Read Quechua Bolivia DC Bible SAN MARCOS 16 Bible Online

SAN MARCOS 16 - Quechua Bolivia DC Bible bible

SAN MARCOS 16

¹Samakuna p'unchay pasayta, María Magdalena, Santiagoj maman María, Salomé ima, q'apaj perfumesta rantimorqanku, chaywan Jesuspa ayanta jawimunankupaj.

²Semanaj ñaupaj p'unchaynin sut'iyamuyta, warmis, inti llojsimuytaña sepulturaman chayamorqanku.

³Rishaspataj paykuna ninakusharqanku: Kunanqa, pitaj sepulturapi rumita tanqaripuwasunri?

⁴Qhawarispataj, rumitaqa tanqarparisqataña rikorqanku; imaraykuchus ancha jatun karqa.

⁵Warmistaj, sepulturaman yaykuspa rikorqanku uj waynata pañanejpi tiyashajta, qhoysu yuraj p'achayojta; paykunataj mancharikorqanku.

⁶Waynataj nerqa: Ama mancharikuychejchu. qankunaqa Jesús nazarenota mask'ashankichej, cruzpi chakatasqata. Payqa kausarimpunña, mana kaypiñachu. Qhawaychej: Kaypi Jesuspa ayanta churarqanku.

⁷Kunanqa rispa willamuychej yachachisqasninman, Pedroman ima. Jesusqa ñaupaqeykichejta Galileaman rishan, chaypitaj payta rikunkichej, nisqanman jina.

⁸Warmistaj, sepulturamanta llojsispa ayqerqanku, imaraykuchus mancharikuspa kharkatitisharqanku; chay jawataj, mana pimampis imata willarqankuchu. [

⁹Jesús kausarimuspa, semanaj ñaupaj p'unchaynin sut'iyamuyta; ñaupajta rikhurerqa María Magdalenaman, pimantachus Jesús qharqorqa qanchis supaykunata.

¹⁰Mariataj rispa willamorqa Jesuswan kajkunaman. Paykunaqa phutisqas kasharqanku, waqasharqankutaj.

¹¹Jesús kausarimpusqanta uyarispa, Mariapis payta rikusqanta, manapuni creerqankuchu.

¹²Chay qhepata Jesús rikhurillarqataj waj rijch'ayniyoj, iskay yachachisqasninman; paykunaqa chajraman risharqanku.

¹³Llajtaman kutirispataj chay ujkunaman willamorqanku Jesusta rikusqankuta; nillataj paykunatapis creerqankuchu.

¹⁴Qhepaman Jesús rikhurillarqataj chunka ujniyoj apostolesninman mikhushajtinku. Paykunatataj k'amirarqa, rumi sonqos mana creesqankurayku, imaraykuchus kausarimpusqanta rikojkunatapis manapuni creerqankuchu.

¹⁵Jesustaj nerqa: Riychej tukuy mundoman, evangeliota willamuychej tukuy runasman.

¹⁶Pichus creejqa, bautizachikojtaj, salvasqa kanqa; mana creejtajrí wañuypaj juchachasqa kanqa.

¹⁷Creejkunataj kay señalesta ruwanqanku: Sutiypi supaykunata qharqonqanku; mosoj parlaykunatataj parlanqanku.

¹⁸Makisninkuwan katarista oqharenqanku; venenota ujyaspapis mana imanakonqankuchu; onqosqasman makisninkuta churaspapis thañichenqanku.

¹⁹Señortaj apostolesninman parlaytawan janaj pachaman oqharisqa karqa; chaypitaj Diospa pañanman tiyaykukorqa.

²⁰Paykunataj llojsiytawan tukuynejpi evangeliota willarqanku. Señortaj yanapasharqa, señalesta ruwasqankuwan rikuchispa willasqanku cheqa kasqanta.]