Read Quechua Bolivia DC Bible SAN LUCAS 1 Bible Online

SAN LUCAS 1 - Quechua Bolivia DC Bible bible

SAN LUCAS 1

¹Ashkhasña munarqanku escribiyta, imaschus noqanchej ukhupi allin rejsisqas karqa chaykunamanta; ñaupajmantapacha rikojkuna willawasqanchejman jina, pikunachus Diospa palabranta predicarqanku.

³Noqamampis rijch'awarqa, kay tukuy imasta allinta entiendespa escribisunayqa, imaschus qallariymantapacha kasqanta, may respetasqa Teófilo; aswan allinta yachanaykipaj, imastachus yachachisorqanku chay cheqa kajta.

⁴

⁵Herodes Judeapi kamachishajtin, uj sacerdote karqa Zacarías sutiyoj, Abiaspa mit'anmanta; warmintaj Isabel sutiyoj, Aarompa ayllunmanta.

⁶Qhari warmi karqanku llimphu kausayniyoj runas Diospa ñaupaqempi; Señorpa nisqanman jina kausakuspa, ni pejpa ima ninan.

⁷Mana wawayoj karqanku, Isabel mana wachakoj kasqanrayku; iskayninkutaj machusña karqanku.

⁸Jinallapi, Zacarías mit'ampi Diosta sirvishajtin, usunkuman jina, sorteopi Zacariasman chayarqa, Señorman inciensota q'osñichina.

⁹

¹⁰Pay inciensota q'osñichinankamataj, runasqa jawapi Diosmanta mañakusharqanku.

¹¹Jinallapi, Zacariasman rikhurerqa Señorpa angelnin sayashaj, incienso altarpa pañannejpi.

¹²Angelta rikuspataj Zacariasqa, pawichikuspa mancharerqa.

¹³Chantá angeltaj payman nerqa: Ama mancharikuychu Zacarías. Mañakusqaykita Dios uyarinña, warmiyki Isabel wawayoj kanqa, paytataj Juanta sutichanki.

¹⁴Ancha kusiypuni qampaj kanqa, jinallataj wajkunapajpis wawayki nacikusqanmanta.

¹⁵Payqa jatun kanqa Señorpa ñaupaqempi. Manataj vinota, nitaj ima machachej ujyanasta ujyanqachu. Mamampa wijsanmantapacha Santo Espirituwan junt'a kanqa.

¹⁶Ashkha israelitasta kutirichenqa Señor Diosninkuman.

¹⁷Señorpa ñaupaqempi purenqa, profeta Eliaspa espiritunwan, atiywan ima; tatasta wawasninkuwan allinyachispa, mana kasukojkuna kasukuyta yachanankupaj. Ajinata, runasta allinta wakichenqa Señorta recibinankupaj.

¹⁸Zacariasqa angelta taporqa: Imaynatataj chantá kayta yachasaj? Noqaqa machuña kani, warmiypis payaña.

¹⁹Angeltaj kuticherqa: Noqa Gabriel kani, Diospa kamachimpi; pay kachamuwan willasunaypaj kay sumaj noticiasta.

²⁰Nisusqayta mana creesqaykiraykutaj opayanki, mana parlarinkichu wawayki nacikunankama. Ajinata kay tukuynin junt'akonqa maychus kasqanman jina.

²¹Chaykamataj runasqa jawapi Zacariasta maytapuni suyasharqanku, anchata templo ukhupi qhepakusqanrayku.

²²Llojsimuspataj Zacariasqa mana parlayta aterqachu; paykunataj, imachá payman rikhurin santuariopi, nisharqanku. Zacariastaj, señasllawanña parlasharqa opayasqanrayku.

²³Mit'an templopi junt'akojtintaj kutiporqa wasinman.

²⁴Qhepamantaj Isabel warmenqa wijsallikorqa. Phishqa killa junt'atataj mana wasinmanta llojserqachu, nispa: Señor ruwan kaytaqa, ama runa sajrata qhawanawampaj.

²⁵

²⁶Sojta killanmantaj, Dios kachamorqa ángel Gabrielta, Galileapi Nazaret llajtaman, manaraj qharita rejsej María sutiyojman; pichus casaranampaj parlapayasqa karqa, José sutiyoj, Rey Davidpa ayllunmanta kaj qhariwan.

²⁷

²⁸Maypichus María kasharqa chayman yaykuspataj, angelqa payta napaykorqa: Qampi Diospa khuyakuynin! Señor qanwan kashan. [Tukuy warmismanta aswan bendicisqa kanki.]

²⁹Angelpa nisqanta uyarispataj t'ukorqa, imatachus niyta munasqanta chay napaykusqan.

³⁰Chaymantataj angelqa nerqa: Ama mancharikuychu María. Qanqa Diospa khuyakuyninta tarinki.

³¹Kunanqa wijsayoj rikhurinki. Nacichikunki uj qhari wawata, Jesustataj sutichanki.

³²Payqa jatun kanqa, sutichasqataj kanqa patapi kajpa Churin; Señor Diostaj, tatan Davidpa reinonta payman qonqa.

³³Payqa wiñaypaj israelitasta kamachenqa, mana jayk'aj tukukuyniyoj reinompi.

³⁴Chaymantataj Mariaqa angelta taporqa: Chantá imaynataj kay kanqa? Noqaqa qharita mana rejsinichu.

³⁵Angeltaj kuticherqa: Santa Espíritu qanman jamonqa, Diospa atiynintaj llanthusonqa; nacej wawaqa ajllasqa sutichasqa kanqa Diospa Churin.

³⁶Jinallataj aylluykimanta Isabelpis, paya kashaspaña, qhari wawayoj kanqa, mana wawayoj nisqapis, sojta killa wijsayojña.

³⁷Diospajqa mana imapis mana atikojqa kanchu.

³⁸Chaypacha María nerqa: Noqaqa Señorpa kamachin kani. Diospa munaynin ruwasqa kachun noqapi nisqaykiman jina. Angeltaj ñaupaqenmanta riporqa.

³⁹Chaypachataj Mariaqa rerqa usqhayllata Judea jallp'api uj llajtaman.

⁴⁰Zacariaspa wasinman yaykuspataj, Isabelta napaykorqa.

⁴¹Maríaj napaykusqanta Isabel uyarejtintaj, wawaqa wijsan ukhupi kuyurerqa. Isabeltaj Santo Espirituwan junt'a karqa.

⁴²Qhaparispataj nerqa: Bendicisqa kanki warmis ukhupi, wijsaykipi kaj wawapis bendicisqallataj.

⁴³Ima niytataj kay munan, Señorniypa maman watukunawampajri?

⁴⁴Napaykuwasqaykita uyarisqaytawan, wawaqa wijsay ukhupi kusiywan kuyurin.

⁴⁵May kusiyniyoj kanki creesqaykirayku. Señorpa nisusqanqa junt'akonqapuni.

⁴⁶Mariataj nerqa: Almayqa jatunchan Señorta.

⁴⁷Espirituytaj mayta kusikorqa Salvawaj Diosniypi.

⁴⁸Diosqa, warmi kamachimpa wajcha kayninta qhawarqa. Chayrayku kunanmantapacha tukuy runaj miraynin noqata kusikuyniyoj kanki niwanqanku.

⁴⁹Tukuy Atiyniyoj Diosqa, jatun imasta noqapaj ruwarqa; sutenqa Santo.

⁵⁰Diospa khuyakuynenqa miraymanta mirayman, payta manchachikojkunapaj.

⁵¹Makinwantaj atiyninta rikucherqa; ch'eqeracherqataj tukuy jatunchakojkunata sonqonkupi yuyayninkupi ima.

⁵²Atiyniyojkunata uraykucherqa tronosninkumanta; llamp'u sonqoyoj runastataj oqharerqa.

⁵³Yarqhasqa runasta allin imaswan atipacherqa. Qhapaj runastataj mana imayojta kachaporqa.

⁵⁴Diosqa, khuyakuyninmanta yuyarikuspa, kamachin Israelta yanaparqa; ñaupa tatasninchejman wiñaypaj parlasqanman jina, Abrahamman, tukuy paypa mirayninman ima.

⁵⁵

⁵⁶Mariataj, kinsa killata jina, Isabelwan kakorqa. Chaymantataj wasinman kutiporqa.

⁵⁷Isabelqa nacichikunan junt'akojtin, qhari wawata nacichikorqa.

⁵⁸Kausaqesnin, ayllusnin ima, Señor sumajta Isabelta khuyasqanta uyarispa, paywan kusikorqanku.

⁵⁹Pusaj p'unchayninmantaj, jamorqanku wawata circuncidaj, suticharqankutaj tatan Zacariaspa sutinwan.

⁶⁰Mamantaj nerqa: Mana. Wawaj sutenqa Juan kanqa.

⁶¹Paymantaj nerqanku: Mana pipis aylluykipi chay sutiyojqa kanchu.

⁶²Tatantataj señaswan taporqanku ima sutiwanchus sutichayta munasqanta.

⁶³Zacariastaj, tablillata mañakuspa, chaypi escriberqa: Juan sutenqa, nispa. Tukuyninkutaj t'ukorqanku.

⁶⁴Chay kikimpachataj Zacariaspa simin kicharikorqa, qallumpis phaskakaporqa; parlaspataj Diosta yupaycharqa.

⁶⁵Tukuy chay qayllapi tiyakojkuna mancharikorqanku. Runastaj tukuy Judea lomaspi, kay tukuy imasta willararqanku.

⁶⁶Tukuy uyarisqankutataj, sonqonkupi waqaychaspa, ninakorqanku: Chantá imapunitaj kanqa kay wawari? Señorpa atiynin paywan karqa.

⁶⁷Tatan Zacariastaj Santo Espirituwan junt'asqa karqa. Sut'incharqataj kay jinata: Yupaychasqa kachun Israelpa Señor Diosnenqa, imaraykuchus ayllunta watukorqa, juchasninmantataj salvarqa.

⁶⁸

⁶⁹Noqanchejpaj atiyniyoj Salvadorta oqharerqa, kamachin Davidpa ayllunmanta; imaynatachus ñaupajmanta Dios parlasqanman jina, ajllasqa profetasnimpa siminnejta; enemigosninchejmanta salvanawanchejpaj, tukuy chejniwajninchejpa makisninmantawan.

⁷⁰

⁷¹

⁷²Dios khuyarqa, tatasninchejta yuyarikuspa, sumaj tratonta paykunawan ruwasqanmanta.

⁷³Abraham tatanchejmantaj juraspa nerqa qonawanchejta; enemigosninchejmanta salvasqas kaspa, mana manchachikuspa, Diospa munayninta ruwananchejpaj; mana juchayoj, cheqan kausaypi, paypa ñaupaqempi kausananchejkama.

⁷⁴

⁷⁵

⁷⁶Qanri wawáy, jatun Diospa profetan sutichasqa kanki. Señorpa ñaupaqenta rinki, purinasninta wakichispa.

⁷⁷Ayllunmantaj salvacionta rejsichinki, juchasninku pampachasqas kanankupaj.

⁷⁸Diosninchejqa, khuyakoj sonqonrayku, patamantapacha k'anchamuspa watukuwarqanchej.

⁷⁹Jamorqa laqhapi tiyakojkunata k'anchanampaj, wañuy llanthupi kajkunatapis; purinasninchejta cheqanchaspa, sonqo tiyakuyta qonawanchejpaj.

⁸⁰Wawaqa wiñasharqa, kallpachakusharqataj espiritupi. Payqa ch'innejpi tiyakorqa Israel aylluman rikuchikunankama.