Read Quechua Bolivia DC Bible SAN MARCOS 13 Bible Online

SAN MARCOS 13 - Quechua Bolivia DC Bible bible

SAN MARCOS 13

¹Jesús templomanta llojsimushajtin, ujnin yachachisqan payman nerqa: Maestro, qhawariy, kay chhikachachaj rumis, wasispis kay chhika jatuchaj!

²Jesustaj kuticherqa: Kay jatuchaj wasista rikunkichu? Mana rumi patapi rumi qhepakonqachu; thuñikuspa tukuynin urmanqa.

³Jesús tiyaykukorqa Olivos orqopi, temploj chimpampi. Pedro, Santiago, Andrés imataj sapallampi taporqanku: Willawayku ari, mayk'ajtaj kay tukuy ima kanqari? Ima señaltaj rikhurimonqa kay tukuy ima junt'akunampajri?

⁵Jesustaj kutichispa, yachachiyta qallarerqa: Allinta qhawakuychej, pajtataj pipis ch'aukiyasunkichejman.

⁶Ashkhas ari sutiypi jamonqanku: Noqa Cristo kani, nispa. Ajinamanta ashkha runata pantachenqanku.

⁷Maypachachus guerrasmanta parlajta uyarinkichej, chayrí, ch'ajwasmanta chayqa, ama mancharikuychejchu. Chay tukuy ima kanampuni tiyan. Chaywampis manaraj kay pachaj tukukuyninchu.

⁸Uj nación waj naciompa contranta oqharikonqa, uj reinotaj waj reinoj contranta. Kaynejpi jaqaynejpitaj jallp'a kuyuykuna kanqa; yarqhaykunataj, ch'ajwas ima. Kay tukuy imataj nacichikojpa nanaynimpa qallariynin jina.

⁹Chayrayku qankuna sumajta qhawakuychej; imaraykuchus, jap'ichispa juntasninkuman pusasonqachej, sinagogaspitaj jasut'isonqachej. Noqarayku kuraj kamachejkunaman, reyesman ima pusasonqachej; noqamantataj parlankichej paykuna yachanankupaj.

¹⁰Evangelioqa ñaupajta tukuy llajtaspi willakunan tiyan.

¹¹Maypachachus jap'ichispa kamachejkunaman pusasunkichejman chayqa, ama manchachikunkichejchu, nitaj yuyaychejchu imatachus ninaykichejta; astawanqa, imatachus chaypacha Dios yuyaychasunkichej, chayllata parlaychej. Mana qankunachu parlankichej, Santo Espiritumin qankunanejta parlanqa.

¹²Wauqeqa, wauqellantataj wañuchichenqa, tatapis wawanta. Wawaspis tatasninkoj contranta oqharikuspa wañuchenqanku.

¹³Noqarayku tukuy runaspa chejninan kankichej. Pichus tukukuykama sinch'ita sayajtaj, salvasqa kanqa.

¹⁴Rikunkichej millay ch'inyachejta, mana kanampi kajta. Pichus escribisqata leejqa entiendechun. Chaypacha Judeapi kajkunaqa orqo patasman ayqechunku.

¹⁵Chay diapi, pillapis wasin patapi kashaspaqa, ama uraykamuchunchu wasinmanta imasnintapis orqhoj.

¹⁶Chajrapi kajpis nillataj wasinman kutirichunchu, p'achanta oqharimoj.

¹⁷Chay p'unchaypi, ay, wijsayoj warmismanta, ñuñoj wawasniyojmantapis!

¹⁸Diosmanta mañakuychej, ama chay ayqenaykichej chiri tiempopi kanampaj.

¹⁹Chay p'unchaykunapeqa manchay llakiykuna kanqa; chay jina llakiykunaqa mana jayk'ajpis rikukorqachu, Dios kay mundota ruwasqanmantapacha kunankama; nillataj qhepamampis kanqachu.

²⁰Manachus Señor jaqay p'unchaykunata juch'uyyachinman karqa chayqa, mana pipis salvasqachu kanman karqa; astawanqa, ajllasqasninrayku chay p'unchaykunata juch'uyyacherqa.

²¹Chaypachachus pipis nisunkichejman: Qhawaychej, kaypi Cristo kashan, chayrí jaqaypi Cristo kashan, nispa chayqa, ama kasuychejchu.

²²Rikhurimonqankutaj llullamanta Cristos, llullamanta profetas ima. Paykunataj señalesta, milagrosta ima ruwaspa, runasta ch'aukiyanqanku, atispaqa Diospa ajllasqasnintinta.

²³Chayrayku qhawakuychej, imaraykuchus kaytaqa ñaupajtaña willarqaykichej.

²⁴Chay ñak'ariy p'unchaykunaj qhepanta inti laqhayaykonqa, killapis manaña k'anchamonqachu.

²⁵Qoyllorkunapis urmaramonqanku, janaj pacha atiykunapis kuyurenqanku.

²⁶Chaypacha Runaj Churinta rikonqanku phuyupi jamushajta, jatun atiywan, k'anchaywan ima.

²⁷Paytaj angelesninta kachamonqa mundoj tawantin cheqamanta tantanankupaj Diospa ajllasqasninta; jallp'aj cantonmanta ujnin cantonkama.

²⁸Jesús nillarqataj: Yachakuychej higo sach'amanta kay rijch'anachinata; maypachachus ramasnin q'omeryayta, laqheytataj qallarinku, chaypacha yachankichej q'oñi tiempo qayllapiña kasqanta.

²⁹Ajinallatataj, qankunapis kay tukuy ima rikhurimojtenqa, yachaychej Runaj Churin qayllapiña kasqanta.

³⁰Cheqamanta kayta niykichej; manaraj kay kunan tiempo runaspa miraynin tukukushajtin, kay tukuy ima jamunan tiyan.

³¹Janaj pacha kay pachapis tukukonqa, palabrasniyrí mana tukukonqankuchu.

³²Chay p'unchaymantaqa, chay horamantapis, mana pipis yachanchu, ni janaj pachapi angelespis, nitaj Churipis. Dios Tatalla chaymantaqa yachan.

³³Chayrayku qankunaqa, allinta qhawakuychej, ama puñurpayaspa [Diosmanta mañakuychej], imaraykuchus mana yachankichejchu mayk'ajchus chay p'unchay chayamunanta.

³⁴Kayqa karu llajtaman ripojman rijch'akun. Wasinta saqespa atiyta qorqa sapa uj kamachisninman. Punku qhawajtapis nerqa allinta qhawananta.

³⁵Chayrayku, ama puñuspa qhawaychej, imaraykuchus mana yachankichejchu mayk'ajchus wasiyoj chayamunanta; ch'isiyaykuytachus, chayrí chaupi tutatachus, chayrí gallo waqaytachus, manachayrí sut'iyaytachus.

³⁶Pajtataj wasiyoj chayarparimunman, puñushajtataj taripasunkichejman.

³⁷Chayrayku, imatachus qankunaman niykichej, chayllatataj runasmampis nini: Ama puñuspa qhawaychej.