Read Quechua Bolivia DC Bible SAN MATEO 24 Bible Online

SAN MATEO 24 - Quechua Bolivia DC Bible bible

SAN MATEO 24

¹Jesús templomanta llojsispa purisharqa; yachachisqasnintaj qayllaykuspa temploj imaynachus ruwasqa kasqanta rikucherqanku.

²Jesustaj paykunaman nerqa: Rikunkichejchu kay tukuyta? Cheqamanta niykichej, kaypeqa mana uj rumillapis rumi patapi qhepakonqachu; tukuynin pampachasqa kanqa.

³Olivos orqopi Jesús tiyakushajtin, yachachisqasnin qayllaykuspa, sapallampi taporqanku, nispa: Niwayku, mayk'ajtaj kay imas kanqa? Ima señaltataj rikuchiwasqayku kutimunaykimanta, kay mundoj tukukuyninmantawan?

⁴Jesustaj paykunaman kuticherqa: Allinta qhawakuychej, pajtataj pipis ch'aukiyasunkichejman.

⁵Kayta niykichej, imaraykuchus ashkhas sutiypi jamonqanku, nispa: Noqa Cristo kani. Ashkhastataj pantachenqanku.

⁶Uyarinkichejtaj guerrasta, guerrasmanta parlaykunata. Chaymantaqa ama mancharinkichejchu imaraykuchus ajinapuni kanan tiyan. Chaywampis manaraj tukukuychu kanqa.

⁷Uj nación waj naciompa contranta oqharikonqa; uj reinopis waj reinoj contranta; jinallataj kanqa yarqhaykuna, onqoykuna, jallp'a kuyuykuna ima; kaynejpi, chaynejpi.

⁸Chay tukuy imastaj, nanaykunaj qallariynillanraj kanqa.

⁹Chaymantataj ñak'arichisonqachej, wakintataj wañuchisonqachej. Ajinata tukuy runaj chejnisqan kankichej, noqaj sutiyrayku.

¹⁰Chaypacha ashkhas misk'anqanku, wakinkuna purajmanta ch'atanakonqanku, chejninakonqankutaj.

¹¹Ashkha llulla profetas rikhurimonqanku, ashkhastataj pantachenqanku.

¹²Ajinata jucha yapakojtin, ashkhaspa munakuynin chiriyaponqa.

¹³Pichus tukukuykama sinch'ita sayanqa, chaymá salvasqa kanqa.

¹⁴Janaj pacha reinomanta evangelio tukuynejpi willasqa kanqa, tukuy laya runaspaj testigo kanampaj; chaypachamá tukukoyqa jamonqa.

¹⁵Maypachachus rikojtiykichej millay ch'inyachejta Diospa templompi, chay millay ch'inyachejmanta profeta Daniel parlasqanman jina. Pillapis kayta leejqa, entiendechun.

¹⁶Chaypacha, Judeapi kashajkuna ayqechunku orqosman.

¹⁷Chay p'unchaypi pillapis alto patapi kashajqa, ama uraykamuchunchu wasinmanta imallatapis orqhoj.

¹⁸Chajrapi kashajpis, ama kutichunchu wasinman p'achanta orqhoj.

¹⁹Way, chay p'unchaypi wijsayoj warmismanta, ñuñoj wawayojkunamanta ima!

²⁰Diosmanta mañakuychej ari, ama chiri tiempopi ayqenaykichej kanampaj, nitaj samakuna p'unchaypipis.

²¹Chaypacha manchay ñak'ariy kanqa; chaytaj mundo qallarikusqanmantapacha, manaraj chay jina karqachu, nitaj jayk'ajpis kanqachu.

²²Chay p'unchaykunachus mana pisiyachisqas kankuman karqa chayqa, mana pipis salvasqachu kanman. Ajllasqasraykutaj chay p'unchaykuna pisiyachisqas kanqanku.

²³Chantá pillapis nisojtiykichej, kaypi Cristo kashan, chayrí jaqaypi kashan, ama paykunata creenkichejchu.

²⁴Ashkhas jamonqanku, noqa Cristo kani, chayrí profeta kani, nispa. Llullakuspataj jatuchaj señalesta, milagrosta ima ruwanqanku. Chaywantaj tukuyta pantachenqanku; atinkuman chayqa ajllasqasnintinta.

²⁵Chaytaqa ñaupajmantaña nerqaykichej.

²⁶Chayrayku, Cristo ch'innejpi kashan nisojtiykichejqa, ama rinkichejchu; chayrí, wasi ukhupi kashan nisojtiykichejpis amallataj creenkichejchu.

²⁷Imaynatachus lliuj lliujqa, inti llojsimuymanta inti yaykuykama lliphipirispa rikuchikun, ajinallataj kanqa, Runaj Churimpa jamuynenqa.

²⁸Maypichá wañusqa kashan, chayman q'arqañas tantakonqanku.

²⁹Ñak'ariy tiempo tukukojtintaj, inti laqhayaykaponqa; killapis manaña k'anchanqachu, qoyllurkunataj urmaramonqanku; janaj pacha atiykunataj kuyurenqanku.

³⁰Chaypachataj Runaj Churimpa señalnin janaj pachapi rikhurenqa; tukuy kay pachapi ayllustaj waqanqanku. Runaj Churintataj cielo phuyus patapi jamushajta rikonqanku; tukuy atiyninwan, lliphipiyninwan ima.

³¹Angelesnintataj kachamonqa, cornetata sinch'ita waqachispa, tukuy ajllasqasninta tantanankupaj, mundoj tawantin cheqamanta, uj cantonmanta, ujnin cantonkama.

³²Higo sach'amanta rijch'anachinata yachakuychej: Ramasnin q'omeryaspa laqhesnin q'erqeshajtin, yachankichej q'oñi tiempoña kasqanta.

³³Ajinallatataj qankunapis, kay tukuy imata rikuspa, yachankichej ñapis Cristo qayllapiña kasqanta.

³⁴Cheqamanta niykichej: Kunan tiempo runasqa manaraj wañonqankuchu, kay tukuy ima junt'akunankama.

³⁵Cielo, kay mundopis tukukaponqanku, palabrasniytaj mana jayk'ajpis tukukonqankuchu.

³⁶Mayk'ajchus, ima diachus, ima horachus kananta mana pipis yachanchu; ni janaj pachapi angelespis, nitaj Churipis yachanchu; Tatallay chaytaqa yachan.

³⁷Imaynachus, Noejpa tiempompi karqa, ajinallataj Runaj Churimpa jamuynin kanqa.

³⁸Chay tiempopi, manaraj jatun para chayamushajtin, runasqa mikhusharqanku, ujyasharqanku, casarasharqanku, ususisninkutapis casarachisharqanku, arcaman Noé yaykunankama.

³⁹Paykunaqa mana unancharqankuchu, jatun para jamunankama, tukuyninkutataj chinkacherqa. Ajinallataj kanqa Runaj Churimpa jamuynimpis.

⁴⁰Chaypachaqa iskay runas chajrapi kashanqanku. Ujnin oqharisqa kanqa, ujnintaj saqerparisqa.

⁴¹Jinallataj iskay warmispis molinopi jak'uchishanqanku, ujnin oqharisqa kanqa, ujnintaj saqerparisqa.

⁴²Chayrayku, ama puñuspa suyaychej; imaraykuchus mana yachankichejchu ima diachus Señorniykichej jamunanta.

⁴³Kayta yachaychej, sichus wasiyoj tuta ima horatachus suwa jamunanta yachanman chayqa, mana puñuspa suyaykunman, nitaj wasinta jusk'ojta saqenmanchu.

⁴⁴Chayrayku qankunapis wakichisqas kaychej; imaraykuchus mana yuyasqaykichej horapi Runaj Churenqa jamonqa.

⁴⁵Pitaj chay allin kamachi, yuyayniyojtaj kanman, mayqentachus patronnin churanman kamachi masisninman horampi mikhunata qonampaj?

⁴⁶Kusisqa kanqa chay kamacheqa, mayqentachus patronnin chayamuspa ajinata ruwashajta taripajtenqa.

⁴⁷Cheqamanta niykichej: Ajinata ruwajtenqa, mayordomota churanqa, kamachinampaj tukuy kapuynin pataman.

⁴⁸Chantá, chay kamachichus sajra kanman, sonqompitaj ninman chayqa: Manaraj sina patronniy chayamonqachu, nispa.

⁴⁹Wakin kamachi masisnintataj maqayta qallarinman, machajkunawantaj mikhunman, ujyanmantaj.

⁵⁰Ajina kashajtintaj patrón kutimunman, mana suyasqan diapi, mana yachasqan horapitaj.

⁵¹Chaypacha, mana ñak'ariy atinata jasut'ispa, churanqa puraj uyastawan khuska. Chaypitaj waqay, kiru k'arukuytaj kanqa.