaspa, ñawisninkuta llankhaykorqa. Chay kikimpachataj rikorqanku. Jesuswantaj rerqanku.