Read Quechua Bolivia DC Bible SAN LUCAS 11 Bible Online

SAN LUCAS 11 - Quechua Bolivia DC Bible bible

SAN LUCAS 11

¹Uj kuti, ujnejpi Jesúsqa, Diosmanta mañakusharqa, tukojtintaj ujnin yachachisqan nerqa: Señor, yachachiwayku Diosmanta mañakuyta, imaynatachus Juampis yachachisqasninman yachacherqa, ajinata.

²Jesustaj paykunaman nerqa: Diosmanta mañakuspaqa niychej: [Janaj pachapi kashaj] Tatayku, sutiyki yupaychasqa kachun. Reinoyki jamuchun. [Munayniyki ruwasqa kachun, imaynatachus janaj pachapi, ajinallatataj kay pachapipis.]

³Sapa día t'antaykuta kunan kopuwayku.

⁴Juchasniykuta pampachapuwayku, imaynatachus noqaykupis juchallikuwajniykuta perdonayku, ajinata. Amataj saqeychu supay, juchaman urmachinawaykuta; [astawanqa jark'awayku sajramanta.]

⁵Nillarqataj: Pitaj qankunamanta, uj kausaqen kajtin, rinman chaupi tutata, nej: Kausaqéy, mañariway kinsa t'antata; uj kausaqey karumanta chayamun, nitaj jaywarinaypaj ni ima kanchu.

⁶

⁷Chay kausaqentaj wasi ukhumanta nimunman: Ama umayta nanachiwaychu, punku wisq'asqaña, wawasniypis noqawan camapiña kanku, mana jatarimuymanchu qosunaypaj.

⁸Niykichej, amapis jatarimuchunchu qonampaj, kausaqen kasqanrayku; chaywampis kasunan tiyan, anchata mañakusqanrayku. Jatarimuspataj qonqa imatachus mañasqanta.

⁹Chaynejta niykichej: Mañakuychej, qosonqachejtaj; mask'aychej, tarinkichejtaj; punkuta takaychej, kicharimusonqachejtaj.

¹⁰Pichus mañakojqa jap'in, mask'aj tarin; punkuta takajtapis kicharinku.

¹¹Mayqen tatataj kanman qankunamanta, wawan [t'antata mañajtin rumita qojri?] challwata mañajtin katarita qojri?

¹²Chayrí, runtuta mañajtimpis, atoj atojtachu qonman?

¹³Chayrayku, qankunachus sajra runas kashaspa, allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Santo Espirituta qonqa mañakojkunaman.

¹⁴Jesús, opayachej supayta uj runamanta qharqorqa. Supay llojsejtinkamataj, opaqa parlayta qallarerqa, runakunataj t'ukorqanku.

¹⁵Paykunamantataj wakin nerqanku: Kay runaqa supaykunaj kurajnin, Beelzebúj atiyninwan supaykunata qharqon, nispa.

¹⁶Wajkunataj, Jesusta pantachiyta munaspa uj señalta ruwananta munarqanku.

¹⁷Yuyasqankuta yachaspa nerqa: Ima reinollapis, t'aqanasqa kaspa, ujkuna ujkunawan maqanakuspaqa tukuchinakunku. Ajinallatataj uj t'aqasqa waseqa urmallantaj.

¹⁸Ajinallatataj, Satanaschus pay kikillantaj t'aqakunman chayqa, imaynatataj reinon sayallanqapuniri? Kayta niykichej, Beelzebunejta supaykunata qharqosqayta niwasqaykichejrayku.

¹⁹Sichus noqa Beelzebunejta supaykunata qharqoni chayqa, wawasnikichejrí, pinejtataj qharqonku? Chayrayku, paykuna juecesniykichej kanqanku.

²⁰Sichus diospa atiyninwan, noqa supaykunata qharqoni chayqa, cheqamanta niykichej, Diospa reinonqa chayamunña qankunaman.

²¹Kallpasapa runa, sumaj armasqa wasinta qhawajtenqa, tukuy imasnin sumaj waqaychasqa kakun.

²²Wajchus, paymanta aswan kallpayoj jamuspa atipanman chayqa, qhechun tukuy maqanasninta, mayqempichus atienekusqanta; rak'intaj chay qhechusqanta.

²³Pichus mana noqawan kajqa, contraypi; pitajchus noqawan mana pallajpis, t'akan.

²⁴Ch'ichi supay, runamanta llojsejqa ch'aki jallp'asnejta purin samakunata mask'aspa; mana tarispataj nin: Kutipusaj, maymantachus llojsimorqani chay wasiyman.

²⁵Chayaspataj payqa pichasqata tarin, k'achanchasqatataj.

²⁶Chantaqa, llojsispa qanchis supaykunatawan pusaykun, paymanta aswan ch'ichista; yaykuspataj, chaypi tiyanku. Chay runataj, ñaupaj kasqanmanta nisqaqa, aswan millayman tukun.

²⁷Chayta Jesús ninankamataj, uj warmi, runakuna chaupipi qhaparispa nerqa: Kusikuyniyoj kanan tiyan pi warmichus wijsampi apasorqa, pejpa ñuñuntachus ñuñorqanki, chay.

²⁸Jesustaj kuticherqa: Diospa palabranta uyarispa kasojkunarajmá aswan kusikuyniyojqa kanqanku.

²⁹Runas k'iskikamojtintaj, parlayta qallarerqa nispa: Kunan tiempo runaqa sajra, chayrayku señalta mañan; manataj waj señalta paykunaqa rikonqankuchu, manachayqa Jonaspa señalnillanta.

³⁰Imaynatachus Jonás señal karqa Nínive runasman, ajinallataj Runaj Churimpis kanqa, kay tiempo runasman.

³¹Uranejmanta reina, juicio p'unchaypi rikhurimonqa kay tiempo runasman, paykunataj juchachanqa; imaraykuchus pay jamorqa karu jallp'asmanta, Salomompa yachayninta uyarej. Kaypitaj kashan Salomonmanta aswan yachayniyoj.

³²Ninivemanta runas jatarimonqanku juicio p'unchaypi, kunan tiempo runaswan, juchachanqankutaj; imaraykuchus Jonás predicajtinkama, Diosman kutirikorqanku; kaypitaj kashan Jonasmanta aswan kuraj.

³³Mana pipis pakanchu, k'ancha jap'ichisqata, nitaj wich'iwan k'umpuykunchu; manachayqa pataman churan, wasiman tukuy yaykojkuna k'anchayta rikunankupaj.

³⁴Ñaweqata cuerpota k'anchaykun. Ñawiyki allin kajtenqa, tukuy cuerpoykipis k'anchayniyoj kanqa; ñawiyki mana allin kajtinrí, tukuy cuerpoyki laqhapi kanqa.

³⁵Pajtataj qampi kaj k'anchay, laqhaman tukunman.

³⁶Chayrayku, tukuy cuerpoykichus k'anchaywan junt'a kashan chayqa, ni ima laqhayaj kanqachu, tukuynin cuerpoykitaj k'anchayniyoj kanqa, imaynatachus uj k'anchaypa lliphipiynin k'anchaykusunki ajinata.

³⁷Jesús parlayta tukojtintaj, uj fariseo wajyarqa, wasimpi paywan mikhunampaj. Wasinman yaykuspataj, mikhunampaj tiyaykorqa.

³⁸Fariseotaj t'ukorqa rikuspa, Jesús ñaupajta makisninta mana mayllakusqanmanta mikhunampaj.

³⁹Señortaj nerqa: Qankuna fariseosqa, vasojta, chuwajta ima jawallanta mayllankichej; ukhuykichejtaj suwanamanta, sajrata ruwanamantawan junt'a kashan.

⁴⁰Wampus, manachu jawanta ruwajqa, ukhuntapis ruwallarqataj?

⁴¹Kapuyniykichejmanta wajchasman qoychej. Tukuy imaykichejtaj llimphu kanqa.

⁴²Ay, qankunamanta fariseos! Qankunaqa diezmota qonkichej mentamanta, rudamanta, tukuy q'omerkunamantawan; Diospa cheqanchayninta, munakuynintawan qonqapunkichej. Kayta ruwana karqa, mana jaqayta saqespa.

⁴³Ay, qankunamanta fariseos! Qankunaqa sinagogaspi ñaupajpipuni tiyayta munankichej, ajinallatataj callepipis napaykuchikuyta munankichej.

⁴⁴Ay, qankunamanta leymanta yachachejkuna, fariseos puraj uyas! Qankunaqa mana rikukoj sepulturas jina kankichej; chay sepulturas patatataj runas purinku mana yachaspalla.

⁴⁵Leymanta yachachejkunamanta ujnintaj, kutichispa nerqa: Maestro, kayta nispaqa, p'enqaypi rikhurichiwayku noqaykutapis.

⁴⁶Paytaj kuticherqa: Ay, qankunamantapis leymanta yachachejkuna! Mana apay atina q'epista runaswan q'epichinkichej, qankunataj mana dedollaykichejwampis yanapaykurinkichejchu.

⁴⁷Ay, qankunamanta, profetaspaj sepulturasta ruwajkuna; tatasniykichejtaj paykunata wañucherqanku!

⁴⁸Qankunaqa, tatasniykichejpa ruwasqanta yachaspapis, walej ninkichej; paykunaqa cheqamanta profetasta wañucherqanku. qankunatajrí, sepulturasta paykunapaj ruwankichej.

⁴⁹Chaynejta Diospa yachaynenqa nerqa: Noqa kachamusqaykichej profetasta, apostolesta ima; paykunatataj wakinta wañuchenqanku, wakintataj ñak'arichenqanku.

⁵⁰Kay runaj mirayninmanta tukuy profetaspa yawarnin mañasqa kanqa, mayqenkunachus mundoj qallariyninmantapacha jich'arqanku, chayta; Abelpa yawarninmantapacha, Zacariaspa yawarninkama; pitachus templopi wañucherqanku altarnejpi. Arí niykichej, kay runaj mirayninmanta chay yawar mañasqa kanqa.

⁵¹

⁵²Ay, qankunamanta leymanta yachachejkuna! Yachaypa llaventa jap'ikapojkuna. Qankuna mana yaykunkichejchu, yakojtapis jark'ankichej.

⁵³Jesús kay imasta nejtintaj, leymanta yachachejkuna, fariseoswan phiñarikuspa, tukuy imamanta tapuraspataj parlananta munarqanku, imaymanamanta jap'iyta munaspa, ima nisqallampipis ch'ataykunankupaj.