Read Quechua Bolivia DC Bible SAN LUCAS 10 Bible Online

SAN LUCAS 10 - Quechua Bolivia DC Bible bible

SAN LUCAS 10

¹Chaymanta qhepamantaj, Señorqa ajllallarqataj qanchis chunka [iskayniyoj] runasta. Paykunatataj iskaymanta iskay kacharqa, paypa ñaupaqenta rinankupaj tukuy llajtasman, ranchosman ima, maykunamanchus rinan karqa chaykunaman.

²Jesustaj nerqa: Cheqamanta cosechanaqa ashkha, oqharejkunataj pisi. Mañakuychej Señormanta astawan oqharejkunata cosechanman kachamunampaj.

³Riychej ari, noqa kachashaykichej corderosta jina atojkunaj chaupinman.

⁴Ama apaychejchu qolqe churanata, wayaqata, nitaj ujut'astapis. Ama pitapis napaykuychejchu ñanta rishaspaqa.

⁵Mayqen wasiman yaykuspapis, ñaupajta napaykuychej: Sonqo tiyasqa kay kachun kay wasipi, nispa.

⁶Chaypitajchus sonqo tiyasqa runa kanman chayqa, napaykusqaykichej paypi samakonqa. Mana chayrí, qankunaman kutimponqa.

⁷Chay wasipi qhepakuychej mikhuspa, ujyaspa imatachus qosusqaykichejta. Llank'aj runaqa pagoyoj kanan tiyan. Amataj wasimanta wasi puriychejchu.

⁸May llajtallamampis yaykojtiykichej, wajyarisunkichejmantaj chayqa, mikhuychej imatachus jaywarisunkichej chayta.

⁹Chaypi onqosqas kajkunata thañichiychej, niychejtaj: Qankunaman Diospa reinon qayllamunña, nispa.

¹⁰Sichus may llajtaman yaykojtiykichej mana wajyarisunkichejmanchu chayqa, callesman llojsispa niychej: Llajtaykichejmanta chakisniykuman jallp'a k'askajtapis contraykichejpi thalarakuyku. Chantapis yachaychej, qankunaman Diospa reinon qayllamusunkichejña.

¹²Chaynejta niykichej: Jaqay juicio p'unchaypeqa, Sodoma llajtaraj aswan pisita ñak'arenqa chay llajtamanta nisqaqa.

¹³Ay, qanmanta Corazín llajta! Ay, qanmantapis Betsaida llajta! Sichus Tiropi, Sidompi ima, milagros ruwakunman karqa qankuna ukhupi jina chayqa, maypachaña chaypi tiyakojkunaqa Diosman kutirikunkuman karqa, ushpharara qhashqa p'achata churakuspa.

¹⁴Chaynejta niykichej: Juicio p'unchaypeqa, aswan pisi ñak'ariy kanqa Tiropaj, Sidompaj ima, qankunamanta nisqaqa.

¹⁵Qanrí, Capernaum llajta! Cielokama oqharisqachu kayta munanki? Qanqa infiernokama uraykunki.

¹⁶Pichus qankunata uyarejqa, noqata uyariwan; pitajchus qankunata qhesachajqa, noqata qhesachawan; noqata qhesachawajrí, kachamuwajniyta qhesachan.

¹⁷Qanchis chunka iskayniyoj kachasqa kusisqas kutimorqanku, nerqankutaj: Señor, supaykunapis kasuwayku sutiykipi.

¹⁸Paytaj nerqa: Noqaqa supayta rikorqani, lliuj lliuj jina cielomanta urmamojta.

¹⁹Kunanqa atiyta qoykichej, catarista, atoj atojkunatapis sarunaykichejpaj; enemigoj tukuy kallpantapis atipanaykichejpaj; manataj imapis imanasonqachejchu.

²⁰Chaywampis, ama kusikuychejchu supaykuna kasusojtiykichej, astawanqa kusikuychej janaj pachapi sutiykichej escribisqa kasqanmanta.

²¹Chay kikimpachataj, Jesusqa Santo Espiritunejta may kusisqa kaspa nerqa: Tatáy, janaj pachajta kay pachajtawan Señornin, yupaychayki kay imasta pakasqaykimanta, yachayniyojkunamanta yuyayniyojkunamantawan; wawasmantaj kay imasmanta willasqaykimanta. Arí Tatáy, ajinata qanqa munarqanki.

²²Tukuy imata Tatay qowarqa. Mana pipis yachanchu pichus Churi kasqanta. Chaytaqa Dios Tatalla yachan. Nitaj pipis yachanchu pichus Tata kasqanta, manachayqa Churilla yachan; pimantajchus Churi rejsichiyta munan chaylla.

²³Yachachisqasninman kutirispataj, wajnejpi sapankupi nerqa: Kusikuyniyoj kanku imastachus rikusqaykichejta rikojkunaqa.

²⁴Ashkha profetas, reyes ima rikuyta munarqanku qankunaj rikusqaykichejta, manataj rikorqankuchu; uyarisqaykichejtapis uyariyta munarqanku, nillataj uyarerqankuchu.

²⁵Chantá uj runa leymanta yachachej, Jesusman qayllaykuspa pantachiyta munaspataj, taporqa: Maestro, imata ruwaspataj wiñay kausayniyoj kasajri?, nispa.

²⁶Paytaj nerqa: Imataj leypi escribisqa kashan? Imatataj leenki?

²⁷Paytaj kuticherqa: Señor Diosniykita munakunki tukuy sonqoykiwan, tukuy almaykiwan, tukuy kallpaykiwan, tukuy yuyayniykiwan ima; runa masiykitataj qan kikiykita jina munakunki.

²⁸Jesustaj nerqa: Allinta kutichinki, ajinata ruway, kausankitaj, nispa.

²⁹Paytaj allinman rijch'ayta munaspa kuticherqa: Pitaj runa masiyri?, nispa.

³⁰Jesustaj nerqa: Uj runa, Jerusalenmanta Jericoman uraykushaspa, suwaspa makinman urmarqa. Tukuy imanta, p'achantawan qhechuspataj, suwasqa sumaj maqasqata, parte wañusqatataj saqerparerqanku.

³¹Chantá uj sacerdote chay ñannejta uraykushallarqataj, rikuspataj pasapullarqa.

³²Jinallatataj, uj levita chay qayllanta rej jina, rikuspa pasallarqataj.

³³Chantá uj samaritanoñataj chaynejta rishaspa, qayllaykorqa, rikuspataj mayta khuyarqa.

³⁴Nanasqasninta jampiykorqa aceitewan, vinowan ima. Chantá, animalninman wicharichispa tamboman pusarqa, chaypitaj allinta qhawacherqa.

³⁵Q'ayantintaj samaritanoqa, manaraj ripushaspa iskay denario qolqeta orqhokuspa tamboyojman pagarqa: Qhawaripuway kay onqosqata, tukuy gastasqaykitataj kutimuspa qopusqayki, nispa.

³⁶Kunanqa niway: Kay kinsamanta mayqentaj rijch'asunki runa masin kasqanta, chay suwaswan ch'allpachikojpatari?

³⁷Paytaj nerqa: Mayqenchus khuyakorqa, chay. Jesustaj nerqa: Riy, chay kikinta qampis ruwamuy, nispa.

³⁸Ñanta rishaspallapuni, Jesús chayarqa uj ranchoman. Chaypitaj uj warmi Marta sutiyoj wasinman wajyakorqa.

³⁹Martajtataj uj ñañan karqa María sutiyoj; paytaj Jesuspa ñaupaqenman tiyaykuspa yachachisqanta uyarej.

⁴⁰Martaqa ashkha ruwanasninwan musphasharqa, chaynejta Jesusman qayllaykuspa nerqa: Señor, manachu rikunki ñañay mana ruwaysiwasqanta? Niy ari yanapanawanta.

⁴¹Jesustaj kuticherqa: Marta, Marta, ancha uma muyusqa kashanki; musphashankitaj chay chhika ruwanaswan.

⁴²Ujllamin aswan walejqa. Mariaqa ajllakun allin kajta. Chaytaqa mana pipis qhechonqachu.