Read Quechua Bolivia DC Bible SAN MARCOS 6 Bible Online

SAN MARCOS 6 - Quechua Bolivia DC Bible bible

SAN MARCOS 6

¹Chaymanta llojsispataj Jesusqa kutiriporqa llajtanman, yachachisqasnimpis paywan khuska rerqanku.

²Samakuna día chayamojtintaj, sinagogapi yachachiyta qallarerqa. Ashkha runa Jesuspa yachachisqanta uyarispa, t'ukuspataj nisharqanku: Kay runarí, maypitaj kay tukuy imata yachamorqa? Imaynamantataj kay yachayta jap'erqa? Imaynamantataj kay milagrostapis ruwanri?

³Manachu kayqa carpintero, maríaj wawan; manachu wauqesnimpis Santiago, José, Simón ima kanku? Manachu panasnimpis noqanchejwan kaypi kashanku? Ajinata Jesustaqa qhesacharqanku.

⁴Jesustaj paykunaman nerqa: Profetaqa tukuynejpi munasqa. Kikin llajtampitaj, ayllusnimpi, wasimpipis qhesachasqa.

⁵Chayrayku, chaypeqa Jesús mana ni ima milagrota ruwayta aterqachu; wakin onqosqasllata thañicherqa makisninta churaykuspa.

⁶Jesustaj mayta t'ukorqa mana creesqankumanta; rerqataj chay muyuynintimpi llajtasman yachachispa evangeliota.

⁷Jesustaj chunka iskayniyoj yachachisqasninta wajyaspa, paykunata kacharqa iskay iskaymanta. Atiytataj qorqa millay espiritusta qharqonankupaj.

⁸Kamacherqataj ama ni imata ñampaj apanankuta, manachayqa tojnullata; ama wayaqatapis, ni qoqawitapis, nitaj qolqetapis qara chumpinkupi apanankuta.

⁹Kamachillarqataj ujut'asllata churakunankuta, uj p'achallawantaj kanankuta.

¹⁰Chantá nillarqataj: Mayllapipis uj wasiman wajyachikuspaqa, chay wasillapi kakuychej, llajtamanta ripunaykichejkama.

¹¹Mayllapipis mana wajyarisunkichejmanchu, nitaj uyarisunkichejmanchu chayqa, ripuychej chaymanta, chakisniykichejmanta jallp'ata thalarakuspa; ajinamanta sajra ruwasqankuta yachanankupaj.

¹²Chaymantataj rerqanku runasman willaraspa: Sajra kausayniykichejta saqespa, Diosman kutirikuychej, nispa.

¹³Paykunataj ashkha supaykunata qharqorqanku; onqosqastataj aceitewan jawispa onqoyninkumanta thañicherqanku.

¹⁴Rey Herodestaj kay imasta Jesusmanta uyarerqa, imaraykuchus Jesuspa ruwasqasnenqa tukuynejpiña yachakorqa, nerqataj: Juan Bautistachá kausarimpun. Chayrayku kay jina atiyniyojpuni pay kashan.

¹⁵Wajkunataj nisharqanku: Profeta Eliaschá, nispa. Ujkunataj nerqanku: Payqa Diospa profetan, chay ñaupa profetas jina.

¹⁶Herodestaj, Jesuspa ruwasqasninmanta uyarispa nerqa: Kayqa Juan Bautistapuni. Noqa paypa umanta qholucherqani, kunanrí wañusqamanta kausarimpusqa.

¹⁷Chay ñaupajta kikin Herodesllataj Juanta jap'ichispa, wataykuchispataj wisq'aykucherqa. Kayta ruwacherqa Herodiasrayku. Payqa Felipe wauqempa warmin karqa.

¹⁸Chayrayku Juan Bautista, Herodesta k'amillarqapuni: Mana allinchu wauqeykej warminwan kanaykeqa, nispa.

¹⁹Herodiasqa Juanta wateqaj wañuchinampaj, manataj atejchu.

²⁰Herodesqa, sumaj runapaj Juanta jap'erqa; chayrayku manchachikoj, Juanqa cheqan runa, allin kausayniyojtaj kasqanrayku; chaynejtataj sumajta waqaychachej. Herodesqa tukuy sonqo uyarillajpuni Juantaqa; sapa uyarispataj mayta t'ukoj.

²¹Uj p'unchay chayamorqa, Herodestaj diachakuspa sumaj mikhunasta wakichicherqa. Chaymantataj wajyacherqa kurajkunata, soldado kamachejkunata, Galilea jallp'api atiyniyojkunata ima.

²²Herodiaspa ususintaj, yaykumuspa tusorqa. Herodestaj, diachakupi mikhojkuna ima mayta kusikorqanku; chayrayku herodesqa sipasman nerqa: Imatachus munasqaykita mañakuway, noqataj chayta qosqayki.

²³Chantá, juraspa nillarqataj: Imatachá mañawasqaykita qosqayki, reinoypa khuskanninkamapis, nispa.

²⁴Sipastaj llojsispa mamanta tapumorqa: Imatataj mañakuymanri?, nispa. Mamantaj Juan Bautistaj umanta mañay, nerqa.

²⁵Sipastaj usqhayta kutiykuspa, Herodesmanta mañarqa: Kunampacha qoway uj pampa chuwapi Juan Bautistaj umanta.

²⁶Chayta uyarispataj, Herodesqa mayta phutikorqa, tukuy mikhojkuna rikusqankurayku jurasqanraykutaj, manaña sipasmanqa, mana, niyta aterqachu.

²⁷Herodestaj chay kikimpacha uj soldadota kacharqa, Juampa umanta apamunampaj.

²⁸Soldadotaj, carcelman rispa, Juampa umanta qholurparerqa; pampa chuwapi apamuspataj sipasman jaywarqa; sipastaj mamanman qorqa.

²⁹Chayta yachaspataj Juampa yachachisqasnin, carcelman rispa ayata apakaporqanku, p'ampaykorqankutaj.

³⁰Apostolesnintaj ujtawan Jesuswan tantakuspa, willarqanku tukuy ima ruwasqasninkuta, imaynatachus yachachisqankuta ima.

³¹Jesustaj paykunaman nerqa: Jamuychej ch'innejman, chaypitaj tumpallatapis samarikunkichej, nispa. Ashkha runa, rispa jamuspa, paykunata mana saqejchu kanku mikhojllatapis.

³²Ajinamanta, paykunalla boteman yaykuspa, ch'innejman rerqanku.

³³Ashkha paykunata rejta rikorqanku, rejserqankutaj. Chayrayku, llajtasmanta runas, usqhayllata chakipi kachaykukorqanku. Paykunamantapis astawan ñaupajtaraj chayarqanku; paymantaj qayllaykorqanku.

³⁴Jesusqa botemanta llojsimuspa ashkha runata rikorqa, paykunatataj khuyakorqa; imaraykuchus mana michejniyoj ovejas jina karqanku; paykunamantaj tukuy imata yachachiyta qallarerqa.

³⁵Inti chinkaykusharqaña, yachachisqasnintaj Jesusman qayllaykuspa, nerqanku: Ch'impi kanchej, ch'isiyaykushanñataj.

³⁶Runasta kachapullayña, kay qayllapi chajrasman, ranchosman ima rispa mikhunata rantikamunankupaj, imaraykuchus mana mikhunanku kanchu.

³⁷Jesustaj paykunaman kuticherqa: Qankuna mikhuchiychej. Paykunataj nerqanku: Iskay pachaj denario qolqewan t'antata rantimuspachu paykunaman mikhuchisqayku?

³⁸Jesustaj taporqa: Mashkha t'antataj kapusunkichejri? Rispa qhawarimuychej. Paykunataj mashkhachus kasqanta yachamuspa Jesusman willarqanku: Phishqa t'antalla, iskay challwaswan kapuwayku.

³⁹Chaymanta Jesús kamacherqa, t'aqa t'aqalla runas tiyarakunankuta q'omer ch'iki pasto patapi.

⁴⁰Paykunataj sinrulla tiyaykukorqanku, wakin t'aqapi pachaj, wakimpitaj phishqa chunka karqanku.

⁴¹Jesustaj, chay phishqa t'antata, iskay challwastawan makimpi jap'ispa, janaj pachata qhawarispataj graciasta qorqa. T'antata partispataj yachachisqasninman jaywarqa runasman qomunankupaj. Iskay challwastapis jaywallarqataj rak'iranankupaj tukuyninkuman.

⁴²Tukuyninkutaj mikhorqanku sajsakunankukama.

⁴³Yachachisqasnintaj oqharerqanku chunka iskayniyoj canastas junt'asta t'anta puchojta, challwa puchojtawan.

⁴⁴Chay mikhojkunataj phishqa waranqa qharis karqanku.

⁴⁵Chay kikimpachataj, Jesusqa yachachisqasninta boteman pusaykorqa paymanta ñaupashanankupaj, qocha chimpa Betsaida llajtaman. Chaykamataj Jesusqa runasta kachaporqa.

⁴⁶Runasta kachapuytawantaj, orqoman wicharerqa Diosmanta mañakoj.

⁴⁷Tutayamuyta, botepi rejkunaqa khuskan qochapiña karqanku. Jesustaj qocha cantopi sapallan kasharqa.

⁴⁸Rikorqataj yachachisqasninta, ñak'ayllataña boteta ñaupajman wayt'achishajta, imaraykuchus ñaupaqenkumanta wayra manchayta wayramusharqa. Sut'iyarpayaytaña chay cheqanman Jesús jamorqa, yaku patata purispa, yachachisqasninmantataj ñaupaykuyta munasharqa.

⁴⁹Paykunataj yaku patata purishajta rikuspa, alma kasqanta yuyaspa qhaparerqanku.

⁵⁰Payta rikuspa, tukuyninku manchachikuywan kharkatisharqanku. Ujllata Jesusqa paykunata parlapayamorqa: Sonqochakuychej! Noqa kani! Ama manchariychejchu!, nispa.

⁵¹Jesús boteman wicharisqantawantaj, wayra thañerqa. Chayta rikuspataj yachachisqasnin mancharikuspa mayta t'ukorqanku.

⁵²Manapuni unanchayllatapis aterqankuchu t'antata mikhusqankumanta; imaraykuchus paykunaj sonqonku rumiyasqa karqa.

⁵³Jesusqa yachachisqasninwan qochanejta rispa Genesaret llajtaman chayarqa, chaypitaj boteta watarqanku.

⁵⁴Botemanta llojsishajtinkutaj, Jesusta rejserqankupacha.

⁵⁵Tukuynejman rispataj, maypichus Jesús kasqanta yachaspa, onqosqasta phullusninkupi apamuyta qallarerqanku.

⁵⁶Maymanchá Jesús chayarqa chay ranchosman, llajtasman, chajrasman, qhatunasman, tukuy ñanman ima, onqosqasta apamusharqanku. Jesusmantataj mañakorqanku p'achampa cantollantapis onqosqas llankharinankuta. Tukuy llankhaykojkunataj onqoyninkumanta thañikaporqanku.