Read Quechua Bolivia DC Bible SAN MARCOS 7 Bible Online

SAN MARCOS 7 - Quechua Bolivia DC Bible bible

SAN MARCOS 7

¹Fariseos Jesusman tantakamorqanku, leymanta wakin yachachejkunawan, Jerusalenmanta jamojkunawan ima.

²Rikorqankutaj Jesuspa wakin yachachisqasninta, ch'ichi makiswan mana mayllakuspalla mikhushajta.

³Fariseosqa, tukuy judiospis, manaraj allinta makisninkuta mayllakushaspaqa, mana mikhunkuchu, ñaupa tatasninkoj yachachisqankuta qhatispa.

⁴Plazamanta kutimuspapis, mana ñaupajta llimphuchakuspaqa, mana mikhunkuchu. Ajinallatataj waj ñaupa usustapis qhatinku. Chayrayku mayllanku ujyana vasosta, mankasta, metal yurustapis. Camastapis t'ajsanku.

⁵Chayrayku fariseos, leymanta yachachejkunawan Jesusta taporqanku: Imaraykutaj yachachisqasniyki mana ruwankuchu ñaupa tataspa yachachisqasninkuta? Paykunaqa t'antata mikhushanku makisninkuta mana mayllakuspalla.

⁶Jesustaj paykunaman kuticherqa: Puraj uyas, allintapuni qankunamanta Isaiasqa sut'incharqa kay jinata escribispa: Kay runasqa simillankuwan yupaychawanku; sonqonkurí noqamanta karupi kashan.

⁷Qhasi mana kajta paykuna yupaychawanku; runaspa kamachisqasnillanta yachachispa.

⁸Jesús nillarqataj: Qankunaqa Diospa kamachisqanta saqerpayaspa, runaspa yachachisqanta qhatinkichej.

⁹Nillarqataj: Diospa kamachisqanta qhesachallankichejtaj, ñaupa tatasniykichejpa yachachisqankuta ruwanaykichejpaj.

¹⁰Moisesqa kay jinata nerqa: Tataykita, mamaykitapis respetanki; pichus tatampaj sajrata rimanman chayqa, wañuchun.

¹¹Qankunaqa ninkichej: Pillapis tatanman, chayrí mamanman ninman: Qankunata yanapanay kajqa, Corbán; kay niyta munan: Diosman ofrenda, nispa.

¹²Ajinamanta chay runata mana saqenkichejchu mana imawan tatanta nitaj mamanta yanapajta.

¹³Diospa palabranta qhesachashankichej, tatasniykichejpa kamachisqankuta ruwaspa; ashkha imastataj kaykunaman rijch'akojkunata ruwankichej.

¹⁴Ujtawan runasta wajyaspa, Jesús nerqa: tukuyniykichej uyariwaychej, entiendeychejtaj.

¹⁵Mana imapis jawamanta runaman yaykojqa ch'ichichanchu; sonqomanta llojsimojmá runataqa ch'ichichan.

¹⁶[Pichus ningriyojqa uyarichun.]

¹⁷Runasmanta karunchaspataj Jesús yaykorqa wasi uqhuman; chaypitaj yachachisqasnin taporqanku chay rijch'anachina ima niytachus munasqanta.

¹⁸Jesustaj paykunaman nerqa: Qankunapis mana yuyayniyojllatajchu kankichej? Manachu yachankichej, tukuy ima jawamanta runaman yaykojqa, mana ch'ichichasqanta?

¹⁹Mana runaj sonqonmanchu yaykun, manachayqa wijsanman; chaymantataj llojsipun. Chaywan niyta munarqa tukuy mikhuna llimphu kasqanta.

²⁰Nillarqataj: Imachá runaj sonqonmanta llojsimun, chaymá runataqa ch'ichichan.

²¹Runaspa sonqonkumanta llojsimunku: Sajra yuyaykuna, qhenchachakuykuna, tantalla puriykuna, runa wañuchiykuna, suwaykuna, wajpa kapuyninta munapayaykuna, sajra ruwaykuna, ch'aukiyaykuna, aychaj munayninta ruwaykuna, sajra rimaykuna, runaykachaykuna, mana yuyayniyoj kaykuna ima.

²³Kay tukuy sajra ruwaykunamá, ukhumanta llojsimuspa runataqa ch'ichichanku.

²⁴Chay qhepata Jesús rerqa Tiro jallp'aman; uj wasiman yaykuspataj mana munarqachu ni pipis paymanta yachananta, nitaj pakukuyta aterqachu.

²⁵Uj warmitaj uyarerqa Jesús chaypi kasqanta. Paypa warmi wawantaj millay supayniyoj karqa; jamuytawantaj Jesuspa ñaupaqenman qonqoriykukorqa.

²⁶Kay warmeqa griego parlayniyoj karqa, Sirofenicia llajtamanta. Jesusmantataj maytapuni mañakusharqa, wawanmanta supayta qharqonanta.

²⁷Jesustaj warmiman nerqa: Ñaupajtaqa wawasraj mikhunanku tiyan, sajsakunankukama; mana allinchu wawaspa t'antanta qhechuspa alqetusman qaranaqa.

²⁸Warmitaj kuticherqa: Arí, Señor, alqetuspis mesa urapi, wawaspa t'anta t'unasninta mikhunkupuni.

²⁹Chantá warmiman nerqa: Kayta nisqaykirayku, ripullayña, wawaykimanta supay llojsinña.

³⁰Warmitaj wasinman chayaspa, tariparqa wawanta camapi sirikushajta; supayqa paymanta llojsisqaña.

³¹Tiro jallp'amanta llojsispataj Jesús rerqa Sidonnejta, Decápolis llajtas chaupinta Galilea qochaman.

³²Chaymantaj uj lojt'u opa runata pusamorqanku; Jesusmantataj mayta mañakorqanku makinta payman churaykurinanta.

³³Jesustaj runa chaupimanta wajnejman chay runata pusarqa; ningrisninman dedosninta sat'iykuspataj, thoqayninwan qallunta llujchiykorqa.

³⁴Patata qhawarispataj, ayqhospa runaman nerqa: Efata! Kayqa niyta munan: Kicharikuy!

³⁵Chay kikimpacha runaj ningrisnin kicharikorqanku, qallumpis phaskarakorqa, ch'uwatataj parlarerqa.

³⁶Jesustaj paykunata kamacherqa ama pimampis willanankuta; ajinata kamachishajtimpis astawan willararqanku.

³⁷Chayta uyarejkunataj maytapuni t'ukorqanku, nerqankutaj: Tukuy imata allinta ruwan. Lojt'usta uyarichin, opastapis parlarichin, nispa.