Read Quechua Bolivia DC Bible SAN MATEO 6 Bible Online

SAN MATEO 6 - Quechua Bolivia DC Bible bible

SAN MATEO 6

¹Ama runaspa ñaupaqellampeqa cheqa kajta ruwaychejchu, paykunawan rikuchikunallaykichejpajqa; ajinata ruwajtiykichejqa, mana t'inkaykichej kanqachu, janaj pachapi kashaj Tataykichejpa ñaupaqempi.

²Chayrayku qolqeykita qospaqa, ama putututa ñaupaqeykipi waqachiychu; imaynatachus puraj uya runas, sinagogaspi, callespi ima, ruwanku runakunawan allinta qhawachikunankurayku, jinataqa. Cheqamanta niykichej, ñapis paykunaqa t'inkayojña kanku.

³Chayrayku mana kapuyniyojkunaman imallatapis qoshajtiyki, ama yachachunchu lloq'e makiyki, imatachus paña makiyki ruwasqanta.

⁴Wajchasta pakayllamanta khuyay. Pakaypi khuyasqaykita rikusoj Tataykitaj t'inkachipusonqa.

⁵Diosmanta mañakuspaqa, ama puraj uyas jina kaychejchu. Paykunaqa sayaykukuspa Diosmanta mañakunku, sinagogaspi, plaza esquinaspi ima, runaswan rikuchikunankupaj. Cheqamanta niykichej, ñapis paykunaqa t'inkayojña kanku.

⁶Qampis Diosmanta mañakunaykipajqa, cuartoykiman yaykuy; wasi punkuykita wisq'aykamuspataj, pakaypi, Tataykimanta mañakuy. Pakaypi rikoj Tataykitaj t'inkaykita qopusonqa.

⁷Diosmanta mañakuspaqa, ama ashkhata parlaychejchu Diosta mana rejsejkuna jinaqa. Paykunaqa yuyanku uyarichikunankuta ashkhata parlasqankurayku.

⁸Ama qankunaqa paykunaman rijch'akuychejchu. Tataykichejqa yachanña imaykichejchus pisisqanta, manaraj paymanta mañakushajtiykichej.

⁹Chayrayku qankunaqa, kay jinata mañakunkichej: Janaj pachapi kashaj Tatayku, sutiyki jatunchasqa kachun.

¹⁰Reinoyki jamuchun, munayniyki ruwasqa kachun; imaynatachus janaj pachapi, ajinallatataj kay pachapipis.

¹¹Sapa día t'antaykuta kunan qopuwayku.

¹²Juchasniykuta pampachapuwayku, imaynatachus noqaykupis juchallikuwajniykuta perdonapuyku ajinata.

¹³Amataj saqeychu juchaman urmanaykuta; astawampis, jark'awayku sajramanta; [imaraykuchus, qampatamin reino, atiy, janaj pacha k'anchay ima; wiñaypa wiñayninkama. Amén.]

¹⁴Chayrayku, runakuna qankunapaj juchallisqankuta perdonankichej chayqa; ajinallatataj, janaj pachapi kashaj Tataykichejpis juchasniykichejta pampachanqa.

¹⁵Runakunaj juchallisqankutachus mana perdonankichej chayqa, Dios Tataykichejpis manallataj juchasniykichejta pampachanqachu.

¹⁶Ayunaspaqa, ama llakisqas kaychejchu, puraj uyas jina; paykunaqa uyasninkuta uj jinayachinku, ayunasqankuta runaswan rikuchikunankupaj. Cheqamanta niykichej, ñapis paykunaqa t'inkayojña kanku.

¹⁷Qanrí, ayunaspaqa umaykita ñajch'akuy, uyaykitapis mayllakuy.

¹⁸Ama ayunasqaykita runas yachachunkuchu; pakaypi kashaj Tatallayki yachachun. Pakaypi rikoj Tataykitaj t'inkaykita qopusonqa.

¹⁹Ama kay mundopeqa qhapajyayta munaychejchu; kay mundopeqa thuta k'utun, tukuy imapis qorwariyapun, suwaspis perqasta jusk'uspa suwanku.

²⁰Chayrayku, tukuy kapuyniykichejta janaj pachapaj tantaychej. Chaypi mana thuta ni ismuypis tukuchinchu, nitaj suwas kanchu jusk'uspa suwanankupaj.

²¹Maypichá kapuyniyki kashan, chayllapitaj sonqoykipis.

²²Ñaweqa cuerpoj k'anchaynin. Ñawiyki allin kajtenqa, tukuy cuerpoykipis k'anchaypi kanqa.

²³Ñawiykitajchus mana allin kanman chayqa, tukuy cuerpoyki laqhapi rikhurenqa. Chay qampi kashaj k'anchaytajchus laqhayapunman chayqa, imayna yana laqhapunitaj kanman chay laqhari!

²⁴Mana pipis iskay patronespa kamachin kayta atinchu, imaraykuchus ujninta chejnenqa, ujnintataj munakonqa; chayrí, ujninman kutikonqa, ujnintataj qhesachanqa. Mana atinkichejchu ujllapi k'umuykukuyta Diosman qolqemampis.

²⁵Chayrayku niykichej: Ama phutikuychejchu kausayniykichejmanta, mikhunaykichejmanta, ujyanaykichejmanta ima; nillataj phutikuychejchu imawanchus p'achallikunaykichejmantapis. Manachu kausayniykichejqa astawanraj mikhunamanta; cuerpoykichejpis astawanraj p'achamantaqa?

²⁶Qhawariychej phawaykachaj p'isqosta; mana tarpunkuchu, nitaj ruthunkuchu; ni pirwaspipis waqaychankuchu. Janaj pachapi kashaj Tataykichej paykunataqa mikhuchin. Manachu qankunaqa, aswan munasqaraj kankichej p'isqosmanta nisqaqa?

²⁷Mayqentaj qankunamanta, mashkhatapis unanchakuspa, atinman uj makillatawampis sayayninman yapaykuyta?

²⁸Imaraykutaj p'achamanta llakikunkichejri? Qhawariychej campo lirio t'ikasta, imaynatachus wiñasqankuta. Paykunaqa mana llank'ankuchu, nitaj phushkankuchu.

²⁹Cheqamanta niykichej, Salomompis, tukuy qhapaj atiynimpi, manapuni ujnin t'ika jinallapis p'achallikorqachu.

³⁰Chay campo qhora, kunan p'unchay kashan, q'ayataj hornoman wijch'usqa; chay qhoratapis Diosqa k'achituta p'achallichin. Pisi feniyoj runas! Manachu qankunapajqa aswan sumajtaraj ruwanman?

³¹Chayrayku, ama phutikuychejchu: imatataj mikhusun, imatataj ujyasun; chayrí imawantaj p'achallikusun?, nispa.

³²Diosta mana rejsej runasqa, kay imasllata anchata mask'anku. Janaj pacha Dios Tataykichejqa yachanña kay tukuy imamanta pisichikusqaykichejta.

³³Ñaupajtaqa Diospa reinonta, cheqa kaynintawan mask'aychej; kay tukuy imatataj yapata jina Dios qosonqachej.

³⁴Ama phutikuychejchu ari, q'aya p'unchaymanta; imaraykuchus, q'aya p'unchayqa, pay kikinmanta llakiyniyoj. Sapa p'unchaypata tiyan llakiynin.