Read Quechua Bolivia DC Bible SAN MATEO 7 Bible Online

SAN MATEO 7 - Quechua Bolivia DC Bible bible

SAN MATEO 7

¹Ama wajkunata juchachaychejchu, qankunapis ama juchachasqas kanaykichejpaj.

²Ima juchawanchá wajkunata juchachankichej, chayllawantaj qankunapis juchachasqas kankichej. Ima tupuwanchá wajkunata tupunkichej, chayllawantaj tupusqas kankichej.

³Imaraykutaj wauqeykej ñawimpi q'opitata qhawanki, qampa ñawiykipitaj kurkuta mana rikukunkichu?

⁴Chayrí, imaynatataj wauqeykita niyta atiwaj: Saqeway ñawiykimanta q'opitata orqhojta, qampa ñawiykipitaj kurku kashajtin?

⁵Puraj uya! Qampa ñawiykimantaraj kurkuta ñaupajta orqhokuy. Chaymantataj sut'ita rikuspa, wauqeykej ñawinmanta q'opitata orqhonki.

⁶Ama Diospaj ajllasqa kajta alqosman qoychejchu. Nitaj khuchismampis perla walqasniykichejta wijch'uychejchu; pajtataj chakisninkuwan sarurankuman, kutirimuspataj janch'usunkichejman.

⁷Mañakuychej, qosqaykichejtaj; mask'aychej, tarinkichejtaj; punkuta takaychej, kicharisonqachejtaj.

⁸Mañakojqa jap'in; mask'ajpis tarin; punkuta takajmampis kicharinku.

⁹Pi runataj qankunamanta kanman, wawan t'antata mañakojtin rumita qojri?

¹⁰Challwata mañakojtimpis, kataritachu qonman?

¹¹Sichus qankuna sajra runas kaspa, allin imasta wawasniykichejman qoyta yachankichej chayqa; imaraykutaj mana janaj pachapi kashaj Tataykichej aswan allin imastaraj qonmanchu, paymanta mañakojkunaman?

¹²Chayrayku, imatachus mañankichej runas qankunapaj ruwanankuta chayqa; ajinallatataj qankunapis paykunapaj ruwaychej; imaraykuchus kayta leyqa kamachin, profetaspis.

¹³K'ullku punkunejta yaykuychej, imaraykuchus anchomin punkoqa, jatuntaj chinkayman pusaj ñampis; chaynejta yaykojkunarí ashkhas kanku.

¹⁴Punkoqa k'ullkumin; k'ullkullataj kausayman pusaj ñampis. Pisistaj kanku chayta tarejkunaqa.

¹⁵Llulla profetasmanta allinta qhawakuychej; paykunaqa jamusunkichej ovejas jina p'achallisqas; ukhunkupitaj suwa atojkuna kanku.

¹⁶Ruwasqasninkunejta paykunata rejsinkichej. Khishkasmantachu uvasta pallanku; chayrí khishka qhorasmantachu higostapis pallanku?

¹⁷Ajinata, allin sach'aqa, sumaj poqoykunata qon; mana walej sach'arí, manallataj allin poqoykunatachu qon.

¹⁸Sumaj sach'aqa, mana atinchu apayta mana walej poqoykunataqa, nillataj mana allin sach'apis, allin poqoykunata apayta atinchu.

¹⁹Ima sach'allapis, mana walejta poqojtenqa k'utusqa, ninamantaj kanasqa.

²⁰Ajinata, ruwasqasninkunejta paykunata rejsinkichej.

²¹Mana tukuy niwajkuna Señor, Señor, nispa, janaj pacha reinoman yaykonqankuchu. Manachayqa, janaj pachapi kashaj Tataypa munayninta ruwajkunalla yaykonqanku.

²²Chay p'unchaypeqa, ashkhas niwanqanku: Señor, Señor! Manachu sutiykipi profetizarqayku, sutiykipitaj supaykunata qharqorqayku; sutillaykipitaj ashkha milagrostapis ruwarqayku?

²³Chaypachataj paykunaman nisaj: Ni jayk'aj qankunata rejserqaykichejchu; t'aqakuychej noqamanta sajrata ruwajkuna.

²⁴Pillapis kay nisqasniyta uyarispa ruwan chayqa; sumaj yuyayniyoj, chhanka patapi wasichakoj runaman rijch'akun.

²⁵Para jich'akamorqa, mayustaj chayamorqanku, wayrastaj sinch'ita wayramuspa chay wasiman wajtakamorqanku. Chay wasitaj, mana urmarqachu chhanka patapi ruwasqa kasqanrayku.

²⁶Pichá kay nisqasniyta uyarin, manataj kasunchu chayqa, mana yuyayniyoj, t'iyu patapi wasichakoj runaman rijch'akun.

²⁷Para jich'akamojtintaj, mayus chayamorqanku; wayrastaj sinch'ita wayramuspa wasiman wajtakamorqanku, t'iyu patapi ruwasqa kasqanraykutaj waseqa urmarqa, thuñikuynintaj manchay karqa.

²⁸Kaykunata Jesús parlayta tukusqanmantataj, runasqa yachachiyninmanta mayta t'ukorqanku.

²⁹Atiyniyoj jinapuni yachachisharqa; manataj leymanta yachachejkuna jinachu.