Read Quechua Bolivia DC Bible SAN MATEO 27 Bible Online

SAN MATEO 27 - Quechua Bolivia DC Bible bible

SAN MATEO 27

¹Sut'iyamojtintaj, jatun sacerdotes, judiospa kuraj runasnin ima, juntapi tantakuspa yuyaychanakorqanku Jesusta wañuchinankupaj.

²Jesusta watasqata pusaspataj, kamachej Pilatoman entregarqanku.

³Chantá, jap'ichej Judastaj, Jesusta wañunampaj juchachasqata rikuspa, mayta sonqonta nanachikorqa. Kinsa chunka qolqetataj kutichiporqa jatun sacerdotesman, kuraj runasman ima.

⁴Nerqataj: Juchallini mana juchayojta wañuyman entregaspa. Paykunataj nerqanku: Ima ruwanayku tiyan chaywanri? Qan chaytaqa imanaypis.

⁵Judastaj, temploman qolqeta qhallaykuspa llojsiporqa. Riytawantaj sipikamorqa.

⁶Kuraj sacerdotestaj, qolqeta oqharispa, nerqanku: Kay qolqetaqa mana atisunmanchu ofrenda qolqetawan khuska waqaychayta; imaraykuchus chay qolqeqa yawarpa precion.

⁷Paykunataj parlanakuytawan, manka t'uru jallp'ata chay qolqewan ranterqanku, waj llajtayojkunata chayman p'ampanankupaj.

⁸Chayrayku chay jallp'aqa kunankama, Yawar jallp'a sutiyoj.

⁹Ajinata junt'akorqa, profeta Jeremiaspa nisqan: Kinsa chunka qolqeta jap'erqanku; chay preciotaqa payman wakin Israelpa wawasnin churarqanku.

¹⁰Chay qolqewantaj, manka t'uru jallp'ata ranterqanku, Señor kamachiwasqanman jina.

¹¹Jesusta Pilatoj ñaupaqenman pusarqanku, paytaj taporqa: Qanchu judiospa reynin kanki?, nispa. Jesustaj kuticherqa: Qan chayta ninki.

¹²Jatun sacerdotes, judiospa kurajkunasninwan ch'ataykojtinku, Jesusqa mana imata kutichikorqachu.

¹³Chaymanta, Pilato nillarqataj: Manachu uyarinki, qampa contraykita, tukuy imaymanata nisqankuta?

¹⁴Jesustaj, mana uj palabrallatapis kutichikorqachu; jinamantataj Pilatoqa mayta t'ukorqa.

¹⁵Kuraj kamachej, sapa Pascuapi uj presota usunkuman jina kacharej, pitachus runakuna munaj kanku, chayta.

¹⁶Chaypachataj, uj sumaj rejsisqa runa, Barrabás sutiyoj, wisq'asqa kasharqa.

¹⁷Pilatotaj, tantasqa runasta taporqa: Pitataj munankichej kacharinayta: Barrabastachu, chayrí Jesustachu, Cristo nisqata?

¹⁸Pay yacharqa runas chhoqonakuspalla Jesusta wisq'achisqankuta.

¹⁹Pilato juzganampaj kashajtintaj, warmin nichimorqa: Ama imatapis ruwaychu chay cheqan kaj runawanqa. Payrayku kunan ch'isi millay mosqoyta mosqorqani, nispa.

²⁰Kuraj sacerdotes, kuraj runakunawan, runasman yachaykucherqanku mañanankuta Barrabasta kacharichinampaj, Jesustataj wañuchinanta.

²¹Pilatotaj taporqa: Mayqentataj kacharinayta munankichej? Paykunataj, Barrabasta, nerqanku.

²²Paytaj nerqa: Imanasajtaj Cristo nisqa Jesuswanri? Tukuyninkutaj qhaparerqanku, chakatasqa kachun, nispa.

²³Pilato nillarqataj: Ima sajratataj ruwarqari? Paykunataj, astawan sinch'ita qhaparerqanku: Chakatasqa kachun, nispa.

²⁴Pilatotaj, runasta mana atipayta aterqachu; astawanraj ch'ajwa jatarisharqa. Yakuta apachimuspataj, makisninta mayllakorqa, runakunaj ñaupaqempi, nispa: Mana noqaqa juchayojchu kani, kay cheqan runaj yawarninmanta; qankunallaña imatapis ruwaychej.

²⁵Runastaj kuticherqanku: Yawarnin noqaykoj pataykupi, wawasniykojpiwan kachun.

²⁶Chantá Pilatoqa Barrabasta kacharerqa. Jesustataj jasut'ichispa, chakatanankupaj pusacherqa.

²⁷Chaymantataj, Pilatoj soldadosnin Jesusta pusarqanku pretorioman; paytataj muyuykorqanku.

²⁸P'achasninta lluch'uspataj, uj puka p'achata churaykorqanku.

²⁹Umanmantaj, uj simp'asqa khishka pilluta churaykorqanku; paña makinmantaj uj soqosota. Ñaupaqenman qonqoriykukuspataj, mayta asipayarqanku: Kausachun, judiospa reynin!, nispa.

³⁰Payta thoqaykuspataj, soqosowan umampi wajtarqanku.

³¹Ajinata asipayaytawan, puka p'achata lluch'uspa, p'achanta churaykaporqanku. Chaymantataj, pusarqanku chakatanankupaj.

³²Llojsishaspataj tinkorqanku, Cirene llajtayoj, Simón sutiyoj runawan; Jesuspa cruznintataj paywan apacherqanku.

³³Chayarqankutaj Gólgota nisqa orqoman; chay niyta munan: T'ojlu pata.

³⁴Chaypitaj, vinagreta jayaq'etawan chajruykuspa jaywarqanku; Jesustaj llamirispa mana ujyayta munarqachu.

³⁵Cruzpi chakataytawantaj, soldadosqa suerteta choqaspa, Jesuspa p'achasninta chayachinakorqanku, profetaj nisqanman jina: P'achasniyta chayachinakorqanku, paykuna ukhu suerteta choqaspa.

³⁶Paykunataj chaypi tiyaspa qhawasharqanku.

³⁷Cruzpi, uman patanejman uj escribisqata churarqanku, imamantachus ch'atasqa kasqanta: Kayqa Jesús, Judiospa Reynin.

³⁸Chaypacha, paytawan khuska chakatarqanku iskay suwasta; ujninta pañanman, ujnintataj lloq'enman.

³⁹Chaynejta purejkunataj, umankuta khiwirispa, mayta paypaj rimarqanku.

⁴⁰Nerqankutaj: Qan templota urmachej, kinsa diapitaj sayarichej; qan kikiykita kacharichikuy. Diospa Churin kanki chayqa, uraykamuy chay cruzmanta.

⁴¹Ajinallatataj, kuraj sacerdotespis asipayarqanku, leymanta yachachejkunawan, fariseoswan, kuraj runaswan ima, nispa: Wajkunata salvarqa, pay kikintaj mana salvakuyta atinchu. Israelpa Reynin chayqa; kunampacha cruzmanta uraykamuchun, paypitaj creesunchej.

⁴²

⁴³Diosman atienekorqa, kunanqa Dios kacharichichun ari, munakun chayqa, imaraykuchus Diospa Churin kani nerqa.

⁴⁴Kikillantataj k'amerqanku, paywan khuska chakatasqa kasharqanku chay suwaspis.

⁴⁵Tukuynin jallp'apitaj laqhayaykorqa, chaupi p'unchaymanta samay horakama.

⁴⁶Chaypacha Jesusqa sinch'ita qhaparerqa: Elí, Elí, lama sabactani?, nispa. Kayrí niyta munan: Diosníy, Diosníy, imaraykutaj saqerpariwankiri?

⁴⁷Wakin chaypi kashajkunataj, chayta uyarispa nisharqanku: Kay runaqa Eliasta wajyashan, nispa.

⁴⁸Ujnintaj usqhay usqhayta phinkispa, soqosoman esponjata wataykuytawan, vinagreman chhapuykuspa jaywarqa ujyanampaj.

⁴⁹Wakintaj nerqanku: Saqey, qhawasunchej, ichachus Elías jamuspa kacharichenqa.

⁵⁰Ujtawan sinch'ita qhaparispa, Jesús wañuporqa.

⁵¹Chay kikimpachataj, temploj cortinan iskayman llik'ikorqa patamanta urakama. Jallp'ataj kharkatiterqa, chhankaspis phatararqanku.

⁵²Sepulturas kicharikorqanku, Diospa ashkha ajllasqasnintaj wañusqasmanta kausarimorqanku.

⁵³Paykunataj sepulturasmanta llojsispa, Jesús kausarimusqanmantaña, Jerusalén llajtaman yaykorqanku; chaypitaj ashkha runasman rikhurerqanku.

⁵⁴Capitantaj soldadosninwan Jesusta qhawasharqanku; jallp'ata ikhakojta, waj imastawan rikuspa maytapuni mancharerqanku, nerqankutaj: Cheqamanta kay runaqa Diospa Churin karqa, nispa.

⁵⁵Chaypitaj ashkha warmis kasharqanku karullamanta qhawaspa; paykunaqa jamorqanku Galileamantapacha Jesusta yanapaspa.

⁵⁶Chay warmis ukhupitaj kasharqanku: María Magdalena; Santiagojta, Josejpatawan mamanku María; Zebedeoj wawasnimpa mamanku ima.

⁵⁷Ch'isiyaykushajtintaj jamorqa uj qhapaj runa José sutiyoj, Arimatea llajtayoj. Paypis Jesuspa yachachisqallantaj karqa.

⁵⁸Paytaj, Pilatoman qayllaykuspa Jesuspa ayanta mañarqa. Pilatotaj kamacherqa ayata qonankuta.

⁵⁹Josetaj, ayata oqhariytawan uj yuraj llimphu qhatanawan mayt'uykorqa.

⁶⁰Chaymantataj, mosoj sepulturanman churaykorqa; chaytaqa pay kikimpaj chhankapi ruwachikorqa. Jatun rumiwan punkunta wisq'aykuspataj riporqa.

⁶¹Sepulturaj ñaupaqempitaj tiyasharqanku María Magdalena, waj Mariawan ima.

⁶²Q'ayantintaj, Pascuapaj wakichina p'unchaypi kuraj sacerdotes, fariseos ima Pilatojman rerqanku.

⁶³Paymantaj nerqanku: Señor, yuyariyku jaqay ch'auka runa kausashaspallaraj nisqanta: Kinsa p'unchaymanta kausarimusaj.

⁶⁴Chayrayku kamachiy ari, kinsa p'unchaykama allinta sepulturata qhawanankuta, ama yachachisqasnin jamuspa ayanta suwanankupaj. Chantá runakunaman nenqanku: Wañusqakunamanta kausarimun, nispa. Jinapeqa, kay qhepa pantay astawan mana allinchu kanqa, ñaupajmanta nisqaqa.

⁶⁵Pilatotaj nerqa paykunaman: Soldados qhawanankupaj tiyapusunkichejña, rispa astawan atisqaykichejman jina, jallch'aykamuychej.

⁶⁶Paykunataj rispa sepulturata allinta jallch'aykamorqanku, rumita sellaykuspataj, soldadosta qhawajta saqerqanku.