Read Quechua Bolivia DC Bible SAN MARCOS 5 Bible Online

SAN MARCOS 5 - Quechua Bolivia DC Bible bible

SAN MARCOS 5

¹Ajinamanta Jesús yachachisqasninwan chayarqa qochaj chimpanman, Gerasa jallp'aman.

²Botemanta uraykusqantawantaj, payta taripaj jamorqa uj supayniyoj runa, sepulturasmanta llojsimuspa.

³Kay runaqa tiyakoj sepulturaspi, manataj pipis watayta atejchu, ni cadenaswampis.

⁴Ashkha kutitaña chakisninta, makisnintapis cadenaswan watarqanku, sapa kutitataj cadenasta p'itiraj; manataj pipis aterqañachu atipayta.

⁵Tuta p'unchay qhaparispallapuni puriykachaj, sepulturaspi, orqo pataspi ima, rumiswan takakuspa.

⁶Kay runaqa karumantapacha Jesusta rikuytawan, phinkirispa rerqa, ñaupaqenmantaj qonqoriykukorqa.

⁷Sinch'ita qhaparispataj nerqa: Jesús, jatun Diospa Churin! Imá ruwanayki tiyan noqawan? Diospa sutimpi mañakuyki ama ñak'arichinawaykita.

⁸Chayta nerqa, imaraykuchus Jesusqa kamachisharqa: Millay supay, llojsiy chay runamanta!, nispa.

⁹Chaymantataj Jesús taporqa: Imá sutiykiri?, nispa. Paytaj kuticherqa: Suteyqa Tropa, imaraykuchus ashkha kayku.

¹⁰Jesusmantataj mayta mañakusharqa, ama wijch'unanta chay jallp'amanta.

¹¹Chaypitaj orqo qayllapi ashkha khuchis mikhusharqanku.

¹²Supaykunataj Jesusmanta mañakorqanku: Saqewayku khuchisman yaykojta, nispa.

¹³Jesustaj saqerqa ajinata ruwanankuta. Millay supaykunataj runamanta llojsiytawan khuchisman yaykorqanku. Khuchistaj iskay waranqa jina karqanku. Qaqantataj manchay kallpawan wijch'uykukorqanku qochaman, jeq'eqaspataj wañurarqanku.

¹⁴Chayta rikuspataj khuchi michejkunaqa ayqerqanku; llajtapi, campopi imataj willamorqanku. Runastaj jamorqanku imachus kasqanta yachanankupaj.

¹⁵Jesusman jamuspataj, rikorqanku chay ashkha supayniyoj runata p'achallisqataña, tiyakushajta sumaj yuyaynimpi; paykunataj mancharerqanku.

¹⁶Rikojkunataj jamojkunaman willarqanku, imaynatachus supayniyoj runa thañikapusqanta; khuchispis imaynatachus wañurasqankuta.

¹⁷Runastaj maytapuni Jesusman nerqanku jallp'ankumanta ripunanta.

¹⁸Boteman Jesús yaykushajtintaj, ashkha supayniyoj karqa chay runaqa, Jesusmanta mañakorqa: Qanwan khuska kakojta saqeway, nispa.

¹⁹Jesustaj mana munarqachu paywan rinanta, astawanqa runaman nerqa: Ripuy wasiykiman, ayllusniykiman ima. Paykunamantaj willamuy may jina jatun imastachus khuyasuspa Señor qampaj ruwasqanta.

²⁰Ajinamanta runaqa riporqa. Chantá, chunka llajtas nisqa suyupi purerqa tukuyman willaspa imaynatachus Jesús paywan ruwasqanta, tukuytaj t'ukorqanku.

²¹Jesús ujtawan kutirerqa botepi, jatun qochaj chimpanman. Qocha cantopi kashajtintaj, ashkha runas payman tantakamorqanku.

²²Chay jinallaman, sinagogamanta ujnin kuraj kamachej Jairo sutiyoj jamorqa. Jesusta rikuspataj, ñaupaqenman qonqoriykukuspa, maytapuni mañakusharqa: Warmi waway wañupushanña. Jamuriy ari. Makisniykita payman churaykuripuwanki thañikapunampaj kausanampajtaj, nispa.

²⁴Jesús Jairowan rishajtintaj, ashkha runa qhatisharqa; k'iskinakuspataj Jesusta ñit'imusharqanku.

²⁵Chaypitaj uj onqosqa warmi kasharqa, payqa chunka iskayniyoj watataña yawar apaywan onqosqa karqa.

²⁶Unaytaña ñak'arerqa medicoswan jampichikuspa, tukuy kapuyninta tukuchinankama; manataj imaynapi thañikuyta aterqañachu; astawanraj chullchusharqa.

²⁷Jesusmanta parlajta uyarispa qhepallata jamusharqa runaspa chaupinta; Jesuspa p'achantataj llankhaykorqa.

²⁸Sonqompi nisharqa: P'achallantapis llankhaykuyman chayqa thañikapuyman.

²⁹Jesuspa p'achanta llankhaykojtintaj, kikimpacha yawar onqoynin sayaykaporqa; paytaj yacharqa onqoyninmanta thañikapusqanta.

³⁰Jesustaj yacharqa atiynin llojsisqanta; runasman kutirispataj taporqa: Pitaj p'achayta llankhamuwan?, nispa.

³¹Yachachisqasnintaj payman nerqanku: Rikushanki imaynatachus runas k'iskikamuspa ñit'imusqankuta; qantaj tapushanki, pitaj llankhamuwanri?, nispa.

³²Jesustaj muyuyninta qhawarerqa rikuyta munaspa pichus llankhaykusqanta.

³³Warmitajrí thañisqa kasqanta yachakuspa, Jesusman chimpaykorqa manchariywan kharkatitispa. Ñaupaqenman qonqoriykukuspataj, imachus paypi ruwakusqanmanta willarqa, maychus kasqanta.

³⁴Jesustaj payman nerqa: Wawáy, creesqaykirayku salvasqa kanki. Kunanqa sonqo tiyasqa ripuy, onqoyniykimanta thañisqaña kanki.

³⁵Chayta warmiman nishajtintaj, Jairoj wasinmanta kamachis chayamorqanku, paymantaj nerqanku: Wawayki wañupunña, imapajñá pusayta munashanki Maestrota?

³⁶Jesustaj, kamachispa willasqankuta uyarispa, Jairoman nerqa: Ama mancharikuychu, creellay.

³⁷Jesustaj mana munarqachu paywan waj runas rinankuta; chayrayku ajllarqa Pedrota, Santiagota, wauqen Juanllatawan.

³⁸Sinagogapi kamachejpa wasinman chayaspataj, Jesusqa uyarerqa ch'ajwata, waqajkunata, qhaparejkunatawan.

³⁹Yaykuspataj runasman nerqa: Imamantá ch'ajwashankichej, waqashankichejtaj? Mana wawaqa wañusqachu kashan, puñushallan.

⁴⁰Chayta nisqantawantaj asikorqanku; Jesustaj runasta jawaman llojsichispa, pusaykorqa wawaj tatanta, mamanta, paywan kajkunatawan; yaykorqataj maypichus wawa kasharqa chayman.

⁴¹Wawaj makinmanta jap'iykuspataj Jesús nerqa: Talita kumi; chayqa niyta munan: Imillita, qanta niyki jatarikuy.

⁴²Chay kikimpachataj wawaqa sayarerqa, puriykacharqataj; payqa chunka iskayniyoj watayojña karqa. Chayta rikuspataj runasqa maytapuni t'ukorqanku.

⁴³Jesustaj runasta sinch'ita kamacherqa, ama pipis chay ruwasqanta yachananta, nerqataj: Wawaman mikhuyta qoychej.