Read Quechua Bolivia DC Bible SAN MARCOS 14 Bible Online

SAN MARCOS 14 - Quechua Bolivia DC Bible bible

SAN MARCOS 14

¹Iskay diallaña Pascuapaj kashajtin; chay Pascua diapi, mikhoj kanku mana levadurayoj t'antata. Kuraj sacerdotestaj, leymanta yachachejkuna ima mask'asharqanku imaynamantachus Jesusta pakayllamanta jap'ichispa wañuchinankupaj.

²Paykunataj nisharqanku: Ama jatun diapeqa jap'ichinachu; imaraykuchus runas oqharikuspa ch'ajwankuman.

³Betania llajtapi, lepra onqoyniyoj Simompa wasimpi Jesús kasharqa. Chaypi pay mikhushajtintaj, uj warmi yaykumorqa alabastro yuru aparisqa. Yuroqa nardo perfumewan junt'a karqa, may precioyoj. Warmitaj yurituta p'akirparispa, perfumeta Jesuspa umanman jich'aykorqa.

⁴Wakinkunataj, sonqonkupi phiñakuspa nerqanku: Imapajtaj kay jinata perfumeta usuchinri?

⁵Kinsa pachaj kuraj denario qolqepi vendekunman karqa. Chaytataj wajchasman qosunman karqa, nispa. Warmipajqa mayta rimarqanku.

⁶Jesustaj paykunaman nerqa: Saqeychej, imaraykutaj k'amishankichejri? Kay warmeqa allinta noqapaj ruwapuwan.

⁷Wajchasqa qankunawan kallanqankupuni; munaspaqa mayk'ajllapis atinkichej yanapayta. Noqarí manaña unaytachu qankunawan kasaj.

⁸Kay warmeqa atisqanta ruwan; perfumewan ukhuyta jawispaqa ñaupaykun p'ampakunaypaj wakichiwaspa.

⁹Cheqamanta niykichej; mayllapipis kay evangelio willakojtin, kay warmej ruwasqampis willakullanqataj paymanta yuyarikunankupaj.

¹⁰Chaypacha, chunka iskayniyojmanta ujnin, Judas Iscariote, rerqa kuraj sacerdoteswan parlamoj, Jesusta jap'ichinampaj.

¹¹Paykunaqa chayta uyarispa kusikorqanku. Qolqeta qonankupajtaj parlarqanku; Judastaj qhawaykachasharqa imaynamantachus Jesusta jap'ichinanta.

¹²Mana levadurayoj t'anta mikhuna Pascua p'unchaypa qallariynin karqa. Pascua corderota wañuchishajtinku yachachisqasnin Jesusman nerqanku: Maymantaj risqayku wakichej Pascuata mikhunaykipaj?

¹³Chaymanta iskay yachachisqasninta kacharqa, nispa: Riychej llajtaman; chaypi tinkukunkichej p'uñupi yakuta apashaj runawan, paytataj qhatiychej.

¹⁴Maymanchá yaykonqa chay wasiyojta niychej: maestroyku nisunki, maypitaj sala kashan yachachisqasniywan Pascuata mikhunaypaj?

¹⁵Wasiyojtaj, alto patapi rikuchisonqachej uj jatun salata, k'uchunchasqataña; chaypi wakichiychej mikhunanchejpaj.

¹⁶Yachachisqastaj rerqanku; llajtaman yaykuspataj, tukuy imata Jesuspa nisqanman jina tarerqanku; chay wasipitaj wakicherqanku Pascua mikhunata.

¹⁷Chisiyaykuytataj, chay wasiman Jesús chayarqa, chunka iskayniyoj yachachisqasninwan.

¹⁸Mikhushajtinkutaj paykunaman nerqa: Cheqamanta niykichej. Qankunamanta ujniykichej, pichus noqawan mikhushan chay jap'ichiwanqa.

¹⁹Yachachisqasnintaj llakikuyta qallarerqanku, Jesustataj taporqanku ujmanta uj: Noqachu kani?, nispa.

²⁰Jesustaj paykunaman kutichispa nerqa: Qankuna chunka iskayniyojmanta ujniykichej, pichus noqawan chuwapi t'antata chhapuspa mikhushan chay.

²¹Cheqamanta Runaj Churenqa, paymanta qelqasqaman jina wañuyman rishan. Ay, jaqay runamanta, pinejtachus runaj Churin jap'ichisqa kanqa! Allin kanman karqa chay runapaj ama nacinan.

²²Paykuna mikhushajtinku, Jesús t'antata oqharispa, diosman graciasta qorqa, partiytawantaj yachachisqasninman jaywarqa: Jap'iychej, kaymin cuerpoyqa, nispa.

²³Copata oqharispataj, Diosman graciasta qorqa, paykunamantaj jaywarqa; tukuyninkutaj copamanta ujyarqanku.

²⁴Jesustaj paykunaman nerqa: Kaymin yawarneyqa [mosoj] tratomanta; chay yawartaj ashkha runarayku jich'asqa kanqa.

²⁵Cheqamanta niykichej, manaña jayk'ajpis uvas sach'aj poqoyninmanta ujyasajchu; Diospa reinompi watejmanta ujyanaykama.

²⁶Salmosta takiytawan, Olivos orqoman riporqanku.

²⁷Chaymantataj, Jesús paykunaman nerqa: Kunan tukuyniykichej qhesachawankichej. Escribisqa kashan: Michejta wajtasaj, ovejastaj ch'eqerakonqanku.

²⁸Wañuymanta kausarimuspataj ñaupaqeykichejta Galileaman risaj.

²⁹Pedrotaj Jesusman nerqa: Tukuyninkupis iskayrayachunku, noqaqa manapuni qanmanta iskayrayasajchu.

³⁰Pedromantaj Jesús nerqa: Cheqamanta niyki, kunan tutapacha, manaraj gallo iskay kutita waqashajtin, qanqa kinsa kutita mana rejsej tukuwanki.

³¹Pedrotaj astawan atipakuspa kuticherqa: Qanwan wañunay kashajtimpis, manapuni mana rejsinichu nisqaykichu. Tukuy yachachisqasnimpis kikillantataj nerqanku.

³²Jesús yachachisqasninwan chayarqa uj cheqaman, Getsemaní nisqaman. Jesustaj paykunaman nerqa: Kaypi tiyarikuychej, noqa Diosmanta mañakamunaykama.

³³Pedrota, Santiagota, Juantawan pusarqa; chaypitaj sonqo nanayta, llakiywan ñak'ariyta qallarerqa.

³⁴Paykunamantaj nerqa: Almayqa ancha llakisqa kashan wañuykama. Kaypi suyawaychej ama puñuspa.

³⁵Jesustaj tumpatawan ñaupajman karuncharispa, pampaman k'umuykuspa Diosmanta mañakorqa, atikojtenqa chay ñak'arinan hora imaynallamantapis qhechukunampaj.

³⁶Mañakuspataj Jesús nerqa: Abba Tatáy, tukuy ima qampajqa atikun, jark'away ari chay ñak'ariymanta; chaywampis ama noqaj munasqallayqa kachunchu; astawanqa, qampa munasqayki ruwasqa kachun.

³⁷Jesustaj kutirimuspa, paykunata puñushajta tariparqa, Pedromantaj nerqa: Simón, puñushankichu? Manachu uj horallatapis qhawayta aterqanki?

³⁸Qhawakuychej ama puñuspa. Diosmanta mañakuychej ama juchaman urmanaykichejpaj. Cheqamanta espiritoqa wakichisqa kashan, aychatajrí pisi kallpayoj.

³⁹Jesustaj ujtawan rispa, Diosmanta mañakorqa ñaupajta jina.

⁴⁰Ujtawan kutimuspataj, puñurashajllatataj tariparqa; imaraykuchus paykunaqa k'aywisharqanku puñuywan atichikuspa; manataj imata kutichiyta aterqankuchu.

⁴¹Kinsa kaj kutimuynimpitaj, Jesusqa paykunaman nerqa: Kunanqa puñullaychejña, samakuychejtaj. Jinallaña kachun, ñapis hora junt'akunña. Runaj Churenqa juchasapaspa makimpiña kashan.

⁴²Jatariychej, jaku. Jap'ichiwajqa qayllapiña.

⁴³Jesús parlashajtillanraj, Judas chayaykamorqa; payqa chunka iskayniyojmanta ujnin kaj karqa. Paywantaj, ashkha runa jamorqa espadaswan, k'aspiswan ima. Chaykunata kachamorqanku kuraj sacerdotes, leymanta yachachejkuna, kurajkuna ima.

⁴⁴Judastaj yachachinakusqaña imaynatachus Jesusta jap'ichinampaj: Pitachari noqa much'aykusaj, chay kanqa, payta jap'ispa, ama kacharispataj presota apaychej, nispa.

⁴⁵Judastaj chayaykamuytawan, Jesusman qayllaykuspa, Maestro, nerqa. Much'aykorqataj.

⁴⁶Runastaj, Jesusta jap'iytawan presocharqanku.

⁴⁷Chaypi kajkunamanta ujnintaj, espadanta orqhospa, kuraj sacerdotej kamachimpa ningrinta qholurparerqa.

⁴⁸Jesustaj runasman nerqa: Suwata jinachu jap'ej jamuwarqankichej, espadaswan, k'aspiswan ima?

⁴⁹Templopi sapa p'unchay yachachishajteyqa mana jap'iwarqankichejchu; kunanrí Escrituraj nisqan junt'akunampaj, jap'iwankichej.

⁵⁰Chayman Jesusta saqerparispa, tukuynin yachachisqasnin ayqerqanku.

⁵¹Uj waynataj Jesusta qhatisharqa, sabanawan qhatasqa. Paytapis jap'illarqankutaj.

⁵²Jap'ejkunaj makinkupi sabanata saqerparispataj, q'alalla waynaqa ayqerikaporqa.

⁵³Chaymanta Jesusta pusarqanku jatun sacerdotesman. Chaymantaj tantakamorqanku kuraj sacerdotes, kurajkuna, leymanta yachachejkuna ima.

⁵⁴Pedrotaj, karullamanta Jesusta qhaterqa, yaykorqataj jatun sacerdotej pation uqhuman. Chaypitaj payqa, nina qayllapi tiyakuspa, kamachiswan q'oñikusharqa.

⁵⁵Kuraj sacerdotestaj tukuy juntamanta kajkunawan, mask'asharqanku llulla testigosta, Jesusta ch'ataykunankupaj, chaymantataj wañuchinankupaj. Manataj ni imata tarerqankuchu.

⁵⁶Ashkhas llullakuspa paypa contranta parlarqanku; parlasqankutaj mana kikinchu karqa.

⁵⁷Wakintaj sayarispa, llullata nerqanku Jesuspa contranta: Noqayku Jesusta uyarerqayku nejta: Noqa urmachisaj kay runaj makinwan ruwasqa templota, chaymantataj kinsa diapi watejmanta sayarichisaj, mana runaj makinwan ruwasqatañachu.

⁵⁸

⁵⁹Chaywampis, paykunaj tumpasqankoqa mana jinachu karqa.

⁶⁰Chaypacha, jatun sacerdote, chaupinkumanta jatarispa Jesusta taporqa: Manachu imatapis kutichikunki? Imamantataj kaykuna ch'atasunkuri?, nispa.

⁶¹Jesustaj ch'inlla karqa, mana imata kutichikuspa. Watejmanta jatun sacerdoteqa Jesusta tapullarqataj: Qanchu Cristo kanki, yupaychasqa Diospa Churin?, nispa.

⁶²Jesustaj kuticherqa: Arí, noqa kani. Qankunataj rikunkichej Diospa Churinta, jatun atiyniyoj Diospa pañampi tiyashajta, janaj pachamantataj phuyuspi jamushajta.

⁶³Chaypacha jatun sacerdoteqa, p'achasninta llik'irakuspa nerqa: Imapajñataj munanchej testigosta?

⁶⁴Qankuna uyarinkichejña imaynatachus Diospaj sajrata rimasqanta. Kunanrí, ima ninkichejtaj? Tukuyninkutaj Jesusta juchacharqanku wañunampaj.

⁶⁵Wakinkunataj qallarerqanku Jesusta thoqaykuyta; uyanta qhataykuspataj sajmarqanku: Sut'inchay, pitaj sajmasunkiri?, nispa. Kamachistaj Jesuspa umampi sajmarqanku.

⁶⁶Pedro ura patiopi kashajtin, jamorqa jatun sacerdotej warmi kamachin.

⁶⁷Paytaj, Pedrota nina qayllapi q'oñikushajta rikuspa, qhawariytawan nerqa: Qampis Jesús nazarenowan kasharqanki.

⁶⁸Pedrotaj nerqa: Mana jinachu. Mana payta rejsinichu, nitaj yachanichu imamantachus nisqaykita. Chantá jawaman llojserqa; ajinallamantaj gallo waqarqa.

⁶⁹Kamachi warmitaj, Pedrota ujtawan qhawarispa, chaypi kajkunaman nerqa: Kay runaqa paykunamanta, nispa.

⁷⁰Pedrotaj ujtawan, mana jinachu, nerqa. Uj chhikanmantawan chaypi kajkunapis Pedrota uyancharqanku: Cheqamanta qampis paykunamanta kankeqa. Galileollataj kasqayki parlaynillaykipi sut'i kashan.

⁷¹Chaymantataj, Pedroqa maldiciyta, juraytataj qallarerqa: Mana chay runata rejsinichu, pimantachus parlashankichejpis, nispa.

⁷²Chantá ujtawan gallo waqallarqataj; Pedrotaj chayta uyarispa Jesuspa nisqanmanta yuyarikorqa: Manaraj iskay kutita gallo waqashajtin, qanqa kinsa kutita ninki mana rejsiwasqaykita. Kayta yuyarispataj Pedroqa waqarqa.