Read Quechua Bolivia DC Bible SAN MARCOS 3 Bible Online

SAN MARCOS 3 - Quechua Bolivia DC Bible bible

SAN MARCOS 3

¹Watejmanta Jesús yaykullarqataj sinagogaman, chaypitaj uj runa makin ch'akisqa kasharqa.

²Wakin runas chaypi kajkunamanta, Jesusta wateqasharqanku; rikuyta munaspa samakuna diapi, thañichenqachus manachus nispa; chay jawataj ch'ataykunankupaj.

³Jesustaj makin cha'kisqa runata nerqa: Sayariy, jamuy kay ñaupajman, nispa.

⁴Chaymanta runasta taporqa: Atikunchu samakuna diapi allin kajta ruway, chayrí sajra kajtachu? Runaj kausayninta salvaychu, chayrí wañupojta saqeychu? Paykunataj ch'inlla karqanku.

⁵Chaymantá, Jesusqa muyuynimpi kajkunata phiñakuspa qhawarerqa, paykunamantataj llakikorqa rumi sonqos kasqankurayku; runamantaj nerqa: Aysariy makiykita. Paytaj makinta aysarerqa, thañikaporqataj.

⁶Chaymantataj fariseosqa llojsispa, herodianoswan tantaykukuspa, yachachinakorqanku Jesusta wañuchinankupaj.

⁷Ajinamanta, Jesús riporqa yachachisqasninwan Galilea qocha cantoman; chaywampis ashkha runa payta qhatillarqataj, Galileamanta, Judeamantawan.

⁸Jamullarqankutaj Jerusalenmanta, Idumeamanta, Jordán mayu chimpamanta, Tirompa, Sidompa muyuyninmanta ima. Chay jina ashkha runas jamorqanku Jesusman, jatuchaj ruwasqasninta uyarispa.

⁹Chay chhika runata rikuspataj, yachachisqasninman nerqa: Boteta wakichipuwaychej, runas k'iskikamuspa ama ñit'imunawankupaj.

¹⁰Ashkha runataña Jesús thañicherqa. Chayraykutaj tukuy onqosqas ñit'imusharqanku, Jesusman qayllaykuspa, imaynallamantapis llujchiykunankupaj.

¹¹Millay espiritustaj, Jesusta rikuspa, ñaupaqenman wijch'uykukuspataj qhaparisharqanku: Qanka Diospa Churin kanki, nispa.

¹²Jesustaj mayta kamacherqa ama sut'inchanankupaj pichus pay kasqanta.

¹³Chaymantá Jesús wicharerqa orqoman; chaymantaj wajyarqa pikunatachá ajllayta munarqa chaykunata; paykunataj Jesusman jamorqanku.

¹⁴Jesustaj chunka iskayniyoj runasta ajllarqa, paywan kanankupaj, evangelionmanta willajta kachanampaj.

¹⁵Paykunamantaj atiyta qorqa, onqosqasta thañichinankupaj, supaykunatataj qharqonankupaj.

¹⁶Kaykuna chay chunka iskayniyoj ajllasqasnin kanku: Simón, Pedro nisqa; Zebedeoj churisnin Santiago wauqen Juanwan. Paykunatapis Boanerges nispa sutichallarqataj. Kay niyta munan truenoj churisnin. Chaymanta kanku: Andrés, Felipe, Bartolomé, Mateo, Tomás; Alfeoj churin Santiago, Tadeo, Simón cananeo nisqa; Jesusta jap'ichej Judas Iscariote ima.

²⁰Chaymantá runa tantakamullarqataj, chayrayku paykunaqa mana mikhuyllatapis aterqankuchu.

²¹Chayta yachaspataj, ayllusnin jamorqanku Jesusta pusakapunankupaj; nisharqankutaj: Mana yuyaynimpichu kashan, nispa.

²²Leymanta yachachejkuna, Jerusalenmanta jamojkunapis nishallarqankutaj: Kuraj Supay Beelzebú paypi kashan; chayrayku, paypa atiyninwan supaykunata qharqoshan.

²³Jesustaj runasta wajyaspa, rijch'anachinaswan nerqa: Imaynatataj Satanás, Satanasllatataj qharqokunmanri?

²⁴Jesús nillarqataj: Sichus uj suyoka iskayman t'aqasqa kanman chayqa, chay suyoqa manaña sayanmanchu.

²⁵Sichus uj wasipi, familiantin t'aqanasqa kankuman chayqa; chay wasipi kajkunaqa, manallataj kayta atinkumanchu.

²⁶Ajinallatataj, Satanaspa reinompis iskayman t'aqasqa kanman chayqa, manallataj sayayta atinmanchu; astawanqa chinkapunman.

²⁷Mana ni pipis kallpasapa runaj wasinman yaykuyta atinchu kapuyninta qhechoj, manachus ñaupajta kallpasapata wataykunmanraj chayqa. Chantaraj wasimpi kajta suwanqa.

²⁸Cheqamanta niykichej: Runaspa tukuy juchan pampachasqa kanqa, jinallataj ima sajrata rimasqampis.

²⁹Santo Espíritoj contranta rimajpatarí, mana jayk'ajpis juchan pampachasqachu kanqa; astawanqa wiñaypaj juchachasqa kanqa.

³⁰Runasqa nisharqanku Jesusqa millay espirituyoj kasqanta.

³¹Chay qhepata Jesuspa maman, wauqesnin ima chayamorqanku. Jawapi sayaspataj kacharqanku payta wajyajta.

³²Jesuspa muyuynimpi tiyashajkunataj, payman nerqanku: Mamayki, wauqesniyki ima jawapi mask'ashasunku.

³³Jesustaj paykunaman kuticherqa: Pitaj mamay kasqari? Pikunataj wauqesniy kasqankuri?

³⁴Chaymantataj, muyuynimpi tiyashajkunata qhawarispa nerqa: Qhawariychej, kaykunamá mamay, wauqesniypis kanku.

³⁵Pichus Diospa munayninta ruwan, chaymá wauqeyqa panaypis, mamaypis.