Read Quechua Bolivia DC Bible SAN MARCOS 12 Bible Online

SAN MARCOS 12 - Quechua Bolivia DC Bible bible

SAN MARCOS 12

¹Chay qhepata Jesús, rijch'anachinaswan yachachiyta qallarerqa runasman kay jinamanta: Uj runa jallp'ampi uvasta plantarqa, perqawantaj muyuykucherqa. T'oqota allaspataj, uvas ch'irwanata ruwarqa; qhawanampajtaj torreta sayaricherqa, chantá chajrata arriendaspa karuman riporqa.

²Uvas pallana p'unchay chayamojtintaj, ujnin kamachinta kacharqa, chay llank'ajkunamanta, paypa kajta jap'imunankupaj.

³Llank'ajkunataj, kachata jap'iykuspa maqaykorqanku, ch'usajtataj kutiricherqanku.

⁴Chaymanta waj kamachintañataj kacharqa, paytataj rumiswan ch'anqaykorqanku; umanta jusk'uspa, k'amispataj kachaporqanku.

⁵Waj kamachitañataj kacharqa, paytataj wañucherqanku. Qhepantataj, aswan ashkha kamachistañataj kachallarqataj; paykunatapis, wakinta maqarqanku, wakintataj wañucherqanku.

⁶Tukuypa qhepantataj, may munasqa churintañataj kacharqa llank'ajkunaman: Churiytaqa respetanqanku, nispa.

⁷Llank'ajkunataj, paykuna ukhu ninakorqanku: Jallp'ayojpa churin kayqa, jamuychej, wañuchinachej, kay uvas chajrataj noqanchejpaj kanqa.

⁸Ajinamanta churitaqa wañucherqanku, uvas chajramantataj wijch'umorqanku.

⁹Imananqataj uvas chajrayoj? Payqa jamuspa, chay llank'ajkunata wañurachenqa, uvas chajrantataj wajkunaman qonqa.

¹⁰Manachu kayta Escriturapi leerqankichej? Wasi ruwajkunaj qhesachasqanku rumeqa, aswan sumaj rumiman paran.

¹¹Señor ruwarqa kaytaqa, t'ukunaykichejpaj jina.

¹²Enemigosnintaj, Jesusta presochayta munarqanku, yuyaspa paykunaj contranta chay rijch'anachinawan nisqanta; runasta manchachikuspataj, saqerparispa riporqanku.

¹³Chaymanta, Jesusman kachamorqanku wakin fariseosta, herodianostawan, ima nisqanmantapis pantajtin ch'ataykunankupaj.

¹⁴Chaykunataj jamuspa taporqanku: Maestro, yachayku cheqa runa kasqaykita, manataj pitapis manchachikusqaykita; imaraykuchus mana runaj rijch'aynillantachu qhawanki; astawanqa Diospa cheqan ñanninta yachachinki; niwayku ari: Allinchu impuestota Cesarman qonaykoqa? Chayrí, manachu qosqayku?

¹⁵Jesustaj puraj uyas kasqankuta yachaspa, paykunaman nerqa: Imaraykutaj pantachiwayta munankichej? Denario qolqeta apamuychej qhawanaypaj.

¹⁶Denario qolqeta jaywarqanku, Jesustaj taporqa: Pejpa uyantaj, pejpa sutintaj kay qolqepi churasqa? Paykunataj kuticherqanku: Cesarpata, nispa.

¹⁷Cesarpata kajtaqa Cesarman qopuychej; Diospata kajtataj Diosman, nispa. Paykunataj t'ukorqanku Jesusmanta.

¹⁸Chantá saduceos Jesusman jamorqanku. Paykunaqa ninku wañuymanta kausarimuy mana kasqanta. Taporqankutaj nispa: Maestro, noqaykupaj Moisés escribisqata saqerqa: Sichus uj runaj wauqen wañunman, warmintataj mana wawayojta saqenman chayqa; wauqen casaranan tiyan chay viudawan, wañoj wauqempa miraynin ama chinkanampaj.

²⁰Jinataj, qanchis wauqes karqanku, kuraj kaj casarakorqa, qhepanejmantaj wañuporqa, warmimpi wawata mana saqespa.

²¹Iskay kaj wauqe chay viudawan casarakorqa; paypis kikillantataj mana wawayoj wañuporqa. Ajinallatataj kinsa kaj wauqepis casarakullarqataj chay viudawan, paypis wañupullarqataj, mana wawayoj.

²²Ajinamanta, chay warmiwan qanchisnintin casarakorqanku, tukuyninkutaj wañuporqanku mana wawata rejsispa chay warmipi; qhepantataj warmipis wañupullarqataj.

²³Wañuymanta kausarimuna p'unchaypi, paykuna kausarimojtinku, mayqempa warmintaj kanqari? Qanchisnintin paywan casarakorqankoqa.

²⁴Jesustaj paykunaman kuticherqa: Qankunaqa pantasqas kashankichej; mana Escriturasta, nitaj Diospa atiyninta rejsisqaykichejrayku.

²⁵Wañojkuna kausarimojtinkoqa, qharipis, warmipis, manaña casaranqankuchu, nitaj casarachenqankuchu; janaj pachapi ángeles jinallaña kausakonqanku.

²⁶Wañusqas kausarimunankumantaqa, manachu leerqankichej Moisespa escribisqampi, thansamanta Dios parlamusqanta?, nispa: Noqa Abrahampa Diosnin kani, Isaacpata, Jacobpata ima.

²⁷Diosqa mana wañusqaspa Diosninchu, astawanqa kausajkunaj Diosnin. Chayrayku qankunaqa anchata pantankichej.

²⁸Leymanta yachachej runa qayllaykuspa uyarerqa, Jesús saduceosman allinta kutichisqanta. Paytaj taporqa: Tukuy kamachiykunamanta, mayqentaj ñaupaj kajri?

²⁹Jesustaj kuticherqa: Tukuy kamachiykunamantaqa kaymin ñaupaj kajqa: Uyariy Israel; Señor Diosninchejqa, payllamin Señorqa.

³⁰Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima. Kaymin kuraj kaj kamacheqa.

³¹Iskay kajtaj, kay jina: Runa masiykita munakunki qan kikiykita jina. Kay iskay kamachisqasmantaqa mana aswan kuraj kanñachu.

³²Leymanta yachachej runataj nerqa: Maestro, allinta ninki, uj k'atalla Dios kasqanta; manataj waj kanchu.

³³Diosta tukuy sonqo munakoyqa, tukuy yachaywan, tukuy almawan, tukuy kallpawan ima, runa masinchejtataj noqanchejta jina munakoyqa; aswan allin ruphachina rikuchikusmanta, uywa wañuchisqasta Diosman jaywanamanta ima nisqaqa.

³⁴Jesustaj allinta kutichisqanmanta, leymanta yachachejman nerqa: Diospa reinonmanta mana karupichu kashanki, nispa. Manañataj pipis astawan tapoj churakorqachu.

³⁵Jesusqa yachachishaspa templopi nerqa: Imaraykutaj leymanta yachachejkuna ninku Cristo Davidpa churin kasqanta?

³⁶Kikin Davidqa Santo Espiritunejta nerqa: Señorqa nerqa Señorniyta: Pañaypi tiyakuy; chejnisojkunata chakisniyki uraman churanaykama.

³⁷Kikin Davidpis payta Señor nerqa. Imaynamantataj chantá Cristoqa Davidpa churin kanmanri? Ashkha runataj tukuy sonqo payta uyarisharqa.

³⁸Yachachishaspataj paykunaman Jesús nerqa: Allinta qhawakuychej leymanta yachachejkunamanta. Paykunaqa, puriykachayta munanku qhoysu p'achasniyoj, chanta qhatuna cheqaspi tukuy runaswan napaykuchikuyta munaspa.

³⁹Paykunaqa sinagogaspi, ñaupajpipuni tiyakuyta munanku, qhochuku wasispipis allin kaj tiyanasta mask'anku.

⁴⁰Viudaspa wasisninkutapis ch'inyachinku; Diosmantataj unay unayta mañakunku. Chaykunaqa astawan juchachasqas kanqanku.

⁴¹Jesús tiyakusharqa qolqe churana qayllapi, qhawasharqataj imaynatachus ofrendata churasqankuta. Qhapajkunaqa, ashkha qolqeta churasharqanku.

⁴²Chayllaman uj viuda jamorqa. Paytaj iskay phatasninta churaykorqa; chaykunaqa phisullawan ninakun.

⁴³Jesustaj yachachisqasninta wajyaspa nerqa: Cheqamanta niykichej, kay wajcha viudaqa, astawan kurajta churan, tukuy runasmanta nisqaqa.

⁴⁴Qhapajkunaqa, kapuyninkumanta puchojllataña churanku; payrí, wajcha kayninwan tukuy mikhunampaj kapusqanta churaykun.