Read Quechua Bolivia DC Bible SAN MATEO 5 Bible Online

SAN MATEO 5 - Quechua Bolivia DC Bible bible

SAN MATEO 5

¹Jesús ashkha runasta rikuspa orqoman wicharerqa. Chaypi tiyaykukojtintaj yachachisqasnin payman qayllaykorqanku.

²Chantá Jesús yachachiyta qallarerqa ajinata:

³Kusikuyniyoj kanku wajcha sonqoyojkunaqa, imaraykuchus paykunajta janaj pacha reinoqa.

⁴Kusikuyniyoj kanku waqajkunaqa, imaraykuchus paykunataqa Dios sonqochanqa.

⁵Kusikuyniyoj kanku llamp'u sonqoyojkunaqa, imaraykuchus paykuna jallp'ata chayaqenkupaj jap'enqanku.

⁶Kusikuyniyoj kanku cheqan kausaymanta yarqhachikojkunaqa, ch'ankichikojkunapis, imaraykuchus paykuna sajsachisqas kanqanku.

⁷Kusikuyniyoj kanku khuyakojkunapis, imaraykuchus paykunaqa khuyakuyta tarenqanku.

⁸Kusikuyniyoj kanku llimphu sonqoyojkunaqa, imaraykuchus paykunaqa Diosta rikonqanku.

⁹Kusikuyniyoj kanku allinyachejkunaqa, imaraykuchus paykunaqa Diospa wawasnin kanqanku.

¹⁰Kusikuyniyoj kanku cheqan kausayrayku ñak'arejkunaqa imaraykuchus janaj pacha reinoqa paykunajta kanqa.

¹¹Kusikuyniyoj kankichej runakuna noqarayku qankunapaj rimajtinku, chejnispa ñak'arichisojtinku, tukuy imatataj llullakuspa contraykichejpi nejtinku ima.

¹²Kusikuychej jatun kusiywan, imaraykuchus jatunmin janaj pachapi t'inkaykichejqa. Ajinallatataj qankunamanta ñaupajta jamoj profetastapis, chejnispa ñak'aricherqanku.

¹³Qankunaqa mundopaj kachi jina kankichej. Kachichus laqayanman chayqa, imawantaj kachichakonqari? Mana imapaj walejñachu; manachayqa jawaman wijch'unallapajña, runa sarunampajtaj.

¹⁴Qankunaqa mundopaj k'anchay kankichej. Orqo patapi ruwasqa llajtaqa, mana pakasqa kayta atinchu.

¹⁵Nillataj pipis k'anchayta jap'ichinchu wich'iwan k'umpuykunampaj. Pillapis k'anchayta jap'ichispaqa pataman churan, wasipi tukuy kajkunata k'anchanampaj.

¹⁶Ajinallatataj k'anchayniykichejqa k'anchachun runaspa ñaupaqempi. Paykunapis allin ruwasqaykichejta rikuspa, janaj pachapi kashaj Tataykichejta yupaychanankupaj.

¹⁷Ama qankunaqa yuyaychejchu Moisespa leyninta chinkachej jamusqayta, chayrí, profetaspa yachachisqankuta. Mana chaykunata chinkachejchu jamuni, astawampis junt'aj jamuni.

¹⁸Chayrayku cheqamanta niykichej: Ñaupajtaraj cielopis mundopis tukukuyta atinku; leymantataj mana uj juch'uy letra, ni uj ch'iñi rayallapis chinkanqachu, kay tukuy junt'akunankama.

¹⁹Pillapis kay kamachiykunamanta aswan juch'uy kajllatapis p'akinman, kikillantataj wajkunamampis yachachinman chayqa, janaj pacha reinopeqa ancha juch'uypaj qhawasqa kanqa. Ajinallatataj pillapis chay kamachiykunata ruwanqa, wajkunamampis maychus kasqanta yachachenqa chayqa, chaymá sumaj jatumpaj qhawasqa kanqa janaj pacha Diospa reinompeqa.

²⁰Chayrayku qankunaman niykichej, manachus cheqan kayniykichej qelqerispamanta, fariseospamantawan aswan allin kanqa chayqa, mana yaykunkichejchu janaj pacha reinoman.

²¹Qankuna uyarerqankichej ñaupa runasman imachus nisqa kasqanta: Ama wañuchinkichu; pillapis wañuchejqa, juiciopi juchachasqa kanqa, nispa.

²²Noqataj niykichej: Pillapis wauqempaj phiñakun chayqa, juchachasqa kanqa juiciopaj. Pichus wauqenta wampu nejpis, jatun juntapi juchachasqa kanqa; chantá pichus wauqenta opa ninman chayqa, infierno nina larwayman wijch'usqa kanqa.

²³Chayrayku altarman rikuchikuykita apashaspachus yuyarikuwaj, wauqeyki qampaj phiñasqa kasqanta chayqa, altarpa ñaupaqenman rikuchikuykita saqellay. Riyraj ñaupajta wauqeykiwan allinyakamoj. Chaymanta kutimusparaj, rikuchikuykita Diosman jaywanki.

²⁴

²⁵Piwanchus phiñasqa kanki chayqa, paywan usqhayta ñanllataraj rishaspa allinyakuy, ama enemigoyki juezwan jap'ichisunampaj, jueztajrí soldadoswan, soldadostaj ama carcelman wisq'asunankupaj.

²⁶Cheqatapuni niyki, mana jaqaymantaqa llojsimuwajchu tukuy phataykita paganaykikama.

²⁷Qankuna uyarerqankichejña nisqa kasqanta: Ama qhenchachakunkichu.

²⁸Noqatajrí niykichej: Pillapis uj warmita qhawan munapayaspa chayqa, ñapis paywan sonqompi qhenchachakunña.

²⁹Chayrayku paña ñawiyki juchaman urmachinayasojtenqa, sik'ispa wijch'uy; imaraykuchus aswan allin kanqa uj ñawillayki chinkanan, tukuy ukhuyki nina larwayman enqhasqa kananmantaqa.

³⁰Ajinallatataj paña makiyki juchaman urmachinayasojtenqa, khuchuspa wijch'uy. Aswan allin kanqa uj makillayki chinkanan, tukuy ukhuyki nina larwayman wijch'usqa kananmantaqa.

³¹Ajinallatataj ñaupajta nisqa karqa: Pillapis warminmanta t'aqakojqa, divorcio papelta qopuchun.

³²Noqataj niykichej: Pillapis warminmanta t'aqakun mana wasanchajtillan chayqa, warminta adulterio juchaman urmachin; pitajchus chay warmiwan casarajpis, adulterio juchaman urmallantaj.

³³Uyarillarqankichejtaj ñaupa runasman nisqa kasqanta: Ama llullakuspa, qhasimanta Diospa sutimpi jurankichu; Diospa ñaupaqempi imatachus jurasqaykita junt'anki.

³⁴Noqataj niykichej: Amapuni jurankichejchu janaj pacharaykupis, imaraykuchus Diospa trononmin.

³⁵Nitaj mundoraykupis jurankichejchu, imaraykuchus Diospa chakisnimpa sarunanmin. Nillataj Jerusalenraykupis, imaraykuchus jatun reypa llajtanmin.

³⁶Amallataj umaykiraykupis jurankichu, imaraykuchus mana uj chujchallatapis yurajyachiyta nitaj yanayachiyta atiwajchu.

³⁷Chayrayku parlayniykichejqa kay jina kachun: Arí, arí, nispa; chayrí, mana, mana, nispa. Kaymanta astawanqa sajramanta jamun.

³⁸Ñaupajta uyarerqankichej: Ñawimanta ñawi, kirumanta kiru, nisqa kasqanta.

³⁹Noqataj niykichej: Sajra runamanqa ama kutichikuychejchu; pillapis paña uyaykipi laq'asojtenqa, lloq'e uyaykitawan kutirichiy.

⁴⁰Pichá munan pleiteasuyta p'achaykita qhechusunampaj chayqa, ponchoykitawan saqepuy.

⁴¹Pillapis uj kilometrota paywan rinaykita munan chayqa, uj jinatawan riy.

⁴²Pillapis imata mañakusojtenqa qoriy; manukusuyta munajmampis, ama, mana niychu.

⁴³Uyarerqankichej nisqa kasqanta: Runa masiykita munakunki, enemigosniykitataj chejninki.

⁴⁴Noqataj niykichej: Enemigosniykichejta munakuychej; [maldicisojkunaman allinta kutichiychej; chejnisojkunapaj allin kajta ruwapuychej; rimasojkunapaj,] qhatiykachasojkunapaj ima Diosmanta mañapuychej.

⁴⁵Ajinata ruwaspaqa, janaj pachapi kashaj Tataykichejpa wawasnin kankichej. Payqa, sajra runaspaj, k'acha runaspajpis intita llojsichimun. Kikillantataj parachimun tukuypaj; allin runaspaj, sajra runaspaj ima.

⁴⁶Munakusojkunallatachus munakuwajchej chayqa, ima t'inkayojtaj kawajchejrí? Manachu publicanospis kikillantataj ruwanku?

⁴⁷Wauqesnillaykichejtachus napaykuwajchej chayqa, ima aswan allintataj ruwankichejri? Manachu gentilespis kikillantataj ruwanku?

⁴⁸Imaynatachus janaj pachapi kashaj Tataykichej cabal, ajinallatataj qankunapis cabal kaychej.