Read Quechua Bolivia DC Bible SAN MARCOS 15 Bible Online

SAN MARCOS 15 - Quechua Bolivia DC Bible bible

SAN MARCOS 15

¹Sut'iyamuytataj, tantakorqanku kuraj sacerdotes, kurajkuna, leymanta yachachejkuna, tukuy juntantin. Paykunataj Jesusta watasqata Pilatoman pusarqanku.

²Pilatotaj Jesusta taporqa: Qanchu judiospa Reynin kanki? Jesustaj kutichispa nerqa: Arí, qan ninki.

³Kuraj sacerdotestaj, maytapuni Jesusta ch'ataykusharqanku.

⁴Pilato ujtawan Jesusta tapullarqataj: Manachu imatapis kutichikunki? Uyariy, chay chhika imasmanta ch'atashasunku.

⁵Chaywampis Jesusqa manapuni kuticherqachu. Chayraykutaj Pilatoqa t'ukorqa.

⁶Sapa Pascua p'unchaypi, Pilatoqa kacharejpuni uj presota, mayqentachá runas munaj kanku, chayta.

⁷Chaypacha, uj runa Barrabás sutiyoj, carcelpi wisq'asqa kasharqa waj runaswan, pikunawanchus ch'ajwapi runata wañucherqanku chaykunawan.

⁸Ashkha runa tantakamuspataj, Pilatomanta mañarqanku, sapa wata ruwasqanman jina uj presota kacharichinanta.

⁹Pilatotaj paykunaman nerqa: Munankichejchu judiospa Reyninta kacharichinayta?

¹⁰Payqa allinta yachasharqa, kuraj sacerdotes chejnikusqankurayku Jesusta pusamusqankuta.

¹¹Kuraj sacerdotesqa runasman yachachisharqanku, Pilatomanta mañanankupaj Barrabasta kacharinanta.

¹²Pilatotaj kutichispa ujtawan paykunaman nerqa: Imatataj ruwanayta munankichej judiospa Reyninwanri?

¹³Runastaj qhaparispa kuticherqanku: Cruzpi chakatay!

¹⁴Pilato tapullarqataj: Ima sajratataj pay ruwarqari?, nispa. Paykunataj astawan qhaparerqanku: Cruzpi chakatay!

¹⁵Pilatotaj runasman allin rijch'ananrayku, Barrabasta kacharerqa; Jesusta jasut'ichispataj soldadosman qorqa chakatanankupaj.

¹⁶Soldadostaj Jesusta pusaykorqanku palacioj ukhu pationman; chaymantaj tantacherqanku tukuy soldadosta.

¹⁷Jesustataj p'achallicherqanku puka p'achawan. Umanmantaj churaykorqanku khishkamanta simp'asqa pilluta.

¹⁸Chaymantataj napaykuyta qallarerqanku: Kausachun judiospa Reynin!, nispa.

¹⁹Jesuspa umampi soqosowan wajtaspataj thoqaykorqanku, qonqoriykukuspataj payta asipayarqanku.

²⁰Asipayaytawantaj puka p'achata lluch'uspa, kikin p'achasninta churaykorqanku; jawamantaj orqhorqanku chakatanankupaj.

²¹Cirenemanta Simón, Alejandroj, Rufojtawan tatan, campomanta jamusharqa; paywantaj q'epicherqanku Jesuspa cruzninta.

²²Jesustataj pusarqanku Gólgota nisqa orqoman, kay niyta munan T'ojlu pata.

²³Jesusmantaj qorqanku vinota, mirrawan chajrusqata. Paytaj mana munarqachu ujyayta.

²⁴Jesusta chakataytawantaj soldasdosqa p'achasninta rak'inakorqanku; suerteta choqaspa, chayman jina sapa uj apakunampaj.

²⁵Jesusta chakatashajtinkoqa, tutamanta isq'on hora karqa.

²⁶Juchachasqanku escribisqataj kay jina karqa: Judiospa Reynin.

²⁷Jesustawan chakatallarqankutaj iskay suwasta: Ujninta pañanman, ujnintataj lloq'enman. [

²⁸Ajinamanta, Escriturapi paymanta nisqan junt'akorqa: Payqa juchasapaswan yupasqa karqa.]

²⁹Chaynejta purejkunataj, umankuta khiwirispa Jesuspaj rimarqanku: Wa! Qan kanki templota urmachej, kinsa p'unchaypitaj sayarichej!

³⁰Qan kikiykita salvakuy. Chay cruzmanta uraykamuy.

³¹Ajinallatataj kuraj sacerdotes, leymanta yachachejkunawan Jesusta asipayaspa ninakusharqanku: Wajkunata salvarqa, paytaj mana salvakuyta atinchu.

³²Kunanqa, Cristo Israelpa Reynin, uraykamuchun chay cruzmanta rikunanchejpaj, creenanchejpajtaj, nispa. Ajinallatataj chay iskay paywan chakatasqaspis rimasharqanku.

³³Chaupi día kashajtin, tukuy jallp'ata laqhayaykamorqa kinsa horakama.

³⁴Chay kikin horallapitaj, Jesusqa sinch'ita qhaparispa nerqa: Eloi, Eloi, lama sabactani? Chay niyta munan: Diosníy, Diosníy, imaraykutaj saqerpariwankiri?

³⁵Chayta uyarispataj, wakin chaypi uyarejkunamanta nerqanku: Uyariychej, Eliasta wajyakushan, nispa.

³⁶Ujnintaj usqhayta jamuspa, esponjata vinagreman chhapuykuspa, soqosoman wataykuytawan Jesuspa siminman churaykorqa: Saqeychej, ichachus Elías jamonqa cruzmanta uraykuchej, nispa.

³⁷Jesustaj, sinch'ita qhaparispa wañuporqa.

³⁸Chaypacha, temploj velon iskayman llik'ikorqa, patamanta urakama.

³⁹Centuriontaj, Jesuspa cruznimpa ñaupaqempi kasharqa; paytaj Jesús qhaparispa wañusqanta rikuspa, nerqa: Cheqamanta kay runaqa Diospa Churin karqa, nispa.

⁴⁰Wakin chaypi kajkuna warmispis karullamanta qhawamusharqanku. Paykuna ukhupi karqa María Magdalena; sullk'a kaj Santiagojta, Josejtawan mamanku María, Salomé ima.

⁴¹Galileapi Jesús kashajtintaj, kay warmisqa Jesuswan rej kanku yanapaspa. Waj warmispis Jesuswan wicharillarqankutaj Jerusalenman.

⁴²Ch'isiña kashajtin, samakuna p'unchaypaj wakichikuna kasqanrayku, Arimateamanta José jamorqa. Payqa juntapi sumajpaj qhawasqa runa, Diospa reinontataj suyasharqa. Mana manchachikuspataj Pilatomanta Jesuspa ayanta mañarqa.

⁴³

⁴⁴Pilatotaj t'ukorqa Jesús wañusqaña kasqanmanta; chayrayku centurionta wajyaspa taporqa Jesús wañusqañachus kasqanta.

⁴⁵Centurión willajtintaj Pilatoqa Joseman Jesuspa ayanta qoporqa.

⁴⁶Josetaj sabanata rantimuspa, Jesuspa ayanta cruzmanta uraykuchiytawan mayt'uykorqa. Chhankapi jusk'usqa sepulturaman Jesusta churaykorqa, chantá jatun rumiwantaj wisq'aykorqa.

⁴⁷María Magdalenataj, Josejpa maman Mariawan qhawasharqanku maymanchus Jesusta churasqankuta.